Narayaniyam Ekonacatvarimsadasakam In Kannada

Narayaniyam Ekonacatvarimsadasakam in Kannada:

॥ ನಾರಾಯಣೀಯಂ ಏಕೋನಚತ್ವಾರಿಂಶದಶಕಮ್ ॥

ನಾರಾಯಣೀಯಂ ಏಕೋನಚತ್ವಾರಿಂಶದಶಕಮ್ (೩೯) – ಯೋಗಮಾಯಾ ಪ್ರಾದುರ್ಭಾವಂ ತಥಾ ಗೋಕುಲೇ ಕೃಷ್ಣಜನ್ಮೋತ್ಸವಮ್ ॥

ಭವನ್ತಮಯಮುದ್ವಹನ್ ಯದುಕುಲೋದ್ವಹೋ ನಿಸ್ಸರನ್
ದದರ್ಶ ಗಗನೋಚ್ಚಲಜ್ಜಲಭರಾಂ ಕಲಿನ್ದಾತ್ಮಜಾಮ್ ।
ಅಹೋ ಸಲಿಲಸಞ್ಚಯಃ ಸ ಪುನರೈನ್ದ್ರಜಾಲೋದಿತೋ
ಜಲೌಘ ಇವ ತತ್ಕ್ಷಣಾತ್ಪ್ರಪದಮೇಯತಾಮಾಯಯೌ ॥ ೩೯-೧ ॥

ಪ್ರಸುಪ್ತಪಶುಪಾಲಿಕಾಂ ನಿಭೃತಮಾರುದದ್ಬಾಲಿಕಾ-
ಮಪಾವೃತಕವಾಟಿಕಾಂ ಪಶುಪವಾಟಿಕಾಮಾವಿಶನ್ ।
ಭವನ್ತಮಯಮರ್ಪಯನ್ ಪ್ರಸವತಲ್ಪಕೇ ತತ್ಪದಾ-
ದ್ವಹನ್ ಕಪಟಕನ್ಯಕಾಂ ಸ್ವಪುರಮಾಗತೋ ವೇಗತಃ ॥ ೩೯-೨ ॥

ತತಸ್ತ್ವದನುಜಾರವಕ್ಷಪಿತನಿದ್ರವೇಗದ್ರವ-
ದ್ಭಟೋತ್ಕರನಿವೇದಿತಪ್ರಸವವಾರ್ತಯೈವಾರ್ತಿಮಾನ್ ।
ವಿಮುಕ್ತಚಿಕುರೋತ್ಕರಸ್ತ್ವರಿತಮಾಪತನ್ ಭೋಜರಾ-
ಡತುಷ್ಟ ಇವ ದೃಷ್ಟವಾನ್ ಭಗಿನಿಕಾಕರೇ ಕನ್ಯಕಾಮ್ ॥ ೩೯-೩ ॥

ಧ್ರುವಂ ಕಪಟಶಾಲಿನೋ ಮಧುಹರಸ್ಯ ಮಾಯಾ ಭವೇ-
ದಸಾವಿತಿ ಕಿಶೋರಿಕಾಂ ಭಗಿನಿಕಾಕರಾಲಿಙ್ಗಿತಾಮ್ ।
ದ್ವಿಪೋ ನಲಿನಿಕಾನ್ತರಾದಿವ ಮೃಣಾಲಿಕಾಮಾಕ್ಷಿಪ-
ನ್ನಯಂ ತ್ವದನುಜಾಮಜಾಮುಪಲಪಟ್ಟಕೇ ಪಿಷ್ಟವಾನ್ ॥ ೩೯-೪ ॥

ತತೋ ಭವದುಪಾಸಕೋ ಝಟಿತಿ ಮೃತ್ಯುಪಾಶಾದಿವ
ಪ್ರಮುಚ್ಯ ತರಸೈವ ಸಾ ಸಮಧಿರೂಢರೂಪಾನ್ತರಾ ।
ಅಧಸ್ತಲಮಜಗ್ಮುಷೀ ವಿಕಸದಷ್ಟಬಾಹುಸ್ಫುರ-
ನ್ಮಹಾಯುಧಮಹೋ ಗತಾ ಕಿಲ ವಿಹಾಯಸಾ ದಿದ್ಯುತೇ ॥ ೩೯-೫ ॥

