॥ Hymn to Kottai Ishvara Telugu Lyrics ॥
॥ గోష్ఠేశ్వరాష్టకమ్ ॥
సత్యజ్ఞానమనన్తమద్వయసుఖాకారం గుహాన్తఃస్థిత-
శ్రీచిద్వ్యోమ్ని చిదర్కరూపమమలం యద్ బ్రహ్మ తత్త్వం పరమ్ ।
నిర్బీజస్థలమధ్యభాగవిలసద్గోష్ఠోత్థవల్మీక-
సమ్భూతం సత్ పురతో విభాత్యహహ తద్గోష్ఠేశలిఙ్గాత్మనా ॥ ౧ ॥
సర్వజ్ఞత్వనిదానభూతకరుణామూర్తిస్వరూపామలా
చిచ్ఛక్తిర్జడశక్తికైతవవశాత్ కాఞ్చీనదీత్వం గతా ।
వల్మీకాశ్రయగోష్ఠనాయకపరబ్రహ్మైక్యకర్త్రీ ముహుః
నృణాం స్నానకృతాం విభాతి సతతం శ్రీపిప్పిలారణ్యగా ॥ ౨ ॥
శ్రీమద్రాజతశైలశృఙ్గవిలసచ్ఛ్రీమద్గుహాయాం మహీ-
వార్వహ్న్యాశుగఖాత్మికీ విజయతే యా పఞ్చలిఙ్గాకృతిః ।
సైవాశక్తజనేషు భూరికృపయా శ్రీపిప్పిలారణ్యగే
వల్మీకే కిల గోష్ఠనాయకమహాలిఙ్గాత్మనా భాసతే ॥ ౩ ॥
యత్రాద్యాప్యణిమాదిసిద్ధినిపుణాః సిద్ధేశ్వరాణాం గణాః
తత్తద్దివ్యగుహాసు సన్తి యమిదృగ్దృశ్యా మహావైభవాః ।
యత్రైవ ధ్వనిరర్ధరాత్రసమయే పుణ్యాత్మభిః శ్రూయతే
పూజావాద్యసముత్థితః సుమనసాం తం రాజతాద్రిం భజే ॥ ౪ ॥
శ్రీమద్రాజతపర్వతాకృతిధరస్యార్ధేన్దుచూడామణే-
ర్లోమైకం కిల వామకర్ణజనితం కాఞ్చీతరుత్వం గతమ్ ।
తస్మాదుత్తరవాహినీ భువి భవాన్యాఖ్యా తతః పూర్వగా
కాఞ్చీనద్యభిధా చ పశ్చిమగతా నిలానదీ పావనీ ॥ ౫ ॥
శ్రీమద్భార్గవహస్తలగ్నపరశువ్యాఘట్టనాద్ దారితే
క్షోణీధ్రే సతి వామదక్షిణగిరిద్వన్ద్వాత్మనా భేదితే ।
తన్మధ్యప్రథితే విదారధరణీభాగేతినద్యాశ్రయే
సా నీలాతటినీ పునాతి హి సదా కల్పాదిగాన్ ప్రాణినః ॥ ౬ ॥
కల్పాదిస్థలమధ్యభాగనిలయే శ్రీవిశ్వనాథాభిధే
లిఙ్గే పిప్పిలకాననాన్తరగతశ్రీగోష్ఠనాథాభిధః ।
శ్రీశమ్భుః కరుణానిధిః ప్రకురుతే సాంనిధ్యమన్యాదృశం
తత్పత్నీ చ విరాజతేఽత్ర తు విశాలాక్షీతి నామాఙ్కితా ॥ ౭ ॥
శ్రీకాఞ్చీతరుమూలపావనతలం భ్రాజత్త్రివేణ్యుద్భవం
త్యక్త్వాన్యత్ర విధాతుమిచ్ఛతి ముహుర్యస్తీర్థయాత్రాదికమ్ ।
సోఽయం హస్తగతం విహాయ కుధియా శాఖాగ్రలీనం వృథా
యష్ట్యా తాడితుమీహతే జడమతిర్నిఃసారతుచ్ఛం ఫలమ్ ॥ ౮ ॥
శ్రీమద్రాజతశైలోత్థత్రివేణీమహిమాఙ్కితమ్ ।
గోష్ఠేశ్వరాష్టకమిదం సారజ్ఞైరవలోక్యతామ్ ॥ ౯ ॥
ఇతి గోష్ఠేశ్వరాష్టకం సమ్పూర్ణమ్
– Chant Stotra in Other Languages –
Hymn to Kottai Ishvara Lyrics in Sanskrit » English » Bengali » Gujarati » Kannada » Malayalam » Odia » Tamil