॥ Sri Vishakhanandabhidhastotram Kannada Lyrics ॥
ಶ್ರೀವಿಶಾಖಾನನ್ದಾಭಿಧಸ್ತೋತ್ರಮ್
ಭಾವನಾಮಗುಣಾದೀನಾಮೈಕ್ಯಾತ್ಶ್ರೀರಾಧಿಕೈವ ಯಾ ।
ಕೃಷ್ಣೇನ್ದೋಃ ಪ್ರೇಯಸೀ ಸಾ ಮೇ ಶ್ರೀವಿಶಾಖಾ ಪ್ರಸೀದತು ॥ 1 ॥
ಜಯತಿ ಶ್ರೀಮತೀ ಕಾಚಿದ್ವೃನ್ದಾರಣ್ಯವಿಹಾರಿಣೀ ।
ವಿಧಾತುಸ್ತರುಣೀಸೃಷ್ಟಿಕೌಶಲಶ್ರೀಋ ಇಹೋಜ್ಜ್ವಲಾ ॥ 2 ॥
ಛಿನ್ನಸ್ವರ್ಣಸದೃಕ್ಷಾಂಗೀ ರಕ್ತವಸ್ತ್ರಾವಗುಂಠಿನೀ ।
ನಿರ್ಬನ್ಧಬದ್ಧವೇಣೀಕಾ ಚಾರುಕಾಶ್ಮೀರಚರ್ಚಿತಾ ॥ 3 ॥
ದ್ವಿಕಾಲೇನ್ದುಲಲಾಟೋದ್ಯತ್ಕಸ್ತೂರೀತಿಲಕೋಜ್ಜ್ವಲಾ ।
ಸ್ಫುಟಕೋಕನದದ್ವನ್ದ್ವ ಬನ್ಧುರೀಕೃತಕರ್ಣಿಕಾ ॥ 4 ॥
ವಿಚಿತ್ರವರ್ಣವಿನ್ಯಾಸ ಚಿತ್ರಿತೀಕೃತವಿಗ್ರಹಾ
ಕೃಷ್ಣಚೋರಭಯಾಚ್ಚೋಲೀ ಗುಮ್ಫೀಕೃತಮಣಿಸ್ತನೀ ॥ 5 ॥
ಹಾರಮಂಜೀರಕೇಯೂರ ಚೂಡಾನಾಸಾಗ್ರಮೌಕ್ತಿಕೈಃ ।
ಮುದ್ರಿಕಾದಿಭಿರನ್ಯೈಶ್ಚ ಭೂಷಿತಾ ಭೂಷಣೋತ್ತಮೈಃ ॥ 6 ॥
ಸುದೀಪ್ತಕಜ್ಜಲೋದ್ದೀಪ್ತ ನಯನೇನ್ದೀವರದ್ವಯ ।
ಸೌರಭೋಜ್ಜ್ವಲತಾಮ್ಬೂಲ ಮಂಜುಲಾ ಶ್ರೀಮುಖಾಮ್ಬುಜಾ ॥ 7 ॥
ಸ್ಮಿತಲೇಶಲಸತ್ಪಕ್ವ ಚಾರುಬಿಮ್ಬಫಲಾಧರಾ ।
ಮಧುರಾಲಾಪಪೀಯೂಷ ಸಂಜೀವಿತಸಖೀಕುಲಾ ॥ 8 ॥
ವೃಷಭಾನುಕುಲೋತ್ಕೀರ್ತಿ ವರ್ಧಿಕಾ ಭಾನುಸೇವಿಕಾ ।
ಕೀರ್ತಿದಾಖಣಿರತ್ನಶ್ರೀಃ ಶ್ರೀಜಿತಶ್ರೀಃ ಶ್ರಿಯೋಜ್ಜ್ವಲಾ ॥ 9 ॥
ಅನಂಗಮಂಜರೀಜ್ಯೇಷ್ಠಾ ಶ್ರೀದಾಮಾನನ್ದದಾನುಜಾ ।
ಮುಖರಾದೃಷ್ಟಿಪೀಯೂಷ ವರ್ತಿನಪ್ತ್ರೀ ತದಾಶ್ರಿತಾ ॥ 10 ॥
ಪೌರ್ಣಮಾಸೀಬಹಿಃಖೇಲತ್ಪ್ರಾಣಪಂಜರಸಾರಿಕಾ ।
ಸುಬಲಪ್ರಣಯೋಲ್ಲಾಸಾ ತತ್ರ ವಿನ್ಯಸ್ತಭಾರಕಾ ॥ 11 ॥
ವ್ರಜೇಶ್ಯಾಃ ಕೃಷ್ಣವತ್ಪ್ರೇಮ ಪಾತ್ರೀ ತತ್ರಾತಿ ಭಕ್ತಿಕಾ ।
ಅಮ್ಬಾವಾತ್ಸಲ್ಯಸಂಸಿಕ್ತಾ ರೋಹಿಣೀಘ್ರಾತಮಸ್ತಕಾ ॥ 12 ॥
ವ್ರಜೇನ್ದ್ರಚರಣಾಮ್ಭೋಜೇ ಽರ್ಪಿತಭಕ್ತಿಪರಮ್ಪರಾ ।
ತಸ್ಯಾಪಿ ಪ್ರೇಮಪಾತ್ರೀಯಂ ಪಿತುರ್ಭಾನೋರಿವ ಸ್ಫುಟಮ್ ॥ 13 ॥
ಗುರುಬುದ್ಧ್ಯಾ ಪ್ರಲಮ್ಬಾರೌ ನತಿಂ ದೂರೇ ವಿತನ್ವತೀ ।
ವಧೂಬುದ್ಧ್ಯೈವ ತಸ್ಯಾಪಿ ಪ್ರೇಮಭೂಮೀಹ ಹ್ರೀಯುತಾ ॥ 14 ॥
ಲಲಿತಾಲಲಿತಾ ಸ್ವೀಯ ಪ್ರಾಣೋರುಲಲಿತಾವೃತಾ ।
ಲಲಿತಾಪ್ರಾಣರಕ್ಷೈಕರಕ್ಷಿತಾ ತದ್ವಶಾತ್ಮಿಕಾ ॥ 15 ॥
ವೃನ್ದಾಪ್ರಸಾಧಿತೋತ್ತುಂಗ ಕುಡುಂಗಾನಂಗವೇಶ್ಮನಿ ।
ಕೃಷ್ಣಖಂಡಿತಮಾನತ್ವಾಲ್ ಲಲಿತಾಭೀತಿಕಮ್ಪಿನೀ ॥ 16 ॥
