॥ Devigiti Shatakam Telugu Lyrics ॥
॥ దేవీగీతిశతకమ్ ॥
శ్రీగణేశాయ నమః ॥
కిం దేవైః కిం జీవైః కిం భావైస్తేఽపి యేన జీవన్తి ।
తవ చరణం శరణం మే దరహణం దేవి కాన్తిమత్యమ్బ ॥ ౧ ॥
అరుణామ్బుదనిభకాన్తే కరుణారసపూరపూర్ణనేత్రాన్తే ।
శరణం భవ శశిబిమ్బద్యుతిముఖి జగదమ్బ కాన్తిమత్యమ్బ ॥ ౨ ॥
కలిహరణం భవతరణం శుభభరణం జ్ఞానసమ్పదాం కరణమ్ ।
నతశరణం తవ చరణం కరోతు మే దేవి కాన్తిమత్యమ్బ ॥ ౩ ॥
అమితాం సమతాం మమ తాం తను తాం తనుతాం గతాం పదాబ్జం తే ।
కృపయా విదితో విహితో యయా తవాహం హి కాన్తిమత్యమ్బ ॥ ౪ ॥
మమ చరితం విదితం చేదుదయేన్న దయా కదాపి తే సత్యమ్ ।
తదపి వదామ్యయి కురు తాం నిర్హేతుకమాశు కాన్తిమత్యమ్బ ॥ ౫ ॥
న బుధత్వం న విధుత్వం న విధిత్వం నౌమి కిం తు భృఙ్గత్వమ్ ।
అసకృత్ప్రణమ్య యాచే త్వచ్చరణాబ్జస్య కాన్తిమత్యమ్బ ॥ ౬ ॥
అభజమహం కిం సారే కంసారే వీపదేఽపి సంసారే ।
రుచిమత్తాం శుచిమత్తామహహ త్వం పాహి కాన్తిమత్యమ్బ ॥ ౭ ॥
మామసకృదప్రసాదాద్దుష్కృతకారీతి మాఽవమన్యస్వ ।
స్మర కిం న మయా సుకృతం వర్ధితమిదమద్య కాన్తిమత్యమ్బ ॥ ౮ ॥
కరుణావిషయం యది మాం న తనోషి యథా తథాపి వర్తేఽహమ్ ।
భవతి కృపాలుత్వం తే సీదామి మృషేతి కాన్తిమత్యమ్బ ॥ ౯ ॥
అతులితభవానురాగిణి దుర్వర్ణాచలవిహారిణి మయి త్వమ్ ।
సమతేర్ష్యయా ప్రసాదం న విధత్సే కిం ను కాన్తిమత్యమ్బ ॥ ౧౦ ॥
ద్యాం గాం వాభ్యపతం యది జీవాతుస్త్వామృతేఽన్తతః కో మే ।
హిత్వా పయోదపఙ్క్తిం స్తోకస్య గతిః క్వ కాన్తిమత్యమ్బ ॥ ౧౧ ॥
కం వా కటాక్షలక్ష్యం న కరోష్యేవం మయి త్వమాసీః కిమ్ ।
కిం త్వాముపాలభేఽహం విధిర్గరీయాన్ హి కాన్తిమత్యమ్బ ॥ ౧౨ ॥
తనుజే జననీ జనయత్యహితేఽపి ప్రేమ హీతి తన్మిథ్యా ।
యదుపేక్షసే త్రిలోకీం మాతర్మాం దేవి కాన్తిమత్యమ్బ ॥ ౧౩ ॥
నిన్దామి సాధువర్గం స్తౌమి పునః క్షీణషడ్గసంసర్గమ్ ।
వన్దే కిం తే చరణే కిం స్యాత్ప్రీతిస్తు కాన్తిమత్యమ్బ ॥ ౧౪ ॥
