॥ Sharada Trishati Bengali Lyrics ॥
॥ শারদাত্রিশতী ॥
গঙ্গাধরমখিবিরচিতা ।
পরমাভরণং ধাতুর্বদনাম্ভোজস্য শারদা দেবী ।
য়া রাজতি জননী সা লসতু সদা সুপ্রসন্না নঃ ॥ ১ ॥
সা শারদা প্রসন্না রাজতি মম মানসে নিত্যম্ ।
য়া শারদাব্জবদনা জননী কীর্ত্যা হি সর্বলোকানাম্ ॥ ২ ॥
সংপদ্ দিব্যা ধাতুঃ খ্যাতা সা শারদা দেবী ।
য়দ্ভজনং দেবানামপি তত্ত্বজ্ঞানদং বিদুর্বিবুধাঃ ॥ ৩ ॥
সরসকবিতাবিভূত্যৈ য়ত্পদমারাধ্যতে বিশেষজ্ঞৈঃ ।
সা শারদা শ্রিয়ৈ নঃ কালে সর্বপ্রসন্নাত্মা ॥ ৪ ॥
নীলারবিন্দলোচনয়ুগলা সা শারদা দেবী ।
করকমলকলিতবীণা সদা প্রসন্না শ্রিয়ৈঃ বঃ স্যাত্ ॥৫ ॥
কলয়ে তামহমনিশং ফুল্লাব্জবিলোচনাং বাণীম্ ।
য়া সৃষ্ট্যাদৌ সাহ্যং কলয়তি ধাতুর্জগন্মাতা ॥ ৬ ॥
য়স্যা লীলালোলঃ পদ্মাসনগোঽপি বেদপাঠরতঃ ।
তামহমতুলানন্দপ্রাপ্ত্যৈ কলয়ে মনঃপদ্মে ॥ ৭ ॥
ব্রহ্মাণং তাং বাণীমেকাসনভাসুরাং শ্রিয়ঃ প্রাপ্ত্যৈ ।
আরাদ্বিলোক্য মানসমানন্দরসং পরং ভজতে ॥ ৮ ॥
মুক্তাময়ে বিমানে পদ্মাসনয়ন্ত্রিকামধ্যে ।
দৃশ্যাং বাণীং দেবীং সেবে সংততসুখপ্রাপ্ত্যৈ ॥ ৯ ॥
ভাগ্যান্মম চ কবীনাং সা দেবী দৃশ্যতামেতি ।
বীণাপুস্তকহস্তা য়া কমলাসনপুরন্ধ্রী হি ॥ ১০ ॥
মামকমানসকীরং বধ্নীয়াশ্চরণপঞ্জরে মাতঃ ।
তেন মম জন্মলাভঃ স্তোত্রং চ তব প্রকামকলিতার্থম্ ॥ ১১ ॥
সংবিত্প্ররোহকলিকাপ্রাপ্ত্যৈ তাং নৌমি শারদাং দেবীম্ ।
য়া কিল কবীশ্চরাণামধিনেত্রী কাব্যকলনাদৌ ॥ ১২ ॥
ভক্তানাং জিহ্বাগ্রং সিংহাসনমাদরাদ্ বাণী ।
কলয়ন্তি নৃত্যতি কিল ততস্তু তন্নূপুরনিনাদঃ ॥ ১৩ ॥
মঞ্জুলফণিতিঝরীতি প্রগীয়তে দিক্তটে রসিকৈঃ ।
প্রাতঃফুল্লপয়োরুহমরন্দরসকেলিধূর্বহা কালে ॥ ১৪ ॥
দুর্বারগর্বদুর্মতিদুরর্থনিরসনকলানিপুণাঃ ।
মাতস্তব পাদয়োরুহসেবাধন্যতাং প্রাপ্তাঃ ॥ ১৫ ॥
নীচা মম তু মনীষা তথাপি তব নুতিকলাপ্রবৃত্তোঽস্মি ।
অম্ব তব তত্র হেতুঃ কৃপাং পরং বুদ্ধিদা জয়তি ॥ ১৬ ॥
বিধিদয়িতে তব মাতঃ স্তুতৌ ন শক্তা অপি ত্রিদশাঃ ।
ক্ষন্তব্যমত্র দয়য়া মম চাপল্যং তব স্তোত্রে ॥ ১৭ ॥
শুকবাণীমিব মাতর্নিরর্থকাং মদ্বচোভঙ্গীম্ ।
সদসি শৃণোষি দয়য়া তত্ তব চোত্তমপদব্যক্ত্যৈ ॥ ১৮ ॥
পরদেবতে প্রসীদ প্রাণেশ্বরি ধাতুরম্ব মম বাণীম্ ।
কৃপয়া তব নুতিয়োগ্যাং ত্বন্নূপুরনিনদরম্যরসগুম্ফাম্ ॥ ১৯ ॥
