॥ Suryashatakam Kannada Lyrics ॥
॥ ಸೂರ್ಯಶತಕಮ್ ॥
ಮಹಾಕವಿಶ್ರೀಮಯೂರಪ್ರಣೀತಮ್
॥ ಶ್ರೀ ಗಣೇಶಾಯ ನಮಃ ॥
ಜಮ್ಭಾರಾತೀಭಕುಮ್ಭೋದ್ಭವಮಿವ ದಧತಃ ಸಾನ್ದ್ರಸಿನ್ದೂರರೇಣುಂ
ರಕ್ತಾಃ ಸಿಕ್ತಾ ಇವೌಘೈರುದಯಗಿರಿತಟೀಧಾತುಧಾರಾದ್ರವಸ್ಯ । var ಸಕ್ತೈಃ
ಆಯಾನ್ತ್ಯಾ ತುಲ್ಯಕಾಲಂ ಕಮಲವನರುಚೇವಾರುಣಾ ವೋ ವಿಭೂತ್ಯೈ
ಭೂಯಾಸುರ್ಭಾಸಯನ್ತೋ ಭುವನಮಭಿನವಾ ಭಾನವೋ ಭಾನವೀಯಾಃ ॥ 1 ॥
ಭಕ್ತಿಪ್ರಹ್ವಾಯ ದಾತುಂ ಮುಕುಲಪುಟಕುಟೀಕೋಟರಕ್ರೋಡಲೀನಾಂ
ಲಕ್ಷ್ಮೀಮಾಕ್ರಷ್ಟುಕಾಮಾ ಇವ ಕಮಲವನೋದ್ಧಾಟನಂ ಕುರ್ವತೇ ಯೇ ।
ಕಾಲಾಕಾರಾನ್ಧಕಾರಾನನಪತಿತಜಗತ್ಸಾಧ್ವಸಧ್ವಂಸಕಲ್ಯಾಃ
ಕಲ್ಯಾಣಂ ವಃ ಕ್ರಿಯಾಸುಃ ಕಿಸಲಯರುಚಯಸ್ತೇ ಕರಾ ಭಾಸ್ಕರಸ್ಯ ॥ 2 ॥
ಗರ್ಭೇಷ್ವಮ್ಭೋರುಹಾಣಾಂ ಶಿಖರಿಷು ಚ ಶಿತಾಗ್ರೇಷು ತುಲ್ಯಂ ಪತನ್ತಃ
ಪ್ರಾರಮ್ಭೇ ವಾಸರಸ್ಯ ವ್ಯುಪರತಿಸಮಯೇ ಚೈಕರೂಪಾಸ್ತಥೈವ ।
ನಿಷ್ಪರ್ಯಾಯಂ ಪ್ರವೃತ್ತಾಸ್ತ್ರಿಭುವನಭವನಪ್ರಾಂಗಣೇ ಪಾನ್ತು ಯುಷ್ಮಾ-
ನೂಷ್ಮಾಣಂ ಸಂತತಾಧ್ವಶ್ರಮಜಮಿವ ಭೃಶಂ ಬಿಭ್ರತೋ ಬ್ರಧ್ನಪಾದಾಃ ॥ 3 ॥
ಪ್ರಭ್ರಶ್ಯತ್ಯುತ್ತರೀಯತ್ವಿಷಿ ತಮಸಿ ಸಮುದ್ದೀಕ್ಷ್ಯ ವೀತಾವೃತೀನ್ಪ್ರಾ-
ಗ್ಜನ್ತೂಂಸ್ತನ್ತೂನ್ಯಥಾ ಯಾನತನು ವಿತನುತೇ ತಿಗ್ಮರೋಚಿರ್ಮರೀಚೀನ್ ।
ತೇ ಸಾನ್ದ್ರೀಭೂಯ ಸದ್ಯಃ ಕ್ರಮವಿಶದದಶಾಶಾದಶಾಲೀವಿಶಾಲಂ
ಶಶ್ವತ್ಸಮ್ಪಾದಯನ್ತೋಽಮ್ಬರಮಮಲಮಲಂ ಮಂಗಲಂ ವೋ ದಿಶನ್ತು ॥ 4 ॥
ನ್ಯಕ್ಕುರ್ವನ್ನೋಷಧೀಶೇ ಮುಷಿತರುಚಿ ಶುಚೇವೌಷಧೀಃ ಪ್ರೋಷಿತಾಭಾ
ಭಾಸ್ವದ್ಗ್ರಾವೋದ್ಗತೇನ ಪ್ರಥಮಮಿವ ಕೃತಾಭ್ಯುದ್ಗತಿಃ ಪಾವಕೇನ ।
ಪಕ್ಷಚ್ಛೇದವ್ರಣಾಸೃಕ್ಸ್ರುತ ಇವ ದೃಷದೋ ದರ್ಶಯನ್ಪ್ರಾತರದ್ರೇ-
ರಾತಾಮ್ರಸ್ತೀವ್ರಭಾನೋರನಭಿಮತನುದೇ ಸ್ತಾದ್ಗಭಸ್ತ್ಯುದ್ಗಮೋ ವಃ ॥ 5 ॥
ಶೀರ್ಣಘ್ರಾಣಾಂಘ್ರಿಪಾಣೀನ್ವ್ರಣಿಭಿರಪಘನೈರ್ಘರ್ಘರಾವ್ಯಕ್ತಘೋಷಾನ್
ದೀರ್ಘಾಘ್ರಾತಾನಘೌಘೈ ಪುನರಪಿ ಘಟಯತ್ಯೇಕ ಉಲ್ಲಾಘಯನ್ ಯಃ ।
ಘರ್ಮಾಂಶೋಸ್ತಸ್ಯ ವೋಽನ್ತರ್ದ್ವಿಗುಣಘನಘೃಣಾನಿಘ್ನನಿರ್ವಿಘ್ನವೃತ್ತೇ-
ರ್ದತ್ತಾರ್ಘಾಃ ಸಿದ್ಧಸಂಘೈರ್ವಿದಧತು ಘೃಣಯಃ ಶೀಘ್ರಮಂಹೋವಿಧಾತಮ್ ॥ 6 ॥
ಬಿಭ್ರಾಣಾ ವಾಮನತ್ವಂ ಪ್ರಥಮಮಥ ತಥೈವಾಂಶವಃ ಪ್ರಾಂಶವೋ ವಃ
ಕ್ರಾನ್ತಾಕಾಶಾನ್ತರಾಲಾಸ್ತದನು ದಶದಿಶಃ ಪೂರಯನ್ತಸ್ತತೋಽಪಿ ।
ಧ್ವಾನ್ತಾದಾಚ್ಛಿದ್ಯ ದೇವದ್ವಿಷ ಇವ ಬಲಿತೋ ವಿಶ್ವಮಾಶ್ವಶ್ನುವಾನಾಃ var ದೇವದ್ರುಹ
ಕೃಚ್ಛ್ರಾಣ್ಯುಚ್ಛ್ರಾಯಹೇಲೋಪಹಸಿತಹರಯೋ ಹಾರಿದಶ್ವಾ ಹರನ್ತು ॥ 7 ॥
ಉದ್ಗಾಢೇನಾರುಣಿಮ್ನಾ ವಿದಧತಿ ಬಹುಲಂ ಯೇಽರುಣಸ್ಯಾರುಣತ್ವಂ
ಮೂರ್ಧೋದ್ಧೂತೌ ಖಲೀನಕ್ಷತರುಧಿರರುಚೋ ಯೇ ರಥಾಶ್ವಾನನೇಷು ।
ಶೈಲಾನಾಂ ಶೇಖರತ್ವಂ ಶ್ರಿತಶಿಖರಿಶಿಖಾಸ್ತನ್ವತೇ ಯೇ ದಿಶನ್ತು var ಶಿಖರಶಿಖಾಃ
ಪ್ರೇಂಖನ್ತಃ ಖೇ ಖರಾಂಶೋಃ ಖಚಿತದಿನಮುಖಾಸ್ತೇ ಮಯೂಖಾಃ ಸುಖಂ ವಃ ॥ 8 ॥
ದತ್ತಾನನ್ದಾಃ ಪ್ರಜಾನಾಂ ಸಮುಚಿತಸಮಯಾಕೃಷ್ಟಸೃಷ್ಟೈಃ ಪಯೋಭಿಃ var ಅಕ್ಲಿಷ್ಟಸೃಷ್ಟೈಃ
ಪೂರ್ವಾಹ್ಣೇ ವಿಪ್ರಕೀರ್ಣಾ ದಿಶಿ ದಿಶಿ ವಿರಮತ್ಯಹ್ನಿ ಸಂಹಾರಭಾಜಃ ।
ದೀಪ್ತಾಂಶೋರ್ದೀರ್ಘದುಃಖಪ್ರಭವಭವಭಯೋದನ್ವದುತ್ತಾರನಾವೋ
ಗಾವೋ ವಃ ಪಾವನಾನಾಂ ಪರಮಪರಿಮಿತಾಂ ಪ್ರೀತಿಮುತ್ಪಾದಯನ್ತು ॥ 9 ॥
ಬನ್ಧಧ್ವಂಸೈಕಹೇತುಂ ಶಿರಸಿ ನತಿರಸಾಬದ್ಧಸಂಧ್ಯಾಂಜಲೀನಾಂ
ಲೋಕಾನಾಂ ಯೇ ಪ್ರಬೋಧಂ ವಿದಧತಿ ವಿಪುಲಾಮ್ಭೋಜಖಂಡಾಶಯೇವ ।
ಯುಷ್ಮಾಕಂ ತೇ ಸ್ವಚಿತ್ತಪ್ರಥಿತಪೃಥುತರಪ್ರಾರ್ಥನಾಕಲ್ಪವೃಕ್ಷಾಃ var ಪ್ರಥಿಮ
ಕಲ್ಪನ್ತಾಂ ನಿರ್ವಿಕಲ್ಪಂ ದಿನಕರಕಿರಣಾಃ ಕೇತವಃ ಕಲ್ಮಷಸ್ಯ ॥ 10 ॥
ಧಾರಾ ರಾಯೋ ಧನಾಯಾಪದಿ ಸಪದಿ ಕರಾಲಮ್ಬಭೂತಾಃ ಪ್ರಪಾತೇ
ತತ್ತ್ವಾಲೋಕೈಕದೀಪಾಸ್ತ್ರಿದಶಪತಿಪುರಪ್ರಸ್ಥಿತೌ ವೀಥ್ಯ ಏವ ।
ನಿರ್ವಾಣೋದ್ಯೋಗಿಯೋಗಿಪ್ರಗಮನಿಜತನುದ್ವಾರಿ ವೇತ್ರಾಯಮಾಣಾ-
ಸ್ತ್ರಾಯನ್ತಾಂ ತೀವ್ರಭಾನೋರ್ದಿವಸಮುಖಸುಖಾ ರಶ್ಮಯಃ ಕಲ್ಮಷಾದ್ವಃ ॥ 11 ॥
var ತೀವ್ರಭಾಸಃ var ಕಶ್ಮಲಾದ್ವಃ
ಪ್ರಾಚಿ ಪ್ರಾಗಾಚರನ್ತ್ಯೋಽನತಿಚಿರಮಚಲೇ ಚಾರುಚೂಡಾಮಣಿತ್ವಂ
ಮುಂಚನ್ತ್ಯೋ ರೋಚನಾಮ್ಭಃ ಪ್ರಚುರಮಿವ ದಿಶಾಮುಚ್ಚಕೈಶ್ಚರ್ಚನಾಯ ।
ಚಾಟೂತ್ಕೈಶ್ಚಕ್ರನಾಮ್ನಾಂ ಚತುರಮವಿಚಲೈರ್ಲೋಚನೈರರ್ಚ್ಯಮಾನಾ- var ಸುಚಿರಂ
ಶ್ಚೇಷ್ಟನ್ತಾಂ ಚಿನ್ತಿತಾನಾಮುಚಿತಮಚರಮಾಶ್ಚಂಡರೋಚೀರುಚೋ ವಃ ॥ 12 ॥
ಏಕಂ ಜ್ಯೋತಿರ್ದೃಶೌ ದ್ವೇ ತ್ರಿಜಗತಿ ಗದಿತಾನ್ಯಬ್ಜಜಾಸ್ಯೈಶ್ಚತುರ್ಭಿ-
ರ್ಭೂತಾನಾಂ ಪಂಚಮಂ ಯಾನ್ಯಲಮೃತುಷು ತಥಾ ಷಟ್ಸು ನಾನಾವಿಧಾನಿ ।
ಯುಷ್ಮಾಕಂ ತಾನಿ ಸಪ್ತತ್ರಿದಶಮುನಿನುತಾನ್ಯಷ್ಟದಿಗ್ಭಾಂಜಿ ಭಾನೋ-
ರ್ಯಾನ್ತಿ ಪ್ರಾಹ್ಣೇ ನವತ್ವಂ ದಶ ದಧತು ಶಿವಂ ದೀಧಿತೀನಾಂ ಶತಾನಿ ॥ 13 ॥ var ದದತು
