॥ Suratakathamritam Athava Arya Ashatakam Telugu Lyrics ॥
సురతకథామృతం అథవా ఆర్యశతకమ్
మూలగ్రన్థస్య కేన్ద్రీయశ్లోకః-
కదాహం సేవిష్యే వ్రతతిచమరీచామరమరు-
ద్వినోదేన క్రీడా కుసుమశయనే న్యస్తవపుషౌ ।
దరోన్మీలన్నేత్రౌ శ్రమజలకణక్లిద్యదలకౌ
బ్రువాణావన్యోన్యం వ్రజనవయువానావిహ యువామ్ ॥
ఉత్కలికావల్లరీ ౫౨
శ్రీకృష్ణ ఉవాచ-
చిత్రమిదం నహి యదహో వితరస్యధరసుధాం నికామం మే ।
అతి కృపణోఽపి కదాచిద్వదాన్యతమతాం జనః ప్రియే ధత్తే ॥ ౧ ॥
లయమపి న యాతి దానే ప్రత్యుత ఋద్ధిం రసాధికాం లభతే ।
అధరసుధోత్తమవిద్యాం విబుధవరాయాద్య మే దేహి ॥ ౨ ॥
స్వాన్తే బిభ్రతి భవతీం స్వాన్తే వాసిన్యతిస్నిగ్ధే ।
మయి కిమపూర్వాం నాదాస్త్వమిమాం చ యస్మాద్విదుష్యహో తత్ర ॥ ౩ ॥
శ్రీరాధాహ-
కులరమణీతతిలజ్జానిర్మూలనతన్త్రకౌశలోద్గారైః ।
ప్రథయసి కిము నిజగర్వం జ్ఞాతం పాణ్డిత్యమస్తి తే తత్ర ॥ ౪ ॥
దైవాద్విపక్షతామపి మయి యాన్త్యా బత మమైవ సహచర్యా ।
న్యస్తాహం తవ హస్తే కథమత్ర గర్వో భవేన్ న తే ॥ ౫ ॥
అయమపి పరమో ధర్మః శ్లాఘా మహతీ తవేయమేవేష్టా ।
యౌవనఫలమపి చేదం కులాబలాపీడనం యదహో ॥ ౬ ॥
శ్రీకృష్ణ ఆహ-
స్మరనరపతివరరాజ్యే ధర్మః శర్మప్రదోఽయమాదిష్టః ।
వత్స్యాయనమునినిర్మితపద్ధత్యుక్తానుసారేణ హి ॥ ౭ ॥
అపి చ-
అత్ర ప్రమాణమిష్టం చేన్మదుక్తేఽపి న మన్యతే కిఞ్చిత్ ।
భరతమునేః కిల శాస్త్రం శాస్త్రాన్తరమత్ర కో గణయేత్ ॥ ౮ ॥
విద్యుతి విద్యుతిదాయీ శ్లాఘాం మనుతే పయోధరః స్వీయామ్ ।
విద్యుదపి స్వాం సుషమాం పయోధరే శ్లాఘయత్యధికామ్ ॥ ౯ ॥
శ్రీరాధాహ-
గోవర్ధనగిరికన్దరవాసీ హరిరసీతి శ్రుతం కతిధా ।
కులబాలాహరిణీతతిరథాపి గచ్ఛత్యతో న తే దోషః ॥ ౧౦ ॥
కిం కుర్మః స్వాచరితో ధర్మస్త్యక్తుం కథం పునః శక్యః ।
దినకరపూజనవిధిరిహ కుసుమావచయే ప్రవర్త్యతే ॥ ౧౧ ॥
శ్రీకృష్ణ ఆహ-
