॥ Padmanabha Shatakam Kannada Lyrics ॥
॥ ಶ್ರೀಪದ್ಮನಾಭಶತಕಮ್ ॥
ಮಹಾರಾಜಾ ಸ್ವಾತಿ ತಿರುನಾಳ್ ವಿರಚಿತಮ್
॥ ಶ್ರೀ ಗಣೇಶಾಯ ನಮಃ ॥
॥ ಪ್ರಥಮಂ ದಶಕಮ್ ॥
ಯಾ ತೇ ಪಾದಸರೋಜಧೂಲಿರನಿಶಂ ಬ್ರಹ್ಮಾದಿಭಿರ್ನಿಸ್ಪೃಹೈಃ
ಭಕ್ತ್ಯಾ ಸನ್ನತಕನ್ಧರೈಃ ಸಕುತುಕಂ ಸನ್ಧಾರ್ಯಮಾಣಾ ಹರೇ ।
ಯಾ ವಿಶ್ವಂ ಪ್ರಪುನಾತಿ ಜಾಲಮಚಿರಾತ್ ಸಂಶೋಷಯತ್ಯಂಹಸಾಂ
ಸಾ ಮಾಂ ಹೀನಗುಣಂ ಪುನಾತು ನಿತರಾಂ ಶ್ರೀಪದ್ಮನಾಭಾನ್ವಹಮ್ ॥ 1 ॥
ಸತ್ತ್ವೈಕಪ್ರವಣಾಶಯಾ ಮುನಿವರಾ ವೇದೈಃ ಸ್ತುವನ್ತಃ ಪರೈಃ
ತ್ವನ್ಮಾಹಾತ್ಮ್ಯಪಯೋನಿಧೇರಿಹಪರಂ ನಾದ್ಯಾಪಿ ಪಾರಂಗತಾಃ ।
ಏವಂ ಸತ್ಯಹಮಲ್ಪಬುದ್ಧಿರವಶಃ ಸ್ತೋತುಂ ಕಥಂ ಶಕ್ನುಯಾಂ
ತ್ವತ್ಕಾರುಣ್ಯಮೃತೇ ಹರೇ! ತರತಿ ಕಃ ಪೋತಂ ವಿನಾ ಸಾಗರಮ್ ॥ 2 ॥
ತಸ್ಮಾಚ್ಛಿನ್ಧಿ ಮದೀಯಮೋಹಮಖಿಲಂ ಸಂಸಾರಬನ್ಧಾವಹಂ
ಭಕ್ತಿಂ ತ್ವತ್ಪದಯೋರ್ದಿಶ ಸ್ಥಿರತರಾಂ ಸರ್ವಾಪದುನ್ಮೀಲಿನೀಮ್ ।
ವಾಣೀಂ ತ್ವತ್ಪದವರ್ಣನೇ ಪಟುತಮಾಂ ವಿದ್ವಜ್ಜನಾಹ್ಲಾದಿನೀಂ
ದೇಹಿ ತ್ವತ್ಪದಸೇವಕಾಯ ನನು ಮೇ ಕಾರುಣ್ಯವಾರಾಂನಿಧೇ ॥ 3 ॥
ಯೇನೇದಂ ಭುವನಂ ತತಂ ಸ್ವಬಲತೋ ಯಸ್ಯಾಜ್ಞಯೋದೇತ್ಯಹರ್-
ನಾಥೋ ವಾತ್ಯನಿಲೋ ದಹತ್ಯಪಿ ಶಿಖಿಃ ಸರ್ವೇಽಪಿ ಯನ್ನಿರ್ಮಿತಾಃ ।
ಯಶ್ಚೇದಂ ಸಕಲಂ ಜಗತ್ಸ್ವಜಠರೇ ಧತ್ತೇ ಚ ಕಲ್ಪಾವಧೌ
ತತ್ತಾದೃಗ್ವಿಭವೇ ತ್ವಯಿ ಪ್ರಮುದಿತೇ ಕಿಂ ವಾ ದುರಾಪಂ ನೃಣಾಮ್ ॥ 4 ॥
ಭಕ್ತಾನಾಮಖಿಲೇಪ್ಸಿತಾರ್ಥಘಟನೇ ಬದ್ಧೋದ್ಯಮಸ್ತ್ವಂ ಹರೇ!
ನಿತ್ಯಂ ಖಲ್ವಿತಿ ಬೋದ್ಧ್ಯಮಸ್ತಿ ಬಹುಶೋ ದೇವ! ಪ್ರಮಾಣಂ ಮಮ ।
ನೋ ಚೇದ್ವ್ಯಾಸವಚಸ್ತವೈವ ವಚನಂ ವೇದೋಪಗೀತಂ ವಚೋ
ಹಾ ರಥ್ಯಾಜನವಾದವದ್ಬತ ಭವೇನ್ಮಿಥ್ಯಾ ರಮಾವಲ್ಲಭ! ॥ 5 ॥
ಇನ್ದ್ರದ್ಯುಮ್ನನೃಪಃ ಕರೀನ್ದ್ರಜನನಂ ಪ್ರಾಪ್ತೋಽಥ ಶಾಪೇನ ವೈ
ನಕ್ರಾಕ್ರಾನ್ತಪದೋ ವಿಮೋಚನಪಟುರ್ನಾಭೂತ್ಸಹಸ್ರಂ ಸಮಾಃ ।
ಭೂಯಸ್ತ್ವಾಮಯಮರ್ಚಯನ್ ಸರಸಿಜೈಃ ಶುಂಡೋದ್ಧೃತೈಃ ಸಾದರಂ
ಸಾರೂಪ್ಯಂ ಸಮವಾಪ ದೇವ ಭವತೋ ನಕ್ರೋಽಪಿ ಗನ್ಧರ್ವತಾಮ್ ॥ 6 ॥
ಪಾಪಃ ಕಶ್ಚಿದಜಾಮಿಲಾಖ್ಯಧರಣೀದೇವೋಽವಸತ್ಸನ್ತತಂ
ಸ್ವೈರಿಣ್ಯಾ ಸಹ ಕಾಮಮೋಹಿತಮತಿಸ್ತ್ವಾಂ ವಿಸ್ಮರನ್ ಮುಕ್ತಿದಮ್ ।
ಅನ್ತೇ ಚಾಹ್ವಯದೀಶ! ಭೀತಹೃದಯೋ ನಾರಾಯಣೇತ್ಯಾತ್ಮಜಂ
ನೀತಃ ಸೋಽಪಿ ಭವದ್ಭಟೈಸ್ತವಪದಂ ಸಂರುಧ್ಯ ಯಾಮ್ಯಾನ್ ಭಟಾನ್ ॥ 7 ॥
ಪಾಂಚಾಲೀಂ ನೃಪಸನ್ನಿಧೌ ಖಲಮತಿರ್ದುಶ್ಶಾಸನಃ ಪುಷ್ಪಿಣೀಂ
ಆಕರ್ಷಶ್ಚಿಕುರೇಣ ದೀನವದನಾಂ ವಾಸಃ ಸಮಾಕ್ಷಿಪ್ತವಾನ್ ।
ಯಾವತ್ಸಾ ಭುವನೈಕಬನ್ಧುಮವಶಾ ಸಸ್ಮಾರ ಲಜ್ಜಾಕುಲಾ
ಕ್ರೋಶನ್ತೀ ವ್ಯತನೋಃ ಪಟೌಘಮಮಲಂ ತಸ್ಯಾಸ್ತ್ವನನ್ತಂ ಹರೇ ! ॥ 8 ॥
ಯಾಮಾರ್ಧೇನ ತು ಪಿಂಗಲಾ ತವ ಪದಂ ಪ್ರಾಪ್ತಾ ಹಿ ವಾರಾಂಗನಾ
ಬಾಲಃ ಪಂಚವಯೋಯುತೋ ಧ್ರುವಪದಂ ಚೌತ್ತಾನಪಾದಿರ್ಗತಃ ।
ಯಾತಶ್ಚಾಪಿ ಮೃಕಂಡುಮೌನಿತನಯಃ ಶೌರೇ! ಚಿರಂ ಜೀವಿತಂ
ನಾಹಂ ವಕ್ತುಮಿಹ ಕ್ಷಮಸ್ತವ ಕೃಪಾಲಭ್ಯಂ ಶುಭಂ ಪ್ರಾಣಿನಾಮ್ ॥ 9 ॥
ಏವಂ ಭಕ್ತಜನೌಘಕಲ್ಪಕತರುಂ ತಂ ತ್ವಾಂ ಭಜನ್ತಃ ಕ್ಷಣಂ
ಪಾಪಿಷ್ಠಾ ಅಪಿ ಮುಕ್ತಿಮಾರ್ಗಮಮಲಂ ಕೇ ಕೇ ನ ಯಾತಾ ವಿಭೋ! ।
ಸ ತ್ವಂ ಮಾಮಪಿ ತಾವಕೀನಚರಣೇ ಭಕ್ತಂ ವಿಧಾಯಾನತಂ
ಸ್ಯಾನನ್ದೂರಪುರೇಶ! ಪಾಲಯ ಮುದಾ ತಾಪಾನ್ಮಮಾಪಾಕುರು ॥ 10 ॥
॥ ದ್ವಿತೀಯಂ ದಶಕಮ್ ॥
ಪಿಬನ್ತಿ ಯೇ ತ್ವಚ್ಚರಿತಾಮೃತೌಘಂ
ಸ್ಮರನ್ತಿ ರೂಪಂ ತವ ವಿಶ್ವರಮ್ಯಮ್ ।
ಹರನ್ತಿ ಕಾಲಂ ಚ ಸಹ ತ್ವದೀಯೈಃ
