Narayaniyam Trisastitamadasakam In Telugu – Narayaneyam Dasakam 63

Narayaniyam Trisastitamadasakam in Telugu:

॥ నారాయణీయం త్రిషష్టితమదశకమ్ ॥

త్రిషష్టితమదశకమ్ (౬౩) – గోవర్ధనోద్ధారణమ్

దదృశిరే కిల తత్క్షణమక్షత-
స్తనితజృంభితకమ్పితదిక్తటాః ।
సుషమయా భవదఙ్గతులాం గతా
వ్రజపదోపరి వారిధరాస్త్వయా ॥ ౬౩-౧ ॥

విపులకరకమిశ్రైస్తోయధారానిపాతై-
ర్దిశి దిశి పశుపానాం మణ్డలే దణ్డ్యమానే ।
కుపితహరికృతాన్నః పాహి పాహీతి తేషాం
వచనమజిత శ్రుణ్వన్మా బిభీతేత్యభాణీః ॥ ౬౩-౨ ॥

కుల ఇహ ఖలు గోత్రో దైవతం గోత్రశత్రో-
ర్విహతిమిహ స రున్ధ్యాత్కో నుః వః సంశాయోఽస్మిన్ ।
ఇతి సహసితవాదీ దేవ గోవర్ధనాద్రిం
త్వరితముదముమూలో మూలతో బాలదోర్భ్యామ్ ॥ ౬౩-౩ ॥

తదను గిరివరస్య ప్రోద్ధృతస్యాస్య తావత్
సికతిలమృదుదేశే దూరతో వారితాపే ।
పరికరపరిమిశ్రాన్ధేనుగోపానధస్తా-
దుపనిదధదధత్థా హస్తపద్మేన శైలమ్ ॥ ౬౩-౪ ॥

భవతి విధృతశైలే బాలికాభిర్వయస్యై-
రపి విహితవిలాసం కేలిలాపాదిలోలే ।
సవిధమిలితధేనూరేకహస్తేన కణ్డూ-
యతి సతి పశుపాలాస్తోషమైషన్త సర్వే ॥ ౬౩-౫ ॥

అతిమహాన్ గిరిరేష తు వామకే
కరసరోరుహి తే ధరతే చిరమ్ – [**తం ధరతే**]
కిమిదమద్భుతమద్రిబలం న్వితి
త్వదవలోకిభిరాకథి గోపకైః ॥ ౬౩-౬ ॥

అహహ ధార్ష్ట్యమముష్య వటోర్గిరిం
వ్యథితబాహురసావవరోపయేత్ ।
ఇతి హరిస్త్వయి బద్ధవిగర్హణో
దివససప్తకముగ్రమవర్షయత్ ॥ ౬౩-౭ ॥

అచలతి త్వయి దేవ పదాత్పదం
గలితసర్వజలే చ ఘనోత్కరే ।
అపహృతే మరుతా మరుతాం పతి-
స్త్వదభిశఙ్కితధీః సముపాద్రవత్ ॥ ౬౩-౮ ॥

శమముపేయుషి వర్షభరే తదా
పశుపధేనుకులే చ వినిర్గతే ।
భువి విభో సముపాహితభూధరః
ప్రముదితైః పశుపైః పరిరేభిషే ॥ ౬౩-౯ ॥

See Also  Shiva Sahasranama Stotram In Telugu

ధరణిమేవ పురా ధృతవానసి
క్షితిధరోద్ధరణే తవ కః శ్రమః ।
ఇతి నుతస్త్రిదశైః కమలాపతే
గురుపురాలయ పాలయ మాం గదాత్ ॥ ౬౩-౧౦ ॥

ఇతి త్రిషష్టితమదశకం సమాప్తమ్ ।

– Chant Stotras in other Languages –

Narayaneeyam Trisastitamadasakam in EnglishKannada – Telugu – Tamil