వృన్దారణ్యపురన్దరమపి మాం న గిరాపి కర్హిచిన్మనుషే ।
సూర్యారాధనగర్వస్తదయం రాధే న తే భవేత్ఖర్వః ॥ ౧౨ ॥
గోవర్ధనగిరిధారణకారణమోజో న తేఽధికం మనుతే ।
తవ సవయస్తతిరపి స తవైకకుచశైలగర్వేణ ॥ ౧౩ ॥
శ్రీరాధాహ-
న కిల కుచౌ మమ శైలౌ పశ్యామ్బుజకోరకౌ నవోత్పన్నౌ ।
న తయోర్దలనం మరకతశిలానిభేనోరసాఽద్య తే యోగ్యమ్ ॥ ౧౪ ॥
కౌస్తుభమణిరతితరలః సరలమతిః పునరహం కుల ప్రమదా ।
తదలమనేన ధినోతు త్వాం నిజసదృశం భృశం హృదిస్థస్తే ॥ ౧౫ ॥
శ్రీకృష్ణ ఆహ-
సత్యమయం భయతరలః కణ్ఠతటాన్తం మమ ప్రియే శ్రయతే ।
దయతే తవ కుచద్వయమధికం సమ్మర్దయత్యహో సద్యః ॥ ౧౬ ॥
శ్రీరాధాహ-
తవ ఖరనఖరవిదారణసహనం కుచయోరియం వరా శక్తిః ।
కిమత్ర సమ్భవతి స్ఫుటమనయోః స్వబలప్రకాశనాటోపః ॥ ౧౭ ॥
శ్రీకృష్ణ ఆహ-
మమ ఖరనఖరమహాఙ్కుశఘాతాదపి శతగుణం బలం లబ్ధ్వా ।
కోలాదివ కుచ కుమ్భౌ మమార్దయతో భృశం ప్రియే పశ్య ॥ ౧౮ ॥
శ్రీరాధాహ-
కుచపద్మకుట్మలయుగం మర్దయతి త్వాం నిజాతిదౌరాత్మ్యాత్ ।
వృన్దావనవరసిన్ధుర నను దయసే త్వం నిసర్గకారుణ్యాత్ ॥ ౧౯ ॥
శ్రీకృష్ణ ఆహ-
తన్వాతే ముదముచ్చైస్తావకకుచకోరకౌ యదిమౌ ।
నఖచన్ద్రోదయమధి కిం స్వయోగ్యమతులం న శోభతే ప్రియే ॥ ౨౦ ॥
శ్రీరాధాహ-
నఖరానామతిఖరతారతాయ తే తావకేన కిల విధినా ।
వ్రజవనితానామరుచ్య రుషేవ నిరమాయి కిం నూనమ్ ॥ ౨౧ ॥
శ్రీకృష్ణ ఆహ-
కుసుమాదపి మృదులాఙ్గ్యాః కుచయోరేవాస్తి హన్త కాఠిన్యమ్ ।
ఇతి తన్ నిష్కాశయితుం క్షుణత్తి నఖరావలీ చతురా ॥ ౨౨ ॥
శ్రీరాధాహ-
హన్త కృతం బత కిమిదం సురతరసోన్మదకులస్త్రియాః కదనమ్ ।
హారాస్త్రుటితాః కాఞ్చీ గలితా స్ఖలితా తథైవ మే వేణీ ॥ ౨౩ ॥
శ్రీకృష్ణ ఆహ-
హారా బలాదురుభారాః కృశమపి మధ్యం చ నహ్యతే కాఞ్చీ ।
చికురకదర్థనభూతా వేణీ తదిమా రక్షితుం న యోగ్యాః ॥ ౨౪ ॥
శ్రీరాధాహ-
ఊధో యేన గిరీన్ద్రస్తమపి న వహతో మమోరసో భారః ।
హారైర్భూషణభూతైరభూదియం స్నేహముద్రా కిమ్ ॥ ౨౫ ॥
