॥ Vishvakarma’s Surya Ashtottara Shatanama Stotram Kannada Lyrics ॥
॥ ನರಸಿಂಹಪುರಾಣೇ ಸೂರ್ಯಾಷ್ಟೋತ್ತರಶತನಾಮಸ್ತೋತ್ರಂ ವಿಶ್ವಕರ್ಮಕೃತ ॥
ಭರದ್ವಾಜ ಉವಾಚ —
ಯೈಃ ಸ್ತುತೋ ನಾಮಭಿಸ್ತೇನ ಸವಿತಾ ವಿಶ್ವಕರ್ಮಣಾ ।
ತಾನ್ಯಹಂ ಶ್ರೋತುಮಿಚ್ಛಾಮಿ ವದ ಸೂತ ವಿವಸ್ವತಃ ॥ 1 ॥
ಸೂತ ಉವಾಚ —
ತಾನಿ ಮೇ ಶೃಣು ನಾಮಾನಿ ಯೈಃ ಸ್ತುತೋ ವಿಶ್ವಕರ್ಮಣಾ ।
ಸವಿತಾ ತಾನಿ ವಕ್ಷ್ಯಾಮಿ ಸರ್ವಪಾಪಹರಾಣಿ ತೇ ॥ 2 ॥
ಆದಿತ್ಯಃ ಸವಿತಾ ಸೂರ್ಯಃ ಖಗಃ ಪೂಷಾ ಗಭಸ್ತಿಮಾನ್ ।
ತಿಮಿರೋನ್ಮಥನಃ ಶಮ್ಭುಸ್ತ್ವಷ್ಟಾ ಮಾರ್ತಂಡ ಆಶುಗಃ ॥ 3 ॥
ಹಿರಣ್ಯಗರ್ಭಃ ಕಪಿಲಸ್ತಪನೋ ಭಾಸ್ಕರೋ ರವಿಃ ।
ಅಗ್ನಿಗರ್ಭೋಽದಿತೇಃ ಪುತ್ರಃ ಶಮ್ಭುಸ್ತಿಮಿರನಾಶನಃ ॥ 4 ॥
ಅಂಶುಮಾನಂಶುಮಾಲೀ ಚ ತಮೋಘ್ನಸ್ತೇಜಸಾಂ ನಿಧಿಃ ।
ಆತಪೀ ಮಂಡಲೀ ಮೃತ್ಯುಃ ಕಪಿಲಃ ಸರ್ವತಾಪನಃ ॥ 5 ॥
ಹರಿರ್ವಿಶ್ವೋ ಮಹಾತೇಜಾಃ ಸರ್ವರತ್ನಪ್ರಭಾಕರಃ ।
ಅಂಶುಮಾಲೀ ತಿಮಿರಹಾ ಋಗ್ಯಜುಸ್ಸಾಮಭಾವಿತಃ ॥ 6 ॥
ಪ್ರಾಣಾವಿಷ್ಕರಣೋ ಮಿತ್ರಃ ಸುಪ್ರದೀಪೋ ಮನೋಜವಃ ।
ಯಜ್ಞೇಶೋ ಗೋಪತಿಃ ಶ್ರೀಮಾನ್ ಭೂತಜ್ಞಃ ಕ್ಲೇಶನಾಶನಃ ॥ 7 ॥
ಅಮಿತ್ರಹಾ ಶಿವೋ ಹಂಸೋ ನಾಯಕಃ ಪ್ರಿಯದರ್ಶನಃ ।
ಶುದ್ಧೋ ವಿರೋಚನಃ ಕೇಶೀ ಸಹಸ್ರಾಂಶುಃ ಪ್ರತರ್ದನಃ ॥ 8 ॥
ಧರ್ಮರಶ್ಮಿಃ ಪತಂಗಶ್ಚ ವಿಶಾಲೋ ವಿಶ್ವಸಂಸ್ತುತಃ ।
ದುರ್ವಿಜ್ಞೇಯಗತಿಃ ಶೂರಸ್ತೇಜೋರಾಶಿರ್ಮಹಾಯಶಾಃ ॥ 9 ॥
ಭ್ರಾಜಿಷ್ಣುರ್ಜ್ಯೋತಿಷಾಮೀಶೋ ವಿಜಿಷ್ಣುರ್ವಿಶ್ವಭಾವನಃ ।
ಪ್ರಭವಿಷ್ಣುಃ ಪ್ರಕಾಶಾತ್ಮಾ ಜ್ಞಾನರಾಶಿಃ ಪ್ರಭಾಕರಃ ॥ 10 ॥
ಆದಿತ್ಯೋ ವಿಶ್ವದೃಗ್ ಯಜ್ಞಕರ್ತಾ ನೇತಾ ಯಶಸ್ಕರಃ ।
ವಿಮಲೋ ವೀರ್ಯವಾನೀಶೋ ಯೋಗಜ್ಞೋ ಯೋಗಭಾವನಃ ॥ 11 ॥
ಅಮೃತಾತ್ಮಾ ಶಿವೋ ನಿತ್ಯೋ ವರೇಣ್ಯೋ ವರದಃ ಪ್ರಭುಃ ।
