॥ Sri Batuka Bhairava Stavaraja (Ashtottara Shatanama Stotram cha) Telugu Lyrics ॥
॥ శ్రీ బటుకభైరవ స్తవరాజః (అష్టోత్తరశతనామ స్తోత్రం చ) ॥
కైలాసశిఖరాసీనం దేవదేవం జగద్గురుమ్ ।
శంకరం పరిపప్రచ్ఛ పార్వతీ పరమేశ్వరమ్ ॥ ౧ ॥
శ్రీపార్వత్యువాచ ।
భగవన్ సర్వధర్మజ్ఞ సర్వశాస్త్రాగమాదిషు ।
ఆపదుద్ధారణం మంత్రం సర్వసిద్ధిప్రదం నృణామ్ ॥ ౨ ॥
సర్వేషాం చైవ భూతానాం హితార్థం వాంఛితం మయా ।
విశేషతస్తు రాజ్ఞాం వై శాంతిపుష్టిప్రసాధనమ్ ॥ ౩ ॥
అంగన్యాస కరన్యాస బీజన్యాస సమన్వితమ్ ।
వక్తుమర్హసి దేవేశ మమ హర్షవివర్ధనమ్ ॥ ౪ ॥
శ్రీభగవానువాచ ।
శృణు దేవి మహామంత్రమాపదుద్ధారహేతుకమ్ ।
సర్వదుఃఖప్రశమనం సర్వశత్రునిబర్హణమ్ ॥ ౫ ॥
అపస్మారాదిరోగాణాం జ్వరాదీనాం విశేషతః ।
నాశనం స్మృతిమాత్రేణ మంత్రరాజమిమం ప్రియే ॥ ౬ ॥
గ్రహరాజభయానాం చ నాశనం సుఖవర్ధనమ్ ।
స్నేహాద్వక్ష్యామి తే మంత్రం సర్వసారమిమం ప్రియే ॥ ౭ ॥
సర్వకామార్థదం మంత్రం రాజ్యభోగప్రదం నృణామ్ ।
ప్రణవం పూర్వముచ్చార్య దేవీ ప్రణవముద్ధరేత్ ॥ ౮ ॥
బటుకాయేతి వై పశ్చాదాపదుద్ధారణాయ చ ।
కురు ద్వయం తతః పశ్చాద్బటుకాయ పునః క్షిపేత్ ॥ ౯ ॥
దేవీ ప్రణవముద్ధృత్య మంత్రరాజమిమం ప్రియే ।
మంత్రోద్ధారమిమం దేవి త్రైలోక్యస్యాపి దుర్లభమ్ ॥ ౧౦ ॥
అప్రకాశ్యమిమం మంత్రం సర్వశక్తిసమన్వితమ్ ।
స్మరణాదేవ మంత్రస్య భూతప్రేతపిశాచకాః ॥ ౧౧ ॥
విద్రవంతి భయార్తా వై కాలరుద్రాదివ ప్రజాః ।
పఠేద్వా పాఠయేద్వాపి పూజయేద్వాపి పుస్తకమ్ ॥ ౧౨ ॥
నాగ్నిచౌరభయం వాపి గ్రహరాజభయం తథా ।
న చ మారీభయం తస్య సర్వత్ర సుఖవాన్ భవేత్ ॥ ౧౩ ॥
ఆయురారోగ్యమైశ్వర్యం పుత్రపౌత్రాదిసంపదః ।
భవంతి సతతం తస్య పుస్తకస్యాపి పూజనాత్ ॥ ౧౪ ॥
శ్రీపార్వత్యువాచ ।
య ఏష భైరవో నామ ఆపదుద్ధారకో మతః ।
త్వయా చ కథితో దేవ భైరవః కల్ప ఉత్తమః ॥ ౧౫ ॥
తస్య నామసహస్రాణి అయుతాన్యర్బుదాని చ ।
సారముద్ధృత్య తేషాం వై నామాష్టశతకం వద ॥ ౧౬ ॥
శ్రీభగవానువాచ ।
యస్తు సంకీర్తయేదేతత్ సర్వదుష్టనిబర్హణమ్ ।
సర్వాన్ కామానవాప్నోతి సాధకః సిద్ధిమేవ చ ॥ ౧౭ ॥
శృణు దేవి ప్రవక్ష్యామి భైరవస్య మహాత్మనః ।
ఆపదుద్ధారకస్యేహ నామాష్టశతముత్తమమ్ ॥ ౧౮ ॥
సర్వపాపహరం పుణ్యం సర్వాపద్వినివారకమ్ ।
సర్వకామార్థదం దేవి సాధకానాం సుఖావహమ్ ॥ ౧౯ ॥
