Narayaniyam Dvipancasattamadasakam in Telugu:
॥ నారాయణీయం ద్విపఞ్చాశత్తమదశకమ్ ॥
ద్విపఞ్చాశత్తమదశకమ్ (౫౨) – వత్సస్తేయం తథా బ్రహ్మగర్వశమనమ్ ।
అన్యావతారనికరేష్వనిరీక్షితం తే
భూమాతిరేకమభివీక్ష్య తదాఘమోక్షే ।
బ్రహ్మా పరీక్షితుమనాః స పరోక్షభావం
నిన్యేఽథ వత్సకగణాన్ప్రవితత్య మాయామ్ ॥ ౫౨-౧ ॥
వత్సానవీక్ష్య వివశే పశుపోత్కరే తా-
నానేతుకామ ఇవ ధాతృమతానువర్తీ ।
త్వం సామిభుక్తకబలో గతవాంస్తదానీం
భుక్తాంస్తిరోధిత సరోజభవః కుమారాన్ ॥ ౫౨-౨ ॥
వత్సాయితస్తదను గోపగణాయితస్త్వం
శిక్యాదిభాణ్డమురలీగవలాదిరూపః ।
ప్రాగ్వద్విహృత్య విపినేషు చిరాయ సాయం
త్వం మాయయాథ బహుధా వ్రజమాయయాథ ॥ ౫౨-౩ ॥
త్వామేవ శిక్యగవలాదిమయం దధానో
భూయస్త్వమేవ పశువత్సకబాలరూపః ।
గోరూపిణీభిరపి గోపవధూమయీభి-
రాసాదితోఽసి జననీభిరతిప్రహర్షాత్ ॥ ౫౨-౪ ॥
జీవం హి కఞ్చిదభిమానవశాత్స్వకీయం
మత్వా తనూజ ఇతి రాగభరం వహన్త్యః ।
ఆత్మానమేవ తు భవన్తమవాప్య సూనుం
ప్రీతిం యయుర్న కియతీం వనితాశ్చ గావః ॥ ౫౨-౫ ॥
ఏవం ప్రతిక్షణవిజృంభితహర్షభార-
నిశ్శేషగోపగణలాలితభూరిమూర్తిమ్ ।
త్వామగ్రజోఽపి బుబుధే కిల వత్సరాన్తే
బ్రహ్మాత్మనోరపి మహాన్యువయోర్విశేషః ॥ ౫౨-౬ ॥
వర్షావధౌ నవపురాతనవత్సపాలాన్
దృష్ట్వా వివేకమసృణే ద్రుహిణే విమూఢే ।
ప్రాదీదృశః ప్రతినవాన్మకుటాఙ్గదాది
భూషాంశ్చతుర్భుజయుజః సజలాంబుదాభాన్ ॥ ౫౨-౭ ॥
ప్రత్యేకమేవ కమలాపరిలాలితాఙ్గాన్
భోగీన్ద్రభోగశయనాన్నయనాభిరామాన్ ।
లీలానిమీలితదృశః సనకాదియోగి-
వ్యాసేవితాన్కమలభూర్భవతో దదర్శ ॥ ౫౨-౮ ॥
నారాయణాకృతిమసఙ్ఖ్యతమాం నిరీక్ష్య
సర్వత్ర సేవకమపి స్వమవేక్ష్య ధాతా ।
మాయానిమగ్నహృదయో విముమోహ యావ-
దేకో బభూవిథ తదా కబలార్ధపాణిః ॥ ౫౨-౯ ॥
నశ్యన్మదే తదను విశ్వపతిం ముహుస్త్వాం
నత్వా చ నూతవతి ధాతరి ధామ యాతే ।
పోతైః సమం ప్రముదితైః ప్రవిశన్నికేతం
వాతాలయాధిప విభో పరిపాహి రోగాత్ ॥ ౫౨-౧౦ ॥
ఇతి ద్విపఞ్చాశత్తమదశకం సమాప్తం
– Chant Stotras in other Languages –
Narayaniyam Dvipancasattamadasakam in English – Kannada – Telugu – Tamil