ಮನ್ಯೇಽತ್ರ ತಾನ್ ಮಾಧವ ಧನ್ಯಧನ್ಯಾನ್ ॥ 1 ॥
ಸದಾ ಪ್ರಸಕ್ತಾಂ ವಿಷಯೇಷ್ವಶಾನ್ತಾಂ
ಮತಿಂ ಮದೀಯಾಂ ಜಗದೇಕಬನ್ಧೋ! ।
ತವೈವ ಕಾರುಣ್ಯವಶಾದಿದಾನೀಂ
ಸನ್ಮಾರ್ಗಗಾಂ ಪ್ರೇರಯ ವಾಸುದೇವ! ॥ 2 ॥
ದೃಶೌ ಭವನ್ಮೂರ್ತಿವಿಲೋಕಲೋಲೇ
ಶ್ರುತೀ ಚ ತೇ ಚಾರುಕಥಾಪ್ರಸಕ್ತೇ ।
ಕರೌ ಚ ತೇ ಪೂಜನಬದ್ಧತೃಷ್ಣೌ
ವಿಧೇಹಿ ನಿತ್ಯಂ ಮಮ ಪಂಕಜಾಕ್ಷ ! ॥ 3 ॥
ನೃಣಾಂ ಭವತ್ಪಾದನಿಷೇವಣಂ ತು
ಮಹೌಷಧಂ ಸಂಸೃತಿರೋಗಹಾರೀ ।
ತದೇವ ಮೇ ಪಂಕಜನಾಭ ಭೂಯಾತ್
ತ್ವನ್ಮಾಯಯಾ ಮೋಹಿತಮಾನಸಸ್ಯ ॥ 4 ॥
ಯದೀಹ ಭಕ್ತಿಸ್ತವಪಾದಪದ್ಮೇ
ಸ್ಥಿರಾ ಜನಾನಾಮಖಿಲಾರ್ತಿಹನ್ತ್ರೀ ।
ತದಾ ಭವೇನ್ಮುಕ್ತಿರಹೋ ಕರಸ್ಥಾ
ಧರ್ಮಾರ್ಥಕಾಮಾಃ ಕಿಮು ವರ್ಣನೀಯಾಃ ॥ 5 ॥
ವೇದೋದಿತಾಭಿರ್ವ್ರತಸತ್ಕ್ರಿಯಾಭಿರ್-
ನಶ್ಯತ್ಯಘೌಘೋ ನ ಹಿ ವಾಸನಾ ತು ।
ತ್ವತ್ಪಾದಸೇವಾ ಹರತಿ ದ್ವಯಂ ಯತ್
ತಸ್ಮಾತ್ಸ್ಥಿರಾ ಸೈವ ಮಮಾಶು ಭೂಯಾತ್ ॥ 6 ॥
ತ್ವದೀಯನಾಮಸ್ಮೃತಿರಪ್ಯಕಸ್ಮಾದ್
ಧುನೋತಿ ಪಾಪೌಘಮಸಂಶಯಂ ತತ್ ।
ಯದ್ವದ್ಗದಾನೌಷಧಮಾಶು ಹನ್ತಿ
ಯಥಾ ಕೃಶಾನುರ್ಭುವಿ ದಾರುಕೂಟಮ್ ॥ 7 ॥
ಯದ್ಯತ್ಸ್ಮರನ್ ಪ್ರೋಜ್ಝತಿ ದೇಹಮೇತತ್
ಪ್ರಯಾಣಕಾಲೇ ವಿವಶೋಽತ್ರ ದೇಹೀ ।
ತತ್ತತ್ಕಿಲಾಪ್ನೋತಿ ಯದನ್ಯಭಾವೇ
ತಸ್ಮಾತ್ತವೈವ ಸ್ಮೃತಿರಸ್ತು ನಿತ್ಯಮ್ ॥ 8 ॥
ಅನೇಕಧರ್ಮಾನ್ ಪ್ರಚರನ್ಮನುಷ್ಯಃ
ನಾಕೇ ನು ಭುಂಕ್ತೇ ಸುಖಮವ್ಯಲೀಕಮ್ ।
ತಸ್ಯಾವಧೌ ಸಮ್ಪತತೀಹಭೂಮೌ
ತ್ವತ್ಸೇವಕೋ ಜಾತು ನ ವಿಚ್ಯುತಃ ಸ್ಯಾತ್ ॥ 9 ॥
ತಸ್ಮಾತ್ಸಮಸ್ತಾರ್ತಿಹರಂ ಜನಾನಾಂ
ಸ್ವಪಾದಭಾಜಾಂ ಶ್ರುತಿಸಾರಮೃಗ್ಯಮ್ ।
ತವಾದ್ಯ ರೂಪಂ ಪರಿಪೂರ್ಣಸತ್ವಂ
ರಮಾಮನೋಹಾರಿ ವಿಭಾತು ಚಿತ್ತೇ ॥ 10 ॥
॥ ತೃತೀಯಂ ದಶಕಮ್ ॥
ದಿನಮನುಪದಯುಗ್ಮಂ ಭಾವಯೇಯಂ ಮುರಾರೇ
ಕುಲಿಶಶಫರಮುಖ್ಯೈಶ್ಚಿಹ್ನಿತೇ ಚಾರು ಚಿಹ್ನೈಃ ।
ನಖಮಣಿವಿಧುದೀಪ್ತ್ಯಾ ಧ್ವಸ್ತಯೋಗೀನ್ದ್ರಚೇತೋ –
ಗತತಿಮಿರಸಮೂಹಂ ಪಾಟಲಾಮ್ಭೋಜಶೋಭಮ್ ॥ 1 ॥
ಯದುದಿತಜಲಧಾರಾ ಪಾವನೀ ಜಹ್ನುಕನ್ಯಾ
ಪುರಭಿದಪಿ ಮಹಾತ್ಮಾ ಯಾಂ ಬಿಭರ್ತಿ ಸ್ವಮೂರ್ಧ್ನಾ ।
ಭುಜಗಶಯನ! ತತ್ತೇ ಮಂಜುಮಂಜೀರಯುಕ್ತಂ
ಮುಹುರಪಿ ಹೃದಿ ಸೇವೇ ಪಾದಪದ್ಮಂ ಮನೋಜ್ಞಮ್ ॥ 2 ॥
ಮುರಹರ! ತವ ಜಂಘೇ ಜಾನುಯುಗ್ಮಂ ಚ ಸೇವೇ
ದುರಿತಹರ ತಥೋರೂ ಮಾಂಸಳೌ ಚಾರುಶೋಭೌ ।
ಕನಕರುಚಿರಚೇಲೇನಾವೃತೌ ದೇವ! ನಿತ್ಯಂ
ಭುವನಹೃದಯಮೋಹಂ ಸಮ್ಯಗಾಶಂಕ್ಯ ನೂನಮ್ ॥ 3 ॥
ಮಣಿಗಣಯುತಕಾಂಚೀದಾಮ ಸತ್ಕಿಂಕಿಣೀಭಿಃ
ಮುಖರತಮಮಮೇಯಂ ಭಾವಯೇ ಮಧ್ಯದೇಶಮ್ ।
ನಿಖಿಲಭುವನವಾಸಸ್ಥಾನಮಪ್ಯದ್ಯ ಕುಕ್ಷಿಂ
ಮುಹುರಜಿತ! ನಿಷೇವೇ ಸಾದರಂ ಪದ್ಮನಾಭ! ॥ 4 ॥
ಭವಹರಣ! ತಥಾ ಶ್ರೀವತ್ಸಯುಕ್ತಂ ಚ ವಕ್ಷೋ-
ವಿಲಸದರುಣಭಾಸಂ ಕೌಸ್ತುಭೇನಾಂಗ ಕಂಠಮ್ ।
ಮಣಿವಲಯಯುತಂ ತೇ ಬಾಹುಯುಗ್ಮಂ ಚ ಸೇವೇ
ದನುಜಕುಲವಿನಾಶಾಯೋದ್ಯತಂ ಸನ್ತತಂ ಯತ್ ॥ 5 ॥
ವರದ ಜಲಧಿಪುತ್ರ್ಯಾ ಸಾಧು ಪೀತಾಮೃತಂ ತೇ
ತ್ವಧರಮಿಹ ಭಜೇಽಹಂ ಚಾರುಬಿಮ್ಬಾರುಣಾಭಮ್ ।
ವಿಮಲದಶನಪಂಕ್ತಿಂ ಕುನ್ದಸದ್ಕುಡ್ಮಲಾಭಾಂ
ಮಕರನಿಭವಿರಾಜತ್ಕುಂಡಲೋಲ್ಲಾಸಿ ಗಂಡಮ್ ॥ 6 ॥
ತಿಲಕುಸುಮಸಮಾನಾಂ ನಾಸಿಕಾಂ ಚಾದ್ಯ ಸೇವೇ
ಗರುಡಗಮನ! ಚಿಲ್ಯೌ ದರ್ಪಕೇಷ್ವಾಸತುಲ್ಯೌ ।
ಮೃಗಮದಕೃತಪುಂಡ್ರಂ ತಾವಕಂ ಫಾಲದೇಶಂ
ಕುಟಿಲಮಳಕಜಾಲಂ ನಾಥ ನಿತ್ಯಂ ನಿಷೇವೇ ॥ 7 ॥
ಸಜಲಜಲದನೀಲಂ ಭಾವಯೇ ಕೇಶಜಾಲಂ
ಮಣಿಮಕುಟಮುದಂಚತ್ಕೋಟಿಸೂರ್ಯಪ್ರಕಾಶಮ್ ।