ಆವೃತ್ತಿಭ್ರಾನ್ತವಿಶ್ವಾಃ ಶ್ರಮಮಿವ ದಧತಃ ಶೋಷಿಣಃ ಸ್ವೋಷ್ಮಣೇವ
ಗ್ರೀಷ್ಮೇ ದಾವಾಗ್ನಿತಪ್ತಾ ಇವ ರಸಮಸಕೃದ್ಯೇ ಧರಿತ್ರ್ಯಾ ಧಯನ್ತಿ ।
ತೇ ಪ್ರಾವೃಷ್ಯಾತ್ತಪಾನಾತಿಶಯರುಜ ಇವೋದ್ವಾನ್ತತೋಯಾ ಹಿಮರ್ತೌ
ಮಾರ್ತಂಡಸ್ಯಾಪ್ರಚಂಡಾಶ್ಚಿರಮಶುಭಭಿದೇಽಭೀಷವೋ ವೋ ಭವನ್ತು ॥ 14 ॥
ತನ್ವಾನಾ ದಿಗ್ವಧೂನಾಂ ಸಮಧಿಕಮಧುರಾಲೋಕರಮ್ಯಾಮವಸ್ಥಾ-
ಮಾರುಢಪ್ರೌಢಿಲೇಶೋತ್ಕಲಿತಕಪಿಲಿಮಾಲಂಕೃತಿಃ ಕೇವಲೈವ ।
ಉಜ್ಜೃಮ್ಭಾಮ್ಭೋಜನೇತ್ರದ್ಯುತಿನಿ ದಿನಮುಖೇ ಕಿಂಚಿದುದ್ಭಿದ್ಯಮಾನಾ
ಶ್ಮಶ್ರುಶ್ರೇಣೀವ ಭಾಸಾಂ ದಿಶತು ದಶಶತೀ ಶರ್ಮ ಘರ್ಮತ್ವಿಷೋ ವಃ ॥ 15 ॥
ಮೌಲೀನ್ದೋರ್ಮೈಷ ಮೋಷೀದ್ದ್ಯುತಿಮಿತಿ ವೃಷಭಾಂಕೇನ ಯಃ ಶಂಕಿನೇವ
ಪ್ರತ್ಯಗ್ರೋದ್ಘಾಟಿತಾಮ್ಭೋರುಹಕುಹರಗುಹಾಸುಸ್ಥಿತೇನೇವ ಧಾತ್ರಾ ।
ಕೃಷ್ಣೇನ ಧ್ವಾನ್ತಕೃಷ್ಣಸ್ವತನುಪರಿಭವತ್ರಸ್ನುನೇವ ಸ್ತುತೋಽಲಂ
ತ್ರಾಣಾಯ ಸ್ತಾತ್ತನೀಯಾನಪಿ ತಿಮಿರರಿಪೋಃ ಸ ತ್ವಿಷಾಮುದ್ಗಮೋ ವಃ ॥ 16 ॥
ವಿಸ್ತೀರ್ಣಂ ವ್ಯೋಮ ದೀರ್ಘಾಃ ಸಪದಿ ದಶ ದಿಶೋ ವ್ಯಸ್ತವೇಲಾಮ್ಭಸೋಽಬ್ಧೀನ್
ಕುರ್ವದ್ಭಿರ್ದೃಶ್ಯನಾನಾನಗನಗರನಗಾಭೋಗಪೃಥ್ವೀಂ ಚ ಪೃಥ್ವೀಮ್ ।
ಪದ್ಮಿನ್ಯುಚ್ಛ್ವಾಸ್ಯತೇ ಯೈರುಷಸಿ ಜಗದಪಿ ಧ್ವಂಸಯಿತ್ವಾ ತಮಿಸ್ರಾ-
ಮುಸ್ರಾ ವಿಸ್ರಂಸಯನ್ತು ದ್ರುತಮನಭಿಮತಂ ತೇ ಸಹಸ್ರತ್ವಿಷೋ ವಃ ॥ 17 ॥ var ವಿಸ್ರಾವಯನ್ತು
ಅಸ್ತವ್ಯಸ್ತತ್ವಶೂನ್ಯೋ ನಿಜರುಚಿರನಿಶಾನಶ್ವರಃ ಕರ್ತುಮೀಶೋ
ವಿಶ್ವಂ ವೇಶ್ಮೇವ ದೀಪಃ ಪ್ರತಿಹತತಿಮಿರಂ ಯಃ ಪ್ರದೇಶಸ್ಥಿತೋಽಪಿ ।
ದಿಕ್ಕಾಲಾಪೇಕ್ಷಯಾಸೌ ತ್ರಿಭುವನಮಟತಸ್ತಿಗ್ಮಭಾನೋರ್ನವಾಖ್ಯಾಂ
ಯಾತಃ ಶಾತಕ್ರತವ್ಯಾಂ ದಿಶಿ ದಿಶತು ಶಿವಂ ಸೋಽರ್ಚಿಷಾಮುದ್ಗಮೋ ವಃ ॥ 18 ॥
ಮಾಗಾನ್ಮ್ಲಾನಿಂ ಮೃಣಾಲೀ ಮೃದುರಿತಿ ದಯಯೇವಾಪ್ರವಿಷ್ಟೋಽಹಿಲೋಕಂ
ಲೋಕಾಲೋಕಸ್ಯ ಪಾರ್ಶ್ವಂ ಪ್ರತಪತಿ ನ ಪರಂ ಯಸ್ತದಾಖ್ಯಾರ್ಥಮೇವ ।
ಊರ್ಧ್ವಂ ಬ್ರಹ್ಮಾಂಡಖಂಡಸ್ಫುಟನಭಯಪರಿತ್ಯಕ್ತದೈರ್ಘ್ಯೋ ದ್ಯುಸೀಮ್ನಿ
ಸ್ವೇಛಾವಶ್ಯಾವಕಾಶಾವಧಿರವತು ಸ ವಸ್ತಾಪನೋ ರೋಚಿರೋಘಃ ॥ 19 ॥
ಅಶ್ಯಾಮಃ ಕಾಲ ಏಕೋ ನ ಭವತಿ ಭುವನಾನ್ತೋಽಪಿ ವೀತೇಽನ್ಧಕಾರೇ var ವೀತಾನ್ಧಕಾರಃ
ಸದ್ಯಃ ಪ್ರಾಲೇಯಪಾದೋ ನ ವಿಲಯಮಚಲಶ್ಚನ್ದ್ರಮಾ ಅಪ್ಯುಪೈತಿ ।
ಬನ್ಧಃ ಸಿದ್ಧಾಂಜಲೀನಾಂ ನ ಹಿ ಕುಮುದವನಸ್ಯಾಪಿ ಯತ್ರೋಜ್ಜಿಹಾನೇ
ತತ್ಪ್ರಾತಃ ಪ್ರೇಕ್ಷಣೀಯಂ ದಿಶತು ದಿನಪತೇರ್ಧಾಮ ಕಾಮಾಧಿಕಂ ವಃ ॥ 20 ॥
ಯತ್ಕಾನ್ತಿಂ ಪಂಕಜಾನಾಂ ನ ಹರತಿ ಕುರುತೇ ಪ್ರತ್ಯುತಾಧಿಕ್ಯರಮ್ಯಾಂ var ಪ್ರತ್ಯುತಾತೀವ ರಮ್ಯಾಂ
ನೋ ಧತ್ತೇ ತಾರಕಾಭಾಂ ತಿರಯತಿ ನಿತರಾಮಾಶು ಯನ್ನಿತ್ಯಮೇವ । var ನಾಧತ್ತೇ
ಕರ್ತುಂ ನಾಲಂ ನಿಮೇಷಂ ದಿವಸಮಪಿ ಪರಂ ಯತ್ತದೇಕಂ ತ್ರಿಲೋಕ್ಯಾ-
ಶ್ಚಕ್ಷುಃ ಸಾಮಾನ್ಯಚಕ್ಷುರ್ವಿಸದೃಶಮಘಭಿದ್ಭಾಸ್ವತಸ್ತಾನ್ಮಹೋ ವಃ ॥ 21 ॥
ಕ್ಷ್ಮಾಂ ಕ್ಷೇಪೀಯಃ ಕ್ಷಪಾಮ್ಭಃಶಿಶಿರತರಜಲಸ್ಪರ್ಶತರ್ಷಾದೃತೇವ
ದ್ರಾಗಾಶಾ ನೇತುಮಾಶಾದ್ವಿರದಕರಸರಃಪುಷ್ಕರಾಣೀವ ಬೋಧಮ್ ।
ಪ್ರಾತಃ ಪ್ರೋಲ್ಲಂಘ್ಯ ವಿಷ್ಣೋಃ ಪದಮಪಿ ಘೃಣಯೇವಾತಿವೇಗಾದ್ದವೀಯ-
ಸ್ಯುದ್ದಾಮ ದ್ಯೋತಮಾನಾ ದಹತು ದಿನಪತೇರ್ದುರ್ನಿಮಿತ್ತಂ ದ್ಯುತಿರ್ವಃ ॥ 22 ॥
ನೋ ಕಲ್ಪಾಪಾಯವಾಯೋರದಯರಯದಲತ್ಕ್ಷ್ಮಾಧರಸ್ಯಾಪಿ ಗಮ್ಯಾ var ಶಮ್ಯಾ
ಗಾಢೋದ್ಗೀರ್ಣೋಜ್ಜ್ವಲಶ್ರೀರಹನಿ ನ ರಹಿತಾ ನೋ ತಮಃಕಜ್ಜಲೇನ ।
ಪ್ರಾಪ್ತೋತ್ಪತ್ತಿಃ ಪತಂಗಾನ್ನ ಪುನರುಪಗತಾ ಮೋಷಮುಷ್ಣತ್ವಿಷೋ ವೋ
ವರ್ತಿಃ ಸೈವಾನ್ಯರೂಪಾ ಸುಖಯತು ನಿಖಿಲದ್ವೀಪದೀಪಸ್ಯ ದೀಪ್ತಿಃ ॥ 23 ॥
ನಿಃಶೇಷಾಶಾವಪೂರಪ್ರವಣಗುರುಗುಣಶ್ಲಾಘನೀಯಸ್ವರೂಪಾ
ಪರ್ಯಾಪ್ತಂ ನೋದಯಾದೌ ದಿನಗಮಸಮಯೋಪಪ್ಲವೇಽಪ್ಯುನ್ನತೈವ ।
ಅತ್ಯನ್ತಂ ಯಾನಭಿಜ್ಞಾ ಕ್ಷಣಮಪಿ ತಮಸಾ ಸಾಕಮೇಕತ್ರ ವಸ್ತುಂ
ಬ್ರಧ್ನಸ್ಯೇದ್ಧಾ ರುಚಿರ್ವೋ ರುಚಿರಿವ ರುಚಿತಸ್ಯಾಪ್ತಯೇ ವಸ್ತುನೋಸ್ತು ॥ 24 ॥ var ಚಿರುರಸ್ಯ, ರುಚಿರಸ್ಯ
ವಿಭ್ರಾಣಃ ಶಕ್ತಿಮಾಶು ಪ್ರಶಮಿತಬಲವತ್ತಾರಕೌರ್ಜಿತ್ಯಗುರ್ವೀಂ
ಕುರ್ವಾಣೋ ಲೀಲಯಾಧಃ ಶಿಖಿನಮಪಿ ಲಸಚ್ಚನ್ದ್ರಕಾನ್ತಾವಭಾಸಮ್ ।
ಆದಧ್ಯಾದನ್ಧಕಾರೇ ರತಿಮತಿಶಯಿನೀಮಾವಹನ್ವೀಕ್ಷಣಾನಾಂ var ಆದೇಯಾದೀಕ್ಷಣಾನಾಂ
ಬಾಲೋ ಲಕ್ಷ್ಮೀಮಪಾರಾಮಪರ ಇವ ಗುಹೋಽಹರ್ಪತೇರಾತಪೋ ವಃ ॥ 25 ॥
ಜ್ಯೋತ್ಸ್ನಾಂಶಾಕರ್ಷಪಾಂಡುದ್ಯುತಿ ತಿಮಿರಮಷೀಶೇಷಕಲ್ಮಾಷಮೀಷ-
ಜ್ಜೃಮ್ಭೋದ್ಭೂತೇನ ಪಿಂಗಂ ಸರಸಿಜರಜಸಾ ಸಂಧ್ಯಯಾ ಶೋಣಶೋಚಿಃ ।
ಪ್ರಾತಃಪ್ರಾರಮ್ಭಕಾಲೇ ಸಕಲಮಪಿ ಜಗಚ್ಚಿತ್ರಮುನ್ಮೀಲಯನ್ತೀ
ಕಾನ್ತಿಸ್ತೀಕ್ಷ್ಣತ್ವಿಷೋಽಕ್ಷ್ಣಾಂ ಮುದಮುಪನಯತಾತ್ತೂಲಿಕೇವಾತುಲಾಂ ವಃ ॥ 26 ॥