కుచగిరివహనపటుత్వం కృశమపి మధ్యం యతో బలాద్ధత్తే ।
మణిమయకాఞ్చీబన్ధాదేవ తమృతే దృఢతాఽస్య కేన స్యాత్ ॥ ౨౬ ॥
ఉత్కర్షణావాకర్షణపర్యాయోదితపరస్పరాసక్త్యా ।
ప్రీతిరియం కిల వేణీచికురాణాం న చ కదర్థనం వాచ్యమ్ ॥ ౨౭ ॥
శ్రీకృష్ణ ఆహ-
సత్యమహం గిరిధారీ కరనలినాభ్యాం గిరిద్వయం ధాస్యే ।
మధ్యస్యాత్ర పటుత్వైరలం బలం కిల మమైవాస్తామ్ ॥ ౨౮ ॥
చికురాణామపి వేణ్యాః పరస్పరాసక్తిః సూచితా ।
ప్రీత్యా కిం ఫలమిహ యది పరిచరణం తే న కుర్వన్తి ॥ ౨౯ ॥
వేణీబన్ధవిముక్తశ్చికుర కలాపోఽత్ర వేల్లితో మరుతా ।
చామరతాముపయాతః స్విన్నాఙ్గీం వీజయత్యహో భవతీమ్ ॥ ౩౦ ॥
శ్రీరాధాహ-
ఆవిస్కృత పురు శిల్పం సఖ్యా మే బహు విలమ్బతో రచితమ్ ।
చిత్రకమలికతటే తత్క్షణేన విధ్వంసితం భవతా ॥ ౩౧ ॥
శ్రీకృష్ణ ఆహ-
స్మితముఖి రుచార్ధవిధునా సుచారుభాలేన మే మిలన్త్యేషా ।
త్వదలికవిధురేఖాఽస్మై ప్రేమ్నాఽర్పయతి స్మ సర్వస్వమ్ ॥ ౩౨ ॥
శ్రీరాధాహ-
గణ్డతటే మమ మకరీ శ్యామా సరలాతిచిత్రితాప్యబలామ్ ।
మకరద్వయతాటఙ్కశ్చపలో ధృష్టః కదర్థయత్యేనామ్ ॥ ౩౩ ॥
శ్రీకృష్ణ ఆహ-
రమణి మమ శ్రుతియుగలం త్వదుదితసౌధద్రవైః ప్లుతం తదపి ।
ద్విగుణితతృష్ణం జాతం లోలుపతాయాః స్వరూపమేవైతత్ ॥ ౩౪ ॥
శ్రీరాధాహ-
లోలుపచూడామణిరసి తవాఙ్గవృన్దం చ లోలుపం యదయమ్ ।
మన్నయనాక్తమసీమప్యధరో రాగీ స్వ మణ్డనం కురుతే ॥ ౩౫ ॥
శ్రీకృష్ణ ఆహ-
బన్ధూకాన్తరవర్తినమలినమివాయం మసీద్రవం ధృత్వా ।
అక్ష్ణోరేవ ముదం తే తనుతే తదిమం కిమాక్షిపసి ॥ ౩౬ ॥
శ్రీరాధాహ-
వన్దే తవ పరిహసితం కం దేవం పరిచరస్యహో నిభిఋతమ్ ।
యత్ప్రసాదాదధీతా సౌరతవిద్యాతిచాతురీధారా ॥ ౩౭ ॥
శ్రీకృష్ణ ఆహ-
తవ జఘనోత్తమసదనం సరసం దేవం సముపచరామ్యతులమ్ ।
నిభృతనికుఞ్జగృహస్థః ప్రతి దినముచితాధికార ఏవాహమ్ ॥ ౩౮ ॥
శ్రీరాధాహ-
సత్యమతః స్వారూప్యం లబ్ధ్వా దృప్తః కులాబలానలినీః ।