ನೃಶಂಸತರ ಕಂಸ ತೇ ಕಿಮು ಮಯಾ ವಿನಿಷ್ಪಿಷ್ಟಯಾ
ಬಭೂವ ಭವದನ್ತಕಃ ಕ್ವಚನ ಚಿನ್ತ್ಯತಾಂ ತೇ ಹಿತಮ್ ।
ಇತಿ ತ್ವದನುಜಾ ವಿಭೋ ಖಲಮುದೀರ್ಯ ತಂ ಜಗ್ಮುಷೀ
ಮರುದ್ಗಣಪಣಾಯಿತಾ ಭುವಿ ಚ ಮನ್ದಿರಾಣ್ಯೇಯುಷೀ ॥ ೩೯-೬ ॥

ಪ್ರಗೇ ಪುನರಗಾತ್ಮಜಾವಚನಮೀರಿತಾ ಭೂಭುಜಾ
ಪ್ರಲಂಬಬಕಪೂತನಾಪ್ರಮುಖದಾನವಾ ಮಾನಿನಃ ।
ಭವನ್ನಿಧನಕಾಮ್ಯಯಾ ಜಗತಿ ಬಭ್ರಮುರ್ನಿರ್ಭಯಾಃ
ಕುಮಾರಕವಿಮಾರಕಾಃ ಕಿಮಿವ ದುಷ್ಕರಂ ನಿಷ್ಕೃಪೈಃ ॥ ೩೯-೭ ॥

ತತಃ ಪಶುಪಮನ್ದಿರೇ ತ್ವಯಿ ಮುಕುನ್ದ ನನ್ದಪ್ರಿಯಾ-
ಪ್ರಸೂತಿಶಯನೇಶಯೇ ರುದತಿ ಕಿಞ್ಚಿದಞ್ಚತ್ಪದೇ ।
ವಿಬುಧ್ಯ ವನಿತಾಜನೈಸ್ತನಯಸಂಭವೇ ಘೋಷಿತೇ
ಮುದಾ ಕಿಮು ವದಾಮ್ಯಹೋ ಸಕಲಮಾಕುಲಂ ಗೋಕುಲಮ್ ॥ ೩೯-೮ ॥

See Also  Narayaniyam Pancamadasakam In English – Narayaneeyam Dasakam 5

ಅಹೋ ಖಲು ಯಶೋದಯಾ ನವಕಲಾಯಚೇತೋಹರಂ
ಭವನ್ತಮಲಮನ್ತಿಕೇ ಪ್ರಥಮಮಾಪಿಬನ್ತ್ಯಾ ದೃಶಾ ।
ಪುನಃ ಸ್ತನಭರಂ ನಿಜಂ ಸಪದಿ ಪಾಯಯನ್ತ್ಯಾ ಮುದಾ
ಮನೋಹರತನುಸ್ಪೃಶಾ ಜಗತಿ ಪುಣ್ಯವನ್ತೋ ಜಿತಾಃ ॥ ೩೯-೯ ॥

ಭವತ್ಕುಶಲಕಾಮ್ಯಯಾ ಸ ಖಲು ನನ್ದಗೋಪಸ್ತದಾ
ಪ್ರಮೋದಭರಸಙ್ಕುಲೋ ದ್ವಿಜಕುಲಾಯ ಕಿಂ ನಾದದಾತ್ ।
ತಥೈವ ಪಶುಪಾಲಕಾಃ ಕಿಮು ನ ಮಙ್ಗಲಂ ತೇನಿರೇ
ಜಗತ್ರಿತಯಮಙ್ಗಲ ತ್ವಮಿಹ ಪಾಹಿ ಮಾಮಾಮಯಾತ್ ॥ ೩೯-೧೦ ॥

ಇತಿ ಏಕೋನಚತ್ವಾರಿಂಶದಶಕಂ ಸಮಾಪ್ತಮ್ ।

– Chant Stotras in other Languages –

Narayaniyam Ekonacatvarimsadasakam in English – Kannada – TeluguTamil