ಆಯಾನ್ತೀ ಕಿಂ ಸುಮೇರೋಃ ಸರಣಿರರುಣಿತಾ ಪಾದ್ಮರಾಗೈಃ ಪರಾಗೈ-
ರಾಹೋಸ್ವಿತ್ಸ್ವಸ್ಯ ಮಾಹಾರಜನವಿರಚಿತಾ ವೈಜಯನ್ತೀ ರಥಸ್ಯ ।
ಮಾಂಜಿಷ್ಠೀ ಪ್ರಷ್ಠವಾಹಾವಲಿವಿಧುತಶಿರಶ್ಚಾಮರಾಲೀ ನು ಲೋಕೈ- var ಚಾಮರಾಲೀವ
ರಾಶಂಕ್ಯಾಲೋಕಿತೈವಂ ಸವಿತುರಘನುದೇ ಸ್ತಾತ್ಪ್ರಭಾತಪ್ರಭಾ ವಃ ॥ 27 ॥
ಧ್ವಾನ್ತಧ್ವಂಸಂ ವಿಧತ್ತೇ ನ ತಪತಿ ರುಚಿಮನ್ನಾತಿರೂಪಂ ವ್ಯನಕ್ತಿ
ನ್ಯಕ್ತ್ವಂ ನೀತ್ವಾಪಿ ನಕ್ತಂ ನ ವಿತರತಿತರಾಂ ತಾವದಹ್ನಸ್ತ್ವಿಷಂ ಯಃ । var ನ್ಯಕ್ತಾಮಹ್ನಿ
ಸ ಪ್ರಾತರ್ಮಾ ವಿರಂಸೀದಸಕಲಪಟಿಮಾ ಪೂರಯನ್ಯುಷ್ಮದಾಶಾ-
ಮಾಶಾಕಾಶಾವಕಾಶಾವತರಣತರುಣಪ್ರಕ್ರಮೋಽರ್ಕಪ್ರಕಾಶಃ ॥ 28 ॥
ತೀವ್ರಂ ನಿರ್ವಾಣಹೇತುರ್ಯದಪಿ ಚ ವಿಪುಲಂ ಯತ್ಪ್ರಕರ್ಷೇಣ ಚಾಣು
ಪ್ರತ್ಯಕ್ಷಂ ಯತ್ಪರೋಕ್ಷಂ ಯದಿಹ ಯದಪರಂ ನಶ್ವರಂ ಶಾಶ್ವತಂ ಚ ।
ಯತ್ಸರ್ವಸ್ಯ ಪ್ರಸಿದ್ಧಂ ಜಗತಿ ಕತಿಪಯೇ ಯೋಗಿನೋ ಯದ್ವಿದನ್ತಿ
ಜ್ಯೋತಿಸ್ತದ್ದ್ವಿಪ್ರಕಾರಂ ಸವಿತುರವತು ವೋ ಬಾಹ್ಯಮಾಭ್ಯನ್ತರಂ ಚ ॥ 29 ॥
ರತ್ನಾನಾಂ ಮಂಡನಾಯ ಪ್ರಭವತಿ ನಿಯತೋದ್ದೇಶಲಬ್ಧಾವಕಾಶಂ
ವಹ್ನೇರ್ದಾರ್ವಾದಿ ದಗ್ಧುಂ ನಿಜಜಡಿಮತಯಾ ಕರ್ತುಮಾನನ್ದಮಿನ್ದೋಃ ।
ಯಚ್ಚ ತ್ರೈಲೋಕ್ಯಭೂಷಾವಿಧಿರಘದಹನಂ ಹ್ಲಾದಿ ವೃಷ್ಟ್ಯಾಶು ತದ್ವೋ var ಯತ್ತು
ಬಾಹುಲ್ಯೋತ್ಪಾದ್ಯಕಾರ್ಯಾಧಿಕತರಮವತಾದೇಕಮೇವಾರ್ಕತೇಜಃ ॥ 30 ॥
ಮೀಲಚ್ಚಕ್ಷುರ್ವಿಜಿಹ್ಮಶ್ರುತಿ ಜಡರಸನಂ ನಿಘ್ನಿತಘ್ರಾಣವೃತ್ತಿ
ಸ್ವವ್ಯಾಪಾರಾಕ್ಷಮತ್ವಕ್ಪರಿಮುಷಿತಮನಃ ಶ್ವಾಸಮಾತ್ರಾವಶೇಷಮ್ ।
ವಿಸ್ರಸ್ತಾಂಗಂ ಪತಿತ್ವಾ ಸ್ವಪದಪಹರತಾದಶ್ರಿಯಂ ವೋಽರ್ಕಜನ್ಮಾ var ಅಪ್ರಿಯಂ
ಕಾಲವ್ಯಾಲಾವಲೀಢಂ ಜಗದಗದ ಇವೋತ್ಥಾಪಯನ್ಪ್ರಾಕ್ಪ್ರತಾಪಃ ॥ 31 ॥
ನಿಃಶೇಷಂ ನೈಶಮಮ್ಭಃ ಪ್ರಸಭಮಪನುದನ್ನಶ್ರುಲೇಶಾನುಕಾರಿ
ಸ್ತೋಕಸ್ತೋಕಾಪನೀತಾರುಣರುಚಿರಚಿರಾದಸ್ತದೋಷಾನುಷಂಗಃ ।
ದಾತಾ ದೃಷ್ಟಿಂ ಪ್ರಸನ್ನಾಂ ತ್ರಿಭುವನನಯನಸ್ಯಾಶು ಯುಷ್ಮದ್ವಿರುದ್ಧಂ
ವಧ್ಯಾದ್ಬ್ರಧ್ನಸ್ಯ ಸಿದ್ಧಾಂಜನವಿಧಿರಪರಃ ಪ್ರಾಕ್ತನೋಽರ್ಚಿಃಪ್ರಚಾರಃ ॥ 32 ॥
ಭೂತ್ವಾ ಜಮ್ಭಸ್ಯ ಭೇತ್ತುಃ ಕಕುಭಿ ಪರಿಭವಾರಮ್ಭಭೂಃ ಶುಭ್ರಭಾನೋ- var ಸ್ಥಿತ್ವಾ
ರ್ಬಿಭ್ರಾಣಾ ಬಭ್ರುಭಾವಂ ಪ್ರಸಭಮಭಿನವಾಮ್ಭೋಜಜೃಮ್ಭಾಪ್ರಗಲ್ಭಾ ।
ಭೂಷಾ ಭೂಯಿಷ್ಠಶೋಭಾ ತ್ರಿಭುವನಭವನಸ್ಯಾಸ್ಯ ವೈಭಾಕರೀ ಪ್ರಾಗ್-
ವಿಭ್ರಾನ್ತಾ ಭ್ರಾಜಮಾನಾ ವಿಭವತು ವಿಭವೋದ್ಭೂತಯೇ ಸಾ ವಿಭಾ ವಃ ॥ 33 ॥ var ನಿರ್ಭಾನ್ತಿ, ವಿಭ್ರಾನ್ತಿ
ಸಂಸಕ್ತಂ ಸಿಕ್ತಮೂಲಾದಭಿನವಭುವನೋದ್ಯಾನಕೌತೂಹಲಿನ್ಯಾ
ಯಾಮಿನ್ಯಾ ಕನ್ಯಯೇವಾಮೃತಕರಕಲಶಾವರ್ಜಿತೇನಾಮೃತೇನ ।
ಅರ್ಕಾಲೋಕಃ ಕ್ರಿಯಾದ್ವೋ ಮುದಮುದಯಶಿರಶ್ಚಕ್ರವಾಲಾಲವಾಲಾ-
ದುದ್ಯನ್ಬಾಲಪ್ರವಾಲಪ್ರತಿಮರುಚಿರಹಃಪಾದಪಪ್ರಾಕ್ಪ್ರರೋಹಃ ॥ 34 ॥
ಭಿನ್ನಂ ಭಾಸಾರುಣಸ್ಯ ಕ್ವಚಿದಭಿನವಯಾ ವಿದ್ರುಮಾಣಾಂ ತ್ವಿಷೇವ
ತ್ವಙ್ನ್ನಕ್ಷತ್ರರತ್ನದ್ಯುತಿನಿಕರಕರಾಲಾನ್ತರಾಲಂ ಕ್ವಚಿಚ್ಚ ।
ನಾನ್ತರ್ನಿಃಶೇಷಕೃಷ್ಣಶ್ರಿಯಮುದಧಿಮಿವ ಧ್ವಾನ್ತರಾಶಿಂ ಪಿಬನ್ಸ್ತಾ-
ದೌರ್ವಃ ಪೂರ್ವೋಽಪ್ಯಪೂರ್ವೋಽಗ್ನಿರಿವ ಭವದಘಪ್ಲುಷ್ಟಯೇಽರ್ಕಾವಭಾಸಃ ॥ 35 ॥
ಗನ್ಧರ್ವೈರ್ಗದ್ಯಪದ್ಯವ್ಯತಿಕರಿತವಚೋಹೃದ್ಯಮಾತೋದ್ಯವಾದ್ಯೈ-
ರಾದ್ಯೈರ್ಯೋ ನಾರದಾದ್ಯೈರ್ಮುನಿಭಿರಭಿನುತೋ ವೇದವೇದ್ಯೈರ್ವಿಭಿದ್ಯ ।
var ವೀತವೇದ್ಯೈರ್ವಿವಿದ್ಯ, ವೇದವಿದ್ಭಿರ್ವಿಭಿದ್ಯ
ಆಸಾದ್ಯಾಪದ್ಯತೇ ಯಂ ಪುನರಪಿ ಚ ಜಗದ್ಯೌವನಂ ಸದ್ಯ ಉದ್ಯ-
ನ್ನುದ್ದ್ಯೋತೋ ದ್ಯೋತಿತದ್ಯೌರ್ದ್ಯತು ದಿವಸಕೃತೋಽಸಾವವದ್ಯಾನಿ ವೋಽದ್ಯ ॥ 36 ॥
ಆವಾನೈಶ್ಚನ್ದ್ರಕಾನ್ತೈಶ್ಚ್ಯುತತಿಮಿರತಯಾ ತಾನವಾತ್ತಾರಕಾಣಾ- var ಆವಾನ್ತೈಃ
ಮೇಣಾಂಕಾಲೋಕಲೋಪಾದುಪಹತಮಹಸಾಮೋಷಧೀನಾಂ ಲಯೇನ ।
ಆರಾದುತ್ಪ್ರೇಕ್ಷ್ಯಮಾಣಾ ಕ್ಷಣಮುದಯತಟಾನ್ತರ್ಹಿತಸ್ಯಾಹಿಮಾಂಶೋ-
ರಾಭಾ ಪ್ರಾಭಾತಿಕೀ ವೋಽವತು ನ ತು ನಿತರಾಂ ತಾವದಾವಿರ್ಭವನ್ತೀ ॥ 37 ॥
ಸಾನೌ ಸಾ ನೌದಯೇ ನಾರುಣಿತದಲಪುನರ್ಯೌವನಾನಾಂ ವನಾನಾ- var ಲಸದ್ಯೌವನಾನಾಂ
ಮಾಲೀಮಾಲೀಢಪೂರ್ವಾ ಪರಿಹೃತಕುಹರೋಪಾನ್ತನಿಮ್ನಾ ತನಿಮ್ನಾ ।
ಭಾ ವೋಽಭಾವೋಪಶಾನ್ತಿಂ ದಿಶತು ದಿನಪತೇರ್ಭಾಸಮಾನಾ ಸಮಾನಾ-
ರಾಜೀ ರಾಜೀವರೇಣೋಃ ಸಮಸಮಯಮುದೇತೀವ ಯಸ್ಯಾ ವಯಸ್ಯಾ ॥ 38 ॥
ಉಜ್ಜೃಮ್ಭಾಮ್ಭೋರುಹಾಣಾಂ ಪ್ರಭವತಿ ಪಯಸಾಂ ಯಾ ಶ್ರಿಯೇ ನೋಷ್ಣತಾಯೈ
ಪುಷ್ಣಾತ್ಯಾಲೋಕಮಾತ್ರಂ ನ ತು ದಿಶತಿ ದೃಶಾಂ ದೃಶ್ಯಮಾನಾ ವಿಧಾತಮ್ ।
ಪೂರ್ವಾದ್ರೇರೇವ ಪೂರ್ವಂ ದಿವಮನು ಚ ಪುನಃ ಪಾವನೀ ದಿಙ್ಮುಖಾನಾ- var ತತಃ
ಮೇನಾಂಸ್ಯೈನೀ ವಿಭಾಸೌ ನುದತು ನುತಿಪದೈಕಾಸ್ಪದಂ ಪ್ರಾಕ್ತನೀ ವಃ ॥ 39 ॥
ವಾಚಾಂ ವಾಚಸ್ಪತೇರಪ್ಯಚಲಭಿದುಚಿತಾಚಾರ್ಯಕಾಣಾಂ ಪ್ರಪಂಚೈ-
