॥ Sri Ganesha Avatara Stotram Telugu Lyrics ॥
॥ శ్రీ గణేశావతార స్తోత్రం ॥
అంగిరస ఉవాచ ।
అనంతా అవతారాశ్చ గణేశస్య మహాత్మనః ।
న శక్యతే కథాం వక్తుం మయా వర్షశతైరపి ॥ ౧ ॥
సంక్షేపేణ ప్రవక్ష్యామి ముఖ్యానాం ముఖ్యతాం గతాన్ ।
అవతారాంశ్చ తస్యాష్టౌ విఖ్యాతాన్ బ్రహ్మధారకాన్ ॥ ౨ ॥
వక్రతుండావతారశ్చ దేహినాం బ్రహ్మధారకః ।
మత్సురాసురహంతా స సింహవాహనగః స్మృతః ॥ ౩ ॥
ఏకదంతావతారో వై దేహినాం బ్రహ్మధారకః ।
మదాసురస్య హంతా స ఆఖువాహనగః స్మృతః ॥ ౪ ॥
మహోదర ఇతి ఖ్యాతో జ్ఞానబ్రహ్మప్రకాశకః ।
మోహాసురస్య శత్రుర్వై ఆఖువాహనగః స్మృతః ॥ ౫ ॥
గజాననః స విజ్ఞేయః సాంఖ్యేభ్యః సిద్ధిదాయకః ।
లోభాసురప్రహర్తా చ మూషకగః ప్రకీర్తితః ॥ ౬ ॥
లంబోదరావతారో వై క్రోధాసురనిబర్హణః ।
ఆఖుగః శక్తిబ్రహ్మా సన్ తస్య ధారక ఉచ్యతే ॥ ౭ ॥
వికటో నామ విఖ్యాతః కామాసురప్రదాహకః ।
మయూరవాహనశ్చాయం సౌరమాత్మధరః స్మృతః ॥ ౮ ॥
విఘ్నరాజావతారశ్చ శేషవాహన ఉచ్యతే ।
మమాసురప్రహంతా స విష్ణుబ్రహ్మేతి వాచకః ॥ ౯ ॥
ధూమ్రవర్ణావతారశ్చాభిమానాసురనాశకః ।
ఆఖువాహనతాం ప్రాప్తః శివాత్మకః స ఉచ్యతే ॥ ౧౦ ॥
ఏతేఽష్టౌ తే మయా ప్రోక్తా గణేశాంశా వినాయకాః ।
ఏషాం భజనమాత్రేణ స్వస్వబ్రహ్మప్రధారకాః ॥ ౧౧ ॥
స్వానందవాసకారీ స గణేశానః ప్రకథ్యతే ।
స్వానందే యోగిభిర్దృష్టో బ్రహ్మణి నాత్ర సంశయః ॥ ౧౨ ॥
తస్యావతారరూపాశ్చాష్టౌ విఘ్నహరణాః స్మృతాః ।
స్వానందభజనేనైవ లీలాస్తత్ర భవంతి హి ॥ ౧౩ ॥
మాయా తత్ర స్వయం లీనా భవిష్యతి సుపుత్రక ।
సంయోగే మౌనభావశ్చ సమాధిః ప్రాప్యతే జనైః ॥ ౧౪ ॥
అయోగే గణరాజస్య భజనే నైవ సిద్ధ్యతి ।
మాయాభేదమయం బ్రహ్మ నిర్వృత్తిః ప్రాప్యతే పరా ॥ ౧౫ ॥
యోగాత్మకగణేశానో బ్రహ్మణస్పతివాచకః ।
తత్ర శాంతిః సమాఖ్యాతా యోగరూపా జనైః కృతా ॥ ౧౬ ॥
నానాశాంతిప్రమోదశ్చ స్థానే స్థానే ప్రకథ్యతే ।
శాంతీనాం శాంతిరూపా సా యోగశాంతిః ప్రకీర్తితా ॥ ౧౭ ॥
యోగస్య యోగతాదృష్టా సర్వబ్రహ్మ సుపుత్రక ।
న యోగాత్పరమం బ్రహ్మ బ్రహ్మభూతేన లభ్యతే ॥ ౧౮ ॥
ఏతదేవ పరం గుహ్యం కథితం వత్స తేఽలిఖమ్ ।
భజ త్వం సర్వభావేన గణేశం బ్రహ్మనాయకమ్ ॥ ౧౯ ॥
పుత్రపౌత్రాదిప్రదం స్తోత్రమిదం శోకవినాశనమ్ ।
ధనధాన్యసమృద్ధ్యాదిప్రదం భావి న సంశయః ॥ ౨౦ ॥
ధర్మార్థకామమోక్షాణాం సాధనం బ్రహ్మదాయకమ్ ।
భక్తిదృఢకరం చైవ భవిష్యతి న సంశయః ॥ ౨౧ ॥
ఇతి శ్రీముద్గలపురాణే గణేశావతారస్తోత్రం సంపూర్ణమ్ ।
– Chant Stotra in Other Languages –
Sri Ganesha Stotram » Ganesha Avatara Stotram in Lyrics in Sanskrit » English » Kannada » Tamil