గీర్వాణవృన్దజిహ్వారసాయనస్వీయమాననీయగుణే ।
నిగమాన్తపఞ్జరాన్తరమరాలికే పాహి కాన్తిమత్యమ్బ ॥ ౧౫ ॥
త్రినయనకాన్తే శాన్తే తాన్తే స్వాన్తే మమాస్తు వద దాన్తే ।
కృపయా మునిజనచిన్తితచరణే నివసాద్య కాన్తిమత్యమ్బ ॥ ౧౬ ॥
ధుతకదనే కృతమదనే భృశమదనే యోగిశర్వభక్తానామ్ ।
మణిసదనే శుభరదనే శశివదనే పాహి కాన్తిమత్యమ్బ ॥ ౧౭ ॥
గిరితనుజే హతదనుజే వరమనుజేద్ధాభిధే చ హర్యనుజే ।
గుహతనుజేఽవితమనుజే కురు కరుణాం దేవి కాన్తిమత్యమ్బ ॥ ౧౮ ॥
గజగమనే రిపుదమనే హరకమనే కౢప్తపాపకృచ్ఛమనే ।
కలిజననే మయి దయయా ప్రసీద హే దేవి కాన్తిమత్యమ్బ ॥ ౧౯ ॥
యన్మానసే పదాబ్జం తవ సంవిద్భాస్వదాభయాఽఽభాతి ।
తత్పాదదాసదాసకదాసత్వం నౌమి కాన్తిమత్యమ్బ ॥ ౨౦ ॥
దుష్కరదుష్కృతరాశేర్న బిభేమి శివే యది ప్రసాదస్తే ।
దలనే దృషదాం టఙ్కః కల్పేత న కిం ను కాన్తిమత్యమ్బ ॥ ౨౧ ॥
కోమలదేహం కిమపి శ్యామలశోభం శరన్మృగాఙ్కముఖమ్ ।
రూపం తవ హృదయే మమ దీపశ్రియమేతు కాన్తిమత్యమ్బ ॥ ౨౨ ॥
కిఞ్చనవఞ్చనదక్షం పఞ్చశరారేః ప్రపఞ్చజీవాతుమ్ ।
చఞ్చలమఞ్చలమక్ష్ణోరయి మయి కురు దేవి కాన్తిమత్యమ్బ ॥ ౨౩ ॥
అఞ్చతి యం త్వదపాఙ్గః కిఞ్చిత్తస్యైవ కుమ్భదాసత్వే ।
అహమహమికయా విబుధాః కలహం కలయన్తి కాన్తిమత్యమ్బ ॥ ౨౪ ॥
కిమిదం వదాద్భుతం తే కస్మింశ్చిల్లక్షితే కటాక్షేణ ।
బృంహాదీనాం హృదయం దీనత్వం యాతి కాన్తిమత్యమ్బ ॥ ౨౫ ॥
ప్రాయో రాయోపచితే మాయోపాయోల్బణాసురక్షపణే ।
గేయో జాయోరుబలే శ్రేయో భూయోఽస్తు కాన్తిమత్యమ్బ ॥ ౨౬ ॥
కరణం శరణం తవ లసదలకం కులకం గిరీశభాగ్యానామ్ ।
సరలం విరలం జయతి సకరుణం తరుణాం హి కాన్తిమత్యమ్బ ॥ ౨౭ ॥
శఙ్కరి నమాంసి వాణీ కిఙ్కరి దైతేయరాడ్భయఙ్కరి తే ।
కరవై మురవైర్యనుజే పురవైర్యభికేఽద్య కాన్తిమత్యమ్బ ॥ ౨౮ ॥
తవ సేవాం భువి కే వా నాకాఙ్క్షన్తే క్షమాభృతస్తనయే ।
త్వమివ భవేయుర్యది తే భజన్తి యే యాం హి కాన్తిమత్యమ్బ ॥ ౨౯ ॥
భవదవశిఖాభివీతం శీతలయేర్మాం కటాక్షవిక్షేపైః ।