সর্বজ্ঞত্বং সংপদমথবান্যাং প্রাপ্তুমত্র তব মাতঃ ।
তব চরণকমলমেতচ্ছরণং নান্যা গতির্দৃষ্টা ॥ ২০ ॥
মন্দধিয়া স্বল্পাপি স্তুতিরম্ব নিরর্থকাপি রসহীনা ।
কলিতা চেত্ তব কৃপয়া তদেব সদসীডিতং ভাতি ॥ ২১ ॥
কুণ্ঠীকরোতু বিপদং চাজ্ঞানং দুর্গতিং বাণি ।
তব চরণকমলসেবাদরো জনানাং কলৌ কালে ॥ ২২ ॥
বীরশ্রীর্বিদ্বচ্ছ্রীর্জয়শ্রিয়ো বামরৈর্মান্যে ।
তব পাদাম্বুজসেবাদরেণ সিধ্যন্তি নান্যথা লোকে ॥ ২৩ ॥
করুণারসবর্ষিণি তে চরণসরোজদ্বয়ং নিধেহি মম ।
মস্তকতলে বিদারিতজরাদিকং সপদি জন্ম সার্থং মে ॥ ২৪ ॥
শ্রদ্ধাং মেধাং সংপদমন্যামমরেন্দ্রমাননীয়াং হি ।
দয়য়া বিধেহি কালে ভক্তানাং নস্ত্বদেকশরণানাম্ ॥ ২৫ ॥
প্রেয়সি ধাতুর্জগতাং পরমেশ্বরি বাণি মাতরম্ব ননু ।
তব নামানি ফণন্তস্ত্রিদশৈঃ সহ য়ান্তি য়ানেন ॥ ২৬ ॥
তব নাম য়স্য জিহ্বাঙ্গণে বিশুদ্ধং ক্ষণং স্ফুরতি ।
স হি বন্দ্যস্ত্রিদশৈরপি বিগলিতপাপঃ পরে লোকে ॥ ২৭ ॥
নতনাকীশ্বরবনিতামৌলিস্রগ্গলিতমকরন্দৈঃ ।
স্নিগ্ধপদাম্বুজয়ুগলা বাণী দেবী শ্রিয়ো হি লসতি পরা ॥ ২৮ ॥
বিদুষামপি তুষ্টিকরং নবনবরসগুম্ফনং কবিত্বং তু ।
য়ত্করুণাবীক্ষণতো সিধ্যতি তাং শারদাং বন্দে ॥ ২৯ ॥
অম্ব প্রসীদ পরমং মায়ামেতাং নিরস্য নতিভাজঃ ।
মম সংবিধেহি মধুরাং বাচং তব নুতিকলার্হাং চ ॥ ৩০ ॥
বাণী মাতা জগতাং বাণীপুস্তককরাম্ভোজা ।
হংসাশ্রিতা হি নমতাং শ্রেয়ঃসিধ্যৈ প্রসন্না নঃ ॥ ৩১ ॥
শ্লাঘ্যা সংপত্কালে বৈদুষ্যং বা য়দীয়বীক্ষণতঃ ।
সিধ্যন্ত্যপি দেবানাং তাং বন্দে শারদাং দেবীম্ ॥ ৩২ ॥
বিদ্যাদানকরীয়ং কমলাসনপুণ্যপরিপাকঃ ।
মম মনসি সংনিধত্তাং দিব্যজ্ঞানাদিসিধ্যৈ হি ॥ ৩৩ ॥
দিব্যজ্ঞানং দয়য়া বিধেহি মাতর্মহাসারম্ ।
তেনৈব তে তু কীর্তির্দানফলং নশ্চ জন্মসাফল্যম্ ॥ ৩৪ ॥
দ্বাদশবীজাক্ষরগাং মন্ত্রোদ্ধারক্রিয়াশক্তিম্ ।
বাণীং বিধেস্তু পত্নীং মধ্যে পশ্যামি বিম্বমধ্যস্থাম্ ॥ ৩৫ ॥
রবিকোটিতেজসং তাং সরস্বতীং ত্র্যক্ষরক্রিয়াশক্তিম্ ।
অণিমাদিদাং প্রসন্নামম্বাং পশ্যামি পদ্মমধ্যগতাম্ ॥ ৩৬ ॥
জগদীশ্বরি ভারতি মে প্রসীদ বাণি প্রপন্নায় ।
অহমপি কুতুকাত্ তব নুতিকলনেঽশক্তশ্চ মন্দধিষণশ্চ ॥ ৩৭ ॥
মুনিজনমানসপেটীরত্নং ধাতুর্গৃহে রত্নম্ ।
বাণীতি দিব্যরত্নং জয়তি সদা কামধুক্ কালে ॥ ৩৮ ॥
অজ্ঞানব্যাধিহরং তদৌষধং শারদারূপম্ ।
