॥ Lord Shiva Stuti (Narayanacharya Kritam) Kannada Lyrics ॥
॥ ಶ್ರೀ ಶಿವ ಸ್ತುತಿಃ (ನಾರಾಯಣಾಚಾರ್ಯ ಕೃತಂ) ॥
ಸ್ಫುಟಂ ಸ್ಫಟಿಕಸಪ್ರಭಂ ಸ್ಫುಟಿತಹಾರಕಶ್ರೀಜಟಂ
ಶಶಾಙ್ಕದಲಶೇಖರಂ ಕಪಿಲಫುಲ್ಲನೇತ್ರತ್ರಯಮ್ ।
ತರಕ್ಷುವರಕೃತ್ತಿಮದ್ಭುಜಗಭೂಷಣಂ ಭೂತಿಮ-
ತ್ಕದಾ ನು ಶಿತಿಕಣ್ಠ ತೇ ವಪುರವೇಕ್ಷತೇ ವೀಕ್ಷಣಮ್ ॥ ೧ ॥
ತ್ರಿಲೋಚನ ವಿಲೋಚನೇ ಲಸತಿ ತೇ ಲಲಾಮಾಯಿತೇ
ಸ್ಮರೋ ನಿಯಮಘಸ್ಮರೋ ನಿಯಮಿನಾಮಭೂದ್ಭಸ್ಮಸಾತ್ ।
ಸ್ವಭಕ್ತಿಲತಯಾ ವಶೀಕೃತಪತೀ ಸತೀಯಂ ಸತೀ
ಸ್ವಭಕ್ತವಶತೋ ಭವಾನಪಿ ವಶೀ ಪ್ರಸೀದ ಪ್ರಭೋ ॥ ೨ ॥
ಮಹೇಶ ಮಹಿತೋಽಸಿ ತತ್ಪುರುಷ ಪೂರುಷಾಗ್ರ್ಯೋ ಭವಾ-
ನಘೋರರಿಪುಘೋರ ತೇಽನವಮ ವಾಮದೇವಾಞ್ಜಲಿಃ ।
ನಮಸ್ಸಪದಿ ಜಾತ ತೇ ತ್ವಮಿತಿ ಪಞ್ಚರೂಪೋಚಿತ-
ಪ್ರಪಞ್ಚಚಯಪಞ್ಚವೃನ್ಮಮ ಮನಸ್ತಮಸ್ತಾಡಯ ॥ ೩ ॥
ರಸಾಘನರಸಾನಲಾನಿಲವಿಯದ್ವಿವಸ್ವದ್ವಿಧು-
ಪ್ರಯಷ್ಟೃಷು ನಿವಿಷ್ಟಮಿತ್ಯಜ ಭಜಾಮಿ ಮೂರ್ತ್ಯಷ್ಟಕಮ್ ।
ಪ್ರಶಾನ್ತಮುತ ಭೀಷಣಂ ಭುವನಮೋಹನಂ ಚೇತ್ಯಹೋ
ವಪೂಂಷಿ ಗುಣಭೂಷಿತೇಹಮಹಮಾತ್ಮನೋಽಹಂ ಭಿದೇ ॥ ೪ ॥
ವಿಮುಕ್ತಿಪರಮಾಧ್ವನಾಂ ತವ ಷಡಧ್ವನಾಮಾಸ್ಪದಂ
ಪದಂ ನಿಗಮವೇದಿನೋ ಜಗತಿ ವಾಮದೇವಾದಯಃ ।
ಕಥಞ್ಚಿದುಪಶಿಕ್ಷಿತಾ ಭಗವತೈವ ಸಂವಿದ್ರತೇ
ವಯಂ ತು ವಿರಲಾನ್ತರಾಃ ಕಥಮುಮೇಶ ತನ್ಮನ್ಮಹೇ ॥ ೫ ॥
ಕಠೋರಿತಕುಠಾರಯಾ ಲಲಿತಶೂಲಯಾ ವಾಹಯಾ
ರಣಡ್ಡಮರುಣಾ ಸ್ಫುರದ್ಧರಿಣಯಾ ಸಖಟ್ವಾಙ್ಗಯಾ ।
ಚಲಾಭಿರಚಲಾಭಿರಪ್ಯಗಣಿತಾಭಿರುನ್ಮೃತ್ಯತ-
ಶ್ಚತುರ್ದಶ ಜಗನ್ತಿ ತೇ ಜಯಜಯೇತ್ಯಯುರ್ವಿಸ್ಮಯಮ್ ॥ ೬ ॥
ಪುರಾ ತ್ರಿಪುರರನ್ಧನಂ ವಿವಿಧದೈತ್ಯವಿಧ್ವಂಸನಂ
ಪರಾಕ್ರಮಪರಮ್ಪರಾ ಅಪಿ ಪರಾ ನ ತೇ ವಿಸ್ಮಯಃ ।
ಅಮರ್ಷಿಬಲಹರ್ಷಿತಕ್ಷುಭಿತವೃತ್ತನೇತ್ರೋಜ್ಜ್ವಲ-
ಜ್ಜ್ವಲಜ್ಜ್ವಲನಹೇಲಯಾ ಶಲಭಿತಂ ಹಿ ಲೋಕತ್ರಯಮ್ ॥ ೭ ॥