ವಿಶಾಖನರ್ಮಸಖ್ಯೇನ ಸುಖಿತಾ ತದ್ಗತಾತ್ಮಿಕಾ ।
ವಿಶಾಖಾಪ್ರಾಣದೀಪಾಲಿ ನಿರ್ಮಂಛ್ಯನಖಚನ್ದ್ರಿಕಾ ॥ 17 ॥
ಸಖೀವರ್ಗೈಕಜೀವಾತುಸ್ಮಿತಕೈರವಕೋರಕಾ ।
ಸ್ನೇಹಫುಲ್ಲೀಕೃತಸ್ವೀಯಗಣಾ ಗೋವಿನ್ದವಲ್ಲಭಾ ॥ 18 ॥
ವೃನ್ದಾರಣ್ಯಮಹಾರಾಜ್ಯಮಹಾಸೇಕಮಹೋಜ್ಜ್ವಲಾ ।
ಗೋಷ್ಠಸರ್ವಜನಾಜೀವ್ಯವದನಾ ರದನೋತ್ತಮಾ ॥ 19 ॥
ಜ್ಞಾತವೃನ್ದಾಟವೀಸರ್ವಲತಾತರುಮೃಗದ್ವಿಜಾ ।
ತದೀಯಸಖ್ಯಸೌರಭ್ಯಸುರಭೀಕೃತಮಾನಸಾ ॥ 20 ॥
ಸರ್ವತ್ರ ಕುರ್ವತಿ ಸ್ನೇಹಂ ಸ್ನಿಗ್ಧಪ್ರಕೃತಿರಾಭವಮ್ ।
ನಾಮಮಾತ್ರಜಗಾಚಿತ್ತದ್ರಾವಿಕಾ ದೀನಪಾಲಿಕಾ ॥ 21 ॥
ಗೋಕುಲೇ ಕೃಷ್ಣಚನ್ದ್ರಸ್ಯ ಸರ್ವಾಪಚ್ಛಾನ್ತಿಪೂರ್ವಕಮ್ ।
ಧೀರಲಾಲಿತ್ಯವೃದ್ಧ್ಯರ್ಥಂ ಕ್ರಿಯಮಾಣವ್ರತಾಧಿಕಾ ॥ 22 ॥
ಗುರುಗೋವಿಪ್ರಸತ್ಕಾರರತಾ ವಿನಯಸನ್ನತಾ ।
ತದಾಶೀಃಶತವರ್ಧಿಷ್ಣುಸೌಭಾಗ್ಯಾದಿಗುಣಾಂಚಿತಾ ॥ 23 ॥
ಆಯುರ್ಗೋಶ್ರೀಯಶೋದಾಯಿಪಾಕೋ ದುರ್ವಾಸಸೋ ವರಾತ್ ।
ಅತಃ ಕುನ್ದಲತಾನೀಯಮಾನಾ ರಾಜ್ಞ್ಯಾಃ ಸಮಾಜ್ಞಯಾ ॥ 24 ॥
ಗೋಷ್ಠಜೀವಾತುಗೋವಿನ್ದಜೀವಾತುಲಪಿತಾಮೃತಾ ।
ನಿಜಪ್ರಾನಾರ್ಬುದಶ್ರೇಣಿರಕ್ಷ್ಯತತ್ಪಾದರೇಣುಕಾ ॥ 25 ॥
ಕೃಷ್ಣಪದಾರವಿನ್ದೋದ್ಯನ್ಮಕರನ್ದಮಯೇ ಮುದಾ ।
ಅರಿಷ್ಟಮರ್ದಿ ಕಾಸಾರೇ ಸ್ನಾತ್ರೀ ನಿರ್ಬನ್ಧತೋಽನ್ವಹಮ್ ॥ 26 ॥
ನಿಜಕುನ್ದಪುರಸ್ತೀರೇ ರತ್ನಸ್ಥಲ್ಯಾಮಹರ್ನಿಶಮ್ ।
ಪ್ರೇಷ್ಠನರ್ಮಾಲಿಭಿರ್ಭಂಗ್ಯಾ ಸಮಂ ನರ್ಮ ವಿತನ್ವತೀ ॥ 27 ॥
ಗೋವರ್ಧನಗುಹಾಲಕ್ಷ್ಮೀರ್ಗೋವರ್ಧನವಿಹಾರಿಣೀ ।
ಧೃತಗೋವರ್ಧನಪ್ರೇಮಾ ಧೃತಗೋವರ್ಧನಪ್ರಿಯಾ ॥ 28 ॥
ಗಾನ್ಧರ್ವಾದ್ಭುತಗಾನ್ಧರ್ವಾ ರಾಧಾ ಬಾಧಾಪಹಾರಿಣೀ ।
ಚನ್ದ್ರಕಾನ್ತಿಶ್ಚಲಾಪಂಗೀ ರಾಧಿಕಾ ಭಾನುರಾಧಿಕಾ ॥ 29 ॥
ಗಾನ್ಧರ್ವಿಕಾ ಸ್ವಗನ್ಧಾತಿಸುಗನ್ಧೀಕೃತಗೋಕುಲಾ ।
ಇತಿ ಪಂಚಭಿರಾಹೂತಾ ನಾಮಭಿರ್ಗೋಕುಲೇ ಜನೈಃ ॥ 30 ॥
ಹರಿಣೀ ಹರಿಣೀನೇತ್ರಾ ರಂಗಿಣೀ ರಂಗಿಣೀಪ್ರಿಯಾ ।
ರಂಗಿಣೀಧ್ವನಿನಾಗಚ್ಛತ್ಸುರಂಗಧ್ವನಿಹಾಸಿನೀ ॥ 31 ॥
ಬದ್ಧನನ್ದೀಶ್ವರೋತ್ಕಂಠಾ ಕಾನ್ತಕೃಷ್ಣೈಕಕಂಕ್ಷಯಾ ।
ನವಾನುರಾಗಸಮ್ಬನ್ಧಮದಿರೋನ್ಮತ್ತಮಾನಸಾ ॥ 32 ॥
ಮದನೋನ್ಮಾದಿಗೋವಿನ್ದಮಕಸ್ಮಾತ್ಪ್ರೇಕ್ಷ್ಯ ಹಾಸಿನೀ ।
ಲಪನ್ತೀ ರುದತೀ ಕಮ್ಪ್ರಾ ರುಷ್ಟಾ ದಷ್ಟಾಧರಾತುರಾ ॥ 33 ॥
ವಿಲೋಕಯತಿ ಗೋವಿನ್ದೇ ಸ್ಮಿತ್ವಾ ಚಾರುಮುಖಾಮ್ಬುಜಮ್ ।