దేహాంగన్యసనం చైవ పూర్వం కుర్యాత్ సమాహితః ।
భైరవం మూర్ధ్ని విన్యస్య లలాటే భీమదర్శనమ్ ॥ ౨౦ ॥
అక్ష్ణోర్భూతాశ్రయం న్యస్య వదనే తీక్ష్ణదర్శనమ్ ।
క్షేత్రపం కర్ణయోర్మధ్యే క్షేత్రపాలం హృది న్యసేత్ ॥ ౨౧ ॥
క్షేత్రాఖ్యం నాభిదేశే చ కట్యాం సర్వాఘనాశనమ్ ।
త్రినేత్రమూర్వోర్విన్యస్య జంఘయో రక్తపాణికమ్ ॥ ౨౨ ॥
పాదయోర్దేవదేవేశం సర్వాంగే వటుకం న్యసేత్ ।
ఏవం న్యాసవిధిం కృత్వా తదనంతరముత్తమమ్ ॥ ౨౩ ॥
నామాష్టశతకస్యాపి ఛందోఽనుష్టుబుదాహృతమ్ ।
బృహదారణ్యకో నామ ఋషిశ్చ పరికీర్తితః ॥ ౨౪ ॥
దేవతా కథితా చేహ సద్భిర్వటుకభైరవః ।
ధర్మార్థకామమోక్షేషు వినియోగః ప్రకీర్తితః ॥ ౨౫ ॥
(అష్టోత్తరశతనామ స్తోత్రమ్)
ఓం భైరవో భూతనాథశ్చ భూతాత్మా భూతభావనః ।
క్షేత్రదః క్షేత్రపాలశ్చ క్షేత్రజ్ఞః క్షత్రియో విరాట్ ॥ ౨౬ ॥
శ్మశానవాసీ మాంసాశీ ఖర్పరాశీ మఖాంతకృత్ ।
రక్తపః ప్రాణపః సిద్ధః సిద్ధిదః సిద్ధసేవితః ॥ ౨౭ ॥
కరాలః కాలశమనః కలాకాష్ఠాతనుః కవిః ।
త్రినేత్రో బహునేత్రశ్చ తథా పింగలలోచనః ॥ ౨౮ ॥
శూలపాణిః ఖడ్గపాణిః కంకాలీ ధూమ్రలోచనః ।
అభీరుర్భైరవో భీరుర్భూతపో యోగినీపతిః ॥ ౨౯ ॥
ధనదో ధనహారీ చ ధనపః ప్రతిభావవాన్ ।
నాగహారో నాగకేశో వ్యోమకేశః కపాలభృత్ ॥ ౩౦ ॥
కాలః కపాలమాలీ చ కమనీయః కలానిధిః ।
త్రిలోచనో జ్వలన్నేత్రస్త్రిశిఖీ చ త్రిలోకపాత్ ॥ ౩౧ ॥
త్రివృత్తనయనో డింభః శాంతః శాంతజనప్రియః ।
వటుకో వటుకేశశ్చ ఖట్వాంగవరధారకః ॥ ౩౨ ॥
భూతాధ్యక్షః పశుపతిర్భిక్షుకః పరిచారకః ।
ధూర్తో దిగంబరః సౌరిర్హరిణః పాండులోచనః ॥ ౩౩ ॥
ప్రశాంతః శాంతిదః శుద్ధః శంకరప్రియబాంధవః ।
అష్టమూర్తిర్నిధీశశ్చ జ్ఞానచక్షుస్తమోమయః ॥ ౩౪ ॥
అష్టాధారః కలాధారః సర్పయుక్తః శశీశిఖః ।
భూధరో భూధరాధీశో భూపతిర్భూధరాత్మకః ॥ ౩౫ ॥
కంకాలధారీ ముండీ చ వ్యాలయజ్ఞోపవీతవాన్ ।
జృంభణో మోహనః స్తంభీ మారణః క్షోభణస్తథా ॥ ౩౬ ॥
శుద్ధనీలాంజనప్రఖ్యదేహో ముండవిభూషితః ।
బలిభుక్ బలిభూతాత్మా కామీ కామపరాక్రమః ॥ ౩౭ ॥
సర్వాపత్తారకో దుర్గో దుష్టభూతనిషేవితః ।
కామీ కలానిధిః కాంతః కామినీవశకృద్వశీ ।
సర్వసిద్ధిప్రదో వైద్యః ప్రభవిష్ణుః ప్రభావవాన్ ॥ ౩౮ ॥
(ఫలశ్రుతిః)
అష్టోత్తరశతం నామ భైరవస్య మహాత్మనః ।
మయా తే కథితం దేవి రహస్యం సర్వకామికమ్ ॥ ౩౯ ॥
య ఇదం పఠతి స్తోత్రం నామాష్టశతముత్తమమ్ ।