కాదమ్బినీవ సలిలైః శిఖణ్డినం దేవి కాన్తిమత్యమ్బ ॥ ౩౦ ॥
త్వద్గుణపయఃకణం మే నిపీయ ముక్తేరలఙ్క్రియాం గిరతు ।
చేతఃశుక్తిర్ముక్తాం భక్తిమిషాం దేవి కాన్తిమత్యమ్బ ॥ ౩౧ ॥
గుణగణమహామణీనామాగమపాథోధిజన్మభాజాం తే ।
గుణతాం కదా ను భజతాం మమ ధిషణా దేవి కాన్తిమత్యమ్బ ॥ ౩౨ ॥
పాటీరచర్చితస్తని కోటీరకృతక్షపాధిరాట్కలికే ।
వీటీరసేన కవితాధాటీం కురు మేఽద్య కాన్తిమత్యమ్బ ॥ ౩౩ ॥
తవ కరుణాం కిం బ్రూమస్త్వామప్యేషానవేక్ష్య తూష్ణీకామ్ ।
ఊరీకరోతి పాపినమపి వినతం దేవి కాన్తిమత్యమ్బ ॥ ౩౪ ॥
ఈశోఽపి వినా భవతీం న చలితుమపి కిం పునర్వయం శక్తాః ।
కిముపేక్షసే ప్రసీద క్షితిధరకన్యేఽద్య కాన్తిమత్యమ్బ ॥ ౩౫ ॥
మన్మానసామ్రశాఖీ పల్లవితః పుష్పితోఽనురాగేణ ।
హర్షేణ చ ప్రసాదాల్లఘు తవ ఫలినోఽస్తు కాన్తిమత్యమ్బ ॥ ౩౬ ॥
ధ్యానామ్బరవసతేర్మమ మానసమేఘస్య దైన్యవర్షస్య ।
పదయుగలీ తవ శమ్పా లక్ష్మీం విదధాతు కాన్తిమత్యమ్బ ॥ ౩౭ ॥
కలితపనభానుతప్తం చిత్తచకోరం మమాతిశీతాభిః ।
జీవయ కటాక్షదమ్భజ్యోత్స్నాభిర్దేవి కాన్తిమత్యమ్బ ॥ ౩౮ ॥
జ్యోత్స్నాసధ్రీచీభిర్దుగ్ధశ్రీభిః కటాక్షవీచీభిః ।
శీతలయానీచీభిః కృపయా మాం దేవి కాన్తిమత్యమ్బ ॥ ౩౯ ॥
రుష్టా త్వమాగసా యది తర్జయ దృష్ట్యాపి నేక్షసే యది మామ్ ।
బాల ఇవ లోలచక్షుః కం శరణం యామి కాన్తిమత్యమ్బ ॥ ౪౦ ॥
విభవః కే కిం కర్తుం ప్రభవః కరుణా న చేత్తవాన్తేఽపి ।
నోచ్ఛ్వసితుం కృతమేభిస్త్వామీశ్వరి నౌమి కాన్తిమత్యమ్వ ॥ ౪౧ ॥
జిత్వా మదముఖరిపుగణమిత్వా త్వద్భక్తభావసామ్రాజ్యమ్ ।
గత్వా సుఖం జనోఽయం వర్తేత కదా ను కాన్తిమత్యమ్బ ॥ ౪౨ ॥
అఖిలదివిషదాలమ్బే పదయుగ్మం దేవి తే సదాఽఽలమ్బే ।
జగతాం గోమత్యమ్బ క్షితిధరకన్యేఽద్య కాన్తిమత్యమ్బ ॥ ౪౩ ॥
అత్రైవ కల్పవల్లీచిన్తామణిరస్తి కామధేనురపి ।
వేద్మి న కిం యది బుధతా పుంసా లభ్యేత కాన్తిమత్యమ్బ ॥ ౪౪ ॥
నాహం భజామి దైవం మనసాప్యన్యత్త్వమేవ దైవం మే ।