ಪುಷ್ಪಾಕೃಷ್ಟಿಮಿಷಾದೂರ್ಧ್ವೇ ಧೃತದೋರ್ಮುಲಚಾಲನಾ ॥ 34 ॥
ಸಮಕ್ಷಮಪಿ ಗೋವಿನ್ದಮವಿಲೋಕ್ಯೇವ ಭಾವತಃ ।
ದಲೇ ವಿಲಿಖ್ಯ ತನ್ಮೂರ್ತಿಂ ಪಶ್ಯನ್ತೀ ತದ್ವಿಲೋಕಿತಾಮ್ ॥ 35 ॥
ಲೀಲಯಾ ಯಾಚಕಂ ಕೃಷ್ಣಮವಧೀರ್ಯೇವ ಭಾಮಿನೀ ।
ಗಿರೀನ್ದ್ರಗಾಹ್ವರಂ ಭಂಗ್ಯಾ ಪಶ್ಯನ್ತೀ ವಿಕಸದ್ದೃಶಾ ॥ 36 ॥
ಸುಬಲಸ್ಕನ್ಧವಿನ್ಯಸ್ತಬಾಹೌ ಪಶ್ಯತಿ ಮಾಧವೇ ।
ಸ್ಮೇರಾ ಸ್ಮೇರಾರವಿನ್ದೇನ ತಮಾಲಂ ತಡಯನ್ತ್ಯಥ ॥ 37 ॥
ಲೀಲಯಾ ಕೇಲಿಪಾಥೋಜಂ ಸ್ಮಿತ್ವಾ ಚುಮ್ಬಿತಮಾಧವೇ ।
ಸ್ಮಿತ್ವಾ ಭಾಲಾತ್ತಕಸ್ತೂರೀರಸಂ ಘೃತವತೀ ಕ್ವಚಿತ್ ॥ 38 ॥
ಮಹಾಭಾವೋಜ್ಜ್ವಲಾಚಿನ್ತಾರತ್ನೋದ್ಭವಿತವಿಗ್ರಹಾಮ್ ।
ಸಖೀಪ್ರಣಯಸದ್ಗನ್ಧವರೋದ್ವರ್ತನಸುಪ್ರಭಾಮ್ ॥ 39 ॥
ಕಾರುಣ್ಯಾಮೃತವೀಚಿಭಿಸ್ತಾರುಣ್ಯಾಮೃತಧಾರಯಾ ।
ಲಾವಣ್ಯಾಮೃತವನ್ಯಾಭಿಃ ಸ್ನಪಿತಾಂ ಗ್ಲಪಿತೇನ್ದಿರಾಮ್ ॥ 40 ॥
ಹ್ರೀಪಟ್ಟವಸ್ತ್ರಗುಪ್ತಾಂಗೀಂ ಸೌನ್ದರ್ಯಘುಸೃಣಾಂಚಿತಾಮ್ ।
ಶ್ಯಾಮಲೋಜ್ಜ್ವಲಕಸ್ತೂರೀವಿಚಿತ್ರಿತಕಲೇವರಾಮ್ ॥ 41 ॥
ಕಮ್ಪಾಶ್ರುಪುಲಕಸ್ತಮ್ಭಸ್ವೇದಗದ್ಗದರಕ್ತತಾ ।
ಉನ್ಮದೋ ಜಾಡ್ಯಮಿತ್ಯೇತೈ ರತ್ನೈರ್ನವಭಿರುತ್ತಮೈಃ ॥ 42 ॥
ಕ್ಲ್ಪ್ತಾಲಂಕೃತಿಸಂಶ್ಲಿಷ್ಟಾಂ ಗುಣಾಲಿಪುಷ್ಪಮಾಲಿನೀಮ್ ।
ಧೀರಾಧಿರತ್ವಸದ್ವಷಪಟವಾಸೈಃ ಪರಿಷ್ಕೃತಾಮ್ ॥ 43 ॥
ಪ್ರಚ್ಛನ್ನಮಾನಧಮ್ಮಿಲ್ಲಾಂ ಸೌಭಾಗ್ಯತಿಲಕೋಜ್ಜ್ವಲಾಮ್ ।
ಕೃಷ್ಣನಾಮಯಶಃಶ್ರಾವಾವತಂಸೋಲ್ಲಾಸಿಕರ್ಣಿಕಾಮ್ ॥ 44 ॥
ರಾಗತಮ್ಬೂಲರಕ್ತೋಷ್ಠೀಂ ಪ್ರೇಮಕೌಟಿಲ್ಯಕಜ್ಜಲಾಮ್ ।
ನರ್ಮಭಾಷಿತನಿಃಸ್ಯನ್ದಸ್ಮಿತಕರ್ಪೂರವಾಸಿತಾಮ್ ॥ 45 ॥
ಸೌರಭಾನ್ತಃಪುರೇ ಗರ್ವಪರ್ಯಂಕೋಪರಿ ಲೀಲಯಾ ।
ನಿವಿಷ್ಟಾಂ ಪ್ರೇಮವೈಚಿತ್ತ್ಯವಿಚಲತ್ತರಲಾಂಚಿತಾಮ್ ॥ 46 ॥
ಪ್ರಣಯಕ್ರೋಧಸಾಚೋಲೀಬನ್ಧಗುಪ್ತಿಕೃತಸ್ತನಾಮ್ ।
ಸಪತ್ನೀವಕ್ತ್ರಹೃಚ್ಛೋಶಿಯಶಃಶ್ರೀಕಚ್ಛಪೀರವಾಮ್ ॥ 47 ॥
ಮಧ್ಯತಾತ್ಮಸಖೀಸ್ಕನ್ಧಲೀಲಾನ್ಯಸ್ತಕರಾಮ್ಬುಜಾಮ್ ।
ಶ್ಯಾಮಾಂ ಶ್ಯಾಮಸ್ಮರಾಮೋದಮಧುಲೀಪರಿವೇಶಿಕಾಮ್ ॥ 48 ॥
ಸುಭಗವಲ್ಗುವಿಂಛೋಲೀಮೌಲೀಭೂಷಣಮಂಜರೀ ।
ಆವೈಕುಂಠಮಜಾಂಡಾಲಿವತಂಸೀಕೃತಸದ್ಯಶಃ ॥ 49 ॥
ವೈದಗ್ಧ್ಯೈಕಸುಧಾಸಿನ್ಧುಶ್ಚಾಟುರ್ಯೈಕಸುಧಾಪುರೀ ।
ಮಾಧುರ್ಯೈಕಸುಧಾವಲ್ಲೀ ಗುಣರತ್ನೈಕಪೇಟಿಕಾ ॥ 50 ॥
ಗೋವಿನ್ದಾನಂಗರಾಜೀವೇ ಭಾನುಶ್ರೀರ್ವಾರ್ಷಭಾನವೀ ।
