॥ Maya Panchakam Telugu Lyrics ॥
॥ మాయాపఞ్చకమ్ ॥
నిరుపమనిత్యనిరంశకేఽప్యఖణ్డే
మయి చితి సర్వవికల్పనాదిశూన్యే ।
ఘటయతి జగదీశజీవభేదం
త్వఘటితఘటనాపటీయసీ మాయా ॥ ౧॥
శ్రుతిశతనిగమాన్తశోధకాన-
ప్యహహ ధనాదినిదర్శనేన సద్యః ।
కలుషయతి చతుష్పదాద్యభిన్నా-
నఘటితఘటనాపటీయసీ మాయా ॥ ౨॥
సుఖచిదఖణ్డవిబోధమద్వితీయం
వియదనలాదివినిర్మితే నియోజ్య ।
భ్రమయతి భవసాగరే నితాన్తం
త్వఘటితఘటనాపటీయసీ మాయా ॥ ౩॥
అపగతగుణవర్ణజాతిభేదే
సుఖచితి విప్రవిడాద్యహంకృతిం చ ।
స్ఫుటయతి సుతదారగేహమోహం
త్వఘటితఘటనాపటీయసీ మాయా ॥ ౪॥
విధిహరిహరవిభేదమప్యఖణ్డే
బత విరచయ్య బుధానపి ప్రకామమ్ ।
భ్రమయతి హరిహరభేదభావా-
నఘటితఘటనాపటీయసీ మాయా ॥ ౫॥
ఇతి శ్రీమత్పరమహంసపరివ్రాజకాచార్యస్య
శ్రీగోవిన్దభగవత్పూజ్యపాదశిష్యస్య
శ్రీమచ్ఛఙ్కరభగవతః కృతౌ
మాయాపఞ్చకమ్
సమ్పూర్ణమ్ ॥
– Chant Stotra in Other Languages –
Maya Panchakam in Sanskrit – English – Bengali – Gujarati – – Kannada – Malayalam – Odia – Telugu – Tamil