న మృషా భణామి శోధయ మానసమావిశ్య కాన్తిమత్యమ్బ ॥ ౪౫ ॥
ఖేదయసి మాం మృగం కిం మృగతృష్ణేవ ప్రసీద నౌమి శివే ।
మోదయ కృపయా నో చేత్క్వ ను యాయాం దేవి కాన్తిమత్యమ్బ ॥ ౪౬ ॥
కార్యం స్వేన స్వహితం కో నామ వదేదయం జనో వేత్తి ।
త్వం వా వదసి కిమస్మాద్గతిస్త్వమేవాస్య కాన్తిమత్యమ్బ ॥ ౪౭ ॥
ధన్యోఽస్తి కో మదన్యో దివి వా భువి వా కరోషి చేత్కరుణామ్ ।
ఇదమపి విశ్వం విశ్వం మమ హస్తే కిం చ కాన్తిమత్యమ్బ ॥ ౪౮ ॥
తరుణేన్దుచూడజాయే త్వాం మనుజా యే భజన్తి తేషాం తే ।
భూతిః పదాబ్జధూలిర్ధూలిర్భూతిస్తు కాన్తిమత్యమ్బ ॥ ౪౯ ॥
త్వామత్ర సేవతే యస్త్వత్సారూప్యం సమేత్య సోఽముత్ర ।
హరకేల్యాం త్వదసూయాపాత్రతి చిత్రాఙ్గి కాన్తిమత్యమ్బ ॥ ౫౦ ॥
చిత్రీయతే మనస్త్వాం దృష్ట్వా భాగ్యావతారమూర్తిం మే ।
కిఞ్చ సుధాబ్ధేర్లహరీవిహారితామేతి కాన్తిమత్యమ్బ ॥ ౫౧ ॥
కిరతు భవతీ కటాక్షాఞ్జలజసదృక్షాన్ రసేన తాదృక్షాన్ ।
కృతసురరక్షాన్మోహనదక్షాన్భీమస్య కాన్తిమత్యమ్బ ॥ ౫౨ ॥
మానసవార్ధినిలీనౌ రాగద్వేషౌ ప్రవోధవేదముషౌ ।
మధుకైటభౌ తవేక్షణమీనో మే హరతు కాన్తిమత్యమ్బ ॥ ౫౩ ॥
మఞ్జులభాషిణి వఞ్జులకుడ్మలలలితాలకే లసత్తిలకే ।
పాలయ కువలయనయనే బాలం మాం దేవి కాన్తిమత్యమ్వ ॥ ౫౪ ॥
పురమథనవిలోలాభిః పటులీలాభిః కటాక్షమాలాభిః ।
శుభశీలాభిః కువలయనీలాభిః పశ్య కాన్తిమత్యమ్బ ॥ ౫౫ ॥
కరుణారసార్ద్రనయనే శరణాగతపాలనైకకృతదీక్షే ।
ప్రగుణాభరణే పాలయ దీనం మాం దేవి కాన్తిమత్యమ్బ ॥ ౫౬ ॥
నరజన్మైవ వరం త్వద్భజనం యేన క్రియేత చేదస్మాత్ ।
కిమవరమేవం నో చేదతస్తదేవాస్తు కాన్తిమత్యమ్బ ॥ ౫౭ ॥
యద్దుర్లభం సురైరపి తన్నరజన్మాదిశో నమామ్యేతత్ ।
సార్థయ దానాద్భక్తేర్వ్యర్థయ మాన్యేన కాన్తిమత్యమ్బ ॥ ౫౮ ॥
జీవతి పఞ్చభిరేభిర్న వినాఽస్త్యేభిర్జనస్తనుం భజతే ।
తదపి తదాసీనాం త్వాం దరమపి నో వేత్తి కాన్తిమత్యమ్బ ॥ ౫౯ ॥
యత్ప్రేమద్విపవదనే షడ్వదనే వా కురుష్వ తన్మయి తే ।