ಕೃಷ್ಣಹೃತ್ಕುಮುದೋಲ್ಲಾಸೇ ಸುಧಾಕಾರಕರಸ್ಥಿತಿಃ ॥ 51 ॥
ಕೃಷ್ಣಮಾನಸಹಂಸಸ್ಯ ಮಾನಸೀ ಸರಸೀ ವರಾ ।
ಕೃಷ್ಣಚಾತಕಜೀವಾತುನವಾಮ್ಭೋದಪಯಃಶ್ರುತಿಃ ॥ 52 ॥
ಸಿದ್ಧಾಂಜನಸುಧಾವಾರ್ತಿಃ ಕೃಷ್ಣಲೋಚನಯೋರ್ದ್ವಯೋಃ ।
ವಿಲಾಸಶ್ರಾನ್ತಕೃಷ್ಣಾಂಗೇ ವಾತಲೀ ಮಾಧವೀ ಮತಾ ॥ 53 ॥
ಮುಕುನ್ದಮತ್ತಮಾತಂಗವಿಹಾರಾಪರದೀರ್ಘಿಕಾ ।
ಕೃಷ್ಣಪ್ರಾಣಮಹಾಮೀನಖೇಲನಾನನ್ದವಾರಿಧಿಃ ॥ 54 ॥
ಗಿರೀನ್ದ್ರಧಾರಿರೋಲಮ್ಬರಸಾಲನವಮಂಜರೀ ।
ಕೃಷ್ಣಕೋಕಿಲಸಮ್ಮೋದಿಮನ್ದರೋದ್ಯಾನವಿಸ್ತೃತಿಃ ॥ 55 ॥
ಕೃಷ್ಣಕೇಲಿವರಾರಾಮವಿಹಾರಾದ್ಭುತಕೋಕಿಲಾ ।
ನಾದಾಕೃಷ್ಟಬಕದ್ವೇಷಿವೀರಧೀರಮನೋಮೃಗಾ ॥ 56 ॥
ಪ್ರಣಯೋದ್ರೇಕಸಿದ್ಧ್ಯೇಕವಶಿಕೃತಧೃತಾಚಲಾ ।
ಮಾಧವಾತಿವಶಾ ಲೋಕೇ ಮಾಧವೀ ಮಾಧವಪ್ರಿಯಾ ॥ 57 ॥
ಕೃಷ್ಣಮಂಜುಲತಾಪಿಂಛೇ ವಿಲಸತ್ಸ್ವರ್ಣಯೂಥಿಕಾ ।
ಗೋವಿನ್ದನವ್ಯಪಾಥೋದೇ ಸ್ಥಿರವಿದ್ಯುಲ್ಲತಾದ್ಭುತಾ ॥ 58 ॥
ಗ್ರೀಷ್ಮೇ ಗೋವಿನ್ದಸರ್ವಾಂಗೇ ಚನ್ದ್ರಚನ್ದನಚನ್ದ್ರಿಕಾ ।
ಶೀತೇ ಶ್ಯಾಮಶುಭಾಂಗೇಷು ಪೀತಪಟ್ಟಲಸತ್ಪಟೀ ॥ 59 ॥
ಮಧೌ ಕೃಷ್ಣತರೂಲ್ಲಾಸೇ ಮಧುಶ್ರೀರ್ಮಧುರಾಕೃತಿಃ ।
ಮಂಜುಮಲ್ಲಾರರಾಗಶ್ರೀಃ ಪ್ರಾವೃಷೀ ಶ್ಯಾಮಹರ್ಷಿಣೀ ॥ 60 ॥
ಋತೌ ಶರದಿ ರಾಸೈಕರಸಿಕೇನ್ದ್ರಮಿಹ ಸ್ಫುಟಮ್ ।
ವರಿತುಂ ಹನ್ತ ರಾಸಶ್ರೀರ್ವಿಹರನ್ತೀ ಸಖೀಶ್ರಿತಾ ॥ 61 ॥
ಹೇಮಾನ್ತೇ ಸ್ಮರಯುದ್ಧಾರ್ಥಮಟನ್ತಂ ರಾಜನನ್ದನಮ್ ।
ಪೌರುಷೇಣ ಪರಾಜೇತುಂ ಜಯಶ್ರೀರ್ಮೂರ್ತಿಧಾರಿಣೀ ॥ 62 ॥
ಸರ್ವತಃ ಸಕಲಸ್ತವ್ಯವಸ್ತುತೋ ಯತ್ನತಶ್ಚಿರಾತ್ ।
ಸಾರಣಾಕೃಷ್ಯ ತೈರ್ಯುಕ್ತ್ಯಾ ನಿರ್ಮಾಯಾದ್ಭುತಶೋಭಯಾ ॥ 63 ॥
ಸ್ವಶ್ಲಾಘಂ ಕುರ್ವತಾ ಫುಲ್ಲವಿಧಿನಾ ಶ್ಲಾಘಿತಾ ಮುಹುಃ ।
ಗೌರೀಶ್ರೀಮೃಗ್ಯಸೌನ್ದರ್ಯವನ್ದಿತಶ್ರೀನಖಪ್ರಭಾ ॥ 64 ॥
ಶರತ್ಸರೋಜಶುಭ್ರಾಂಶುಮಣಿದರ್ಪನಮಾಲಯಾ ।
ನಿರ್ಮಂಛಿತಮುಖಾಮ್ಭೋಜವಿಲಸತ್ಸುಷಮಕಣಾ ॥ 65 ॥
ಸ್ಥಾಯೀಸಂಚಾರಿಸೂದ್ದೀಪ್ತಸತ್ತ್ವಿಕೈರನುಭಾವಕೈಃ ।
ವಿಭಾವಾದ್ಯೈರ್ವಿಭಾವೋಽಪಿ ಸ್ವಯಂ ಶ್ರೀರಸತಾಂ ಗತಾ ॥ 66 ॥
ಸೌಭಾಗ್ಯದುನ್ದುಭಿಪ್ರೋದ್ಯದ್ಧ್ವನಿಕೋಲಾಹಲೈಃ ಸದಾ ।
ವಿತ್ರಸ್ತೀಕೃತಗರ್ವಿಷ್ಠವಿಪಕ್ಷಾಖಿಲಗೋಪಿಕಾ ॥ 67 ॥
ವಿಪಕ್ಷಲಕ್ಷಾಹೃತ್ಕಮ್ಪಾಸಮ್ಪಾದಕಮುಖಶ್ರಿಯಾ ।
ವಶೀಕೃತಬಕಾರಾತಿಮಾನಸಾ ಮದನಾಲಸಾ ॥ 68 ॥
ಕನ್ದರ್ಪಕೋಟಿರಮ್ಯಶ್ರೀಜಯಿಶ್ರೀಗಿರಿಧಾರಿಣಾ ।