మలినీః కురుషే కా తవ నయనే పతితా స్వకం పతిం భజతామ్ ॥ ౩౯ ॥
శ్రీకృష్ణ ఆహ-
సఖి తవ నిరావృతాన్యతిరుచిరాన్యఙ్గాన్యతీవ సఙ్కుచన్తి ।
సమ్ప్రతి మన్నయనాన్తర్విశన్తి మన్దాక్షమగ్నాని ॥ ౪౦ ॥
శ్రీరాధాహ-
ధృష్టతమే తవ నయనే యన్మిత్రం కౌస్తుభో ద్యుతిం తనుతే ।
తదిహ మదఙ్గాన్యధునా శరణం యాన్తు త్వదఙ్గానామ్ ॥ ౪౧ ॥
శ్రీకృష్ణ ఆహ-
హిత్వా సతృషదృశౌ మమ వైరాదివ కౌస్తుభం పరాభూయ ।
విశతి తవ స్తనయుగలం మద్ధృదయాన్తః స్వవిక్రమం బిభ్రత్ ॥ ౪౨ ॥
శ్రీరాధాహ-
కఠినతమం తవ హృదయం కుచయుగమపి మే ప్రతీయతే కఠినమ్ ।
తదుచితమనయోర్మిలనం యోగ్యం యోగ్యేన యుజ్యతే యస్మాత్ ॥ ౪౩ ॥
శ్రీకృష్ణ ఆహ-
మదురః పక్షగతా త్వం మమ యద్యక్ష్ణోర్విపక్షతాం కురుషే ।
తదపి తయోస్త్వద్వదనం ప్రకామసుభగం ముదం తనుతే ॥ ౪౪ ॥
శ్రీరాధాహ-
స్వచ్ఛన్దం యది రమసే రమస్వ తత్రాబలాస్మి కిం కుర్యామ్ ।
క్షిపసి దృశం యదలజ్జం మదపఘనే తత్కథం సహే కులజా ॥ ౪౫ ॥
శ్రీకృష్ణ ఆహ-
యది మమ దృష్తిచకోర్యా విధుముఖి నైవోపలభ్యసే దైవాత్ ।
హృదయగృహే ఖేలస్యపి తథాపి హా జ్వలయసి ప్రసభమ్ ॥ ౪౬ ॥
శ్రీరాధాహ-
తవ భుజయుగదృఢబన్ధం వామాపీహేఽన్యథా భవన్నయనే ।
నిస్త్రపశిరోమణే మాం త్రపామ్బుధౌ పాతయిష్యతః ప్రకటమ్ ॥ ౪౭ ॥
శ్రీకృష్ణ ఆహ-
త్వన్నయనే చ మదక్ష్ణోరన్తేవాసిత్వమిచ్ఛతః కిన్తు ।
గర్వాదివ న చ పఠతః ప్రకటం ప్రౌఢిః కియతో అహో యదియమ్ ॥ ౪౮ ॥
శ్రీరాధాహ-
చేతః స్ఫుటతి స్వయం చ తథాపి నయనే న తాదృశే భవతః ।
సాధ్వీనామియముచితా ఏవ నిసర్గత్రపాకులతా ॥ ౪౯ ॥
శ్రీకృష్ణ ఆహ-
సమ్ప్రతి సత్యం బ్రూషే త్రపావతీనాం శిరోమణిస్త్వమసి ।
వత్స్యాయనతన్త్రోక్తః సాధ్వీనామయమేవ ధర్మః ॥ ౫౦ ॥
శ్రీరాధాహ-
యద్యప్యరున్ధతీ సా సాధ్వీగణగణ్యగౌరవా జగతి ।
ధర్మమిమం పాఠయితుం తామపి శక్నోతి తే నయనమ్ ॥ ౫౧ ॥
శ్రీకృష్ణ ఆహ-
రాఢే ద్విగుణితశోభం మదాస్యపఙ్కేరుహం ధ్రువం పిబతు ।