ಪುನರನಘ! ಮತಿಂ ಮೇ ದೇವ! ಸಂಕೋಚ್ಯ ಯುಂಜೇ
ತವ ವದನಸರೋಜೇ ಮನ್ದಹಾಸೇ ಮನೋಜ್ಞೇ ॥ 8 ॥
ಗಿರಿಧರ ತವ ರೂಪಂ ತ್ವೀದೃಶಂ ವಿಶ್ವರಮ್ಯಂ
ಮಮ ವಿಹರತು ನಿತ್ಯಂ ಮಾನಸಾಮ್ಭೋಜಮಧ್ಯೇ ।
ಮನಸಿಜಶತಕಾನ್ತಂ ಮಂಜುಮಾಧುರ್ಯಸಾರಂ
ಸತತಮಪಿ ವಿಚಿನ್ತ್ಯಂ ಯೋಗಿಭಿಃ ತ್ಯಕ್ತಮೋಹೈಃ ॥ 9 ॥
ಅಥ ಭುವನಪತೇಽಹಂ ಸರ್ಗವೃದ್ಧಿಕ್ರಮಂ ವೈ
ಕಿಮಪಿ ಕಿಮಪಿ ವಕ್ತುಂ ಪ್ರಾರಭೇ ದೀನಬನ್ಧೋ ।
ಪರಪುರುಷ! ತದರ್ಥಂ ತ್ವತ್ಕೃಪಾ ಸಮ್ಪತೇನ್ಮ-
ಯ್ಯಕೃತಸುಕೃತಜಾಲೈರ್ದುರ್ಲಭಾ ಪಂಕಜಾಕ್ಷ ! ॥ 10 ॥
॥ ಚತುರ್ಥಂ ದಶಕಮ್ ॥
ತಾವಕನಾಭಿಸರೋಜಾತ್
ಜಾತೋ ಧಾತಾ ಸಮಸ್ತವೇದಮಯಃ ।
ಶಂಸತಿ ಸಕಲೋ ಲೋಕೋ
ಯಂ ಕಿಲ ಹಿರಣ್ಯಗರ್ಭ ಇತಿ ॥ 1 ॥
ತದನು ಸ ವಿಸ್ಮಿತಚೇತಾಃ
ಚತಸೃಷು ದಿಕ್ಷು ಸಾಧು ಸಮ್ಪಶ್ಯನ್ ।
ಸಮಗಾದಚ್ಯುತ ತೂರ್ಣಂ
ಚತುರಾನನತಾಮಿಹಾಷ್ಟನಯನಯುತಾಮ್ ॥ 2 ॥
ದೃಷ್ಟ್ವಾ ಕಮಲಂ ಸೋಽಯಂ
ತನ್ಮೂಲಾಂ ತವ ತನುಂ ತ್ವಸಮ್ಪಶ್ಯನ್ ।
ಕೋಽಹಂ ನಿಶ್ಶರಣೋಽಜಂ
ಕಸ್ಮಾದಜನೀತಿ ದೇವ! ಚಿನ್ತಿತವಾನ್ ॥ 3 ॥
ಜ್ಞಾತುಂ ತತ್ವಂ ಸೋಽಯಂ
ಸರಸಿಜನಾಳಾಧ್ವನಾ ತ್ವಧೋ ಗತ್ವಾ ।
ಯೋಗಬಲೇನ ಮನೋಜ್ಞಾಂ
ತವ ತನುಮಖಿಲೇಶ! ನಾಪ್ಯಪಶ್ಯದಹೋ ॥ 4 ॥
ತಾವದ್ದುಖಿತಹೃದಯಃ
ಪುನರಪಿ ಚ ನಿವೃತ್ಯ ಪೂರ್ವವಜ್ಜಲಜೇ ।
ತಾವಕ ಕರುಣಾಮಿಚ್ಛನ್
ಚಕ್ರೇ ಸಮಾಧಿಮಯಿ! ಭಗವನ್ ॥ 5 ॥
ವತ್ಸರಶತಕಸ್ಯಾನ್ತೇ
ದೃಢತರತಪಸಾ ಪರಿವಿಧೂತಹೃದಯಮಲಃ ।
ಸ ವಿಧಿರಪಶ್ಯತ್ಸ್ವಾನ್ತೇ
ಸೂಕ್ಷ್ಮತಯಾ ತವ ತನುಂ ತು ಸುಭಗತಮಾಮ್ ॥ 6 ॥
ಪುನರಿಹ ತೇನ ನುತಸ್ತ್ವಂ
ಶಕ್ತಿಮದಾಸ್ತಸ್ಯ ಭುವನನಿರ್ಮಾಣೇ ।
ಪೂರ್ವಂ ತ್ವಸೃಜತ್ಸೋಽಯಂ
ಸ್ಥಾವರಜಂಗಮಮಯಂ ತು ಸಕಲಜಗತ್ ॥ 7 ॥
ಸನಕಮುಖಾನ್ ಮುನಿವರ್ಯಾನ್
ಮನಸಾಹ್ಯಸೃಜತ್ತವಾಂಘ್ರಿರತಹೃದಯಾನ್ ।
ಸೃಷ್ಟೌ ತು ತೇ ನಿಯುಕ್ತಾಃ
ಜಗೃಹುರ್ವಾಣೀಂ ನ ವೈಧಸೀಂ ಭೂಮನ್! ॥ 8 ॥
ಅಂಗಾದಭವಂಸ್ತೂರ್ಣಂ
ನಾರದಮುಖ್ಯಾ ಮುನೀಶ್ವರಾಸ್ತಸ್ಯ ।
ಮನುಶತರೂಪಾತ್ಮಾಸೌ
ಮಾನುಷಸೃಷ್ಟಿಂ ಚಕಾರ ಕಮಲಭವಃ ॥ 9 ॥
ಸರ್ಗಸ್ಥಿತಿಲಯಮೂಲಂ
ಸುರಮುನಿಜಾಲೈರಮೇಯಮಹಿಮಾನಮ್ ।
ತಂ ತ್ವಾಮೇವ ಪ್ರಣಮನ್
ಮುದಮತುಲಾಂ ಪದ್ಮನಾಭ! ಕಲಯಾಮಿ ॥ 10 ॥
॥ ಪಂಚಮಂ ದಶಕಮ್ ॥
ಭುವೋ ಭಾರಂ ಹರ್ತುಂ ನಿಯತಮವತಾರಾಂಸ್ತು ಭವತೋ
ನಿಯುಂಕ್ತೇ ವಕ್ತುಂ ಮಾಮಪಿ ಜಡಧಿಯಂ ಭಕ್ತಿರಧುನಾ ।
ತದರ್ಥಂ ಕೃತ್ವಾ ಮಾಮನುಪಮಪಟುಂ ಪಾಲಯ ಹರೇ
ಭವತ್ಪಾದಾಮ್ಭೋಜಪ್ರವಣಹೃದಯಂ ದೇವ ಸದಯಮ್ ॥ 1 ॥
ಹಯಗ್ರೀವಾಖ್ಯೇನ ತ್ರಿದಶರಿಪುಣಾ ವೇದನಿವಹೇ
ಹೃತೇ ನಿದ್ರಾಣಸ್ಯಾಮ್ಬುರುಹಜನುಷೋ ಹನ್ತ ವದನಾತ್ ।
ನಿಹನ್ತುಂ ದುಷ್ಟಂ ತಂ ವಿನಿಹಿತಮತಿಸ್ತ್ವಂ ಪುರುದಯಾ-
ಪಯೋಧಿಸ್ತೂರ್ಣಂ ವೈ ದಧಿತ ಬತ ಮಾತ್ಸ್ಯಂ ಕಿಲ ವಪುಃ ॥ 2 ॥
ನದೀತೋಯೇ ಸನ್ತರ್ಪಯತಿ ಕಿಲ ಸತ್ಯವ್ರತನೃಪೇ
ಭವಾನ್ ದೃಷ್ಟೋ ಹಸ್ತೇ ಪರಮತನುವೈಸಾರಿಣವಪುಃ ।
ತತೋ ನಿನ್ಯೇ ಕೂಪಂ ಪುನರಪಿ ತಟಾಕಂ ಚ ತಟಿನೀಂ
ಮಹಾಬ್ಧಿಂ ತೇನಾಹೋ ಸಪದಿ ವವೃಧೇ ತಾವಕ ವಪುಃ ॥ 3 ॥
ತತಸ್ತಂ ಭೂಪಾಲಂ ಪ್ರಲಯಸಮಯಾಲೋಕನಪರಂ
ಮುನೀನ್ದ್ರಾನ್ ಸಪ್ತಾಪಿ ಕ್ಷಿತಿತರಣಿಮಾರೋಪ್ಯ ಚ ಭವಾನ್ ।
ಸಮಾಕರ್ಷನ್ ಬದ್ಧಾಂ ನಿಜ ವಿಪುಲಶೃಂಗೇ ಪುನರಿಮಾಂ
ಮುದಾ ತೇಭ್ಯಃ ಸನ್ದರ್ಶಿತಭುವನಭಾಗಃ ಸಮಚರತ್ ॥ 4 ॥
ಪುನಸ್ಸಂಹೃತ್ಯ ತ್ವಂ ನಿಜಪರುಷಶೃಂಗೇಣ ದಿತಿಜಂ
ಕ್ಷಣಾದ್ವೇದಾನ್ ಪ್ರಾದಾ ಮುದಿತಮನಸೇ ದೇವ ವಿಧಯೇ ।
ತಥಾಭೂತಾಽಮೇಯಪ್ರಣತಜನಸೌಭ್ಯಾಗ್ಯದ! ಹರೇ!
