Narayaniyam Vimsadasakam in Telugu:

॥ నారాయణీయం వింశదశకమ్ ॥

వింశదశకమ్ (౨౦) – ఋషభయోగీశ్వరచరితమ్

ప్రియవ్రతస్య ప్రియపుత్రభూతా-
దాగ్నీధ్రరాజాదుదితో హి నాభిః ।
త్వాం దృష్ట్వానిష్టదమిష్టిమధ్యే
తవైవ తుష్ట్యై కృతయజ్ఞకర్మా ॥ ౨౦-౧ ॥

అభిష్టుతస్తత్ర మునీశ్వరైస్త్వం
రాజ్ఞః స్వతుల్యం సుతమర్థ్యమానః ।
స్వయం జనిష్యేఽహమితి బ్రువాణ-
స్తిరోదధా బర్హిషి విశ్వమూర్తే ॥ ౨౦-౨ ॥

నాభిప్రియాయామథ మేరుదేవ్యాం
త్వమంశతోఽభూరృషభాభిధానః ।
అలోకసామాన్యగుణప్రభావ-
ప్రభావితాశేషజనప్రమోదః ॥ ౨౦-౩ ॥

త్వయి త్రిలోకీభృతి రాజ్యభారం
నిధాయ నాభిః సహ మేరుదేవ్యా ।
తపోవనం ప్రాప్య భవన్నిషేవీ
గతః కిలానన్దపదం పదం తే ॥ ౨౦-౪ ॥

ఇన్ద్రస్త్వదుత్కర్షకృతాదమర్షా-
ద్వవర్ష నాస్మిన్నజనాభవర్షే ।
యదా తదా త్వం నిజయోగశక్త్యా
స్వవర్షమేనద్వ్యదధాః సువర్షమ్ ॥ ౨౦-౫ ॥

జితేన్ద్రదత్తాం కమనీం జయన్తీ-
మథోద్వహన్నాత్మరతాశయోఽపి ।
అజీజనత్తత్ర శతం తనూజా-
నేషాం క్షితీశో భరతోఽగ్రజన్మా ॥ ౨౦-౬ ॥

నవాభవన్యోగివరా నవాన్యే
త్వపాలయన్భారతవర్షఖణ్డాన్ ।
సైకా త్వశీతిస్తవ శేషపుత్రా-
స్తపోబలాద్భూసురభూయమీయుః ॥ ౨౦-౭ ॥

ఉక్త్వా సుతేభ్యోఽథ మునీన్ద్రమధ్యే
విరక్తిభక్త్యన్వితముక్తిమార్గమ్ ।
స్వయం గతః పారమహంస్యవృత్తి-
మధా జడోన్మత్తపిశాచచర్యామ్ ॥ ౨౦-౮ ॥

పరాత్మభూతోఽపి పరోపదేశం
కుర్వన్భవాన్సర్వనిరస్యమానః ।
వికారహీనో విచచార కృత్స్నాం
మహీమహీనాత్మరసాభిలీనః ॥ ౨౦-౯ ॥

శయువ్రతం గోమృగకాకచర్యాం
చిరం చరన్నాప్య పరం స్వరూపమ్ ।
దవాహృతాఙ్గః కుటకాచలే త్వం
తాపాన్మమాపాకురు వాతనాథ ॥ ౨౦-౧౦ ॥

ఇతి వింశదశకం సమాప్తమ్ ।

– Chant Stotras in other Languages –

Narayaniyam Vimsadasakam in English – Kannada – Telugu – Tamil