ಚಂಚಲಾಪಂಗಭಂಗೇನ ವಿಸ್ಮಾರಿತಸತೀವ್ರತಾ ॥ 69 ॥
ಕೃಷ್ಣೇತಿವರ್ಣಯುಗ್ಮೋರುಮೋಹಮನ್ತ್ರೇಣ ಮೋಹಿತಾ ।
ಕೃಷ್ಣದೇಹವರಾಮೋದಹೃದ್ಯಮಾದನಮಾದಿತಾ ॥ 70 ॥
ಕುಟಿಲಭ್ರೂಚಲಾಚಂಡಕನ್ದರ್ಪೋದ್ದಂಡಕರ್ಮುಕಾ ।
ನ್ಯಸ್ತಾಪಂಗಶರಕ್ಷೇಪೈರ್ವಿಹ್ವಲೀಕೃತಮಾಧವಾ ॥ 71 ॥
ನಿಜಾಂಗಸೌರಭೋದ್ಗಾರಮದಕೌಷಧಿವಾತ್ಯಯಾ ।
ಉನ್ಮದೀಕೃತಸರ್ವೈಕಮದಕಪ್ರವರಾಚ್ಯುತಾ ॥ 72 ॥
ದೈವಾಚ್ಛ್ರುತಿಪಥಾಯಾತನಾಮನೀಹಾರವಾಯುನಾ ।
ಪ್ರೋದ್ಯದ್ರೋಮಾಂಚಶೀತ್ಕಾರಕಮ್ಪಿಕೃಷ್ಣಮನೋಹರಾ ॥ 73 ॥
ಕೃಷ್ಣನೇತ್ರಲಸಂಜಿಹ್ವಾಲೇಹ್ಯವಕ್ತ್ರಪ್ರಭಾಮೃತಾ ।
ಕೃಷ್ಣಾನ್ಯತೃಷ್ಣಾಸಂಹಾರೀ ಸುಧಾಸಾರೈಕಝರ್ಝರೀ ॥ 74 ॥
ರಾಸಲಾಸ್ಯರಸೋಲ್ಲಾಸವಶೀಕೃತಬಲಾನುಜಾ ।
ಗಾನಫುಲ್ಲೀಕೃತೋಪೇನ್ದ್ರಾ ಪಿಕೋರುಮಧುರಸ್ವರಾ ॥ 75 ॥
ಕೃಷ್ಣಕೇಲಿಸುಧಾಸಿನ್ಧುಮಕರೀ ಮಕರಧ್ವಜಮ್ ।
ವರ್ಧಯನ್ತೀ ಸ್ಫುಟಂ ತಸ್ಯ ನರ್ಮಾಸ್ಫಲನಖೇಲಯಾ ॥ 76 ॥
ಗತಿರ್ಮತ್ತಗಜಃ ಕುಮ್ಭೌ ಕುಚೌ ಗನ್ಧಮದೋದ್ಧುರೌ ।
ಮಧ್ಯಮುದ್ದಾಮಸಿಂಹೋಽಯಂ ತ್ರಿಬಲ್ಯೋ ದುರ್ಗಭಿತ್ತಯಃ ॥ 77 ॥
ರೋಮಾಲೀ ನಾಗಪಾಶಶ್ರೀರ್ನಿತಮ್ಬೋ ರಥ ಉಲ್ಬನಃ ।
ದಾನ್ತಾ ದುರ್ದನ್ತಸಾಮಾನ್ತಾಃ ಪಾದಾಂಗುಲ್ಯಃ ಪದಾತಯಃ ॥ 78 ॥
ಪಾದೌ ಪದತಿಕಾಧ್ಯಕ್ಷೌ ಪುಲಕಃ ಪೃಥುಕಂಕತಃ ।
ಊರೂ ಜಯಮಣಿಸ್ತಮ್ಭೌ ಬಾಹೂ ಪಾಶವರೌ ದೃಢೌ ॥ 79 ॥
ಭ್ರೂದ್ವನ್ದ್ವಂ ಕರ್ಮುಕಂ ಕ್ರೂರಂ ಕಟಾಕ್ಷಾಃ ಶನಿತಾಃ ಶರಾಃ ।
ಭಾಲಮರ್ಧೇನ್ದುದಿವ್ಯಾಸ್ತ್ರಮಂಕುಶಾಣಿ ನಖಾಂಕುರಾಃ ॥ 80 ॥
ಸ್ವರ್ಣೇನ್ದುಫಲಕಂ ವಕ್ತ್ರಂ ಕೃಪಣೀ ಕರಯೋರ್ದ್ಯುತಿಃ ।
ಭಲ್ಲಭಾರಃ ಕರಾಂಗುಲ್ಯೋ ಗಂಡೌ ಕನಕದರ್ಪನೌ ॥ 81 ॥
ಕೇಶಪಾಶಃ ಕಟುಕ್ರೋಧಃ ಕರ್ಣೌ ಮೌರ್ವಗುಣೋತ್ತಮೌ ।
ಬನ್ಧುಕಾಧರರಾಗೋಽತಿಪ್ರತಾಪಃ ಕರಕಮ್ಪಕಃ ॥ 82 ॥
ದುನ್ದುಭ್ಯಾದಿರವಶ್ಚೂಡಾಕಿಂಕಿನೀನೂಪುರಸ್ವನಃ ।
ಚಿಬುಕಂ ಸ್ವಸ್ತಿಕಂ ಶಾಸ್ತಂ ಕಂಠಃ ಶಂಖೋ ಜಯಪ್ರದಃ ॥ 83 ॥
ಪರಿಷ್ವಂಗೋ ಹಿ ವಿದ್ಧ್ಯಸ್ತ್ರಂ ಸೌರಭಂ ಮದಕೌಷದಮ್ ।
ವಾಣೀ ಮೋಹನಮನ್ತ್ರಶ್ರೀರ್ದೇಹಬುದ್ಧಿವಿಮೋಹಿನೀ ॥ 84 ॥
ನಾಭೀ ರತ್ನಾದಿಭಾಂಡಾರಂ ನಾಸಾಶ್ರೀಃ ಸಕಲೋನ್ನತಾ ।
ಸ್ಮಿತಲೇಶೋಽಪ್ಯಚಿನ್ತ್ಯಾದಿ ವಶೀಕರಣತನ್ತ್ರಕಃ ॥ 85 ॥
ಅಲಕಾನಾಂ ಕುಲಂ ಭೀಷ್ಮಂ ಭೃಂಗಾಸ್ತ್ರಂ ಭಂಗದಾಯಕಮ್ ।