సమ్ప్రత్యపి నిజలోచనమధుకరయుగం కిం న సర్వథా దిశసి ॥ ౫౨ ॥
శ్రీరాధాహ-
లావణ్యాద్భుతవన్యామయం త్వదఙ్గం న శీలయత్యధికమ్ ।
లోచనశఫరయుగం మమ దృగన్తజాలం యదా ను తత్క్షిపసి ॥ ౫౩ ॥
శ్రీకృష్ణ ఆహ-
నూపురమఙ్గలవాద్యజ్ఞాపితమనసిజనృపోత్సవామోదః ।
త్వరితముపయాతి అలివన్దీ కీర్తిం చ తవ ప్రథయన్విరాజతే ॥ ౫౪ ॥
శ్రీరాధాహ-
దయిత నృపోఽస్యనుభూతః సత్యం మనసిజపరఃశతానాం త్వమ్ ।
దిశి దిశి సతీషు విక్రమవిజయం శంసతి తవైవాయమ్ ॥ ౫౫ ॥
శ్రీకృష్ణ ఆహ-
సురతమహామఖభేరీ త్రిజగతి గర్జంస్తవైష నూపురః ।
తర్జతి గర్వవతీస్తాః ప్రకామమమరాఙ్గనా అపి ప్రసభమ్ ॥ ౫౬ ॥
శ్రీరాధాహ-
రమణమహోదితమదభరమత్తాహం కిం బ్రవీమి తే చరితమ్ ।
స్తౌషి ముహుర్నూపురమపి నూపురమాత్రావశిష్టభూషాయాః ॥ ౫౭ ॥
శ్రీకృష్ణ ఆహ-
కిం కథ్యసే స్వయం బత రమణమహే త్వం సముద్ధతా సత్యమ్ ।
మదభరమత్త యన్ నిజపరిహితవాసోఽపి కురుషే స్మరసాత్ ॥ ౫౮ ॥
శ్రీరాధాహ-
స కిల తవేష్టా దేవతా మదనః శ్రద్ధావతీరతో యువతీః ।
ఉపదిష్యైతన్మన్త్రం శిష్యాః కురుషే వితీర్ణసర్వస్వాః ॥ ౫౯ ॥
శ్రీకృష్ణ ఆహ-
త్వయి పునరసౌ రసజ్ఞః స్మరోఽపి రోపితముదా వసతి ।
యదిదం కుచహాటక సమ్పుటయుగమస్య సర్వస్వమ్ ॥ ౬౦ ॥
శ్రీరాధాహ-
ఏవం చేత్కథమనయోః కఞ్చుకమథ మౌక్తికం లసద్ధారమ్ ।
మృగమదచర్చాం దలయసి కలయసి చ కఠినకరాఘాతమ్ ॥ ౬౧ ॥
శ్రీకృష్ణ ఆహ-
స్వధనవ్యవహృతిసమయే హాటకమయసమ్పుతస్య యద్దృష్టః ।
మఙ్గలభూషణవసనోద్ఘాటో ముఖదార్ఢ్యతః నఖాఘాతః ॥ ౬౨ ॥
శ్రీరాధాహ-
తద్వ్యవహర్తా పునరథ కృత్వా ద్విగుణితసుసమ్భారమ్ ।
ఆవృత్యాతిరహఃస్థం కురుతే సమ్పుటమిదం చ భో దృష్టమ్ ॥ ౬౩ ॥
శ్రీకృష్ణ ఆహ-
స్మరమణిసమ్పుటకుచయుగమధునాప్యుత్తానమస్తి తత్కాన్తే ।
హృదయగృహం మమ పూరయ కృత్వాఽధో ముఖమిదం మహారత్నైః ॥ ౬౪ ॥
శ్రీరాధాహ-
విధినా విమృశ్య నిహితం యాసామబలేతి నామ యుక్తార్థమ్ ।