ಧನದಃ ಪ್ರಾಣದಃ ಶ್ರೇಷ್ಠಃ ಕಾಮದಃ ಕಾಮರೂಪಧೃಕ್ ॥ 12 ॥
ತರಣಿಃ ಶಾಶ್ವತಃ ಶಾಸ್ತಾ ಶಾಸ್ತ್ರಜ್ಞಸ್ತಪನಃ ಶಯಃ ।
ವೇದಗರ್ಭೋ ವಿಭುರ್ವೀರಃ ಶಾನ್ತಃ ಸಾವಿತ್ರಿವಲ್ಲಭಃ ॥ 13 ॥
ಧ್ಯೇಯೋ ವಿಶ್ವೇಶ್ವರೋ ಭರ್ತಾ ಲೋಕನಾಥೋ ಮಹೇಶ್ವರಃ ।
ಮಹೇನ್ದ್ರೋ ವರುಣೋ ಧಾತಾ ವಿಷ್ಣುರಗ್ನಿರ್ದಿವಾಕರಃ ॥ 14 ॥
ಏತೈಸ್ತು ನಾಮಭಿಃ ಸೂರ್ಯಃ ಸ್ತುತಸ್ತೇನ ಮಹಾತ್ಮನಾ ।
ಉವಾಚ ವಿಶ್ವಕರ್ಮಾಣಂ ಪ್ರಸನ್ನೋ ಭಗವಾನ್ ರವಿಃ ॥ 15 ॥
ಭ್ರಮಿಮಾರೋಪ್ಯ ಮಾಮತ್ರ ಮಂಡಲಂ ಮಮ ಶಾತಯ ।
ತ್ವತ್ಬುದ್ಧಿಸ್ಥಂ ಮಯಾ ಜ್ಞಾತಮೇವಮೌಷ್ಣ್ಯಂ ಶಮಂ ವ್ರಜೇತ್ ॥ 16 ॥
ಇತ್ಯುಕ್ತೋ ವಿಶ್ವಕರ್ಮಾ ಚ ತಥಾ ಸ ಕೃತವಾನ್ ದ್ವಿಜ ।
ಶಾನ್ತೋಷ್ಣಃ ಸವಿತಾ ತಸ್ಯ ದುಹಿತುರ್ವಿಶ್ವಕರ್ಮಣಃ ॥ 17 ॥
ಸಂಜ್ಞಾಯಾಶ್ಚಾಭವದ್ವಿಪ್ರ ಭಾನುಸ್ತ್ವಷ್ಟಾರಮಬ್ರವೀತ್ ।
ತ್ವಯಾ ಯಸ್ಮಾತ್ ಸ್ತುತೋಽಹಂ ವೈ ನಾಮ್ನಾಮಷ್ಟಶತೇನ ಚ ॥ 18 ॥
ವರಂ ವೃಣೀಷ್ವ ತಸ್ಮಾತ್ ತ್ವಂ ವರದೋಽಹಂ ತವಾನಘ ।
ಇತ್ಯುಕ್ತೋ ಭಾನುನಾ ಸೋಽಥ ವಿಶ್ವಕರ್ಮಾಬ್ರವೀದಿದಮ್ ॥ 19 ॥
ವರದೋ ಯದಿ ಮೇ ದೇವ ವರಮೇತಂ ಪ್ರಯಚ್ಛ ಮೇ ।
ಏತೈಸ್ತು ನಾಮಭಿರ್ಯಸ್ತ್ವಾಂ ನರಃ ಸ್ತೋಷ್ಯತಿ ನಿತ್ಯಶಃ ॥ 20 ॥
ತಸ್ಯ ಪಾಪಕ್ಷಯಂ ದೇವ ಕುರು ಭಕ್ತಸ್ಯ ಭಾಸ್ಕರ ॥ 21 ॥
ತೇನೈವಮುಕ್ತೋ ದಿನಕೃತ್ ತಥೇತಿ
ತ್ವಷ್ಟಾರಮುಕ್ತ್ವಾ ವಿರರಾಮ ಭಾಸ್ಕರಃ ।
ಸಂಜ್ಞಾಂ ವಿಶಂಕಾಂ ರವಿಮಂಡಲಸ್ಥಿತಾಂ
ಕೃತ್ವಾ ಜಗಾಮಾಥ ರವಿಂ ಪ್ರಸಾದ್ಯ ॥ 22 ॥
ಇತಿ ಶ್ರೀನರಸಿಂಹಪುರಾಣೇ ಏಕೋನವಿಂಶೋಽಧ್ಯಾಯಃ ॥ 19 ॥
– Chant Stotra in Other Languages –
Navagraha Slokam » Sri Surya Ashtottara Shatanama Stotra by Vishvakarma Lyrics in Sanskrit » English » Bengali » Gujarati » Malayalam » Odia » Telugu » Tamil