ಮೂರ್ತಿಃ ಕನ್ದರ್ಪಯುದ್ಧಶ್ರೀರ್ವೇಣೀ ಸಂಜಯಿನೀ ಧ್ವಜಾ ॥ 86 ॥
ಇತಿ ತೇ ಕಾಮಸಂಗ್ರಾಮಸಾಮಗ್ಯೋ ದುರ್ಘಟಾಃ ಪರೈಃ ।
ಈದೃಶ್ಯೋ ಲಲಿತಾದೀನಾಂ ಸೇನಾನೀನಾಂ ಚ ರಾಧಿಕೇ ॥ 87 ॥
ಅತೋ ದರ್ಪಮದಾದ್ಯೂತಂ ದಾನೀನ್ದ್ರಮವಧೀರ್ಯ ಮಾಮ್ ।
ಮಹಾಮಾರಮಹಾರಾಜನಿಯುಕ್ತಂ ಪ್ರಥಿತಂ ವ್ರಜೇ ॥ 88 ॥
ಸುಷ್ಠು ಸೀಮಾನ್ತಸಿನ್ದೂರ ತಿಲಕಾನಾಂ ವರತ್ವಿಷಾಮ್ ।
ಹಾರಾಂಗದಾದಿಚೋಲೀನಾಂ ನಾಸಾಮೌಕ್ತಿಕವಾಸಸಾಮ್ ॥ 89 ॥
ಕೇಯೂರಮುದ್ರಿಕಾದೀನಾಂ ಕಜ್ಜಲೋದ್ಯದ್ವತಂಸಯೋಃ ।
ಏತಾವದ್ಯುದ್ಧವಸ್ತೂನಾಂ ಪರಾರ್ಧ್ಯಾನಾಂ ಪರರ್ಧ್ಯತಃ ॥ 90 ॥
ತಥಾ ದಧ್ಯಾದಿಗವ್ಯಾನಆಮಮೂಲ್ಯಾನಾನಾಂ ವ್ರಜೋದ್ಭವಾತ್ ।
ಅದತ್ತ್ವಾ ಮೇ ಕರಂ ನ್ಯಾಯ್ಯಂ ಖೇಲನ್ತ್ಯೋ ಭ್ರಮತೇಹ ಯತ್ ॥ 91 ॥
ತತೋ ಮಯಾ ಸಮಂ ಯುದ್ಧಂ ಕರ್ತುಮಿಚ್ಛತ ಬುಧ್ಯತೇ ।
ಕಿಂ ಚೈಕೋಽಹಂ ಶತಂ ಯೂಯಂ ಕುರುಧ್ವಂ ಕ್ರಮಶಸ್ತತಃ ॥ 92 ॥
ಪ್ರಥಮಂ ಲಲಿತೋಚ್ಚಂಡಾ ಚರತಾಚ್ಚಂಡಸಂಗರಮ್ ।
ತತಸ್ತ್ವಂ ತದನು ಪ್ರೇಷ್ಠಸಂಗರಾಃ ಸಕಲಾಃ ಕ್ರಮಾತ್ ॥ 93 ॥
ಅಥ ಚೇನ್ಮಿಲಿತಾಃ ಕರ್ತುಂ ಕಾಮಯಧ್ವೇ ರಣಂ ಮದಾತ್ ।
ಅಗ್ರೇ ಸರತ ತದ್ದೋರ್ಭ್ಯಾಂ ಪಿನಷ್ಮಿ ಸಕಲಾಃ ಕ್ಷಣಾತ್ ॥ 94 ॥
ಇತಿ ಕೃಷ್ಣವಚಃ ಶ್ರುತ್ವಾ ಸಾಟೋಪಂ ನರ್ಮನಿರ್ಮಿತಮ್ ।
ಸಾನನ್ದಂ ಮದನಾಕ್ರಾನ್ತಮಾನಸಾಲಿಕುಲಾನ್ವಿತಾ ॥ 95 ॥
ಸ್ಮಿತ್ವಾ ನೇತ್ರಾನ್ತಬಾಣೈಸ್ತಂ ಸ್ತಬ್ಧೀಕೃತ್ಯ ಮದೋದ್ಧತಮ್ ।
ಗಚ್ಛನ್ತೀ ಹಂಸವದ್ಭಂಗ್ಯಾ ಸ್ಮಿತ್ವಾ ತೇನ ಧೃತಾಂಚಲಾ ॥ 96 ॥
ಲೀಲಯಾಂಚಲಮಾಕೃಷ್ಯ ಚಲನ್ತೀ ಚಾರುಹೇಲಯಾ ।
ಪುರೋ ರುದ್ಧಪಥಂ ತಂ ತು ಪಶ್ಯನ್ತೀ ರುಷ್ಟಯಾ ದೃಶಾ ॥ 97 ॥
ಮಾನಸಸ್ವರ್ಧುನೀಂ ತೂರ್ಣಮುತ್ತರೀತುಂ ತರೀಂ ಶ್ರಿತಾ ।
ಕಮ್ಪಿತಾಯಾಂ ತರೌ ಭೀತ್ಯಾ ಸ್ತುವನ್ತೀ ಕೃಷ್ಣನಾವಿಕಮ್ ॥ 98 ॥
ನಿಜಕುಂಡಪಯಃಕೇಲಿಲೀಲಾನಿರ್ಜಿತಮಚ್ಯುತಮ್ ।
ಹಸಿತುಂ ಯುಂಜತೀ ಭಂಗ್ಯಾ ಸ್ಮೇರಾ ಸ್ಮೇರಮುಖೀಃ ಸಖೀಃ ॥ 99 ॥
ಮಕನ್ದಮಕುಲಸ್ಯನ್ದಿಮರನ್ದಸ್ಯನ್ದಿಮನ್ದಿರೇ ।
ಕೇಲಿತಲ್ಪೇ ಮುಕುನ್ದೇನ ಕುನ್ದವೃನ್ದೇನ ಮಂಡಿತಾ ॥ 100 ॥
ನಾನಾಪುಷ್ಪಮಣಿವ್ರಾತಪಿಂಛಾಗುಂಜಾಫಲಾದಿಭಿಃ ।
ಕೃಷ್ಣಗುಮ್ಫಿತಧಮ್ಮಿಲ್ಲೋತ್ಫುಲ್ಲರೋಮಸ್ಮರಂಕುರಾ ॥ 101 ॥
ಮಂಜುಕುಂಜೇ ಮುಕುನ್ದಸ್ಯ ಕುಚೌ ಚಿತ್ರಯತಃ ಕರಮ್ ।
ಕ್ಷಪಯನ್ತೀ ಕುಚಕ್ಷೇಪೈಃ ಸುಸಖ್ಯಮಧುನೋನ್ಮದಾ ॥ 102 ॥