ಮುದಾ ಪಾಹಿ ತ್ವಂ ಮಾಂ ಸರಸಿರುಹನಾಭಾಽಖಿಲಗುರೋ! ॥ 5 ॥
ವಹಂಸ್ತ್ವಂ ಮನ್ಥಾನಂ ಕಮಠವಪುಷಾ ಮನ್ದರಗಿರಿಂ
ದಧಾನಃ ಪಾಣಿಭ್ಯಾಂ ಸ್ವಯಮಪಿ ವರತ್ರಾಂ ಫಣಿಪತಿಮ್ ।
ಸುರೇಭ್ಯಃ ಸಮ್ಪ್ರದಾಸ್ತ್ವಮೃತಮಿಹ ಮಥ್ನನ್ ಕಿಲ ಜವಾತ್
ಹರೇ ದುಗ್ಧಾಮ್ಭೋಧೇಃ ಸಪದಿ ಕಮಲಾಽಜಾಯತ ತತಃ ॥ 6 ॥
ತತೋ ನಿಕ್ಷಿಪ್ತಾ ವೈ ಸಪದಿ ವರಣಸ್ರಕ್ ಖಲು ತಯಾ
ಭವತ್ಕಂಠೇ ಮಾತ್ರಾ ನಿಖಿಲಭುವನಾನಾಂ ಸಕುತುಕಮ್ ।
ಪಪೌ ತ್ವತ್ಪ್ರೀತ್ಯರ್ಥಂ ಸಪದಿ ಬತ ಹಾಲಾಹಲವಿಷಂ
ಗಿರೀಶಃ ಪ್ರಾದಾಸ್ತ್ವಂ ಸುರತರುಗಜಾದೀನಿ ಹರಯೇ ॥ 7 ॥
ಪುರಾ ತೇ ದ್ವಾಸ್ಥೌ ದ್ವೌ ಸನಕಮುಖಶಾಪೇನ ತು ಗತೌ
ಹರೇ! ಸರ್ವೈರ್ನಿನ್ದ್ಯಂ ಖಲು ದನುಜಜನ್ಮಾತಿಕಠಿನಮ್ ।
ತಯೋರ್ಭ್ರಾತಾ ದುಷ್ಟೋ ಮುರಹರ ಕನೀಯಾನ್ ವರಬಲಾತ್
ಹಿರಣ್ಯಾಕ್ಷೋ ನಾಮ ಕ್ಷಿತಿಮಿಹ ಜಲೇ ಮಜ್ಜಯದಸೌ ॥ 8 ॥
ಮಹೀಂ ಮಗ್ನಾಂ ದೃಷ್ಟ್ವಾ ತದನು ಮನುನಾ ಸೇವಿತಪದಾತ್
ವಿಧೇರ್ನಾಸಾರನ್ಧ್ರಾತ್ಸಮಭವದಹೋ ಸೂಕರಶಿಶುಃ ।
ತತೋ ದೈತ್ಯಂ ಹತ್ವಾ ಪರಮಮಹಿತಃ ಪೀವರತನುಃ
ಭವಾನ್ ನಿನ್ಯೇ ಭೂಮಿಂ ಸಕಲವಿನುತ ಪ್ರಾಕ್ತನದಶಾಮ್ ॥ 9 ॥
ವಧೇನ ಸ್ವಭ್ರಾತುಃ ಪರಮಕುಪಿತೋ ದಾನವವರೋ
ಹಿರಣ್ಯಪ್ರಾರಮ್ಭಃ ಕಶಿಪುರಿಹ ಮೋಹಾಕುಲಮತಿಃ ।
ವಿಜೇತುಂ ತ್ವಾಂ ಸೋಽಯಂ ನಿಖಿಲಜಗದಾಧಾರವಪುಷಂ
ಪ್ರತಿಜ್ಞಾಂ ಚಾಕಾರ್ಷೀದ್ದನುಸುತಸಭಾಮಧ್ಯನಿಲಯಃ ॥ 10 ॥
॥ ಷಷ್ಠಂ ದಶಕಮ್ ॥
ಪುತ್ರೋಽಸ್ಯ ವೈ ಸಮಜನೀಹ ತವಾಂಘ್ರಿಭಕ್ತಃ
ಪ್ರಹ್ಲಾದ ಇತ್ಯಭಿಮತಃ ಖಲು ಸಜ್ಜನಾನಾಮ್ ।
ತಂ ತತ್ಪಿತಾ ಪರಮದುಷ್ಟಮತಿರ್ನ್ಯರೌತ್ಸೀತ್
ತ್ವತ್ಸೇವಿನಂ ಕಿಮಿಹ ದುಷ್ಕರಮೀಶ ಪಾಪೈಃ ॥ 1 ॥
ಭೂಯೋಽಪಿ ಸೋಽಥ ಜಗದೀಶ್ವರ! ಗರ್ಭವಾಸೇ
ಶ್ರೀನಾರದೇನ ಮುನಿನೋಕ್ತಭವತ್ಪ್ರಭಾವಃ ।
ಶುಶ್ರಾವ ನೋ ಜನಕವಾಕ್ಯಮಸೌ ತದಾನೀಂ
ತತ್ಪ್ರೇರಿತೈರ್ಗುರುಜನೈರಪಿ ಶಿಕ್ಷಿತಶ್ಚ ॥ 2 ॥
ದೃಷ್ಟ್ವಾ ಪಿತಾಽಸ್ಯ ನಿಜಪುತ್ರಮತಿಂ ತ್ವಕಮ್ಪಾಂ
ತ್ವತ್ಪಾದಪದ್ಮಯುಗಳಾದತಿರುಷ್ಟಚೇತಾಃ ।
ಶೂಲೈಶ್ಚ ದಿಗ್ಗಜಗಣೈರಪಿ ದನ್ತಶೂಕೈಃ
ಏನಂ ನಿಹನ್ತುಮಿಹ ಯತ್ನಶತಂ ಚಕಾರ ॥ 3 ॥
ಸೋಽಯಂ ದೃಢಂ ತವ ಕೃಪಾಕವಚಾವೃತಾಂಗಃ
ನೋ ಕಿಂಚಿದಾಪ ಕಿಲ ದೇಹರುಜಾಮನನ್ತ ! ।
“ಕಸ್ತೇ ಬಲಂ ಖಲ! ವದೇ”ತ್ಯಥ ದೇವ ! ಪೃಷ್ಟೋ
“ಲೋಕತ್ರಯಸ್ಯ ತು ಬಲಂ ಹರಿ”ರಿತ್ಯವಾದೀತ್ ॥ 4 ॥
ಸ್ತಮ್ಭೇ ವಿಘಟ್ಟಯತಿ ಕುತ್ರ ಹರಿಸ್ತವೇತಿ
ರೂಪಂ ತತಃ ಸಮಭವತ್ತವ ಘೋರಘೋರಮ್ ।
ನೋ ವಾ ಮೃಗಾತ್ಮ ನ ನರಾತ್ಮ ಚ ಸಿಂಹನಾದ-
ಸನ್ತ್ರಾಸಿತಾಖಿಲಜಗನ್ನಿಕರಾನ್ತರಾಳಮ್ ॥ 5 ॥
ತೂರ್ಣಂ ಪ್ರಗೃಹ್ಯ ದನುಜಂ ಪ್ರಣಿಪಾತ್ಯ ಚೋರೌ
ವಕ್ಷೋ ವಿದಾರ್ಯ ನಖರೈಃ ರುಧಿರಂ ನಿಪೀಯ ।
ಪಾದಾಮ್ಬುಜೈಕನಿರತಸ್ಯ ತು ಬಾಲಕಸ್ಯ
ಕಾಯಾಧವಸ್ಯ ಶಿರಸಿ ಸ್ವಕರಂ ನ್ಯಧಾಸ್ತ್ವಮ್ ॥ 6 ॥
ಏವಂ ಸ್ವಭಕ್ತಜನಕಾಮಿತದಾನಲೋಲ !
