Narayaniyam Catuhpancasattamadasakam in Telugu:

॥ నారాయణీయం చతుఃపఞ్చాశత్తమదశకమ్ ॥

చతుఃపఞ్చాశత్తమదశకమ్ (౫౪) – కాలియస్య కాలిన్దీప్రాప్తిః తథా విషబాధా

త్వత్సేవోత్కః సౌభరిర్నామ పూర్వం
కాలిన్ద్యన్తర్ద్వాదశాబ్దం తపస్యన్ ।
మీనవ్రాతే స్నేహవాన్భోగలోలే
తార్క్ష్యం సాక్షాదైక్షతాగ్రే కదాచిత్ ॥ ౫౪-౧ ॥

త్వద్వాహం తం సక్షుధం తృక్షసూనుం
మీనం కఞ్చిజ్జక్షతం లక్షయన్ సః ।
తప్తశ్చిత్తే శప్తవానత్ర చేత్త్వం
జన్తూన్ భోక్తా జీవితం చాపి మోక్తా ॥ ౫౪-౨ ॥

తస్మిన్కాలే కాలియః క్ష్వేలదర్పాత్
సర్పారాతేః కల్పితం భాగమశ్నన్ ।
తేన క్రోధాత్త్వత్పదాంభోజభాజా
పక్షక్షిప్తస్తద్దురాపం పయోఽగాత్ ॥ ౫౪-౩ ॥

ఘోరే తస్మిన్సూరజానీరవాసే
తీరే వృక్షా విక్షతాః క్ష్వేలవేగాత్ ।
పక్షివ్రాతాః పేతురభ్రే పతన్తః
కారుణ్యార్ద్రం త్వన్మనస్తేన జాతమ్ ॥ ౫౪-౪ ॥

కాలే తస్మిన్నేకదా సీరపాణిం
ముక్త్వా యాతే యామునం కాననాన్తమ్ ।
త్వయ్యుద్దామగ్రీష్మభీష్మోష్మతప్తా
గోగోపాలా వ్యాపిబన్ క్ష్వేలతోయమ్ ॥ ౫౪-౫ ॥

నశ్యజ్జీవాన్ విచ్యుతాన్ క్ష్మాతలే తాన్
విశ్వాన్ పశ్యన్నచ్యుత త్వం దయార్ద్రః ।
ప్రాప్యోపాన్తం జీవయామాసిథ ద్రాక్
పీయూషాంభోవర్షిభిః శ్రీకటాక్షైః ॥ ౫౪-౬ ॥

కిం కిం జాతో హర్షవర్షాతిరేకః
సర్వాఙ్గేష్విత్యుత్థితా గోపసఙ్ఘాః ।
దృష్ట్వాఽగ్రే త్వాం త్వత్కృతం తద్విదన్త-
స్త్వామాలిఙ్గన్ దృష్టనానాప్రభావాః ॥ ౫౪-౭ ॥

గావశ్చైవం లబ్ధజీవాః క్షణేన
స్ఫీతానన్దాస్త్వాం చ దృష్ట్వా పురస్తాత్ ।
ద్రాగావవ్రుః సర్వతో హర్షబాష్పం
వ్యాముఞ్చన్త్యో మన్దముద్యన్నినాదాః ॥ ౫౪-౮ ॥

రోమాఞ్చోఽయం సర్వతో నః శరీరే
భూయస్యన్తః కాచిదానన్దమూర్ఛా ।
ఆశ్చర్యోఽయం క్ష్వేలవేగో ముకున్దే-
త్యుక్తో గోపైర్నన్దితో వన్దితోఽభూః ॥ ౫౪-౯ ॥

ఏవం భక్తాన్ముక్తజీవానపి త్వం
ముగ్ధాపాఙ్కైరస్తరోగాంస్తనోషి ।
తాదృగ్భూతస్ఫీతకారుణ్యభూమా
రోగాత్పాయా వాయుగేహాధినాథ ॥ ౫౪-౧౦ ॥

ఇతి చతుఃపఞ్చాశత్తమదశకం సమాప్తమ్ ।

– Chant Stotras in other Languages –

Narayaniyam Catuhpancasattamadasakam in English – Kannada – Telugu – Tamil