ವಿಲಾಸೇ ಯತ್ನತಃ ಕೃಷ್ಣದತ್ತಂ ತಾಮ್ಬೂಲಚರ್ವಿತಮ್ ।
ಸ್ಮಿತ್ವಾ ವಾಮ್ಯಾದಗೃಹ್ಣಾನಾ ತತ್ರಾರೋಪಿತದೂಷಣಮ್ ॥ 103 ॥
ದ್ಯೂತೇ ಪಾಣಿಕೃತಾಂ ವಂಶೀಂ ಜಿತ್ವಾ ಕೃಷ್ಣಸುಗೋಪಿತಾಮ್ ।
ಹಸಿತ್ವಾಚ್ಛಿದ್ಯ ಗೃಹ್ಣಾನಾ ಸ್ತುತಾ ಸ್ಮೇರಾಲಿಸಂಚಯೈಃ ॥ 104 ॥
ವಿಶಾಖಾಗೂಢನರ್ಮೋಕ್ತಿಜಿತಕೃಷ್ಣಾರ್ಪಿತಸ್ಮಿತಾ ।
ನರ್ಮಾಧ್ಯಾಯವರಾಚಾರ್ಯಾ ಭಾರತೀಜಯವಾಗ್ಮಿತಾ ॥ 105 ॥
ವಿಶಾಖಾಗ್ರೇ ರಹಃಕೇಲಿಕಥೋದ್ಘಾಟಕಮಾಧವಮ್ ।
ತಾಡಯನ್ತೀ ದ್ವಿರಬ್ಜೇನ ಸಭ್ರೂಭಂಗೇನ ಲೀಲಯಾ ॥ 106 ॥
ಲಲಿತಾದಿಪುರಃ ಸಾಕ್ಷಾತ್ಕೃಷ್ಣಸಮ್ಭೋಗಲಂಛನೇ ।
ಸೂಚ್ಯಮಾನೇ ದೃಶಾ ದೂತ್ಯಾ ಸ್ಮಿತ್ವಾ ಹುಂಕುರ್ವತೀ ರುಷಾ ॥ 107 ॥
ಕ್ವಚಿತ್ಪ್ರಣಯಮಾನೇನ ಸ್ಮಿತಮಾವೃತ್ಯ ಮೌನಿನೀ ।
ಭೀತ್ಯಾ ಸ್ಮರಶರೈರ್ಭಂಗ್ಯಲಿಂಗನ್ತೀ ಸಸ್ಮಿತಂ ಹರಿಮ್ ॥ 108 ॥
ಕುಪಿತಂ ಕೌತುಕೈಃ ಕ್ರ್ಷ್ಣಂ ವಿಹಾರೇ ಬಾಢಮೌನಿನಮ್ ।
ಕತರಾ ಪರಿರಭ್ಯಾಶು ಮಾನಯನ್ತೀ ಸ್ಮಿತಾನನಮ್ ॥ 109 ॥
ಮಿಥಃ ಪ್ರಣಯಮಾನೇನ ಮೌನಿನೀ ಮೌನಿನಂ ಹರಿಮ್ ।
ನಿರ್ಮೌನಾ ಸ್ಮರಮಿತ್ರೇಣ ನಿರ್ಮೌನಂ ವೀಕ್ಷ್ಯ ಸಸ್ಮಿತಾ ॥ 110 ॥
ಕ್ವಚಿತ್ಪಥಿ ಮಿಲಾಚನ್ದ್ರಾವಲೀಸಮ್ಭೋಗದೂಷಣಮ್ ।
ಶ್ರುತ್ವಾ ಕ್ರೂರಸಖೀವಕ್ತ್ರಾನ್ಮುಕುನ್ದೇ ಮಾನಿನೀ ರುಷಾ ॥ 111 ॥
ಪಾದಲಕ್ಷಾರಸೋಲ್ಲಾಸಿಶಿರಸ್ಕಂ ಕಂಸವಿದ್ವಿಷಮ್ ।
ಕೃತಕಾಕುಶತಂ ಸಾಸ್ರಾ ಪಶ್ಯನ್ತೀಷಾಚಲದ್ದೃಶಾ ॥ 112 ॥
ಕ್ವಚಿತ್ಕಲಿನ್ದಜಾತೀರೇ ಪುಷ್ಪತ್ರೋಟನಖೇಲಯಾ ।
ವಿಹರನ್ತೀ ಮುಕುನ್ದೇನ ಸಾರ್ಧಮಾಲೀಕುಲಾವೃತಾ ॥ 113 ॥
ತತ್ರ ಪುಷ್ಪಕೃತೇ ಕೋಪಾದ್ವ್ರಜನ್ತೀ ಪ್ರೇಮಕಾರಿತಾತ್ ।
ವ್ಯಾಘೋತಿತಾ ಮುಕುನ್ದೇನ ಸ್ಮಿತ್ವಾ ಧೃತ್ವಾ ಪಟಾಂಚಲಮ್ ॥ 114 ॥
ವಿಹಾರಶ್ರಾನ್ತಿತಃ ಕಾನ್ತಂ ಲಲಿತಾನ್ಯಸ್ತಮಸ್ತಕಮ್ ।
ವೀಜಯನ್ತೀ ಸ್ವಯಂ ಪ್ರೇಮ್ಣಾ ಕೃಷ್ಣಂ ರಕ್ತಪಟಾಂಚಲೈಃ ॥ 115 ॥
ಪುಷ್ಪಕಲ್ಪಿತದೋಲಾಯಾಂ ಕಲಗಾನಕುತೂಹಲೈಃ ।
ಪ್ರೇಮ್ಣಾ ಪ್ರೇಷ್ಠಸಖೀವರ್ಗೈರ್ದೋಲಿತಾ ಹರಿಭೂಷಿತಾ ॥ 116 ॥
ಕುಂಡಕುಂಜಾಂಗನೇ ವಲ್ಗು ಗಾಯದಾಲೀಗಣಾನ್ವಿತಾ ।
ವೀಣಾನನ್ದಿತಗೋವಿನ್ದದತ್ತಚುಮ್ಬೇನ ಲಜ್ಜಿತಾ ॥ 117 ॥
ಗೋವಿನ್ದವದನಾಮ್ಭೋಜೇ ಸ್ಮಿತ್ವಾ ತಾಮ್ಬೂಲವೀಟಿಕಾಮ್ ।
ಯುಂಜತೀಹ ಮಿಥೋ ನರ್ಮಕೇಲಿಕರ್ಪೂರವಾಸಿತಾಮ್ ॥ 118 ॥