ಸಹಸ್ರನಯನೋ ಗುಹಸ್ಸಹಸಹಸ್ರರಶ್ಮಿರ್ವಿಧುಃ
ಬೃಹಸ್ಪತಿರುತಾಪ್ಪತಿಸ್ಸಸುರಸಿದ್ಧವಿದ್ಯಾಧರಾಃ ।
ಭವತ್ಪದಪರಾಯಣಾಶ್ಶ್ರಿಯಮಿಮಾಂ ಯಯುಃ ಪ್ರಾರ್ಥಿತಾಂ
ಭವಾನ್ ಸುರತರುರ್ಭೃಶಂ ಶಿವ ಶಿವಾಂ ಶಿವಾವಲ್ಲಭಾಮ್ ॥ ೮ ॥
ತವ ಪ್ರಿಯತಮಾದತಿಪ್ರಿಯತಮಂ ಸದೈವಾನ್ತರಂ
ಪಯಸ್ಯುಪಹಿತಂ ಘೃತಂ ಸ್ವಯಮಿವ ಶ್ರಿಯೋ ವಲ್ಲಭಮ್ ।
ವಿಬುದ್ಧ್ಯ ಲಘುಬುದ್ಧಯಸ್ಸ್ವಪರಪಕ್ಷಲಕ್ಷ್ಯಾಯಿತಂ
ಪಠನ್ತಿ ಹಿ ಲುಠನ್ತಿ ತೇ ಶಠಹೃದಶ್ಶುಚಾ ಶುಣ್ಠಿತಾಃ ॥ ೯ ॥
ನಿವಾಸನಿಲಯಾಚಿತಾ ತವ ಶಿರಸ್ತತಿರ್ಮಾಲಿಕಾ
ಕಪಾಲಮಪಿ ತೇ ಕರೇ ತ್ವಮಶಿವೋಽಸ್ಯನನ್ತರ್ಧಿಯಾಮ್ ।
ತಥಾಪಿ ಭವತಃ ಪದಂ ಶಿವಶಿವೇತ್ಯದೋ ಜಲ್ಪತಾ-
ಮಕಿಞ್ಚನ ನ ಕಿಞ್ಚನ ವೃಜಿನಮಸ್ತಿ ಭಸ್ಮೀ ಭವೇತ್ ॥ ೧೦ ॥
ತ್ವಮೇವ ಕಿಲ ಕಾಮಧುಕ್ಸಕಲಕಾಮಮಾಪೂರಯನ್
ಸದಾ ತ್ರಿನಯನೋ ಭವಾನ್ವಹಸಿ ಚಾತ್ರಿನೇತ್ರೋದ್ಭವಮ್ ।
ವಿಷಂ ವಿಷಧರಾನ್ದಧತ್ಪಿಬಸಿ ತೇನ ಚಾನನ್ದವಾ-
ನ್ನಿರುದ್ಧಚರಿತೋಚಿತಾ ಜಗದಧೀಶ ತೇ ಭಿಕ್ಷುತಾ ॥ ೧೧ ॥
ನಮಃ ಶಿವಶಿವಾ ಶಿವಾಶಿವ ಶಿವಾರ್ಥ ಕೃನ್ತಾಶಿವಂ
ನಮೋ ಹರಹರಾ ಹರಾಹರ ಹರಾನ್ತರೀಂ ಮೇ ದೃಶಮ್ ।
ನಮೋ ಭವಭವಾ ಭವಪ್ರಭವಭೂತಯೇ ಮೇ ಭವಾ-
ನ್ನಮೋ ಮೃಡ ನಮೋ ನಮೋ ನಮ ಉಮೇಶ ತುಭ್ಯಂ ನಮಃ ॥ ೧೨ ॥
ಸತಾಂ ಶ್ರವಣಪದ್ಧತಿಂ ಸರತು ಸನ್ನತೋಕ್ತೇತ್ಯಸೌ
ಶಿವಸ್ಯ ಕರುಣಾಙ್ಕುರಾತ್ಪ್ರತಿಕೃತಾತ್ಮದಾ ಸೋಚಿತಾ ।
ಇತಿ ಪ್ರಥಿತಮಾನಸೋ ವ್ಯಥಿತ ನಾಮ ನಾರಾಯಣಃ
ಶಿವಸ್ತುತಿಮಿಮಾಂ ಶಿವಾಂ ಲಿಕುಚಿಸೂರಿಸೂನುಸ್ಸುಧೀಃ ॥ ೧೩ ॥
ಇತಿ ಶ್ರೀಲಿಕುಚಿಸೂರಿಸೂನು ನಾರಾಯಣಾಚಾರ್ಯವಿರಚಿತಾ ಶ್ರೀ ಶಿವಸ್ತುತಿಃ ।
– Chant Stotra in Other Languages –
Sri Shiva Stuti (Narayanacharya Kritam) in Sanskrit – English – Kannada – Telugu – Tamil