Shri Subrahmanya Gadyam In Sanskrit

॥ Shri Subrahmaya Gadyam Sanskrit Lyrics ॥

॥ श्री सुब्रह्मण्य गद्यम् ॥
पुरहरनन्दन ।
रिपुकुलभञ्जन ।
दिनकरकोटिरूप ।
परिहृतलोकताप ।
शिखीन्द्रवाहन ।
महेन्द्रपालन ।
विधृतसकलभुवनमूल ।
विधुतनिखिलदनुजतूल ।
तापससमाराधित ।
पापजविकाराजित ॥

तारुण्यविजितमाराकार ।
कारुण्यसलिलपूराधार ।
मयूरवरवाहन ।
महेन्द्रगिरिकेतन ।
भक्तिपरगम्य ।
शक्तिकररम्य ।
परिपालितनाक ।
पुरशासनपाक ।
निखिललोकनायक ।
गिरिविदारिसायक ॥

महादेवभागधेय ।
महापुण्यनामधेय ।
विनतशोकवारण ।
विविधलोककारण ।
सुरवैरिकाल ।
पुरवैरिबाल ।
भवबन्धविमोचन ।
दलदम्बुविलोचन ।
करुणामृतरससागर ।
तरुणामृतकरशेखर ॥

वल्लीमानहारिवेष ।
मल्लीमालभारिकेश ।
परिपालितविबुधलोक ।
परिकालितविनतशोक ।
मुखविजितचन्द्र ।
निखिलगुणमन्दिर ।
भानुकोटिसदृशरूप ।
भानुकोपभयदचाप ।
पितृमनोहारिमन्दहास ।
रिपुशिरोदारिचन्द्रहास ॥

श्रुतिकलितमणिकुण्डल ।
रुचिविजितरविमण्डल ।
भुजवरविजितसाल ।
भजनपरमनुजपाल ।
नववीरसंसेवित ।
रणधीरसम्भावित ।
मनोहारिशील ।
महेन्द्रारिकील ।
कुसुमविशदहास ।
कुलशिखरिनिवास ॥

विजितकरणमुनिसेवित ।
विगतमरणजनिभाषित ।
स्कन्दपुरनिवास ।
नन्दनकृतविलास ।
कमलासनविनत ।
चतुरागमविनुत ।
कलिमलविहीनकृतसेवन ।
सरसिजनिकाशशुभलोचन ।
अहार्यवरधीर ।
अनार्यनरदूर ॥

विदलितरोगजाल ।
विरचितभोगमूल ।
भोगीन्द्रभासित ।
योगीन्द्रभावित ।
पाकशासनपरिपूजित ।
नाकवासिनिकरसेवित ।
विद्रुतविद्याधर ।
विद्रुमहृद्याधर ।
दलितदनुजवेतण्ड ।
विबुधवरदकोदण्ड ॥

See Also  Sri Anjaneya Ashtottara Shatanama Stotram In Sanskrit

परिपालितभूसुर ।
मणिभूषणभासुर ।
अतिरम्यस्वभाव ।
श्रुतिगम्यप्रभाव ।
लीलाविशेषतोषित शङ्कर ।
हेलाविशेषकलितसङ्गर ।
सुमसमरदन ।
शशधरवदन ।
सुब्रह्मण्य विजयी भव ।
विजयी भव ।

इति श्रीसुब्रह्मण्यगद्यम् ॥

– Chant Stotra in Other Languages –

Sri Subrahmanya / Kartikeya / Muruga Stotram » Shri Subrahmanya Gadyam in Lyrics in English » Kannada » Telugu » Tamil