జాత్వపి మా భూద్భేదః స్తోకేష్వస్మాసు కాన్తిమత్యమ్బ ॥ ౬౦ ॥
శమ్బరరుహరుచివదనే శమ్బరరిపుజీవికే హిమాద్రిసుతే ।
అమ్బరమధ్యే బమ్బరడమ్బరచికురేఽవ కాన్తిమత్యమ్బ ॥ ౬౧ ॥
మన్మానసపాఠీనం కలిపులినే క్రోధభానుసన్తప్తే ।
సిఞ్చ పరితో భ్రమన్తం కృపోర్మిభిర్దేవి కాన్తిమత్యమ్బ ॥ ౬౨ ॥
యమినః క్వ వేద ముకుటాన్యపి భవతీం భావయన్తి వా నో వా ।
యద్యేవం మమ హృదయం వేత్తు కథం బ్రూహి కాన్తిమత్యమ్బ ॥ ౬౩ ॥
క్లిశ్యత్యయం జనో బత జననాద్యైరిత్యహం శ్రితో భవతీమ్ ।
తత్రాప్యేవం యది వద తవ కిం మహిమాఽత్ర కాన్తిమత్యమ్బ ॥ ౬౪ ॥
వృజినాని సన్తు కిమతస్తేషాం ధూత్యై న కిం భవేద్వద తే ।
స్మరణం దృషదుత్క్షేపణమివ కాకగణస్య కాన్తిమత్యమ్బ ॥ ౬౫ ॥
ప్రసరతి తవ ప్రసాదే కిమలభ్యం వ్యత్యయే తు కిం లభ్యమ్ ।
లభ్యమలభ్యం కిం నస్తేన వినా దేవి కాన్తిమత్యమ్బ ॥ ౬౬ ॥
కిం చిన్తయామి సంవిచ్ఛరదుదయం త్వత్పదచ్ఛలం కతకమ్ ।
ఘృష్టం యది ప్రసీదేద్ధృదయజలం మేఽద్య కాన్తిమత్యమ్బ ॥ ౬౭ ॥
విభజతు తవ పదయుగలీ హంసీయోగీన్ద్రమానసైకచరీ ।
సంవిదసంవిత్పయసీ మిలితే హృది మేఽద్య కాన్తిమత్యమ్బ ॥ ౬౮ ॥
కియదాయుస్తత్రార్ధం స్వప్నే న హృతం కియచ్చ బాల్యాద్యైః ।
కియదస్తి కేన భజనం తృప్తిస్తవ కేన కాన్తిమత్యమ్బ ॥ ౬౯ ॥
వేద్మి న ధర్మమధర్మం కాయక్లేశోఽస్త్యదో విచారఫలమ్ ।
జానామ్యేకం భజనం తవ శుభదం హీతి కాన్తిమత్యమ్బ ॥ ౭౦ ॥
స్నిహ్యతి భోగే ద్రుహ్యతి యోగాయేదం వృథాఽద్య ముహ్యతి మే ।
హృదయం కిము స్వతో వా పరతో వా వేత్తి కాన్తిమత్యమ్బ ॥ ౭౧ ॥
న బిభీమో భవజలధేర్దరమపి దనుజారిసోదరి శివే తే ।
ఆస్తే కటాక్షవీక్షాతరణిర్నను దేవి కాన్తిమత్యమ్బ ॥ ౭౨ ॥
చిన్తామణౌ కరస్థేఽప్యటనం వీథీషు కిం బ్రువే మాతః ।
వద కిం మే త్వయి సత్యామన్యాశ్రయణే న కాన్తిమత్యమ్బ ॥ ౭౩ ॥
నరవర్ణనేన రసనా పరవనితావీక్షణేన నేత్రమపి ।
క్రౌర్యేణ మనోఽపి హతం భావ్యం తు న వేద్మి కాన్తిమత్యమ్బ ॥ ౭౪ ॥