ನಿರ್ಲೇಪ! ನಿರ್ಗುಣ! ನಿರೀಹ! ಸಮಸ್ತಮೂಲ ! ।
ಮಾಂ ಪಾಹಿ ತಾವಕ ಪದಾಬ್ಜನಿವಿಷ್ಟಚಿತ್ತಂ
ಶ್ರೀಪದ್ಮನಾಭ! ಪರಪೂರಷ! ತೇ ನಮಸ್ತೇ ॥ 7 ॥
ದೃಷ್ಟೋ ಭವಾನದಿತಿಜೋ ವಟುರೂಪಧಾರೀ
ದೈತ್ಯಾಧಿಪೇನ ಬಲಿನಾ ನಿಜ ಯಜ್ಞಗೇಹೇ ।
ಪೃಷ್ಟಶ್ಚ ತೇನ “ಕಿಮು ವಾಂಛಸಿ ಬಾಲಕೇ”ತಿ
ಪಾದತ್ರಯೀ ಪ್ರಮಿತಭೂಮಿತಲಂ ಯಯಾಚೇ ॥ 8 ॥
ಯುಗ್ಮೇನ ದೇವ! ಚರಣಸ್ಯ ತು ಸರ್ವಲೋಕೇ
ಪೂರ್ಣೇ ತೃತೀಯಚರಣಂ ತ್ವವಶಃ ಪ್ರದಾತುಮ್ ।
ಬದ್ಧಶ್ಚ ದೇಹಿ ಮಮ ಮೂರ್ಧ್ನಿ ತೃತೀಯಪಾದಂ
ಇತ್ಯಬ್ರವೀದ್ಗತಮದೋಽನುಗೃಹೀತ ಏಷಃ ॥ 9 ॥
ಜಾತೋಽಸಿ ದೇವ! ಜಮದಗ್ನಿಸುತೋ ಮಹಾತ್ಮಾ
ತ್ವಂ ರೇಣುಕಾಜಠರ ಈಶ್ವರ! ಭಾರ್ಗವಾಖ್ಯಃ ।
ಶಮ್ಭುಪ್ರಸಾದ! ಸುಗೃಹೀತವರಾಸ್ತ್ರಜಾಲಃ
ಕೃತ್ತಾಖಿಲಾರಿನಿಕರೋರುಕುಠಾರಪಾಣಿಃ ॥ 10 ॥
॥ ಸಪ್ತಮಂ ದಶಕಮ್ ॥
ಯಾಂಚಾಭಿಸ್ತ್ವಂ ಖಲು ದಿವಿಷದಾಂ ರಾವಣೋಪದ್ರುತಾನಾಂ
ಪುತ್ರೀಯೇಷ್ಟ್ಯಾ ಫಲವಿಲಸಿತಂ ಮಾನವೇ ದೇವ! ವಂಶೇ ।
ಜಾತೋ ರಾಮೋ ದಶರಥನೃಪಾಲ್ಲಕ್ಷ್ಮಣೇನಾನುಜೇನ
ಭ್ರಾತ್ರಾ ಯುಕ್ತೋ ವರದ! ಭರತೇನಾಥ ಶತ್ರುಘ್ನನಾಮ್ನಾ ॥ 1 ॥
ಧೃತ್ವಾ ಚಾಪಂ ಸಹಜಸಹಿತಃ ಪಾಲಯನ್ ಕೌಶಿಕೀಯಂ
ಯಜ್ಞಂ ಮಾರೀಚಮುಖಸುಮಹಾರಾಕ್ಷಸೇಭ್ಯಃ ಪರಂ ತ್ವಮ್ ।
ಕೃತ್ವಾಽಹಲ್ಯಾಂ ಚರಣರಜಸಾ ಗೌತಮಸ್ಯೇಶ! ಪತ್ನೀಂ
ಭಿತ್ವಾ ಶೈವಂ ಧನುರಥ ತದಾ ಲಬ್ಧವಾಂಶ್ಚಾಪಿ ಸೀತಾಮ್ ॥ 2 ॥
ಮಧ್ಯೇಮಾರ್ಗಾಗತ ಭೃಗುಪತಿಂ ದೇವ! ಜಿತ್ವಾಽತಿರುಷ್ಟಂ
ಭೂಯೋ ಗತ್ವಾ ಪರಮ! ನಗರೀಂ ಸ್ವಾಮಯೋಧ್ಯಾಂ ವಸಂಸ್ತ್ವಮ್ ।
ಕೈಕೇಯೀವಾಗ್ಭ್ರಮಿತಮನಸೋ ಹನ್ತ ತಾತಸ್ಯ ವಾಚಾ
ತ್ಯಕ್ತ್ವಾ ರಾಜ್ಯಂ ವಿಪಿನಮಗಮೋ ದುಃಖಿತಾಶೇಷಲೋಕಃ ॥ 3 ॥
ಗತ್ವಾಽರಣ್ಯಂ ಸಹ ದಯಿತಯಾ ಚಾಥ ಸೌಮಿತ್ರಿಣಾ ತ್ವಂ
ಗಂಗಾಂ ತೀರ್ತ್ವಾ ಸುಸುಖಮವಸಚ್ಚಿತ್ರಕೂಟಾಖ್ಯಶೈಲೇ ।
ತತ್ರ ಶ್ರುತ್ವಾ ಭರತವಚನಾತ್ತಾತಮೃತ್ಯುಂ ವಿಷಣ್ಣಃ
ತಸ್ಮೈ ಪ್ರಾದಾ ವರದ! ಧರಣಿಂ ಪಾದುಕಾಂ ಚಾತ್ಮನಸ್ತ್ವಮ್ ॥ 4 ॥
ಭೂಯೋ ಹತ್ವಾ ನಿಶಿಚರವರಾನ್ ದ್ರಾಗ್ವಿರಾಧಾದಿಕಾಂಸ್ತ್ವಂ
ಕುಮ್ಭೋದ್ಭೂತೇನ ಖಲು ಮುನಿನಾ ದತ್ತದಿವ್ಯಾಸ್ತ್ರಜಾಲಃ ।
ಭ್ರಾತೃಚ್ಛಿನ್ನಶ್ರವಣವಿನದಚ್ಛೂರ್ಪಣಖ್ಯಾ ವಚೋಭಿಃ
ತ್ವಾಯಾತಾಂಸ್ತಾನ್ ಖರಮುಖಮಹಾರಾಕ್ಷಸಾನ್ ಪ್ರಾವಧೀಶ್ಚ ॥ 5 ॥
ಮಾರೀಚಂ ತಂ ಕನಕಹರಿಣಛದ್ಮನಾಯಾತಮಾರಾತ್
ಜಾಯಾವಾಕ್ಯಾದಲಮನುಗತಃ ಪ್ರಾವಧೀಃ ಸಾಯಕೇನ ।
ತಾವದ್ಭೂಮನ್! ಕಪಟಯತಿವೇಷೋಽಥ ಲಂಕಾಧಿನಾಥಃ
ಸೀತಾದೇವೀಮಹರತ ತದಾ ದುಃಖಿತಾತ್ಮಾಽಭವಸ್ತ್ವಮ್ ॥ 6 ॥
ದೃಷ್ಟ್ವಾ ಲಂಕೇಶ್ವರವಿನಿಹತಂ ತಾತಮಿತ್ರಂ ಜಟಾಯುಂ
ತಸ್ಯಾಽಥ ತ್ವಂ ವರದ ಕೃತವಾನ್ ಪ್ರೇತಕಾರ್ಯಂ ವಿಷಣ್ಣಃ ।
ದೃಷ್ಟಸ್ತತ್ರಾಽನುಪಮ! ಭವತಾ ಮಾರುತಿರ್ಭಕ್ತವರ್ಯಃ
ಭೂಯಸ್ತುಷ್ಟಃ ಸರಸಮಕರೋಃ ಸಾಧು ಸುಗ್ರೀವಸಖ್ಯಮ್ ॥ 7 ॥
ಛಿತ್ವಾ ಸಾಲಾನ್ ಸರಸಮಿಷುಣಾ ಸಪ್ತಸಂಖ್ಯಾನ್ ಕ್ಷಣೇನ
ವ್ಯಾಜೇನ ತ್ವಂ ಬತ ನಿಹತವಾನ್ ಬಾಲಿನಂ ಶಕ್ರಸೂನುಮ್ ।
ಭೂಯೋಽನ್ವೇಷ್ಟುಂ ಜನಕತನಯಾಂ ದಿಕ್ಷು ಸಮ್ಪ್ರೇಷ್ಯ ಕೀಶಾನ್
ಸುಗ್ರೀವೋಕ್ತಾನ್ ಪವನಜಕರೇ ದತ್ತವಾಂಶ್ಚಾಂಗುಲೀಯಮ್ ॥ 8 ॥
