॥ Matangi Ashtottara Shatanama Stotram Telugu Lyrics ॥
॥ శ్రీమాతఙ్గీశతనామస్తోత్రమ్ ॥
శ్రీభైరవ్యువాచ –
భగవఞ్ఛ్రోతుమిచ్ఛామి మాతఙ్గ్యాః శతనామకమ్ ।
యద్గుహ్యం సర్వతన్త్రేషు కేనాపి న ప్రకాశితమ్ ॥ ౧ ॥
భైరవ ఉవాచ –
శృణు దేవి ప్రవక్ష్యామి రహస్యాతిరహస్యకమ్ ।
నాఖ్యేయం యత్ర కుత్రాపి పఠనీయం పరాత్పరమ్ ॥ ౨ ॥
యస్యైకవారపఠనాత్సర్వే విఘ్నా ఉపద్రవాః ।
నశ్యన్తి తత్క్షణాద్దేవి వహ్నినా తూలరాశివత్ ॥ ౩ ॥
ప్రసన్నా జాయతే దేవీ మాతఙ్గీ చాస్య పాఠతః ।
సహస్రనామపఠనే యత్ఫలం పరికీర్తితమ్ ।
తత్కోటిగుణితం దేవీనామాష్టశతకం శుభమ్ ॥ ౪ ॥
అస్య శ్రీమాతఙ్గీశతనామస్తోత్రస్య భగవాన్మతఙ్గ ఋషిః
అనుష్టుప్ ఛన్దః మాతఙ్గీ దేవతా మాతఙ్గీప్రీతయే జపే వినియోగః ।
మహామత్తమాతఙ్గినీ సిద్ధిరూపా తథా యోగినీ భద్రకాలీ రమా చ ।
భవానీ భవప్రీతిదా భూతియుక్తా భవారాధితా భూతిసమ్పత్కరీ చ ॥ ౧ ॥
ధనాధీశమాతా ధనాగారదృష్టిర్ధనేశార్చితా ధీరవాపీవరాఙ్గీ ।
ప్రకృష్టప్రభారూపిణీ కామరూపప్రహృష్టా మహాకీర్తిదా కర్ణనాలీ ॥ ౨ ॥
కరాలీ భగా ఘోరరూపా భగాఙ్గీ భగాహ్వా భగప్రీతిదా భీమరూపా ।
భవానీ మహాకౌశికీ కోశపూర్ణా కిశోరీకిశోరప్రియానన్ద ఈహా ॥ ౩ ॥
మహాకారణాకారణా కర్మశీలా కపాలిప్రసిద్ధా మహాసిద్ఖణ్డా ।
మకారప్రియా మానరూపా మహేశీ మహోల్లాసినీలాస్యలీలాలయాఙ్గీ ॥ ౪ ॥
క్షమాక్షేమశీలా క్షపాకారిణీ చాక్షయప్రీతిదా భూతియుక్తా భవానీ ।
భవారాధితా భూతిసత్యాత్మికా చ ప్రభోద్భాసితా భానుభాస్వత్కరా చ ॥ ౫ ॥
ధరాధీశమాతా ధరాగారదృష్టిర్ధరేశార్చితా ధీవరాధీవరాఙ్గీ ।
ప్రకృష్టప్రభారూపిణీ ప్రాణరూపప్రకృష్టస్వరూపా స్వరూపప్రియా చ ॥ ౬ ॥
చలత్కుణ్డలా కామినీ కాన్తయుక్తా కపాలాచలా కాలకోద్ధారిణీ చ ।
కదమ్బప్రియా కోటరీకోటదేహా క్రమా కీర్తిదా కర్ణరూపా చ కాక్ష్మీః ॥ ౭ ॥
క్షమాఙ్గీ క్షయప్రేమరూపా క్షపా చ క్షయాక్షా క్షయాహ్వా క్షయప్రాన్తరా చ ।