త్రాసితసురపతితప్తం తప్తం కిం ధర్మమేవ వా కౢప్తమ్ ।
కిమపి న సఞ్చితమమితం వృజినమయే కిం తు కాన్తిమత్యమ్బ ॥ ౭౫ ॥
పాపీత్యుపేక్షసే చేత్పాతుం కాఽన్యా భవేద్వినా భవతీమ్ ।
కిమిదం న వేద్మి సోఽయం బకమన్త్రః కస్య కాన్తిమత్యమ్బ ॥ ౭౬ ॥
వఞ్చయితుం వృజినాద్యైర్ముగ్ధాన్భవతీం వినేతరాన్నేక్షే ।
కిమతః పరం కరిష్యసి విదితమిదం మేఽద్య కాన్తిమత్యమ్బ ॥ ౭౭ ॥
వఞ్చయసి మాం రుదన్తం బాలమివ ఫలేన మాం ధనాఢ్యేన ।
మాస్తు కదాపి మమేదం కైవల్యం దేహి కాన్తిమత్యమ్బ ॥ ౭౮ ॥
త్రయ్యా కిం మేఽద్య గుణే తవ విదితే యో యతస్తు సమ్భవతి ।
ఆస్తాం మౌక్తికలాభే సతి శుక్త్యా కిం ను కాన్తిమత్యమ్బ ॥ ౭౯ ॥
అద్భుతమిదం సకృద్యేన జ్ఞాతా వా శ్రియో దిశస్యేభ్యః ।
యే ఖలు భక్తాస్తేభ్యః కైవల్యం దిశసి కాన్తిమత్యమ్బ ॥ ౮౦ ॥
సురనైచికీవ విబుధాన్కాదమ్బినికేవ నీలకణ్ఠమపి ।
ప్రీణయసి మానసం మే శోభయ హంసీవ కాన్తిమత్యమ్బ ॥ ౮౧ ॥
కర్తుం మనఃప్రసాదం తవ మయి చేత్కిం కరిష్యతి వృజినమ్ ।
జలజవికాసే భానోః పరిపన్థితమో ను కాన్తిమత్యమ్బ ॥ ౮౨ ॥
తవ తు కరుణా స్రవన్త్యాం ప్రవహన్త్యాం స్తోకతా గతేతి మయా ।
లుఠతి స్ఫుటతి మనో మే నేదం జానాసి కాన్తిమత్యమ్బ ॥ ౮౩ ॥
శోధయితుముదాసీనా యది మాం పాత్రం కిమస్య పశ్యాహమ్ ।
మాదృశి కా వా వార్తా దాసజనే కాన్తిమత్యమ్బ ॥ ౮౪ ॥
అభజమనన్యగతిస్త్వాం కిం కుర్యాస్త్వం న వేద్మ్యతఃప్రభృతి ।
అవనే వాఽనవనే వా న విచారో మేఽస్తి కాన్తిమత్యమ్బ ॥ ౮౫ ॥
కిం వర్తతే మమాస్మాన్నిఖిలజగన్మస్తలాలితం భాగ్యమ్ ।
యమిహృదయపద్మహంసీం యత్త్వాం సేవేఽద్య కాన్తిమత్యమ్బ ॥ ౮౬ ॥
కర్తుం జగన్తి విధివద్భర్తుం హరివద్గిరీశవద్ధర్తుమ్ ।
లీలావతీ త్వమేవ ప్రతీయసే దేవి కాన్తిమత్యమ్బ ॥ ౮౭ ॥
కేచిద్విదన్తి భవతీం కేచిన్న విదన్తి దేవి సర్వమిదమ్ ।
త్వత్కృత్యం వద సత్యం కిం లబ్ధం తేన కాన్తిమత్యమ్బ ॥ ౮౮ ॥
శాస్త్రాణి కుక్షిపూర్త్యై స్ఫూర్త్యై నిగమాశ్చ కర్మణా కిం తైః ।