తాసాం కుచసమ్పుటయోరధో ముఖీ కృతివిధౌ క్వ వా శక్తిః ॥ ౬౫ ॥
శ్రీకృష్ణ ఆహ-
కతి న కరగ్రహవిధినా కుచసమ్పుటకాన్తరాహృత రాధే ।
మోదమణీనాం తతయస్తదపి న మే పూర్యతే హృదయమ్ ॥ ౬౬ ॥
శ్రీరాధాహ-
వ్రజవనితాః శతకోట్యస్తవైవ తాః పణ్డితాశ్చ రతితన్త్రే ।
హృదయం తదపి రతౌ బత రఙ్కతమత్వం న తే త్యజతి ॥ ౬౭ ॥
శ్రీకృష్ణ ఆహ-
స్మరశిఖితప్తే మమ హృది సుకుమార్యస్తాః విశన్తు కిం ముగ్ధాః ।
త్వమతిసమర్థా ప్రసభం ప్రవిశ్య రాజసి సదైవైకా ॥ ౬౮ ॥
శ్రీరాధాహ-
తదయే స్వరఙ్గదానే స్వరఙ్గనాస్తాః సమానయ క్షిప్రమ్ ।
తత్తన్నామ గృహీత్వా మురలీగానే తవాత్ర కో యత్నః ॥ ౬౯ ॥
శ్రీకృష్ణ ఆహ-
నన్దనవనకుసుమాఞ్చితశిరోఽపి ధర్తుం నిజాత్యయోగ్యతయా ।
తవ పదనఖతలసవిధే లజ్జం తే సురవరాఙ్గనా అపి తాః ॥ ౭౦ ॥
శ్రీరాధాహ-
నాభీవివరవరాన్మే సముద్గతేయం న కాన్తరోమాలీ ।
కిన్తు ప్రకుపితభుజగీ తదున్ముఖం కిము చికీర్షసి స్వకరమ్ ॥ ౭౧ ॥
శ్రీకృష్ణ ఆహ-
తవ రోమాలీభుజగీం ఖేలయితుం మత్కరశ్చలత్యభితః ।
భవదఖిలాఙ్గగతాన్యపి రోమాన్యుద్యాన్తి కిం రోద్ధుమ్ ॥ ౭౨ ॥
శ్రీరాధాహ-
మదఖిలగాత్రభటా అపి యతః పరాభవమవాప్య ముహ్యన్తి ।
స్మరరణమత్తే త్వయి కిం బత రోమ్నాం యుజ్యతే యుద్ధమ్ ॥ ౭౩ ॥
శ్రీకృష్ణ ఆహ-
వయమతికృశాశ్చ తదపి ప్రభవామోద్గమవిధావితి ప్రకటమ్ ।
భవతీముద్గమచర్యాం రోమభటాః స్మరయన్త్యహో చతురాః ॥ ౭౪ ॥
శ్రీరాధాహ-
రతిరసపరవశ ! సహతే తేఽతథ్యం కిం మే తనోరన్వయః ।
రమయస్వ అతివామామపి తాం న చ దయసే కాన్త్యా వేదయసే ॥ ౭౫ ॥
శ్రీకృష్ణ ఆహ-
స్మరశరరాధే రాధే సమరే సమరేఖయాఞ్చితే ద్వితయే ।
ఇహ భవదఙ్గమదఙ్గే ప్రతిభటమధునా ధునానేస్తామ్ ॥ ౭౬ ॥
శ్రీరాధాహ-
ప్రస్వేదామ్బు వమన్తీ ఘనరససిక్తేవ గాత్రవల్లీ మే ।
దలితో లలితాకల్పస్తల్పశ్చ ఖణ్డితో నో వా కతిధా ॥ ౭౭ ॥
శ్రీకృష్ణ ఆహ-
మదనఘనాఘన ఏష స్వేదమిషాద్వర్షతీహ తనువల్లీమ్ ।
ఘనరసభరైః ప్రతిపదముదితలసత్కోరకాం కాన్తే ॥ ౭౮ ॥
