Narayaniyam Ekadasadasakam In Telugu – Narayaneeyam Dasakam 11

Narayaniyam Ekadasadasakam in Telugu:

॥ నారాయణీయం ఏకాదశదశకమ్ ॥

ఏకాదశదశకమ్ (౧౧) సనకాదీనాం వైకుణ్ఠదర్శనమ్ – హిరణ్యాక్షస్య తథా హిరణ్యకశిపోః జననమ్ ।

క్రమేణ సర్గే పరివర్ధమానే
కదాపి దివ్యాః సనకాదయస్తే ।
భవద్విలోకాయ వికుణ్ఠలోకం
ప్రపేదిరే మారుతమన్దిరేశ ॥ ౧౧-౧ ॥

మనోజ్ఞనైశ్రేయసకాననాద్యై-
రనేకవాపీమణిమన్దిరైశ్చ ।
అనోపమం తం భవతో నికేతం
మునీశ్వరాః ప్రాపురతీతకక్ష్యాః ॥ ౧౧-౨ ॥

భవద్దిదృక్షూన్భవనం వివిక్షూన్
ద్వాఃస్థౌ జయస్తాన్ విజయోఽప్యరున్ధామ్ ।
తేషాం చ చిత్తే పదమాప కోపః
సర్వం భవత్ప్రేరణయైవ భూమన్ ॥ ౧౧-౩ ॥

వైకుణ్ఠలోకానుచితప్రచేష్టౌ
కష్టౌ యువాం దైత్యగతిం భజేతమ్ ।
ఇతి ప్రశప్తౌ భవదాశ్రయౌ తౌ
హరిస్మృతిర్నోఽస్త్వితి నేమతుస్తాన్ ॥ ౧౧-౪ ॥

తదేతదాజ్ఞాయ భవానవాప్తః
సహైవ లక్ష్మ్యా బహిరంబుజాక్ష ।
ఖగేశ్వరాంసార్పితచారుబాహు-
రానన్దయంస్తానభిరామమూర్త్యా ॥ ౧౧-౫ ॥

ప్రసాద్య గీర్భిః స్తువతో మునీన్ద్రా-
ననన్యనాథావథ పార్షదౌ తౌ ।
సంరంభయోగేన భవైస్త్రిభిర్మా-
ముపేతమిత్యాత్తకృపం న్యగాదీః ॥ ౧౧-౬ ॥

త్వదీయభృత్యావథ కశ్యపాత్తౌ
సురారివీరావుదితౌ దితౌ ద్వౌ ।
సన్ధ్యాసముత్పాదనకష్టచేష్టౌ
యమౌ చ లోకస్య యమావివాన్యౌ ॥ ౧౧-౭ ॥

హిరణ్యపూర్వః కశిపుః కిలైకః
పరో హిరణ్యాక్ష ఇతి ప్రతీతః ।
ఉభౌ భవన్నాథమశేషలోకం
రుషా న్యరున్ధాం నిజవాసనాన్ధౌ ॥ ౧౧-౮ ॥

తయోర్హిరణ్యాక్షమహాసురేన్ద్రో
రణాయ ధావన్ననవాప్తవైరీ ।
భవత్ప్రియాం క్ష్మాం సలిలే నిమజ్య
చచార గర్వాద్వినదన్ గదావాన్ ॥ ౧౧-౯ ॥

తతో జలేశాత్సదృశం భవన్తం
నిశమ్య బభ్రామ గవేషయంస్త్వామ్ ।
భక్తైకదృశ్యః స కృపానిధే త్వం
నిరున్ధి రోగాన్ మరుదాలయేశ ॥ ౧౧-౧౦ ॥

See Also  Vrinda Devi Ashtakam In Telugu

ఇతి ఏకాదశదశకం సమాప్తమ్ ।

– Chant Stotras in other Languages –

Narayaniyam Ekadasadasakam in English –  Kannada – Telugu – Tamil