కిం తవ తత్త్వం జ్ఞేయం యైస్త్వత్కృపయైవ కాన్తిమత్యమ్బ ॥ ౮౯ ॥
కిం ప్రార్థయే పునః పునరవనే భవతీం వినా విచారః స్యాత్ ।
కస్యాః క ఇతి విదన్నపి దూయే మోహేన కాన్తిమత్యమ్బ ॥ ౯౦ ॥
విదుషస్త్వాం శరణం మే శాస్త్రశ్రమలేశవార్తయాపి కృతమ్ ।
కరజుషి నవనీతే కిం దుగ్ధవిచారేణ కాన్తిమత్యమ్బ ॥ ౯౧ ॥
ప్రణవోపనిషన్నిగమాగమయోగిమనఃస్వివాతితుఙ్గేషు ।
భాహి ప్రభేవ తరణేర్మమ హృది నిమ్నేఽపి కాన్తిమత్యమ్బ ॥ ౯౨ ॥
స్ఫుటితారుణమణిశోభం త్రుటితాభినవప్రవాలమృదులత్వమ్ ।
శ్రుతిశిఖరశేఖరం తే చరణాబ్జం స్తౌమి కాన్తిమత్యమ్బ ॥ ౯౩ ॥
తవ చరణామ్బుజభజనాదమృతరసస్యన్దినః కదాప్యన్యత్ ।
స్వప్నేఽపి కిఞ్చిదపి మే మా స్మ భవేద్దేవి కాన్తిమత్యమ్బ ॥ ౯౪ ॥
విస్మాపనం పురారేరస్మాదృగ్జీవికాం పరాత్పరమమ్ ।
సుషమామయం స్వరూపం సదా నిషేవేయ కాన్తిమత్యమ్బ ॥ ౯౫ ॥
మఙ్గలమస్త్వితి పిష్టం పినష్టి గీః సర్వమఙ్గలాయాస్తే ।
వశితజయాయాశ్చ తథా జయేతి వాదోఽపి కాన్తిమత్యమ్బ ॥ ౯౬ ॥
ఆశాసితుర్విభూత్యై భవతి భవత్యై హి మఙ్గలాశాస్తిః ।
స్వామిసమృద్ధ్యాశంసా భృత్యోన్నత్యై హి కాన్తిమత్యమ్బ ॥ ౯౭ ॥
నిగమైరపరిచ్ఛేద్యం క్వ వైభవం తేఽల్పధీః క్వ చాహమితి ।
తూష్ణీకం మాం భక్తిస్తవ ముఖరయతి స్మ కాన్తిమత్యమ్బ ॥ ౯౮ ॥
అనుకమ్పాపరవశితం కమ్పాతటసీమ్ని కల్పితావసథమ్ ।
ఉపనిషదాం తాత్పర్యం తవ రూపం స్తౌమి కాన్తిమత్యమ్బ ॥ ౯౯ ॥
జయ ధరణీధరతనయే జయ వేణువనాధిరాట్ప్రియే దేవి ।
జయ జమ్భభేదివినుతే జయ జగతామమ్బ కన్తిమత్యమ్బ ॥ ౧౦౦ ॥
గుణమఞ్జరిపిఞ్జరితం సున్దరరచితం విభూషణం సుదృశామ్ ।
గీతిశతకం భవత్యాః క్షయతు కటాక్షేణ కాన్తిమత్యమ్బ ॥ ౧౦౧ ॥
వప్తా యస్య మనీషిహారతరలః శ్రీవేఙ్కటేశో మహాన్-
మాతా యస్య పునః సరోజనిలయా సాధ్వీశిరోభూషణమ్ ।
శ్రీవత్సాభిజనామృతామ్బుధివిధుః సోఽయం కవిః సున్దరో
దేవ్యా గీతిశతం వ్యధత్త మహితం శ్రీకాన్తిమత్యా ముదే ॥ ౧౦౨ ॥
ఇతి శ్రీసున్దరాచార్యప్రణీతం దేవీగీతిశతకం సమ్పూర్ణమ్ ॥