ದೃಷ್ಟ್ವಾ ಸೀತಾಂ ನಿಶಿಚರಗೃಹೇ ತಾವಕಂ ದೇವ! ವೃತ್ತಂ
ಕೃತ್ಸ್ನಂ ತೂಕ್ತ್ವಾಪ್ಯವಿದಿತ ಭವತೇ ಮಾರುತಿರ್ಮೌಲಿರತ್ನಮ್ ।
ತುಷ್ಟಸ್ತಾವತ್ಕಿಲ ಜಲನಿಧೌ ಬಾಣವಿತ್ರಾಸಿತೇ ತ್ವಂ
ಸೇತುಂ ಬದ್ಧ್ವಾ ನಿಶಿಚರಪುರಂ ಯಾತವಾನ್ ಪದ್ಮನಾಭ! ॥ 9 ॥
ಹತ್ವಾ ಯುದ್ಧೇ ಕಿಲ ದಶಮುಖಂ ದೇವ! ಸಾಮಾತ್ಯಬನ್ಧುಂ
ಸೀತಾಂ ಗೃಹ್ಣನ್ ಪರಿಹೃತಮಲಾಂ ಪುಷ್ಪಕೇ ರಾಜಮಾನಃ ।
ಪ್ರಾಪ್ಯಾಯೋಧ್ಯಾಂ ಹರಿವರನಿಷಾದೇನ್ದ್ರಯುಕ್ತೋಽಭಿಷಿಕ್ತಃ
ತ್ರಾತಾಶೇಷೋ ರಹಿತದಯಿತಶ್ಚಾಗಮೋಽನ್ತೇ ಸ್ವಧಿಷ್ಣ್ಯಮ್ ॥ 10 ॥
॥ ಅಷ್ಟಮಂ ದಶಕಮ್ ॥
ದೇವ! ದುಷ್ಟಜನೌಘಭರೇಣ
ವ್ಯಾಕುಲಾಽಥ ವಸುಧಾಮ್ಬುಜಯೋನಿಮ್ ।
ಪ್ರಾಪ್ಯ ದೇವನಿಕರೈಃ ಶ್ರಿತಪಾದಂ
ಸ್ವೀಯತಾಪಮಿಹ ಸಮ್ಯಗುವಾಚ ॥ 1 ॥
ಪದ್ಮಭೂರಥ ನಿಶಮ್ಯ ಚ ತಾಪಂ
ಚಿನ್ತಯನ್ ಸಪದಿ ದೇವ! ಭವನ್ತಮ್ ।
ಯುಷ್ಮದೀಯ ಸಕಲಾಧಿಹರಃ ಶ್ರೀ
ಪದ್ಮನಾಭ ಇತಿ ತಾನವದತ್ಸಃ ॥ 2 ॥
ಭೂಯ ಏತ್ಯ ತವ ಮನ್ದಿರಮೇತೇ
ಹೀನಪುಣ್ಯನಿಕರೈರನವಾಪ್ಯಮ್ ।
ತುಷ್ಟುವುಃ ಸವಿಬುಧೋ ದ್ರುಹಿಣಸ್ತ್ವಾಂ
ತಾಪಮಾಶ್ವಕಥಯದ್ವಸುಧಾಯಾಃ ॥ 3 ॥
“ಸಂಭವಾಮಿ ತರಸಾ ಯದುವಂಶೇ
ಯಾದವಾಃ ಕಿಲ ಭವನ್ತ್ವಿಹ ದೇವಾಃ” ।
ಏವಮೀಶ! ಕಥಿತೇ ತವ ವಾಕ್ಯೇ
ವೇಧಸಾ ಕಿಲ ಸುರಾ ಮುದಮಾಪನ್ ॥ 4 ॥
ರೋಹಿಣೀಜಠರತಃ ಕಿಲ ಜಾತಃ
ಪ್ರೇರಣಾತ್ತವ ಪರಂ ತ್ವಹಿರಾಜಃ ।
ತ್ವಂ ಚ ವಿಶ್ವಗತಕಲ್ಮಷಹಾರೀ
ದೇವಕೀಜಠರಮಾಶು ನಿವಿಷ್ಟಃ ॥ 5 ॥
ಅರ್ಧರಾತ್ರಸಮಯೇ ತು ಭವನ್ತಂ
ದೇವಕೀ ಪ್ರಸುಷುವೇಽಧಿಕಧನ್ಯಾ ।
ಶಂಖಚಕ್ರಕಮಲೋರುಗದಾಭೀ –
ರಾಜಿತಾತಿರುಚಿಬಾಹುಚತುಷ್ಕಮ್ ॥ 6 ॥
ತಾವದೀಶ! ಸಕಲೋ ಬತ ಲೋಕೋ
ತುಷ್ಟಿಮಾಪ ತಮೃತೇ ಕಿಲ ಕಂಸಮ್ ।
ಅಷ್ಟಮಃ ಕಿಲ ಸುತೋಽಥ ಭಗಿನ್ಯಾ-
ಸ್ತದ್ವಧಂ ಕಲಯತೀತಿ ಚ ವಾಕ್ಯಾತ್ ॥ 7 ॥
ಬಾಷ್ಪಪೂರ್ಣನಯನೋ ವಸುದವೋ
ನೀತವಾನ್ ವ್ರಜಪದೇಽಥ ಭವನ್ತಮ್ ।
ತತ್ರ ನನ್ದಸದನೇ ಕಿಲ ಜಾತಾ –
ಮಮ್ಬಿಕಾಮನಯದಾತ್ಮನಿಕೇತಮ್ ॥ 8 ॥
ಕಂಸ ಏತ್ಯ ಕಿಲ ಸೂತಿಗೃಹೇ ತೇ
ಕನ್ಯಕಾಂ ತು ಶಯಿತಾಂ ಸ ನಿಶಾಮ್ಯ ।
ನೂನಮೇವಮಜಿತಸ್ಯ ತು ಮಾಯಾ
ಸೇಯಮಿತ್ಯಯಮತುಷ್ಟಿಮಯಾಸೀತ್ ॥ 9 ॥
ತೂರ್ಣಮೇಷ ನಿಧನೇ ನಿರತಾಂಸ್ತೇ
ಪೂತನಾಶಕಟಧೇನುಕಮುಖ್ಯಾನ್ ।
ಪ್ರಾಹಿಣೋದಜಿತ! ಮನ್ದಮತಿಸ್ತಾನ್
ದುಷ್ಕರಂ ಕಿಮಿಹ ವಿಸ್ಮೃತಪಾಪೈಃ ॥ 10 ॥
॥ ನವಮಂ ದಶಕಮ್ ॥
ಏವಂ ಘೋಷೇ ವಿರಾಜತ್ಯಯಿ! ಭವತಿ ಜಗನ್ನೇತ್ರಪೀಯೂಷಮೂರ್ತೌ
ದುಷ್ಟಾ ಕಾಚಿನ್ನಿಶಾಚರ್ಯಥ ಸಮಧಿಗತಾ ಚಾರುಯೋಷಿತ್ಸ್ವರೂಪಾ ।
ಸ್ತನ್ಯಂ ದಾತುಂ ಕುಚಾಗ್ರಂ ತವಮುಖಜಲಜೇ ದೇವ! ಚಿಕ್ಷೇಪ ಯಾವತ್
ತಾವತ್ಕ್ಷೀರಂ ಸಜೀವಂ ಕಪಟಶಿಶುರಹೋ ಪೀತವಾಂಸ್ತ್ವಂ ಕ್ಷಣೇನ ॥ 1 ॥
ಭೂಯಃ ಶೌರೇ! ವ್ರಜೇ ವೈ ಶಕಟದನುಸುತ ಪ್ರಾಪ್ತವಾನ್ ಸಂಹೃತೋಽಯಂ
ವಾತಾತ್ಮಾ ದಾನವಶ್ಚ ಪ್ರವಿತತ ಧರಣೀಭಾರನಾಶೇನ ಕೃತ್ತಃ ।
ದೃಷ್ಟ್ವೈವಂ ತೇ ಮಹತ್ವಂ ದನುಜಹೃತಿಚಣಂ ತಾದೃಶೀಂ ಬಾಲಲೀಲಾಂ
ತ್ವನ್ಮಾಯಾಮೋಹಿತತ್ವಾದಯಿ! ಬತ! ಪಶುಪಾ ವಿಸ್ಮಯಂ ಮೋದಮಾಪನ್ ॥ 2 ॥
ನನ್ದಃ ಪಶ್ಯನ್ ಕದಾಚಿನ್ನಿಜನಿಲಯಗತಂ ಯಾದವಾಚಾರ್ಯವರ್ಯಂ
