Narayaniyam Astacatvarimsadasakam In Telugu – Narayaneyam Dasakam 48

Narayaniyam Astacatvarimsadasakam in Telugu:

॥ నారాయణీయం అష్టచత్వారింశదశకమ్ ॥

అష్టచత్వారింశదశకమ్ (౪౮) – నళకూబర-మణిగ్రీవయోః శాపమోక్షమ్ ।

ముదా సురౌఘైస్త్వముదారసమ్మదై-
రుదీర్య దామోదర ఇత్యభిష్టుతః ।
మృదూదరః స్వైరములూఖలే లగ-
న్నదూరతో ద్వౌ కకుభావుదైక్షథాః ॥ ౪౮-౧ ॥

కుబేరసూనుర్నలకూబరాభిధః
పరో మణిగ్రీవ ఇతి ప్రథాం గతః ।
మహేశసేవాధిగతశ్రియోన్మదౌ
చిరం కిల త్వద్విముఖావఖేలతామ్ ॥ ౪౮-౨ ॥

సురాపగాయాం కిల తౌ మదోత్కటౌ
సురాపగాయద్బహుయౌవతావృతౌ ।
వివాససౌ కేలిపరౌ స నారదో
భవత్పదైకప్రవణో నిరైక్షత ॥ ౪౮-౩ ॥

భియా ప్రియాలోకముపాత్తవాససం
పురో నిరీక్ష్యాపి మదాన్ధచేతసౌ ।
ఇమౌ భవద్భక్త్యుపశాన్తిసిద్ధయే
మునిర్జగౌ శాన్తిమృతే కుతః సుఖమ్ ॥ ౪౮-౪ ॥

యువామవాప్తౌ కకుభాత్మతాం చిరం
హరిం నిరీక్ష్యాథ పదం స్వమాప్నుతమ్ ।
ఇతీరితౌ తౌ భవదీక్షణస్పృహాం
గతౌ వ్రజాన్తే కకుభౌ బభూవతుః ॥ ౪౮-౫ ॥

అతన్ద్రమిన్ద్రద్రుయుగం తథావిధం
సమేయుషా మన్థరగామినా త్వయా ।
తిరాయితోలూఖలరోధనిర్ధుతౌ
చిరాయ జీర్ణౌ పరిపాతితౌ తరూ ॥ ౪౮-౬ ॥

అభాజి శాఖిద్వితయం యదా త్వయా
తదైవ తద్గర్భతలాన్నిరేయుషా ।
మహాత్విషా యక్షయుగేన తత్క్షణా-
దభాజి గోవిన్ద భవానపి స్తవైః ॥ ౪౮-౭ ॥

ఇహాన్యభక్తోఽపి సమేష్యతి క్రమాత్
భవన్తమేతౌ ఖలు రుద్రసేవకౌ ।
మునిప్రసాదాద్భవదఙ్ఘ్రిమాగతౌ
గతౌ వృణానౌ ఖలు భక్తిముత్తమామ్ ॥ ౪౮-౮ ॥

తతస్తరూద్దారణదారుణారవ-
ప్రకమ్పిసమ్పాతిని గోపమణ్డలే ।
విలజ్జితత్వజ్జననీముఖేక్షిణా
వ్యమోక్షి నన్దేన భవాన్విమోక్షదః ॥ ౪౮-౯ ॥

మహీరుహోర్మధ్యగతో బతార్భకో
హరేః ప్రభావాదపరిక్షతోఽధునా ।
ఇతి బ్రువాణైర్గమితో గృహం భవాన్
మరుత్పురాధీశ్వర పాహి మాం గదాత్ ॥ ౪౮-౧౦ ॥

See Also  Ishaanastavah In Telugu – Telugu Shlokas

ఇతి అష్టచత్వారింశదశకం సమాప్తమ్ ।

– Chant Stotras in other Languages –

Narayaniyam Astacatvarimsadasakam in EnglishKannada – Telugu – Tamil