శ్రీరాధాహ-
ప్రియ తవ తరుణిమజలధేరవధేరన్వేషణం కథం కురుతామ్ ।
మహిలామతిమకరీ తద్విరమ్యతాం రమ్యతాం రతం యాతు ॥ ౭౯ ॥
శ్రీకృష్ణ ఆహ-
అతినిఃశ్వసితసమీరణవేగాద్ద్విగుణీభవన్మహావీచిమ్ ।
కేలిసుధాసరితం నౌ మానసకరిణౌ ముహుర్ముహుర్భజతామ్ ॥ ౮౦ ॥
శ్రీరాధాహ-
ఖేలతి మనఃకరీ తే సత్యం ప్రకటం స లక్ష్యతే కిన్తు ।
తత్రైక్యం మమ మనసో బ్రూషే కోఽత్రాభిప్రాయస్తే ॥ ౮౧ ॥
శ్రీకృష్ణ ఆహ-
శ్రీమన్మదనసురోత్తమసేవా సమ్సిద్ధయే తు నౌ మనసీ ।
ఐక్యమవాప్య త్వరయా తత్ర చ సాయుజ్యమీహేతే ॥ ౮౨ ॥
శ్రీరాధాహ-
స్వస్మిన్నేవ తనోర్మమ మనసశ్చాప్యేకదైవ సాయుజ్యమ్ ।
ప్రసభం కురుషే దేవ త్వమేవ సాక్షాన్మహామదనః ॥ ౮౩ ॥
శ్రీకృష్ణ ఆహ-
సర్వస్వాత్మసమర్పణకారిణ్యై తే ముదా మారః ।
స్వీయాం మౌక్తికమాలామలికే స్వేదకణవ్యాజాద్దత్తే ॥ ౮౪ ॥
శ్రీరాధాహ-
త్వదలకనికరస్తామపి నీత్వా స్తిమ్యతి హఠాదయం చపలః ।
మదనప్రసాద ఇత్యతిభాగ్యం సంశ్లాఘతే స్వీయమ్ ॥ ౮౫ ॥
శ్రీకృష్ణ ఆహ-
తామ్బూలామృతరసలవలాభేనైవాత్ర గర్వితే భవన్నయనే ।
అన్తర్బహిరపి తద్రసముదితే గణ్డే కథం ను మే హసతః ॥ ౮౬ ॥
శ్రీరాధాహ-
యత్సూచయసి రసప్రియ తదిదం స్వేనైవ పాఠితం తన్త్రమ్ ।
స్వయమేవ వ్యాచష్టే స భవానితి కిల నమస్తుభ్యమ్ ॥ ౮౭ ॥
శ్రీకృష్ణ ఆహ-
మన్ముఖపఙ్కేరుహమపి చిత్రమిదం యద్వికాశయస్యధికమ్ ।
గుణవత్యతిసురభితేన స్వవదనసుధాకరసుధాద్రవేణ హి ॥ ౮౮ ॥
శ్రీరాధాహ-
నీలనిధేర్బత పోతో బిన్దువ్యాజేన రక్షితశ్చిబుకే ।
తమపి చ భవదధరోఽయం హృతవానితి కతి మృషామ్యనయమ్ ॥ ౮౯ ॥
శ్రీకృష్ణ ఆహ-
అనురాగిణమపి సాగసమధరం మే దణ్డయస్యతః కోపాత్ ।
రదనాస్త్రేణ తదప్యభిమనుతే లబ్ధప్రసాదమేవాయమ్ ॥ ౯౦ ॥
శ్రీరాధాహ-
అధి రదనచ్ఛన్దనం మే స్వరదనకీర్తిం న కిం విచారయసి ।
యువతీసభాసు చిత్రం త్రపాకులతమతేయం ను మయి సృష్టా ॥ ౯౧ ॥
శ్రీకృష్ణ ఆహ-