ಗರ್ಗಂ ತೇ ಕಾರಯಾಮಾಸ ಚ ವಿಧಿವದಸೌ ನಾಮ ಕೃಷ್ಣೇತಿ ತೇನ ।
ರಾಮಾಖ್ಯಾಂ ಸೋದರೇ ತೇ ಮುನಿರಥ ಕಲಯನ್ ವೈಭವಂ ಚ ತ್ವದೀಯಂ
ನನ್ದಾದಿಭ್ಯಃ ಪ್ರಶಂಸನ್ ನಿಜಪದಮಿಹ ಸಮ್ಪ್ರಾಪ್ತವಾನ್ ಭಕ್ತವರ್ಯಃ ॥ 3 ॥
ದೃಷ್ಟಂ ಮಾತ್ರಾ ಸಮಸ್ತಂ ಜಗದಿಹ ವದನೇ ಮೃತ್ತಿಕಾಭಕ್ಷಣಂ ತೇ
ವ್ಯಾಕುರ್ವನ್ತ್ಯಾ ಶಿಶೂನಾಮಥ ವಚನವಶಾತ್ಕಿಂ ತ್ವಿತೋ ಹನ್ತ ಚಿತ್ರಮ್ ।
ಭೂಯಸ್ತೂರ್ಣಂ ಭವಾನ್ ಮಂಗಳಗುಣ! ಗತವಾನ್ದೇವ! ವೃನ್ದಾವನಂ ತತ್
ಯುಷ್ಮದ್ಗಾತ್ರೋರುಶೋಭಾ ಪ್ರತುಲಿತ ಯಮುನಾತೀರಸಂಸ್ಥಂ ಮನೋಜ್ಞಮ್ ॥ 4 ॥
ವನ್ಯಾಶಂ ತ್ವಯ್ಯಧೀಶೇ ಕಲಯತಿ ತರಸಾ ಶ್ರೀಧರಾಹೋ ವಿರಿಂಚೋ
ಗೋಪಾನ್ ವತ್ಸಾನ್ ತ್ವದೀಯಾನಹರದಯಿ! ವಿಭೋ! ತಾವದೇವ ಸ್ವರೂಪಮ್ ।
ಸಂಖ್ಯಾಹೀನಂ ಪರಂ ತ್ವಾಮಪಿ ಕಬಳಧರಂ ವೀಕ್ಷ್ಯ ಸಮ್ಭ್ರಾನ್ತಚೇತಾಃ
ತ್ವತ್ಪಾದಾಬ್ಜೇ ಪತಿತ್ವಾ ಮುಹುರಪಿ ಭಗವನ್ನಸ್ತವೀದಚ್ಯುತಂ ತ್ವಾಮ್ ॥ 5 ॥
ಸರ್ಪಂ ತೋಯೇ ನಿಮಗ್ನಂ ಪರಮಸುಕುಟಿಲಂ ಕಾಳಿಯಂ ವೀಕ್ಷ್ಯ ಶೌರೇ!
ನೃತ್ಯನ್ ನೃತ್ಯನ್ ಫಣೇ ತ್ವಂ ತದನು ಗತಮದಂ ಚಾಕರೋಸ್ತಂ ಗತಂ ಚ ।
ಭೂಯಸ್ತ್ವದ್ವೇಣುಗಾನಾದಜಿತ! ಜಗದಲಂ ಮೋಹಿತಂ ಸರ್ವಮಾಸೀತ್
ಯೋಷಿಚ್ಚಿತ್ತಾಪಹಾರೇ ನಿಪುಣಮಿದಮಿತಿ ಶ್ರೀಶ! ಕಿಂ ವರ್ಣನೀಯಮ್ ॥ 6 ॥
ಧೃತ್ವಾ ಗೋವರ್ಧನಂ ತ್ವಂ ಗಿರಿಮಲಮತನೋರ್ವಾಸವಂ ವೀತಗರ್ವಂ
ಯೋಷಿದ್ಭಿಸ್ತ್ವಂ ಸಲೀಲಂ ರಜನಿಷು ಕೃತವಾನ್ ರಾಸಕೇಳಿಂ ಮನೋಜ್ಞಾಮ್ ।
ಭಕ್ತಾಗ್ರ್ಯಂ ಗಾನ್ದಿನೇಯಂ ತವ ಖಲು ನಿಕಟೇ ಪ್ರೇಷಯಾಮಾಸ ಕಂಸಃ
ಹತ್ವೇಭೇನ್ದ್ರಂ ಚ ಮಲ್ಲಾನ್ ಯದುವರ! ಸಬಲೋ ಮಾತುಲಂ ಚಾವಧೀಸ್ತ್ವಮ್ ॥ 7 ॥
ಗತ್ವಾ ಸಾನ್ದೀಪನಿಂ ತ್ವಂ ಕತಿಪಯದಿವಸೈಃ ಜ್ಞಾತವಾನ್ ಸರ್ವವಿದ್ಯಾಃ
ಕೃತ್ವಾ ರಾಜ್ಯೇ ನರೇನ್ದ್ರಂ ವಿಮಲತಮಗುಣಂ ಚೋಗ್ರಸೇನಂ ಜವೇನ ।
ರಾಜಾನಂ ಧರ್ಮಸೂನುಂ ಚರಣರತಮವನ್ ಚೈದ್ಯಮುಖ್ಯಾದಿಹನ್ತಾ
ರುಗ್ಮಿಣ್ಯಾದ್ಯಷ್ಟಯೋಷಾಯುತಬಹುವನಿತಾಶ್ಚಾರಮೋ ದ್ವಾರಕಾಯಾಮ್ ॥ 8 ॥
ವಿಪ್ರಂ ನಿಸ್ಸ್ವಂ ಕುಚೇಲಂ ಸದನಮುಪಗತಂ ಬಾಲ್ಯಕಾಲೈಕಮಿತ್ರಂ
ಪಶ್ಯನ್ ಕಾರುಣ್ಯಲೋಲಃ ಪೃಥುಕಮಿಹ ಕರಾತ್ತಸ್ಯ ಸಂಗೃಹ್ಯ ತೂರ್ಣಮ್ ।
ಲಕ್ಷ್ಮೀಸಂವಾರಿತೋಽಪಿ ಸ್ವಯಮಪರಿಮಿತಂ ವಿತ್ತಮಸ್ಮೈ ದದಾನಃ
ಕಾರುಣ್ಯಾಮ್ಭೋನಿಧಿಸ್ತ್ವಂ ಜಯ ಜಯ ಭಗವನ್! ಸರ್ವಲೋಕಾಧಿನಾಥ! ॥ 9 ॥
ಯಾವದ್ವೃದ್ಧಿಃ ಕಲೇರ್ವೈ ಭವತಿ ಬತ ತದಾ ಕಲ್ಕಿರೂಪೋಽತಿಹೀನಾನ್
ಮ್ಲೇಚ್ಛಾನ್ ಧರ್ಮೈಕಶತ್ರೂನ್ ಭರಿತಪುರುರುಷಾ ನಾಶಯಿಷ್ಯತ್ಯಶಾನ್ತಾನ್ ।
ಸ ತ್ವಂ ಸತ್ವೈಕತಾನಾಂ ಮಮ ಮತಿಮನಿಶಂ ದೇಹಿ ಶೌರೇ! ತದರ್ಥಂ
ತ್ವತ್ಪಾದಾಬ್ಜೇ ಪತಿತ್ವಾ ಮುಹುರಹಮವಶಃ ಪ್ರಾರ್ಥಯೇ ಪದ್ಮನಾಭ! ॥ 10 ॥
॥ ದಶಮಂ ದಶಕಮ್ ॥
ಭೂಷಣೇಷು ಕಿಲ ಹೇಮವಜ್ಜಗತಿ ಮೃತ್ತಿಕಾವದಥವಾ ಘಟೇ
ತನ್ತುಜಾಲವದಹೋ ಪಟೇಷ್ವಪಿ ರಾಜಿತಾದ್ವಯರಸಾತ್ಮಕಮ್ ।
ಸರ್ವಸತ್ವಹೃದಯೈಕಸಾಕ್ಷಿಣಮಿಹಾತಿಮಾಯ ನಿಜವೈಭವಂ
ಭಾವಯಾಮಿ ಹೃದಯೇ ಭವನ್ತಮಿಹ ಪದ್ಮನಾಭ! ಪರಿಪಾಹಿ ಮಾಮ್ ॥ 1 ॥
ಚಿನ್ಮಯಾಮ್ಬುನಿಧಿವೀಚಿರೂಪ! ಸನಕಾದಿಚಿನ್ತ್ಯವಿಮಲಾಕೃತೇ !