ರ್ವೈರಂಚಾನಾಂ ತಥೋಚ್ಚಾರಿತಚತುರಋಚಾಂ ಚಾನನಾನಾಂ ಚತುರ್ಣಾಮ್ । var ರುಚಿರ
ಉಚ್ಯೇತಾರ್ಚಾಸು ವಾಚ್ಯಚ್ಯುತಿಶುಚಿಚರಿತಂ ಯಸ್ಯ ನೋಚ್ಚೈರ್ವಿವಿಚ್ಯ var ಅರ್ಚಾಸ್ವವಾಚ್ಯ
ಪ್ರಾಚ್ಯಂ ವರ್ಚಶ್ಚಕಾಸಚ್ಚಿರಮುಪಚಿನುತಾತ್ತಸ್ಯ ಚಂಡಾರ್ಚಿಷೋ ವಃ ॥ 40 ॥ var ಶ್ರಿಯಂ
ಮೂರ್ಧ್ನ್ಯದ್ರೇರ್ಧಾತುರಾಗಸ್ತರುಷು ಕಿಸಲಯೋ ವಿದ್ರುಮೌಘಃ ಸಮುದ್ರೇ
var – ಕಿಸಲಯಾದ್ವಿದ್ರುಮೌಘಾತ್ಸಮುದ್ರೇ
ದಿಙ್ಮಾತಂಗೋತ್ತಮಾಂಗೇಷ್ವಭಿನವನಿಹಿತಃ ಸಾನ್ದ್ರಸಿನ್ದೂರರೇಣುಃ ।
var ವಿಹಿತಃ, ನಿಹಿತಾತ್ಸನ್ದ್ರಸಿನ್ದೂರರ್Eಣೋಃ
ಸೀಮ್ನಿ ವ್ಯೋಮ್ನಶ್ಚ ಹೇಮ್ನಃ ಸುರಶಿಖರಿಭುವೋ ಜಾಯತೇ ಯಃ ಪ್ರಕಾಶಃ
ಶೋಣಿಮ್ನಾಸೌ ಖರಾಂಶೋರುಷಸಿ ದಿಶತು ವಃ ಶರ್ಮ ಶೋಭೈಕದೇಶಃ ॥ 41 ॥
ಅಸ್ತಾದ್ರೀಶೋತ್ತಮಾಂಗೇ ಶ್ರಿತಶಶಿನಿ ತಮಃಕಾಲಕೂಟೇ ನಿಪೀತೇ
ಯಾತಿ ವ್ಯಕ್ತಿಂ ಪುರಸ್ತಾದರುಣಕಿಸಲಯೇ ಪ್ರತ್ಯುಷಃಪಾರಿಜಾತೇ ।
ಉದ್ಯನ್ತ್ಯಾರಕ್ತಪೀತಾಮ್ಬರವಿಶದತರೋದ್ವೀಕ್ಷಿತಾ ತೀಕ್ಷ್ಣಭಾನೋ-
var ರುಚಿರತರೋದ್ವೀಕ್ಷಿತಾ var ತೀವ್ರಭಾಸಃ
ರ್ಲಕ್ಷ್ಮೀರ್ಲಕ್ಷ್ಮೀರಿವಾಸ್ತು ಸ್ಫುಟಕಮಲಪುಟಾಪಾಶ್ರಯಾ ಶ್ರೇಯಸೇ ವಃ ॥ 42 ॥ var ಪುಟೋಪಾಶ್ರಯ
ನೋದನ್ವಾಂಜನ್ಮಭೂಮಿರ್ನ ತದುದರಭುವೋ ಬಾನ್ಧವಾಃ ಕೌಸ್ತುಭಾದ್ಯಾ
ಯಸ್ಯಾಃ ಪದ್ಮಂ ನ ಪಾಣೌ ನ ಚ ನರಕರಿಪೂರಃಸ್ಥಲೀ ವಾಸವೇಶ್ಮ ।
ತೇಜೋರೂಪಾಪರೈವ ತ್ರಿಷು ಭುವನತಲೇಷ್ವಾದಧಾನಾ ವ್ಯವಸ್ಥಾಂ var ತ್ರಿಭುವನಭವನೇ
ಸಾ ಶ್ರೀಃ ಶ್ರೇಯಾಂಸಿ ದಿಶ್ಯಾದಶಿಶಿರಮಹಸೋ ಮಂಡಲಾಗ್ರೋದ್ಗತಾ ವಃ ॥ 43 ॥
॥ ಇತಿ ದ್ಯುತಿವರ್ಣನಮ್ ॥ var ತೇಜೋವರ್ಣನಮ್
॥ ಅಥ ಅಶ್ವವರ್ಣನಮ್ ॥
ರಕ್ಷನ್ತ್ವಕ್ಷುಣ್ಣಹೇಮೋಪಲಪಟಲಮಲಂ ಲಾಘವಾದುತ್ಪತನ್ತಃ
ಪಾತಂಗಾಃ ಪಂಗ್ವವಜ್ಞಾಜಿತಪವನಜವಾ ವಾಜಿನಸ್ತೇ ಜಗನ್ತಿ ।
ಯೇಷಾಂ ವೀತಾನ್ಯಚಿಹ್ನೋನ್ನಯಮಪಿ ವಹತಾಂ ಮಾರ್ಗಮಾಖ್ಯಾತಿ ಮೇರಾ-
ವುದ್ಯನ್ನುದ್ದಾಮದೀಪ್ತಿರ್ದ್ಯುಮಣಿಮಣಿಶಿಲಾವೇದಿಕಾಜಾತವೇದಾಃ ॥ 44 ॥
ಪ್ಲುಷ್ಟಾಃ ಪೃಷ್ಠೇಂಽಶುಪಾತೈರತಿನಿಕಟತಯಾ ದತ್ತದಾಹಾತಿರೇಕೈ-
ರೇಕಾಹಾಕ್ರಾನ್ತಕೃತ್ಸ್ನತ್ರಿದಿವಪಥಪೃಥುಶ್ವಾಸಶೋಷಾಃ ಶ್ರಮೇಣ ।
ತೀವ್ರೋದನ್ಯಾಸ್ತ್ವರನ್ತಾಮಹಿತವಿಹತಯೇ ಸಪ್ತಯಃ ಸಪ್ತಸಪ್ತೇ-
ರಭ್ಯಾಶಾಕಾಶಗಂಗಾಜಲಸರಲಗಲಾವಾಙ್ನತಾಗ್ರಾನನಾ ವಃ ॥ 45 ॥ var ಗಲವರ್ಜಿತಾಗ್ರಾನನಾಃ
ಮತ್ವಾನ್ಯಾನ್ಪಾರ್ಶ್ವತೋಽಶ್ವಾನ್ ಸ್ಫಟಿಕತಟದೃಷದ್ದೃಷ್ಟದೇಹಾ ದ್ರವನ್ತೀ
ವ್ಯಸ್ತೇಽಹನ್ಯಸ್ತಸಂಧ್ಯೇಯಮಿತಿ ಮೃದುಪದಾ ಪದ್ಮರಾಗೋಪಲೇಷು ।
ಸಾದೃಶ್ಯಾದೃಶ್ಯಮೂರ್ತಿರ್ಮರಕತಕಟಕೇ ಕ್ಲಿಷ್ಟಸೂತಾ ಸುಮೇರೋ-
ರ್ಮೂರ್ಧನ್ಯಾವೃತ್ತಿಲಬ್ಧಧ್ರುವಗತಿರವತು ಬ್ರಧ್ನವಾಹಾವಲಿರ್ವಃ ॥ 46 ॥ var ದ್ರುತ
ಹೇಲಾಲೋಲಂ ವಹನ್ತೀ ವಿಷಧರದಮನಸ್ಯಾಗ್ರಜೇನಾವಕೃಷ್ಟಾ
ಸ್ವರ್ವಾಹಿನ್ಯಾಃ ಸುದೂರಂ ಜನಿತಜವಜಯಾ ಸ್ಯನ್ದನಸ್ಯ ಸ್ಯದೇನ ।
ನಿರ್ವ್ಯಾಜಂ ತಾಯಮಾನೇ ಹರಿತಿಮನಿ ನಿಜೇ ಸ್ಫೀತಫೇನಾಹಿತಶ್ರೀ- var ಸ್ಫೀತಫೇನಾಸ್ಮಿತಶ್ರೀಃ
ರಶ್ರೇಯಾಂಸ್ಯಶ್ವಪಂಕ್ತಿಃ ಶಮಯತು ಯಮುನೇವಾಪರಾ ತಾಪನೀ ವಃ ॥ 47 ॥
ಮಾರ್ಗೋಪಾನ್ತೇ ಸುಮೇರೋರ್ನುವತಿ ಕೃತನತೌ ನಾಕಧಾಮ್ನಾಂ ನಿಕಾಯೇ
ವೀಕ್ಷ್ಯ ವ್ರೀಡಾನತಾನಾಂ ಪ್ರತಿಕುಹರಮುಖಂ ಕಿಂನರೀಣಾಂ ಮುಖಾನಿ ।
ಸೂತೇಽಸೂಯತ್ಯಪೀಷಜ್ಜಡಗತಿ ವಹತಾಂ ಕಂಧರಾರ್ಧೈರ್ವಲದ್ಭಿ- var ಕಂಧರಾಗ್ರೈಃ
ರ್ವಾಹಾನಾಂ ವ್ಯಸ್ಯತಾದ್ವಃ ಸಮಮಸಮಹರೇರ್ಹೇಷಿತಂ ಕಲ್ಮಷಾಣಿ ॥ 48 ॥
ಧುನ್ವನ್ತೋ ನೀರದಾಲೀರ್ನಿಜರುಚಿಹರಿತಾಃ ಪಾರ್ಶ್ವಯೋಃ ಪಕ್ಷತುಲ್ಯಾ-
ಸ್ತಾಲೂತ್ತಾನೈಃ ಖಲೀನೈಃ ಖಚಿತಮುಖರುಚಶ್ಚ್ಯೋತತಾ ಲೋಹಿತೇನ ।
ಉಡ್ಡೀಯೇವ ವ್ರಜನ್ತೋ ವಿಯತಿ ಗತಿವಶಾದರ್ಕವಾಹಾಃ ಕ್ರಿಯಾಸುಃ
ಕ್ಷೇಮಂ ಹೇಮಾದ್ರಿಹೃದ್ಯದ್ರುಮಶಿಖರಶಿರಃಶ್ರೇಣಿಶಾಖಾಶುಕಾ ವಃ ॥ 49 ॥
॥ ಇತ್ಯಶ್ವವರ್ಣನಮ್ ॥
॥ ಅಥ ಅರುಣವರ್ಣನಮ್ ॥
ಪ್ರಾತಃ ಶೈಲಾಗ್ರರಂಗೇ ರಜನಿಜವನಿಕಾಪಾಯಸಂಲಕ್ಷ್ಯಲಕ್ಷ್ಮೀ-
ರ್ವಿಕ್ಷಿಪ್ತಾಪೂರ್ವಪುಷ್ಪಾಂಜಲಿಮುಡುನಿಕರಂ ಸೂತ್ರಧಾರಾಯಮಾಣಃ ।
ಯಾಮೇಷ್ವಂಕೇಷ್ವಿವಾಹ್ನಃ ಕೃತರುಚಿಷು ಚತುರ್ಷ್ವೇವ ಜಾತಪ್ರತಿಷ್ಠಾ- var ಯಾತಃ ಪ್ರತಿಷ್ಠಾಂ
ಮವ್ಯಾತ್ಪ್ರಸ್ತಾವಯನ್ವೋ ಜಗದಟನಮಹಾನಾಟಿಕಾಂ ಸೂರ್ಯಸೂತಃ ॥ 50 ॥
ಆಕ್ರಾನ್ತ್ಯಾ ವಾಹ್ಯಮಾನಂ ಪಶುಮಿವ ಹರಿಣಾ ವಾಹಕೋಽಗ್ರ್ಯೋ ಹರೀಣಾಂ
ಭ್ರಾಮ್ಯನ್ತಂ ಪಕ್ಷಪಾತಾಜ್ಜಗತಿ ಸಮರುಚಿಃ ಸರ್ವಕರ್ಮೈಕಸಾಕ್ಷೀ ।
ಶತ್ರುಂ ನೇತ್ರಶ್ರುತೀನಾಮವಜಯತಿ ವಯೋಜ್ಯೇಷ್ಠಭಾವೇ ಸಮೇಽಪಿ
ಸ್ಥಾಮ್ನಾಂ ಧಾಮ್ನಾಂ ನಿಧಿರ್ಯಃ ಸ ಭವದಘನುದೇ ನೂತನಃ ಸ್ತಾದನೂರುಃ ॥ 51 ॥