ಗಿರೀನ್ದ್ರಗಾಹ್ವರೇ ತಲ್ಪೇ ಗೋವಿನ್ದೋರಸಿ ಸಾಲಸಮ್ ।
ಶಯನಾ ಲಲಿತಾವೀಜ್ಯಮಾನಾ ಸ್ವೀಯಪಟಾಂಚಲೈಃ ॥ 119 ॥
ಅಪೂರ್ವಬನ್ಧಗಾನ್ಧರ್ವಾಕಲಯೋನ್ಮದ್ಯ ಮಾಧವಮ್ ।
ಸ್ಮಿತ್ವಾ ಹರಿತತದ್ವೇಣುಹಾರಾ ಸ್ಮೇರವಿಶಾಖಯಾ ॥ 120 ॥
ವೀಣಾಧ್ವನಿಧುತೋಪೇನ್ದ್ರಹಸ್ತಾಚ್ಚ್ಯೋತಿತವಂಶಿಕಾ ।
ಚೂಡಾಸ್ವನಹೃತಶ್ಯಾಮದೇಹಗೇಹಪಥಸ್ಮೃತಿಃ ॥ 121 ॥
ಮುರಲೀಗಿಲಿತೋತ್ತುಂಗಗೃಹಧರ್ಮಕುಲಸ್ಥಿತಿಃ ।
ಶೃಂಗತೋ ದತ್ತತತ್ಸರ್ವಸತಿಲಾಪೋಽಂಜಲಿತ್ರಯಾ ॥ 122 ॥
ಕೃಷ್ಣಪುಷ್ಟಿಕರಾಮೋದಿಸುಧಾಸಾರಾಧಿಕಾಧರಾ ।
ಸ್ವಮಧುರಿತ್ವಸಮ್ಪಾದಿಕೃಷ್ಣಪಾದಾಮ್ಬುಜಾಮೃತಾ ॥ 123 ॥
ರಾಧೇತಿ ನಿಜನಾಮ್ನೈವ ಜಗತ್ಖ್ಯಾಪಿತಮಾಧವಾ ।
ಮಾಧವಸ್ಯೈವ ರಾಧೇತಿ ಜ್ಞಾಪಿತಾತ್ಮಾ ಜಗತ್ತ್ರಯೇ ॥ 124 ॥
ಮೃಗನಾಭೇಃ ಸುಗನ್ಧಶ್ರೀರಿವೇನ್ದೋರಿವ ಚನ್ದ್ರಿಕಾ ।
ತರೋಃ ಸುಮಂಜರೀವೇಹ ಕೃಷ್ಣಸ್ಯಾಭಿನ್ನತಾಂ ಗತಾ ॥ 125 ॥
ರಂಗಿನಾ ಸಂಗರಂಗೇನ ಸಾನಂಗರಙಿನೀಕೃತಾ ।
ಸಾನಂಗರಂಗಭಂಗೇನ ಸುರಂಗೀಕೃತರಂಗದಾ ॥ 126 ॥
ಇತ್ಯೇತನ್ನಾಮಲೀಲಾಕ್ತಪದ್ಯೈಃ ಪೀಯೂಷವರ್ಷಕೈಃ ।
ತದ್ರಸಾಸ್ವಾದನಿಷ್ಣಾತವಸನಾವಾಸಿತಾನ್ತರೈಃ ॥ 127 ॥
ಗೀಯಮಾನಂ ಜನೈರ್ಧನ್ಯೈಃ ಸ್ನೇಹವಿಕ್ಲಿನ್ನಮಾನಸೈಃ ।
ನತ್ವಾ ತಾಂ ಕೃಪಯಾವಿಷ್ಟಾಂ ದುಷ್ಟೋಽಪಿ ನಿಷ್ಠುರಃ ಶಠಃ ॥ 128 ॥
ಜನೋಽಯಂ ಯಾಚತೇ ದುಃಖೀ ರುದನ್ನುಚ್ಚೈರಿದಂ ಮುಹುಃ ।
ತತ್ಪದಾಮ್ಭೋಜಯುಗ್ಮೈಕಗತಿಃ ಕಾತರತಾಂ ಗತಃ ॥ 129 ॥
ಕೃತ್ವಾ ನಿಜಗಣಸ್ಯಾನ್ತಃ ಕಾರುಣ್ಯಾನ್ನಿಜಸೇವನೇ ।
ನಿಯಿಜಯತು ಮಾಂ ಸಾಕ್ಷಾತ್ಸೇಯಂ ವೃನ್ದಾವನೇಶ್ವರೀ ॥ 130 ॥
ಭಜಾಮಿ ರಾಧಾಮರವಿನ್ದನೇತ್ರಾಂ
ಸ್ಮರಾಮಿ ರಾಧಾಂ ಮಧುರಸ್ಮಿತಾಸ್ಯಾಮ್ ।
ವದಾಮಿ ರಾಧಾಂ ಕರುಣಭರಾರ್ದ್ರಾಂ
ತತೋ ಮಮಾನ್ಯಾಸ್ತಿ ಗತಿರ್ನ ಕಾಪಿ ॥ 131 ॥
ಲೀಲಾನಾಮಾಂಕಿತಸ್ತೋತ್ರಂ ವಿಶಾಖಾನನ್ದದಾಭಿಧಮ್ ।
ಯಃ ಪಠೇನ್ನಿಯತಂ ಗೋಷ್ಠೇ ವಸೇನ್ನಿರ್ಭರದೀನಧೀಃ ॥ 132 ॥
ಆತ್ಮಾಲಂಕೃತಿರಾಧಾಯಾಂ ಪ್ರೀತಿಮುತ್ಪದ್ಯ ಮೋದಭಾಕ್
ನಿಯೋಜಯತಿ ತಾಂ ಕೃಷ್ಣಃ ಸಾಕ್ಷಾತ್ತತ್ಪ್ರಿಯಸೇವನೇ ॥ 133 ॥
ಶ್ರೀಮದ್ರೂಪಪದಾಮ್ಭೋಜಧೂಲೀಮಾತ್ರೈಕಸೇವಿನಾ
ಕೇನಚಿದ್ಗ್ರಥಿತಾ ಪದ್ಯೈರ್ಮಾಲಾಘ್ರೇಯಾ ತದಾಶ್ರಯೈಃ ॥ 134 ॥
ಇತಿ ಶ್ರೀರಘುನಾಥದಾಸಗೋಸ್ವಾಮಿವಿರಚಿತಸ್ತವಾವಲ್ಯಾಂ
ಶ್ರೀವಿಶಾಖಾನನ್ದಾಭಿಧಸ್ತೋತ್ರಂ ಸಮ್ಪೂರ್ಣಮ್ ।