క్షవత్కామినీ క్షారిణీ క్షీరపూర్ణా శివాఙ్గీ చ శాకమ్భరీ శాకదేహా ॥ ౮ ॥
మహాశాకయజ్ఞా ఫలప్రాశకా చ శకాహ్వా శకాహ్వాశకాఖ్యా శకా చ ।
శకాక్షాన్తరోషా సురోషా సురేఖా మహాశేషయజ్ఞోపవీతప్రియా చ ॥ ౯ ॥
జయన్తీ జయా జాగ్రతీయోగ్యరూపా జయాఙ్గా జపధ్యానసన్తుష్టసంజ్ఞా ।
జయప్రాణరూపా జయస్వర్ణదేహా జయజ్వాలినీ యామినీ యామ్యరూపా ॥ ౧౦ ॥
జగన్మాతృరూపా జగద్రక్షణా చ స్వధావౌషడన్తా విలమ్బావిలమ్బా ।
షడఙ్గా మహాలమ్బరూపాసిహస్తా పదాహారిణీహారిణీ హారిణీ చ ॥ ౧౧ ॥
మహామఙ్గలా మఙ్గలప్రేమకీర్తిర్నిశుమ్భచ్ఛిదా శుమ్భదర్పత్వహా చ ।
తథాఽఽనన్దబీజాదిముక్తస్వరూపా తథా చణ్డముణ్డాపదాముఖ్యచణ్డా ॥ ౧౨ ॥
ప్రచణ్డాప్రచణ్డా మహాచణ్డవేగా చలచ్చామరా చామరాచన్ద్రకీర్తిః ।
సుచామీకరాచిత్రభూషోజ్జ్వలాఙ్గీ సుసఙ్గీతగీతా చ పాయాదపాయాత్ ॥ ౧౩ ॥
ఇతి తే కథితం దేవి నామ్నామష్టోత్తరం శతమ్ ।
గోప్యఞ్చ సర్వతన్త్రేషు గోపనీయఞ్చ సర్వదా ॥ ౧౪ ॥
ఏతస్య సతతాభ్యాసాత్సాక్షాద్దేవో మహేశ్వరః ।
త్రిసన్ధ్యఞ్చ మహాభక్త్యా పఠనీయం సుఖోదయమ్ ॥ ౧౫ ॥
న తస్య దుష్కరం కిఞ్చిజ్జాయతే స్పర్శతః క్షణాత్ ।
స్వకృతం యత్తదేవాప్తం తస్మాదావర్తయేత్సదా ॥ ౧౬ ॥
సదైవ సన్నిధౌ తస్య దేవీ వసతి సాదరమ్ ।
అయోగా యే తవైవాగ్రే సుయోగాశ్చ భవన్తి వై ॥ ౧౭ ॥
త ఏవమిత్రభూతాశ్చ భవన్తి తత్ప్రసాదతః ।
విషాణి నోపసర్పన్తి వ్యాధయో న స్పృశన్తి తాన్ ॥ ౧౮ ॥
లూతావిస్ఫోటకాస్సర్వే శమం యాన్తి చ తత్క్షణాత్ ।
జరాపలితనిర్ముక్తః కల్పజీవీ భవేన్నరః ॥ ౧౯ ॥
అపి కిం బహునోక్తేన సాన్నిధ్యం ఫలమాప్నుయాత్ ।
యావన్మయా పురా ప్రోక్తం ఫలం సాహస్రనామకమ్ ।
తత్సర్వం లభతే మర్త్యో మహామాయాప్రసాదతః ॥ ౨౦ ॥
ఇతి శ్రీరుద్రయామలే మాతఙ్గీశతనామస్తోత్రం సమ్పూర్ణమ్ ॥
– Chant Stotra in Other Languages –
Sri Durga Slokam » Sri Matangi Ashtottara Shatanama Stotram Lyrics in Sanskrit » English » Bengali » Gujarati » Kannada » Malayalam » Odia » Tamil