ದತ್ತಾರ್ಘೈರ್ದೂರನಮ್ರೈರ್ವಿಯತಿ ವಿನಯತೋ ವೀಕ್ಷಿತಃ ಸಿದ್ಧಸಾರ್ಥೈಃ var ಸಿದ್ಧಸಾಧ್ಯೈಃ
ಸಾನಾಥ್ಯಂ ಸಾರಥಿರ್ವಃ ಸ ದಶಶತರುಚೇಃ ಸಾತಿರೇಕಂ ಕರೋತು ।
ಆಪೀಯ ಪ್ರಾತರೇವ ಪ್ರತತಹಿಮಪಯಃಸ್ಯನ್ದಿನೀರಿನ್ದುಭಾಸೋ
ಯಃ ಕಾಷ್ಠಾದೀಪನೋಽಗ್ರೇ ಜಡಿತ ಇವ ಭೃಶಂ ಸೇವತೇ ಪೃಷ್ಠತೋಽರ್ಕಮ್ ॥ 52 ॥
ಮುಂಚನ್ರಶ್ಮೀನ್ದಿನಾದೌ ದಿನಗಮಸಮಯೇ ಸಂಹರಂಶ್ಚ ಸ್ವತನ್ತ್ರ-
ಸ್ತೋತ್ರಪ್ರಖ್ಯಾತವೀರ್ಯೋಽವಿರತಹರಿಪದಾಕ್ರಾನ್ತಿಬದ್ಧಾಭಿಯೋಗಃ । var ವಿತತ
ಕಾಲೋತ್ಕರ್ಷಾಲ್ಲಘುತ್ವಂ ಪ್ರಸಭಮಧಿಪತೌ ಯೋಜಯನ್ಯೋ ದ್ವಿಜಾನಾಂ
ಸೇವಾಪ್ರೀತೇನ ಪೂಷ್ಣಾತ್ಮಸಮ ಇವ ಕೃತಸ್ತ್ರಾಯತಾಂ ಸೋಽರುಣೋ ವಃ ॥ 53 ॥ var ಸ್ವಸಮ
ಶಾತಃ ಶ್ಯಾಮಾಲತಾಯಾಃ ಪರಶುರಿವ ತಮೋಽರಣ್ಯವಹ್ನೇರಿವಾರ್ಚಿಃ var ದಾಹೇ ದವಾಭಃ
ಪ್ರಾಚ್ಯೇವಾಗ್ರೇ ಗ್ರಹೀತುಂ ಗ್ರಹಕುಮುದವನಂ ಪ್ರಾಗುದಸ್ತೋಽಗ್ರಹಸ್ತಃ ।
var ಪ್ರಾಚೀವಾಗ್ರೇ, ಗ್ರಹಕುಮುದರುಚಿಂ
ಐಕ್ಯಂ ಭಿನ್ದನ್ದ್ಯುಭೂಮ್ಯೋರವಧಿರಿವ ವಿಧಾತೇವ ವಿಶ್ವಪ್ರಬೋಧೇ
ವಾಹಾನಾಂ ವೋ ವಿನೇತಾ ವ್ಯಪನಯತು ವಿಪನ್ನಾಮ ಧಾಮಾಧಿಪಸ್ಯ ॥ 54 ॥
ಪೌರಸ್ತ್ಯಸ್ತೋಯದರ್ತೋಃ ಪವನ ಇವ ಪತತ್ಪಾವಕಸ್ಯೇವ ಧೂಮೋ var ಪತನ್
ವಿಶ್ವಸ್ಯೇವಾದಿಸರ್ಗಃ ಪ್ರಣವ ಇವ ಪರಂ ಪಾವನೋ ವೇದರಾಶೇಃ
ಸಂಧ್ಯಾನೃತ್ಯೋತ್ಸವೇಚ್ಛೋರಿವ ಮದನರಿಪೋರ್ನನ್ದಿನಾನ್ದೀನಿನಾದಃ
ಸೌರಸ್ಯಾಗ್ರೇ ಸುಖಂ ವೋ ವಿತರತು ವಿನತಾನನ್ದನಃ ಸ್ಯನ್ದನಸ್ಯ ॥ 55 ॥ var ಸ್ಯನ್ದನೋ ವಃ
ಪರ್ಯಾಪ್ತಂ ತಪ್ತಚಾಮೀಕರಕಟಕತಟೇ ಶ್ಲಿಷ್ಟಶೀತೇತರಾಂಶಾ-
ವಾಸೀದತ್ಸ್ಯನ್ದನಾಶ್ವಾನುಕೃತಿಮರಕತೇ ಪದ್ಮರಾಗಾಯಮಾಣಃ । var ಅಶ್ವಾನುಕೃತಮರಕತೇ
ಯಃ ಸೋತ್ಕರ್ಷಾಂ ವಿಭೂಷಾಂ ಕುರುತ ಇವ ಕುಲಕ್ಷ್ಮಾಭೃದೀಶಸ್ಯ ಮೇರೋ-
ರೇನಾಂಸ್ಯಹ್ನಾಯ ದೂರಂ ಗಮಯತು ಸ ಗುರುಃ ಕಾದ್ರವೇಯದ್ವಿಷೋ ವಃ ॥ 56 ॥
ನೀತ್ವಾಶ್ವಾನ್ಸಪ್ತ ಕಕ್ಷಾ ಇವ ನಿಯಮವಶಂ ವೇತ್ರಕಲ್ಪಪ್ರತೋದ- var ಕಕ್ಷ್ಯಾ
ಸ್ತೂರ್ಣಂ ಧ್ವಾನ್ತಸ್ಯ ರಾಶಾವಿತರಜನ ಇವೋತ್ಸಾರಿತೇ ದೂರಭಾಜಿ ।
ಪೂರ್ವಂ ಪ್ರಷ್ಠೋ ರಥಸ್ಯ ಕ್ಷಿತಿಭೃದಧಿಪತೀನ್ದರ್ಶಯಂಸ್ತ್ರಾಯತಾಂ ವ-
ಸ್ತ್ರೈಲೋಕ್ಯಾಸ್ಥಾನದಾನೋದ್ಯತದಿವಸಪತೇಃ ಪ್ರಾಕ್ಪ್ರತೀಹಾರಪಾಲಃ ॥ 57 ॥
ವಜ್ರಿಂಜಾತಂ ವಿಕಾಸೀಕ್ಷಣಕಮಲವನಂ ಭಾಸಿ ನಾಭಾಸಿ ವಹ್ನೇ! var ನೋ ಭಾಸಿ
ತಾತಂ ನತ್ವಾಶ್ವಪಾರ್ಶ್ವಾನ್ನಯ ಯಮ! ಮಹಿಷಂ ರಾಕ್ಷಸಾ ವೀಕ್ಷಿತಾಃ ಸ್ಥ ।
ಸಪ್ತೀನ್ಸಿಂಚ ಪ್ರಚೇತಃ! ಪವನ! ಭಜ ಜವಂ ವಿತ್ತಪಾವೇದಿತಸ್ತ್ವಂ
ವನ್ದೇ ಶರ್ವೇತಿ ಜಲ್ಪನ್ಪ್ರತಿದಿಶಮಧಿಪಾನ್ಪಾತು ಪೂಷ್ಣೋಽಗ್ರಣೀರ್ವಃ ॥ 58 ॥
ಪಾಶಾನಾಶಾನ್ತಪಾಲಾದರುಣ ವರುಣತೋ ಮಾ ಗ್ರಹೀಃ ಪ್ರಗ್ರಹಾರ್ಥಂ
ತೃಷ್ಣಾಂ ಕೃಷ್ಣಸ್ಯ ಚಕ್ರೇ ಜಹಿಹಿ ನಹಿ ರಥೋ ಯಾತಿ ಮೇ ನೈಕಚಕ್ರಃ ।
ಯೋಕ್ತುಂ ಯುಗ್ಯಂ ಕಿಮುಚ್ಚೈಃಶ್ರವಸಮಭಿಲಷಸ್ಯಷ್ಟಮಂ ವೃತ್ರಶತ್ರೋ- var ತ್ವಾಷ್ಟ್ರಶತ್ರೋಃ
ಸ್ತ್ಯಕ್ತಾನ್ಯಾಪೇಕ್ಷವಿಶ್ವೋಪಕೃತಿರಿವ ರವಿಃ ಶಾಸ್ತಿ ಯಂ ಸೋಽವತಾದ್ವಃ ॥ 59 ॥
ನೋ ಮೂರ್ಚ್ಛಾಚ್ಛಿನ್ನವಾಂಛಃ ಶ್ರಮವಿವಶವಪುರ್ನೈವ ನಾಪ್ಯಾಸ್ಯಶೋಷೀ
ಪಾನ್ಥಃ ಪಥ್ಯೇತರಾಣಿ ಕ್ಷಪಯತು ಭವತಾಂ ಭಾಸ್ವತೋಽಗ್ರೇಸರಃ ಸಃ ।
ಯಃ ಸಂಶ್ರಿತ್ಯ ತ್ರಿಲೋಕೀಮಟತಿ ಪಟುತರೈಸ್ತಾಪ್ಯಮಾನೋ ಮಯೂಖೈ-
ರಾರಾದಾರಾಮಲೇಖಾಮಿವ ಹರಿತಮಣಿಶ್ಯಾಮಲಾಮಶ್ವಪಂಕ್ತಿಮ್ ॥ 60 ॥ var ಹರಿತತೃಣ
ಸೀದನ್ತೋಽನ್ತರ್ನಿಮಜ್ಜಜ್ಜಡಖುರಮುಸಲಾಃ ಸೈಕತೇ ನಾಕನದ್ಯಾಃ
ಸ್ಕನ್ದನ್ತಃ ಕನ್ದರಾಲೀಃ ಕನಕಶಿಖರಿಣೋ ಮೇಖಲಾಸು ಸ್ಖಲನ್ತಃ ।
ದೂರಂ ದೂರ್ವಾಸ್ಥಲೋತ್ಕಾ ಮರಕತದೃಷದಿ ಸ್ಥಾಸ್ನವೋ ಯನ್ನ ಯಾತಾಃ
ಪೂಷ್ಣೋಽಶ್ವಾಃ ಪೂರಯಂಸ್ತೈಸ್ತದವತು ಜವನೈರ್ಹುಂಕೃತೇನಾಗ್ರಗೋ ವಃ ॥ 61 ॥ var ಪ್ರೇರಯನ್ ಹುಂಕೃತೈರಗ್ರಣೀಃ
॥ ಇತ್ಯರುಣವರ್ಣನಮ್ ॥ var ಸೂತವರ್ಣನಮ್
॥ ಅಥ ರಥವರ್ಣನಮ್ ॥
ಪೀನೋರಃಪ್ರೇರಿತಾಭ್ರೈಶ್ಚರಮಖುರಪುಟಾಗ್ರಸ್ಥಿತೈಃ ಪ್ರಾತರದ್ರಾ-
ವಾದೀರ್ಘಾಂಗೈರುದಸ್ತೋ ಹರಿಭಿರಪಗತಾಸಂಗನಿಃಶಬ್ದಚಕ್ರಃ ।
ಉತ್ತಾನಾನೂರುಮೂರ್ಧಾವನತಿಹಠಭವದ್ವಿಪ್ರತೀಪಪ್ರಣಾಮಃ
ಪ್ರಾಹ್ಣೇ ಶ್ರೇಯೋ ವಿಧತ್ತಾಂ ಸವಿತುರವತರನ್ವ್ಯೋಮವೀಥೀಂ ರಥೋ ವಃ ॥ 62 ॥ var ಪ್ರೇಯೋ
ಧ್ವಾನ್ತೌಘಧ್ವಂಸದೀಕ್ಷಾವಿಧಿಪಟು ವಹತಾ ಪ್ರಾಕ್ಸಹಸ್ರಂ ಕರಾಣಾ- var ವಿಧಿಗುರು ದ್ರಾಕ್ಸಹಸ್ರಂ
ಮರ್ಯಮ್ಣಾ ಯೋ ಗರಿಮ್ಣಃ ಪದಮತುಲಮುಪಾನೀಯತಾಧ್ಯಾಸನೇನ ।
ಸ ಶ್ರಾನ್ತಾನಾಂ ನಿತಾನ್ತಂ ಭರಮಿವ ಮರುತಾಮಕ್ಷಮಾಣಾಂ ವಿಸೋಢುಂ
ಸ್ಕನ್ಧಾತ್ಸ್ಕನ್ಧಂ ವ್ರಜನ್ವೋ ವೃಜಿನವಿಜಿತಯೇ ಭಾಸ್ವತಃ ಸ್ಯನ್ದನೋಽಸ್ತು ॥ 63 ॥
ಯೋಕ್ತ್ರೀಭೂತಾನ್ಯುಗಸ್ಯ ಗ್ರಸಿತುಮಿವ ಪುರೋ ದನ್ದಶೂಕಾನ್ದಧಾನೋ