న తస్య దురితం కించన్న రోగేభ్యో భయం తథా ।
న శత్రుభ్యో భయం కించిత్ ప్రాప్నోతి మానవః క్వచిత్ ॥ ౪౦= ॥
పాతకానాం భయం నైవ పఠేత్ స్తోత్రమనన్యధీః ।
మారీభయే రాజభయే తథా చౌరాగ్నిజే భయే ॥ ౪౧ ॥
ఔత్పాతికే మహాఘోరే యథా దుఃస్వప్నదర్శనే ।
బంధనే చ తథా ఘోరే పఠేత్ స్తోత్రం సమాహితః ॥ ౪౨ ॥
సర్వే ప్రశమనం యాంతి భయాద్భైరవకీర్తనాత్ ।
ఏకాదశసహస్రం తు పురశ్చరణముచ్యతే ॥ ౪౩ ॥
త్రిసంధ్యం యః పఠేద్దేవి సంవత్సరమతంద్రితః ।
స సిద్ధిం ప్రాప్నుయాదిష్టాం దుర్లభమపి మానుషః ॥ ౪౪ ॥
షణ్మాసాన్ భూమికామస్తు స జప్త్వా లభతే మహీమ్ ।
రాజా శత్రువినాశాయ జపేన్మాసాష్టకం పునః ॥ ౪౫ ॥
రాత్రౌ వారత్రయం చైవ నాశయత్యేవ శాత్రవాన్ ।
జపేన్మాసత్రయం రాత్రౌ రాజానం వశమానయేత్ ॥ ౪౬ ॥
ధనార్థీ చ సుతార్థీ చ దారార్థీ యస్తు మానవః ।
పఠేద్వారత్రయం యద్వా వారమేకం తథా నిశి ॥ ౪౭ ॥
ధనం పుత్రాంస్తథా దారాన్ ప్రాప్నుయాన్నాత్ర సంశయః ।
రోగీ రోగాత్ ప్రముచ్యేత బద్ధో ముచ్యేత బంధనాత్ ॥ ౪౮ ॥
భీతో భయాత్ ప్రముచ్యేత దేవి సత్యం న సంశయః ।
యాన్ యాన్ సమీ హతే కామాంస్తాంస్తానాప్నోతి నిశ్చితమ్ ।
అప్రకాశ్యమిదం గుహ్యం న దేయం యస్య కస్యచిత్ ॥ ౪౯ ॥
సత్కులీనాయ శాంతాయ ఋజవే దంభవర్జితే ।
దద్యాత్ స్తోత్రమిదం పుణ్యం సర్వకామఫలప్రదమ్ ।
ధ్యానం వక్ష్యామి దేవస్య యథా ధ్యాత్వా పఠేన్నరః ॥ ౫౦ ॥
ఓం శుద్ధస్ఫటికసంకాశం సహస్రాదిత్యవర్చసమ్ ।
అష్టబాహుం త్రినయనం చతుర్బాహుం ద్విబాహుకమ్ ॥ ౫౧ ॥
భుజంగమేఖలం దేవమగ్నివర్ణశిరోరుహమ్ ।
దిగంబరం కుమారీశం వటుకాఖ్యం మహాబలమ్ ॥ ౫౨ ॥
ఖట్వాంగమసిపాశం చ శూలం చైవ తథా పునః ।
డమరుం చ కపాలం చ వరదం భుజగం తథా ॥ ౫౩ ॥
నీలజీమూతసంకాశం నీలాంజనచయప్రభమ్ ।
దంష్ట్రాకరాలవదనం నూపురాంగదభూషితమ్ ॥ ౫౪ ॥
ఆత్మవర్ణసమోపేతసారమేయసమన్వితమ్ ।
ధ్యాత్వా జపేత్ సుసంహృష్టః సర్వాన్ కామానవాప్నుయాత్ ॥ ౫౫ ॥
ఏతచ్ఛ్రుత్వా తతో దేవీ నామాష్టశతముత్తమమ్ ।
భైరవాయ ప్రహృష్టాభూత్ స్వయం చైవ మహేశ్వరీ ॥ ౫౬ ॥
ఇతి విశ్వసారోద్ధారతంత్రే ఆపదుద్ధారకల్పే భైరవ స్తవరాజః సమాప్తః ॥
– Chant Stotra in Other Languages –
Sri Shiva Slokam » Sri Batuka Bhairava Stavaraja (Ashtottara Shatanama Stotram cha) Lyrics in Sanskrit » English » Kannada » Tamil