ಜಾತಿಕರ್ಮಗುಣಭೇದಹೀನ! ಸಕಲಾದಿಮೂಲ! ಜಗತಾಂ ಗುರೋ ! ।
ಬ್ರಹ್ಮಶಂಕರಮುಖೈರಮೇಯವಿಪುಲಾನುಭಾವ! ಕರುಣಾನಿಧೇ!
ಭಾವಯಾಮಿ ಹೃದಯೇ ಭವನ್ತಮಿಹ ಪದ್ಮನಾಭ! ಪರಿಪಾಹಿ ಮಾಮ್ ॥ 2 ॥
ಮಾಯಯಾವೃತತನುರ್ಬಹಿಃ ಸೃಜಸಿ ಲೋಕಜಾಲಮಖಿಲಂ ಭವಾನ್
ಸ್ವಪ್ನಸನ್ನಿಭಮಿದಂ ಪುನಸ್ಸಪದಿ ಸಂಹರನ್ನಿಜಬಲಾದಹೋ! ।
ಹನ್ತ! ಕೂರ್ಮ ಇವ ಪಾದಮಾತ್ಮನಿ ತು ಧಾರಯತ್ಯಥ ಯದಾ ತದಾ
ದಾರುಣೇ ತಮಸಿ ವಿಸ್ತೃತೇ ವಿತಿಮಿರೋ ಲಸತ್ಯನಿಶಮಾತ್ಮನಾ ॥ 3 ॥
ದೇವದೇವ! ತನುವಾಙ್ಮನೋಭಿರಿಹ ಯತ್ಕರೋಮಿ ಸತತಂ ಹರೇ!
ತ್ವಯ್ಯಸಾವಹಮರ್ಪಯಾಮ್ಯಖಿಲಮೇತದೀಶ! ಪರಿತುಷ್ಯತಾಮ್ ।
ತ್ವತ್ಪದೈಕಮತಿರನ್ತ್ಯಜೋಽಪಿ ಖಲು ಲೋಕಮೀಶ್ವರ! ಪುನಾತ್ಯಹೋ!
ನೋ ರಮೇಶ! ವಿಮುಖಾಶಯೋ ಭವತಿ ವಿಪ್ರಜಾತಿರಪಿ ಕೇವಲಮ್ ॥ 4 ॥
ಪಾಪ ಏಷ ಕಿಲ ಗೂಹಿತುಂ ನಿಜ ದುಶ್ಚರಿತ್ರಮಿಹ ಸರ್ವದಾ
ಕೃಷ್ಣ! ರಾಮ! ಮಧುಸೂದನೇತ್ಯನಿಶಮಾಲಪತ್ಯಹಹ! ನಿಷ್ಫಲಮ್ ।
ಏವಮೀಶ! ತವ ಸೇವಕೋ ಭವತಿ ನಿನ್ದಿತಃ ಖಲಜನೈಃ ಕಲೌ
ತಾದೃಶಂ ತ್ವನಘ! ಮಾ ಕೃಥಾ ವರದ! ಮಾಮಸೀಮತಮವೈಭವ! ॥ 5 ॥
ಕಸ್ತು ಲೋಕ ಇಹ ನಿರ್ಭಯೋ ಭವತಿ ತಾವಕಂ ಕಿಲ ವಿನಾ ಪದಂ
ಸತ್ಯಲೋಕವಸತಿ ಸ್ಥಿತೋಽಪಿ ಬತ ನ ಸ್ಥಿರೋ ವಸತಿ ಪದ್ಮಭೂಃ ।
ಏವಮೀಶ ಸತಿ ಕಾ ಕಥಾ ಪರಮ! ಪಾಪಿನಾಂ ತು ನಿರಯಾತ್ಮನಾಂ
ತನ್ಮದೀಯ ಭವಬನ್ಧಮೋಹಮಯಿ! ಖಂಡಯಾಽನಘ! ನಮೋಽಸ್ತು ತೇ ॥ 6 ॥
ಭಾವಯನ್ತಿ ಹಿ ಪರೇ ಭವನ್ತಮಯಿ! ಚಾರು ಬದ್ಧವಿಮಲಾಸನಾಃ
ನಾಸಿಕಾಗ್ರಧೃತಲೋಚನಾ ಪರಮ! ಪೂರಕಾದಿಜಿತಮಾರುತಾಃ ।
ಉದ್ಗತಾಗ್ರಮಥ ಚಿತ್ತಪದ್ಮಮಯಿ! ಭಾವಯನ್ತ ಇಹ ಸಾದರಂ
ಭಾನುಸೋಮಶಿಖಿಮಂಡಲೋಪರಿ ತು ನೀಲನೀರದಸಮಪ್ರಭಮ್ ॥ 7 ॥
ಶ್ಲಕ್ಷ್ಣನೀಲಕುಟಿಲಾಳಕಂ ಮಕರಕುಂಡಲದ್ಯುತಿವಿರಾಜಿತಂ
ಮನ್ದಹಾಸಹೃತಸರ್ವಲೋಕವಿಪುಲಾತಿಭಾರಮತಿಮೋಹನಮ್ ।
ಕೌಸ್ತುಭೇನ ವನಮಾಲಯಾಪಿ ಚ ವಿರಾಜಿತಂ ಮದನಸುನ್ದರಂ
ಕಾಂಚನಾಭವಸನಂ ಭವನ್ತಮಯಿ! ಭಾವಯನ್ತಿ ಹೃತಕಲ್ಮಷಾಃ ॥ 8 ॥
ಜ್ಞಾನಮೀಶ! ಬತ! ಕರ್ಮ ಭಕ್ತಿರಪಿ ತತ್ತ್ರಯಂ ಭವದವಾಪಕಂ
ಜ್ಞಾನಯೋಗವಿಷಯೇಽಧಿಕಾರ ಇಹ ವೈ ವಿರಕ್ತಜನತಾಹಿತಃ ।
ಕರ್ಮಣೀಹ ತು ಭವೇನ್ನೃಣಾಮಧಿಕಸಕ್ತಮಾನಸಜುಷಾಂ ಹರೇ!
ಯೇ ತು ನಾಧಿಕವಿರಕ್ತಸಕ್ತಹೃದಯಾ ಹಿ ಭಕ್ತಿರಯಿ! ತದ್ಧಿತಾ ॥ 9 ॥
ದೇವ! ವೈಭವಮಜಾನತಾದ್ಯ ತವ ಯನ್ಮಯಾ ನಿಗದಿತಂ ಹರೇ!
ಕ್ಷಮ್ಯತಾಂ ಖಲು ಸಮಸ್ತಮೇತದಿಹ ಮೋದಮೀಶ! ಕುರು ತಾವಕೇ ।
ದೀರ್ಘಮಾಯುರಯಿ! ದೇಹಸೌಖ್ಯಮಪಿ ವರ್ಧತಾಂ ಭವದನುಗ್ರಹಾತ್
ಪಂಕಜಾಭನಯನಾಪದೋ ದಲಯ ಪದ್ಮನಾಭ! ವಿಜಯೀ ಭವ! ॥ 10 ॥
॥ ಇತಿ ಮಹಾರಾಜಾ ಸ್ವಾತಿ ತಿರುನಾಳ್ ವಿರಚಿತಂ ಪದ್ಮನಾಭಶತಕಮ್ ॥
– Chant Stotra in Other Languages –
Hind Shataka » Sri Padmanabha Shatakam Lyrics in Sanskrit » English » Bengali » Gujarati » Malayalam » Odia » Telugu » Tamil