ದ್ವೇಧಾವ್ಯಸ್ತಾಮ್ಬುವಾಹಾವಲಿವಿಹಿತಬೃಹತ್ಪಕ್ಷವಿಕ್ಷೇಪಶೋಭಃ ।
ಸಾವಿತ್ರಃ ಸ್ಯನ್ದನೋಽಸೌ ನಿರತಿಶಯರಯಪ್ರೀಣಿತಾನೂರುರೇನಃ-
ಕ್ಷೇಪೀಯೋ ವೋ ಗರುತ್ಮಾನಿವ ಹರತು ಹರೀಚ್ಛಾವಿಧೇಯಪ್ರಚಾರಃ ॥ 64 ॥
ಏಕಾಹೇನೈವ ದೀರ್ಘಾಂ ತ್ರಿಭುವನಪದವೀಂ ಲಂಘಯನ್ ಯೋ ಲಘಿಷ್ಠಃ var ಕೃಸ್ತ್ನಾಂ
ಪೃಷ್ಠೇ ಮೇರೋರ್ಗರೀಯಾನ್ ದಲಿತಮಣಿದೃಷತ್ತ್ವಿಂಷಿ ಪಿಂಷಞ್ಶಿರಾಂಸಿ ।
ಸರ್ವಸ್ಯೈವೋಪರಿಷ್ಟಾದಥ ಚ ಪುನರಧಸ್ತಾದಿವಾಸ್ತಾದ್ರಿಮೂರ್ನ್ಧಿ
ಬ್ರಧ್ನಸ್ಯಾವ್ಯಾತ್ಸ ಏವಂ ದುರಧಿಗಮಪರಿಸ್ಪನ್ದನಃ ಸ್ಯನ್ದನೋ ವಃ ॥ 65 ॥
ಧೂರ್ಧ್ವಸ್ತಾಗ್ರ್ಯಗ್ರಹಾಣಿ ಧ್ವಜಪಟಪವನಾನ್ದೋಲಿತೇನ್ದೂನಿ ದೂರಂ var ದೂರಾತ್
ರಾಹೌ ಗ್ರಾಸಾಭಿಲಾಷಾದನುಸರತಿ ಪುನರ್ದತ್ತಚಕ್ರವ್ಯಥಾನಿ ।
ಶ್ರಾನ್ತಾಶ್ವಶ್ವಾಸಹೇಲಾಧುತವಿಬುಧಧುನೀನಿರ್ಝರಾಮ್ಭಾಂಸಿ ಭದ್ರಂ
ದೇಯಾಸುರ್ವೋ ದವೀಯೋ ದಿವಿ ದಿವಸಪತೇಃ ಸ್ಯನ್ದನಪ್ರಸ್ಥಿತಾನಿ ॥ 66 ॥
ಅಕ್ಷೇ ರಕ್ಷಾಂ ನಿಬಧ್ಯ ಪ್ರತಿಸರವಲಯೈರ್ಯೋಜಯನ್ತ್ಯೋ ಯುಗಾಗ್ರಂ
ಧೂಃಸ್ತಮ್ಭೇ ದಗ್ಧಧೂಪಾಃ ಪ್ರಹಿತಸುಮನಸೋ ಗೋಚರೇ ಕೂಬರಸ್ಯ ।
ಚರ್ಚಾಶ್ಚಕ್ರೇ ಚರನ್ತ್ಯೋ ಮಲಯಜಪಯಸಾ ಸಿದ್ಧವಧ್ವಸ್ತ್ರಿಸಂಧ್ಯಂ var ಚರ್ಚಾಂ
ವನ್ದನ್ತೇ ಯಂ ದ್ಯುಮಾರ್ಗೇ ಸ ನುದತು ದುರಿತಾನ್ಯಂಶುಮತ್ಸ್ಯನ್ದನೋ ವಃ ॥ 67 ॥
ಉತ್ಕೀರ್ಣಸ್ವರ್ಣರೇಣುದ್ರುತಖುರದಲಿತಾ ಪಾರ್ಶ್ವಯೋಃ ಶಶ್ವದಶ್ವೈ- var ರೇಣುರ್ದ್ರುತ
ರಶ್ರಾನ್ತಭ್ರಾನ್ತಚಕ್ರಕ್ರಮನಿಖಿಲಮಿಲನ್ನೇಮಿನಿಮ್ನಾ ಭರೇಣ ।
ಮೇರೋರ್ಮೂರ್ಧನ್ಯಘಂ ವೋ ವಿಘಟಯತು ರವೇರೇಕವೀಥೀ ರಥಸ್ಯ
ಸ್ವೋಷ್ಮೋದಕ್ತಾಮ್ಬುರಿಕ್ತಪ್ರಕಟಿತಪುಲಿನೋದ್ಧೂಸರಾ ಸ್ವರ್ಧುನೀವ ॥ 68 ॥ var ಸ್ವೋಷ್ಮೋದಸ್ತಾಮ್ಬು
ನನ್ತುಂ ನಾಕಾಲಯಾನಾಮನಿಶಮನುಯತಾಂ ಪದ್ಧತಿಃ ಪಂಕ್ತಿರೇವ var ಉಪಯತಾಂ
ಕ್ಷೋದೋ ನಕ್ಷತ್ರರಾಶೇರದಯರಯಮಿಲಚ್ಚಕ್ರಪಿಷ್ಟಸ್ಯ ಧೂಲಿಃ ।
ಹೇಷಹ್ಲಾದೋ ಹರೀಣಾಂ ಸುರಶಿಖರಿದರೀಃ ಪೂರಯನ್ನೇಮಿನಾದೋ var ನಾದೋ
ಯಸ್ಯಾವ್ಯಾತ್ತೀವ್ರಭಾನೋಃ ಸ ದಿವಿ ಭುವಿ ಯಥಾ ವ್ಯಕ್ತಚಿಹ್ನೋ ರಥೋ ವಃ ॥ 69 ॥
ನಿಃಸ್ಪನ್ದಾನಾಂ ವಿಮಾನಾವಲಿವಿತತದಿವಾಂ ದೇವವೃನ್ದಾರಕಾಣಾಂ var ವಲಿತದಿಶಾ
ವೃನ್ದೈರಾನನ್ದಸಾನ್ದ್ರೋದ್ಯಮಮಪಿ ವಹತಾಂ ವಿನ್ದತಾಂ ವನ್ದಿತುಂ ನೋ ।
ಮನ್ದಾಕಿನ್ಯಾಮಮನ್ದಃ ಪುಲಿನಭೃತಿ ಮೃದುರ್ಮನ್ದರೇ ಮನ್ದಿರಾಭೇ var ಮನ್ದರಾಭೇ
ಮನ್ದಾರೈರ್ಮಂಡಿತಾರಂ ದಧದರಿ ದಿನಕೃತ್ಸ್ಯನ್ದನಃ ಸ್ತಾನ್ಮುದೇ ವಃ ॥ 70 ॥
ಚಕ್ರೀ ಚಕ್ರಾರಪಂಕ್ತಿಂ ಹರಿರಪಿ ಚ ಹರೀನ್ ಧೂರ್ಜಟಿರ್ಧೂರ್ಧ್ವಜಾನ್ತಾ-
ನಕ್ಷಂ ನಕ್ಷತ್ರನಾಥೋಽರುಣಮಪಿ ವರುಣಃ ಕೂಬರಾಗ್ರಂ ಕುಬೇರಃ ।
ರಂಹಃ ಸಂಘಃ ಸುರಾಣಾಂ ಜಗದುಪಕೃತಯೇ ನಿತ್ಯಯುಕ್ತಸ್ಯ ಯಸ್ಯ
ಸ್ತೌತಿ ಪ್ರೀತಿಪ್ರಸನ್ನೋಽನ್ವಹಮಹಿಮರುಚೇಃ ಸೋಽವತಾತ್ಸ್ಯನ್ದನೋ ವಃ ॥ 71 ॥ var ರುಚ
ನೇತ್ರಾಹೀನೇನ ಮೂಲೇ ವಿಹಿತಪರಿಕರಃ ಸಿದ್ಧಸಾಧ್ಯೈರ್ಮರುದ್ಭಿಃ
ಪಾದೋಪಾನ್ತೇ ಸ್ತುತೋಽಲಂ ಬಲಿಹರಿರಭಸಾಕರ್ಷಣಾಬದ್ಧವೇಗಃ ।
ಭ್ರಾಮ್ಯನ್ವ್ಯೋಮಾಮ್ಬುರಾಶಾವಶಿಶಿರಕಿರಣಸ್ಯನ್ದನಃ ಸಂತತಂ ವೋ
ದಿಶ್ಯಾಲ್ಲಕ್ಷ್ಮೀಮಪಾರಾಮತುಲಿತಮಹಿಮೇವಾಪರೋ ಮನ್ದರಾದ್ರಿಃ ॥ 72 ॥ var ಅತುಲ್ಯಾಂ
॥ ಇತಿ ರಥವರ್ಣನಮ್ ॥
॥ ಅಥ ಮಂಡಲವರ್ಣನಮ್ ॥
ಯಜ್ಜ್ಯಾಯೋ ಬೀಜಮಹ್ನಾಮಪಹತತಿಮಿರಂ ಚಕ್ಷುಷಾಮಂಜನಂ ಯ- var ಜ್ಯಾಯೋ ಯದ್ಬೀಜಮಹ್ನಾಮಪಹೃತ
ದ್ದ್ವಾರಂ ಯನ್ಮುಕ್ತಿಭಾಜಾಂ ಯದಖಿಲಭುವನಜ್ಯೋತಿಷಾಮೇಕಮೋಕಃ ।
ಯದ್ವೃಷ್ಟ್ಯಮ್ಭೋನಿಧಾನಂ ಧರಣಿರಸಸುಧಾಪಾನಪಾತ್ರಂ ಮಹದ್ಯ-
ದ್ದಿಶ್ಯಾದೀಶಸ್ಯ ಭಾಸಾಂ ತದಧೀಕಲಮಲಂ ಮಂಗಲಂ ಮಂಡಲಂ ವಃ ॥ 73 ॥ var ದೇವಸ್ಯ
ಭಾನೋಃ ತದಧಿಕಮಮಲಂ ಮಂಡಲಂ ಮಂಗಲಂ
ವೇಲಾವರ್ಧಿಷ್ಣು ಸಿನ್ಧೋಃ ಪಯ ಇವ ಖಮಿವಾರ್ಧೋದ್ಗತಾಗ್ಯ್ರಗ್ರಹೋಡು
ಸ್ತೋಕೋದ್ಭಿನ್ನಸ್ವಚಿಹ್ನಪ್ರಸವಮಿವ ಮಧೋರಾಸ್ಯಮಸ್ಯನ್ಮನಾಂಸಿ । var ಮಹಾಂಸಿ
ಪ್ರಾತಃ ಪೂಷ್ಣೋಽಶುಭಾನಿ ಪ್ರಶಮಯತು ಶಿರಃಶೇಖರೀಭೂತಮದ್ರೇಃ
ಪೌರಸ್ತ್ಯಸ್ಯೋದ್ಗಭಸ್ತಿಸ್ತಿಮಿತತಮತಮಃಖಂಡನಂ ಮಂಡಲಂ ವಃ ॥ 74 ॥
ಪ್ರತ್ಯುಪ್ತಸ್ತಪ್ತಹೇಮೋಜ್ಜ್ವಲರುಚಿರಚಲಃ ಪದ್ಮರಾಗೇಣ ಯೇನ
ಜ್ಯಾಯಃ ಕಿಂಜಲ್ಕಪುಂಜೋ ಯದಲಿಕುಲಶಿತೇರಮ್ಬರೇನ್ದೀವರಸ್ಯ ।
ಕಾಲವ್ಯಾಲಸ್ಯ ಚಿಹ್ನಂ ಮಹಿತತಮಮಹೋಮೂರ್ನ್ಧಿ ರತ್ನಂ ಮಹದ್ಯ-
ದ್ದೀಪ್ತಾಂಶೋಃ ಪ್ರಾತರವ್ಯಾತ್ತದವಿಕಲಜಗನ್ಮಂಡನಂ ಮಂಡಲಂ ವಃ ॥ 75 ॥
ಕಸ್ತ್ರಾತಾ ತಾರಕಾಣಾಂ ಪತತಿ ತನುರವಶ್ಯಾಯಬಿನ್ದುರ್ಯಥೇನ್ದು-
ರ್ವಿದ್ರಾಣಾ ದೃಕ್ಸ್ಮರಾರೇರುರಸಿ ಮುರರಿಪೋಃ ಕೌಸ್ತುಭೋ ನೋದ್ಗಭಸ್ತಿಃ ।
ವಹ್ನೇಃ ಸಾಪಹ್ನವೇವ ದ್ಯುತಿರುದಯಗತೇ ಯತ್ರ ತನ್ಮಂಡಲಂ ವೋ
ಮಾರ್ತಂಡೀಯಂ ಪುನೀತಾದ್ದಿವಿ ಭುವಿ ಚ ತಮಾಂಸೀವ ಮೃಷ್ಣನ್ಮಹಾಂಸಿ ॥ 76 ॥