విషమాశుగరణరఙ్గే స్వాఙ్గేనాతుల పరాక్రమా క్రమసే ।
దర్శయ భుజబలమయి భో మయి తే దయితే గుణావలీ ఫలతు ॥ ౯౨ ॥
శ్రీరాధాహ-
తన్వీమపి తనుమేతాం ముహురతిదార్ఢ్యేన వేష్టయతే ।
త్వద్భుజభుజాఙ్గపాశః శ్వాసో మే కేవలం వలతే ॥ ౯౩ ॥
శ్రీకృష్ణ ఆహ-
సమ్ప్రతి సాక్షాత్కారో మదనస్య స్యాదితీవ జానీమః ।
యన్ నశ్చేతస్త్వరతే నిరుపమమత్రైకభావాయ ॥ ౯౪ ॥
శ్రీరాధాహ-
తాణ్డవపణ్డిత నితరామలమధ్యాపనశ్రమేణ తే ।
మదపఘనాః స్వయమేతే చారణచర్యాసు యాన్తి నైపుణ్యమ్ ॥ ౯౫ ॥
శ్రీకృష్ణ ఆహ-
మదనమహాఘనఘూర్ణాఘ్రాతాన్యఙ్గాని నౌ ప్రియే యుగపత్ ।
శ్వాసోదితజయచతురిమభరమన్యోన్యం దిశన్తి సోన్మాదమ్ ॥ ౯౬ ॥
(శ్రీ గ్రన్థకర్తాహ- )
లోచనమీనచతుష్టయమధునా నిష్పన్దతామురీకురుతే ।
రసభరవిస్మయమత్తే నైసర్గికచేష్టితస్మృతిః కిం స్యాత్ ॥ ౯౭ ॥
చన్దననలదసుధాంశుద్రవమయజలయన్త్రవేశ్మమధ్యస్థే ।
స్థలజలరుహదలకల్పితతల్పేఽసుప్తాం రతశ్రాన్తౌ ॥ ౯౮ ॥
క్రమవలితైర్నిఃశ్వసితైః సురభయతోః స్వామినోరథాన్యోన్యమ్ ।
నిద్రావృద్ధిమవేత్య ప్రమోదసిన్ధావయం జనః ప్లవతామ్ ॥ ౯౯ ॥
సురతకథామృతమార్యశతకం నతకన్ధరో జనో జుషతామ్ ।
రతసుఖధామగవాక్షశ్రితనయనః స్వామినోరహో కృపయా ॥ ౧౦౦ ॥
ప్రవిశతు శనైః శనైరథ మూకితనూపురం జనస్తత్ర ।
గాత్రే నిభాల్య యూనోః స్వవలయరాజీం పిధాయ బధ్నాతు ॥ ౧౦౧ ॥
కమ్పనచకితైరలిభిస్త్యక్తుమశక్యేన తాలవృన్తేన ।
వీజయతు శ్రమసలిలం ప్రత్యఙ్గం శోషితం నిరూపయతు ॥ ౧౦౨ ॥
రాధాకుణ్డతటవాసమహాసమ్పదం మదః సోఽయమ్ ।
కిము వాఞ్ఛితమతిదుర్లభవస్తుని తమృతే మమాస్తు సమ్భావ్యమ్ ॥ ౧౦౩ ॥
అష్టమక్ అధికరహస్యవ్యఞ్జకం మథ్నన్ నిబధ్యతేఽత్ర శతకే ।
తాదృశభావవిభావితహృదయేనైవాస్తు తత్సేవ్యమ్ ॥ ౧౦౪ ॥
ఖవియదృతుక్షమాగణితే శాకే వృషసంస్థితే దివాధీశే ।
సురతకథామృతముదగదుదయతాం చ భక్తహృన్నభసి ॥ ౧౦౫ ॥
ఇతి మహామహోపాధ్యాయశ్రీవిశ్వనాథచక్రవర్తివిరచితం
సురతకథామృతం సమాప్తమ్ ॥