ಯತ್ಪ್ರಾಚ್ಯಾಂ ಪ್ರಾಕ್ಚಕಾಸ್ತಿ ಪ್ರಭವತಿ ಚ ಯತಃ ಪ್ರಾಚ್ಯಸಾವುಜ್ಜಿಹಾನಾ-
ದಿದ್ಧಂ ಮಧ್ಯೇ ಯದಹ್ನೋ ಭವತಿ ತತರುಚಾ ಯೇನ ಚೋತ್ಪಾದ್ಯತೇಽಹಃ ।
ಯತ್ಪರ್ಯಾಯೇಣ ಲೋಕಾನವತಿ ಚ ಜಗತಾಂ ಜೀವಿತಂ ಯಚ್ಚ ತದ್ವೋ
ವಿಶ್ವಾನುಗ್ರಾಹಿ ವಿಶ್ವಂ ಸೃಜದಪಿ ಚ ರವೇರ್ಮಂಡಲಂ ಮುಕ್ತಯೇಽಸ್ತು ॥ 77 ॥
ಶುಷ್ಯನ್ತ್ಯೂಢಾನುಕಾರಾ ಮಕರವಸತಯೋ ಮಾರವೀಣಾಂ ಸ್ಥಲೀನಾಂ
ಯೇನೋತ್ತಪ್ತಾಃ ಸ್ಫುಟನ್ತಸ್ತಡಿತಿ ತಿಲತುಲಾಂ ಯಾನ್ತ್ಯಗೇನ್ದ್ರಾ ಯುಗಾನ್ತೇ । var ಚಟಿತಿ
ತಚ್ಚಂಡಾಂಶೋರಕಾಂಡತ್ರಿಭುವನದಹನಾಶಂಕಯಾ ಧಾಮ ಕೃಚ್ಛಾತ್ var ಕೃತ್ಸ್ನಂ
ಸಂಹೃತ್ಯಾಲೋಕಮಾತ್ರಂ ಪ್ರಲಘು ವಿದಧತಃ ಸ್ತಾನ್ಮುದೇ ಮಂಡಲಂ ವಃ ॥ 78 ॥ var ಆಹೃತ್ಯಾಲೋಕಮಾತ್ರಂ ಪ್ರತನು
ಉದ್ಯದ್ದ್ಯೂದ್ಯಾನವಾಪ್ಯಾಂ ಬಹುಲತಮತಮಃಪಂಕಪೂರಂ ವಿದಾರ್ಯ var ಬಹಲ
ಪ್ರೋದ್ಭಿನ್ನಂ ಪತ್ರಪಾರ್ಶ್ವೇಷ್ವವಿರಲಮರುಣಚ್ಛಾಯಯಾ ವಿಸ್ಫುರನ್ತ್ಯಾ ।
ಕಲ್ಯಾಣಾನಿ ಕ್ರಿಯಾದ್ವಃ ಕಮಲಮಿವ ಮಹನ್ಮಂಡಲಂ ಚಂಡಭಾನೋ- var ಚಂಡರಶ್ಮೇಃ
ರನ್ವೀತಂ ತೃಪ್ತಿಹೇತೋರಸಕೃದಲಿಕುಲಾಕಾರಿಣಾ ರಾಹುಣಾ ಯತ್ ॥ 79 ॥
ಚಕ್ಷುರ್ದಕ್ಷದ್ವಿಷೋ ಯನ್ನ ತು ದಹತಿ ಪುರಃ ಪೂರಯತ್ಯೇವ ಕಾಮಂ var ನ ದಹತಿ ನಿತರಾಂ ಪುನಃ
ನಾಸ್ತಂ ಜುಷ್ಟಂ ಮರುದ್ಭಿರ್ಯದಿಹ ನಿಯಮಿನಾಂ ಯಾನಪಾತ್ರಂ ಭವಾಬ್ಧೌ ।
ಯದ್ವೀತಶ್ರಾನ್ತಿ ಶಶ್ವದ್ಭ್ರಮದಪಿ ಜಗತಾಂ ಭ್ರಾನ್ತಿಮಭ್ರಾನ್ತಿ ಹನ್ತಿ
ಬ್ರಧ್ನಸ್ಯಾಖ್ಯಾದ್ವಿರುದ್ಧಕ್ರಿಯಮಥ ಚ ಹಿತಾಧಾಯಿ ತನ್ಮಂಡಲಂ ವಃ ॥ 80 ॥
॥ ಇತಿ ಮಂಡಲವರ್ಣನಮ್ ॥
॥ ಅಥ ಸೂರ್ಯವರ್ಣನಮ್ ।
ಸಿದ್ಧೈಃ ಸಿದ್ಧಾನ್ತಮಿಶ್ರಂ ಶ್ರಿತವಿಧಿ ವಿಬುಧೈಶ್ಚಾರಣೈಶ್ಚಾಟುಗರ್ಭಂ
ಗೀತ್ಯಾ ಗನ್ಧರ್ವಮುಖ್ಯೈರ್ಮುಹುರಹಿಪತಿಭಿರ್ಯಾತುಧಾನೈರ್ಯತಾತ್ಮ ।
ಸಾರ್ಧಂ ಸಾಧ್ಯೈರ್ಮುನೀನ್ದ್ರೈರ್ಮುದಿತಮತಮನೋ ಮೋಕ್ಷಿಭಿಃ ಪಕ್ಷಪಾತಾ- var ಮೋಕ್ಷುಭಿಃ
ತ್ಪ್ರಾತಃ ಪ್ರಾರಭ್ಯಮಾಣಸ್ತುತಿರವತು ರವಿರ್ವಿಶ್ವವನ್ದ್ಯೋದಯೋ ವಃ ॥ 81 ॥
ಭಾಸಾಮಾಸನ್ನಭಾವಾದಧಿಕತರಪಟೋಶ್ಚಕ್ರವಾಲಸ್ಯ ತಾಪಾ-
ಚ್ಛೇದಾದಚ್ಛಿನ್ನಗಚ್ಛತ್ತುರಗಖುರಪುಟನ್ಯಾಸನಿಃಶಂಕಟಂಕೈಃ । var ನ್ಯಸ್ತ
ನಿಃಸಂಗಸ್ಯನ್ದನಾಂಗಭ್ರಮಣನಿಕಷಣಾತ್ಪಾತು ವಸ್ತ್ರಿಪ್ರಕಾರಂ var ತ್ರಿಪ್ರಕಾರೈಃ
ತಪ್ತಾಂಶುಸ್ತತ್ಪರೀಕ್ಷಾಪರ ಇವ ಪರಿತಃ ಪರ್ಯಟನ್ಹಾಟಕಾದ್ರಿಮ್ ॥ 82 ॥
ನೋ ಶುಷ್ಕಂ ನಾಕನದ್ಯಾ ವಿಕಸಿತಕನಕಾಮ್ಭೋಜಯಾ ಭ್ರಾಜಿತಂ ತು var ಕನಕಾಮ್ಭೋರುಹಾ
ಪ್ಲುಷ್ಟಾ ನೈವೋಪಭೋಗ್ಯಾ ಭವತಿ ಭೃಶತರಂ ನನ್ದನೋದ್ಯಾನಲಕ್ಷ್ಮೀಃ ।
ನೋ ಶೃಂಗಾಣಿ ದ್ರುತಾನಿ ದ್ರುತಮಮರಗಿರೇಃ ಕಾಲಧೌತಾನಿ ಧೌತಾ-
ನೀದ್ಧಂ ಧಾಮ ದ್ಯುಮಾರ್ಗೇ ಮ್ರದಯತಿ ದಯಯಾ ಯತ್ರ ಸೋಽರ್ಕೋಽವತಾದ್ವಃ ॥ 83 ॥
ಧ್ವಾನ್ತಸ್ಯೈವಾನ್ತಹೇತುರ್ನ ಭವತಿ ಮಲಿನೈಕಾತ್ಮನಃ ಪಾಪ್ಮನೋಽಪಿ
ಪ್ರಾಕ್ಪಾದೋಪಾನ್ತಭಾಜಾಂ ಜನಯತಿ ನ ಪರಂ ಪಂಕಜಾನಾಂ ಪ್ರಬೋಧಮ್ ।
ಕರ್ತಾ ನಿಃಶ್ರೇಯಸಾನಾಮಪಿ ನ ತು ಖಲು ಯಃ ಕೇವಲಂ ವಾಸರಾಣಾಂ
ಸೋಽವ್ಯಾದೇಕೋದ್ಯಮೇಚ್ಛಾವಿಹಿತಬಹುಬೃಹದ್ವಿಶ್ವಕಾರ್ಯೋಽರ್ಯಮಾ ವಃ ॥ 84 ॥
ಲೋಟँಲ್ಲೋಷ್ಟಾವಿಚೇಷ್ಟಃ ಶ್ರಿತಶಯನತಲೋ ನಿಃಸಹೀಭೂತದೇಹಃ
ಸಂದೇಹೀ ಪ್ರಾಣಿತವ್ಯೇ ಸಪದಿ ದಶ ದಿಶಃ ಪ್ರೇಕ್ಷಮಾಣೋಽನ್ಧಕಾರಾಃ ।
ನಿಃಶ್ವಾಸಾಯಾಸನಿಷ್ಠಃ ಪರಮಪರವಶೋ ಜಾಯತೇ ಜೀವಲೋಕಃ var ಚಿರತರವಶೋ
ಶೋಕೇನೇವಾನ್ಯಲೋಕಾನುದಯಕೃತಿ ಗತೇ ಯತ್ರ ಸೋಽರ್ಕೋಽವತಾದ್ವಃ ॥ 85 ॥ var ಲೋಕಾಭ್ಯುದಯ
ಕ್ರಾಮँಲ್ಲೋಲೋಽಪಿ ಲೋಕಾँಸ್ತದುಪಕೃತಿಕೃತಾವಾಶ್ರಿತಃ ಸ್ಥೈರ್ಯಕೋಟಿಂ
ನೄಣಾಂ ದೃಷ್ಟಿಂ ವಿಜಿಹ್ಮಾಂ ವಿದಧದಪಿ ಕರೋತ್ಯನ್ತರತ್ಯನ್ತಭದ್ರಾಮ್ ।
ಯಸ್ತಾಪಸ್ಯಾಪಿ ಹೇತುರ್ಭವತಿ ನಿಯಮಿನಾಮೇಕನಿರ್ವಾಣದಾಯೀ
ಭೂಯಾತ್ಸ ಪ್ರಾಗವಸ್ಥಾಧಿಕತರಪರಿಣಾಮೋದಯೋಽರ್ಕಃ ಶ್ರಿಯೇ ವಃ ॥ 86 ॥
ವ್ಯಾಪನ್ನರ್ತುರ್ನ ಕಾಲೋ ವ್ಯಭಿಚರತಿ ಫಲಂ ನೌಷಧೀರ್ವೃಷ್ಟಿರಿಷ್ಟಾ
ನೈಷ್ಟೈಸ್ತೃಪ್ಯನ್ತಿ ದೇವಾ ನ ಹಿ ವಹತಿ ಮರುನ್ನಿರ್ಮಲಾಭಾನಿ ಭಾನಿ ।
ಆಶಾಃ ಶಾನ್ತಾ ನ ಭಿನ್ದನ್ತ್ಯವಧಿಮುದಧಯೋ ಬಿಭ್ರತಿ ಕ್ಷ್ಮಾಭೃತಃ ಕ್ಷ್ಮಾಂ
ಯಸ್ಮಿಂಸ್ತ್ರೈಲೋಕ್ಯಮೇವಂ ನ ಚಲತಿ ತಪತಿ ಸ್ತಾತ್ಸ ಸೂರ್ಯಃ ಶ್ರಿಯೇ ವಃ ॥ 87 ॥
ಕೈಲಾಸೇ ಕೃತ್ತಿವಾಸಾ ವಿಹರತಿ ವಿರಹತ್ರಾಸದೇಹೋಢಕಾನ್ತಃ
ಶ್ರಾನ್ತಃ ಶೇತೇ ಮಹಾಹಾವಧಿಜಲಧಿ ವಿನಾ ಛದ್ಮನಾ ಪದ್ಮನಾಭಃ ।
ಯೋಗೋದ್ಯೋಗೈಕತಾನೋ ಗಮಯತಿ ಸಕಲಂ ವಾಸರಂ ಸ್ವಂ ಸ್ವಯಮ್ಭೂ-
ರ್ಭೂರಿತ್ರೈಲೋಕ್ಯಾಚಿನ್ತಾಭೃತಿ ಭುವನವಿಭೌ ಯತ್ರ ಭಾಸ್ವಾನ್ಸ ವೋಽವ್ಯಾತ್ ॥ 88 ॥
ಏತದ್ಯನ್ಮಂಡಲಂ ಖೇ ತಪತಿ ದಿನಕೃತಸ್ತಾ ಋಚೋಽರ್ಚೀಂಷಿ ಯಾನಿ
ದ್ಯೋತನ್ತೇ ತಾನಿ ಸಾಮಾನ್ಯಯಮಪಿ ಪುರುಷೋ ಮಂಡಲೇಽಣುರ್ಯಜೂಂಷಿ ।
ಏವಂ ಯಂ ವೇದ ವೇದತ್ರಿತಯಮಯಮಯಂ ವೇದವೇದೀ ಸಮಗ್ರೋ
ವರ್ಗಃ ಸ್ವರ್ಗಾಪವರ್ಗಪ್ರಕೃತಿರವಿಕೃತಿಃ ಸೋಽಸ್ತು ಸೂರ್ಯಃ ಶ್ರಿಯೇ ವಃ ॥ 89 ॥
ನಾಕೌಕಃಪ್ರತ್ಯನೀಕಕ್ಷತಿಪಟುಮಹಸಾಂ ವಾಸವಾಗ್ರೇಸರಾಣಾಂ
ಸರ್ವೇಷಾಂ ಸಾಧು ಪಾತಾಂ ಜಗದಿದಮದಿತೇರಾತ್ಮಜತ್ವೇ ಸಮೇಽಪಿ ।
ಯೇನಾದಿತ್ಯಾಭಿಧಾನಂ ನಿರತಿಶಯಗುಣೈರಾತ್ಮನಿ ನ್ಯಸ್ತಮಸ್ತು var ಗುಣೇನಾತ್ಮನಿ
ಸ್ತುತ್ಯಸ್ತ್ರೈಲೋಕ್ಯವನ್ದ್ಯೈಸ್ತ್ರಿದಶಮುನಿಗಣೈಃ ಸೋಂಽಶುಮಾನ್ ಶ್ರೇಯಸೇ ವಃ ॥ 90 ॥
ಭೂಮಿಂ ಧಾಮ್ನೋಽಭಿವೃಷ್ಟ್ಯಾ ಜಗತಿ ಜಲಮಯೀಂ ಪಾವನೀಂ ಸಂಸ್ಮೃತಾವ- var ಧಾಮ್ನೋಽಥ
ಪ್ಯಾಗ್ನೇಯೀಂ ದಾಹಶಕ್ತ್ಯಾ ಮುಹುರಪಿ ಯಜಮಾನಾಂ ಯಥಾಪ್ರಾರ್ಥಿತಾರ್ಥೈಃ । var ಯಜಮಾನಾತ್ಮಿಕಾಂ
ಲೀನಾಮಾಕಾಶ ಏವಾಮೃತಕರಘಟಿತಾಂ ಧ್ವಾನ್ತಪಕ್ಷಸ್ಯ ಪರ್ವ-
ಣ್ವೇವಂ ಸೂರ್ಯೋಽಷ್ಟಭೇದಾಂ ಭವ ಇವ ಭವತಃ ಪಾತು ಬಿಭ್ರತ್ಸ್ವಮೂರ್ತಿಮ್ ॥ 91 ॥
ಪ್ರಾಕ್ಕಾಲೋನ್ನಿದ್ರಪದ್ಮಾಕರಪರಿಮಲನಾವಿರ್ಭವತ್ಪಾದಶೋಭೋ
ಭಕ್ತ್ಯಾ ತ್ಯಕ್ತೋರುಖೇದೋದ್ಗತಿ ದಿವಿ ವಿನತಾಸೂನುನಾ ನೀಯಮಾನಃ ।
ಸಪ್ತಾಶ್ವಾಪ್ತಾಪರಾನ್ತಾನ್ಯಧಿಕಮಧರಯನ್ಯೋ ಜಗನ್ತಿ ಸ್ತುತೋಽಲಂ
ದೇವೈರ್ದೇವಃ ಸ ಪಾಯಾದಪರ ಇವ ಮುರಾರಾತಿರಹ್ನಾಂ ಪತಿರ್ವಃ ॥ 92 ॥
ಯಃ ಸ್ರಷ್ಟಾಽಪಾಂ ಪುರಸ್ತಾದಚಲವರಸಮಭ್ಯುನ್ನತೇರ್ಹೇತುರೇಕೋ
ಲೋಕಾನಾಂ ಯಸ್ತ್ರಯಾಣಾಂ ಸ್ಥಿತ ಉಪರಿ ಪರಂ ದುರ್ವಿಲಂಘ್ಯೇನ ಧಾಮ್ನಾ । var ಚ ತ್ರಯಾಣಾಂ
ಸದ್ಯಃ ಸಿದ್ಧ್ಯೈ ಪ್ರಸನ್ನದ್ಯುತಿಶುಭಚತುರಾಶಾಮುಖಃ ಸ್ತಾದ್ವಿಭಕ್ತೋ var ಶುಚಿ
ದ್ವೇಧಾ ವೇಧಾ ಇವಾವಿಷ್ಕೃತಕಮಲರುಚಿಃ ಸೋಽರ್ಚಿಷಾಮಾಕರೋ ವಃ ॥ 93 ॥
ಸಾದ್ರಿದ್ಯೂರ್ವೀನದೀಶಾ ದಿಶತಿ ದಶ ದಿಶೋ ದರ್ಶಯನ್ಪ್ರಾಗ್ದೃಶೋ ಯಃ var ದ್ರಾಕ್ ದೃಶೋ
ಸಾದೃಶ್ಯಂ ದೃಶ್ಯತೇ ನೋ ಸದಶಶತದೃಶಿ ತ್ರೈದಶೇ ಯಸ್ಯ ದೇಶೇ ।
ದೀಪ್ತಾಂಶುರ್ವಃ ಸ ದಿಶ್ಯಾದಶಿವಯುಗದಶಾದರ್ಶಿತದ್ವಾದಶಾತ್ಮಾ
ಶಂ ಶಾಸ್ತ್ಯಶ್ವಾಂಶ್ಚ ಯಸ್ಯಾಶಯವಿದತಿಶಯಾದ್ದನ್ದಶೂಕಾಶನಾದ್ಯಃ ॥ 94 ॥
ತೀರ್ಥಾನಿ ವ್ಯರ್ಥಕಾನಿ ಹೃದನದಸರಸೀನಿರ್ಝರಾಮ್ಭೋಜಿನೀನಾಂ
ನೋದನ್ವನ್ತೋ ನುದನ್ತಿ ಪ್ರತಿಭಯಮಶುಭಶ್ವಭ್ರಪಾತಾನುಬನ್ಧಿ ।
ಆಪೋ ನಾಕಾಪಗಾಯಾ ಅಪಿ ಕಲುಷಮುಷೋ ಮಜ್ಜತಾಂ ನೈವ ಯತ್ರ var ಸ್ವರ್ಗಾಪಗಾಯಾಃ
ತ್ರಾತುಂ ಯಾತೇಽನ್ಯಲೋಕಾನ್ ಸ ದಿಶತು ದಿವಸಸ್ಯೈಕಹೇತುರ್ಹಿತಂ ವಃ ॥ 95 ॥ var ಲೋಕಂ
ಏತತ್ಪಾತಾಲಪಂಕಪ್ಲುತಮಿವ ತಮಸೈವೈಕಮುದ್ಗಾಢಮಾಸೀ-
ದಪ್ರಜ್ಞಾತಾಪ್ರತರ್ಕ್ಯಂ ನಿರವಗತಿ ತಥಾಲಕ್ಷಣಂ ಸುಪ್ತಮನ್ತಃ ।
ಯಾದೃಕ್ಸೃಷ್ಟೇಃ ಪುರಸ್ತಾನ್ನಿಶಿ ನಿಶಿ ಸಕಲಂ ಜಾಯತೇ ತಾದೃಗೇವ
ತ್ರೈಲೋಕ್ಯಂ ಯದ್ವಿಯೋಗಾದವತು ರವಿರಸೌ ಸರ್ಗತುಲ್ಯೋದಯೋ ವಃ ॥ 96 ॥
ದ್ವೀಪೇ ಯೋಽಸ್ತಾಚಲೋಽಸ್ಮಿನ್ಭವತಿ ಖಲು ಸ ಏವಾಪರತ್ರೋದಯಾದ್ರಿ-
ರ್ಯಾ ಯಾಮಿನ್ಯುಜ್ಜ್ವಲೇನ್ದುದ್ಯುತಿರಿಹ ದಿವಸೋಽನ್ಯತ್ರ ತೀವ್ರಾತಪಃ ಸಾ ।
ಯದ್ವಶ್ಯೌ ದೇಶಕಾಲಾವಿತಿ ನಿಯಮಯತೋ ನೋ ತು ಯಂ ದೇಶಕಾಲಾ- var ನು
ವವ್ಯಾತ್ಸ ಸ್ವಪ್ರಭುತ್ವಾಹಿತಭುವನಹಿತೋ ಹೇತುರಹ್ನಾಮಿನೋ ವಃ ॥ 97 ॥
ವ್ಯಗ್ರೈರಗ್ರ್ಯಗ್ರಹೇನ್ದುಗ್ರಸನಗುರು ಭರೈರ್ನೋ ಸಮಗ್ರೈರುದಗ್ರೈಃ var ಗುರುತರೈಃ
ಪ್ರತ್ಯಗ್ರೈರೀಷದುಗ್ರೈರುದಯಗಿರಿಗತೋ ಗೋಗಣೈರ್ಗೌರಯನ್ ಗಾಮ್ ।
ಉದ್ಗಾಢಾರ್ಚಿರ್ವಿಲೀನಾಮರನಗರನಗಗ್ರಾವಗರ್ಭಾಮಿವಾಹ್ನಾ-
ಮಗ್ರೇ ಶ್ರೇಯೋ ವಿಧತ್ತೇ ಗ್ಲಪಯತು ಗಹನಂ ಸ ಗ್ರಹಗ್ರಾಮಣೀರ್ವಃ ॥ 98 ॥
ಯೋನಿಃ ಸಾಮ್ನಾಂ ವಿಧಾತಾ ಮಧುರಿಪುರಜಿತೋ ಧೂರ್ಜಟಿಃ ಶಂಕರೋಽಸೌ
ಮೃತ್ಯುಃ ಕಾಲೋಽಲಕಾಯಾಃ ಪತಿರಪಿ ಧನದಃ ಪಾವಕೋ ಜಾತವೇದಾಃ ।
ಇತ್ಥಂ ಸಂಜ್ಞಾ ಡವಿತ್ಥಾದಿವದಮೃತಭುಜಾಂ ಯಾ ಯದೃಚ್ಛಾಪ್ರವೃತ್ತಾ-
ಸ್ತಾಸಾಮೇಕೋಽಭಿಧೇಯಸ್ತದನುಗುಣಗುಣೈರ್ಯಃ ಸ ಸೂರ್ಯೋಽವತಾದ್ವಃ ॥ 99 ॥ var ಗಣೈಃ
ದೇವಃ ಕಿಂ ಬಾನ್ಧವಃ ಸ್ಯಾತ್ಪ್ರಿಯಸುಹೃದಥವಾಽಽಚಾರ್ಯ ಆಹೋಸ್ವಿದರ್ಯೋ var ಆರ್ಯಃ
ರಕ್ಷಾ ಚಕ್ಷುರ್ನು ದೀಪೋ ಗುರುರುತ ಜನಕೋ ಜೀವಿತಂ ಬೀಜಮೋಜಃ ।
ಏವಂ ನಿರ್ಣೀಯತೇ ಯಃ ಕ ಇವ ನ ಜಗತಾಂ ಸರ್ವಥಾ ಸರ್ವದಾಽಸೌ var ಸರ್ವದಾಃ
ಸರ್ವಾಕಾರೋಪಕಾರೀ ದಿಶತು ದಶಶತಾಭೀಷುರಭ್ಯರ್ಥಿತಂ ವಃ ॥ 100 ॥
ಶ್ಲೋಕಾ ಲೋಕಸ್ಯ ಭೂತ್ಯೈ ಶತಮಿತಿ ರಚಿತಾಃ ಶ್ರೀಮಯೂರೇಣ ಭಕ್ತ್ಯಾ
ಯುಕ್ತಶ್ಚೈತಾನ್ಪಠೇದ್ಯಃ ಸಕೃದಪಿ ಪುರುಷಃ ಸರ್ವಪಾಪೈರ್ವಿಮುಕ್ತಃ ।
ಆರೋಗ್ಯಂ ಸತ್ಕವಿತ್ವಂ ಮತಿಮತುಲಬಲಂ ಕಾನ್ತಿಮಾಯುಃಪ್ರಕರ್ಷಂ
ವಿದ್ಯಾಮೈಶ್ವರ್ಯಮರ್ಥಂ ಸುತಮಪಿ ಲಭತೇ ಸೋಽತ್ರ ಸೂರ್ಯಪ್ರಸಾದಾತ್ ॥ 101 ॥
ಇತಿ ಶ್ರೀಮಯೂರಕವಿಪ್ರಣೀತಂ ಸೂರ್ಯಶತಕಂ ಸಮಾಪ್ತಮ್ ।