য়ঃ পশ্যতি স হি লোকে পরাত্মনে রোচতে কালে ॥ ৩৯ ॥
কমলাসননয়নফলং সৃষ্ট্যাদিকলাসমাসক্তম্ ।
বাণীরূপং তেজঃ স্ফুরতি জগচ্ছ্রেয়সে নিত্যম্ ॥ ৪০ ॥
হংসগতিং তামম্বামম্ভোরুহলোচনাং বন্দে ।
তিলকয়তি য়া গুরূণাং জিহ্বাসিংহাসনং বাণী ॥ ৪১ ॥
বাণি তরঙ্গয় লোচনবীক্ষণশৈলীং ক্ষণং ময়ি ভোঃ ।
মম জন্ম লব্ধবিভবং তেন ভবেন্নৈব তে হানিঃ ॥ ৪২ ॥
পদ্মাসনেন সাকং কালে বাণী সমাসনা জয়তি ।
কুচকলশনমিতদেহা কুর্বন্তী ভদ্রসংততিং নমতাম্ ॥ ৪৩ ॥
ব্যাতন্বানা বাণী কবীশ্বরাণাং মনোজ্ঞবচনঝরীম্ ।
জয়তি বিধিসুকৃতসংততিপরিণমিতমালা বুধৈর্বন্দ্যা ॥ ৪৪ ॥
কমলসুষমাঙ্গয়ষ্টিঃ সা দেবী জয়তি পদ্মমধ্যতলে ।
শতবীজাক্ষরলসিতং দিক্পতিকৃতরক্ষকং চ মেরুমুখম্ ॥ ৪৫ ॥
বাণীয়ন্ত্রং বিবুধৈর্মান্যং য়োগাসনাব্ধীন্দুম্ ।
হ্রীমক্ষরমুখমাদ্যং প্রাক্তটকলিতং চ পদ্মমধ্যতলে ॥ ৪৬ ॥
তন্মেরুচক্ররূপং সমাধিদৃশ্যং চ লোকবেদ্যং চ ।
সৈষাশ্রিত্য তদেতদ্ রাজতি রাজীবলোচনা বাণী ॥ ৪৭ ॥
হংসাশ্রিতগতিবিভবা মন্দস্মেরা তমোনিহন্ত্রী চ ।
মধুরতরবাঙ্নিগুম্ফা বীণাপুস্তককরাম্ভোজা ॥ ৪৮ ॥
বীণাবাদনরসিকা নমতামিষ্টার্থদায়িনী বাণী ।
ধাতুর্নয়নমহোত্সবকলিকা কুর্যাচ্ছুভং জগতাম্ ॥ ৪৯ ॥
তাপিঞ্ছরম্যদেহশ্রীরেষা কবিসমাজনুতা ।
অষ্টৈশ্বর্যাদিকলাদানে দত্তেক্ষণা জয়তি ॥ ৫০ ॥
সৃষ্ট্যাদৌ বিধিলিখিতং বাণী সৈষা হি চান্যথাকর্তুম্ ।
নাকৌকসামপীহ প্রভবতি কলিতপ্রণামানাম্ ॥ ৫১ ॥
য়ঃ পশ্যতি তামেতাং বাণীং পুরুষো হি ধন্যতামেতি ।
য়ং পশ্যতি সৈষায়ং নিতরাং ধন্যো নৃপেডিতঃ কালে ॥ ৫২ ॥
কবলিততমঃসমূহা বাণী সৈষা হি বিজয়তে জগতি ।
অপুনর্ভবসুখদাত্রী বিরিঞ্চিমুখলালিতা কালে ॥ ৫৩ ॥
কমলাসনমুখকমলস্থিরাসনাং শারদাং বন্দে ।
য়ন্নামোচ্চরণকলাবিভবাত্ সর্বজ্ঞতা নিয়তম্ ॥ ৫৪ ॥
ভবপরমৌষধমেতদ্বাণীরূপং সদারাধ্যম্ ।
কমলাসনলোচনগণসরসক্রীডাস্পদং জয়তি ॥ ৫৫ ॥
নারীবংশশিখামণিরেষা চিন্তামণির্নতানাং হি ।
ধাতৃগৃহভাগধেয়ং ধ্যেয়ং সদ্ভিঃ শ্রিয়ঃ সমৃদ্ধ্যৈ নঃ ॥ ৫৬ ॥
জননি ভুবনেশ্বরি ত্বাং বাণীং বন্দে কবিত্বরসসিদ্ধ্যৈ ।
ত্বং তু দদাসি হি দয়য়া মম মন্দস্যাপি বাগ্ঝরীর্মধুরাঃ ॥ ৫৭ ॥
এতেন তব তু কীর্তের্মহিমা সংগীয়তে দিশাং বলয়ে ।
কিংনরবর্গৈরমরীকন্যাভিঃ কল্পবৃক্ষমূলতলে ॥ ৫৮ ॥
কবিমল্লসূক্তিলহরীস্তন্বানা শারদা জয়তি ।
বিধিকেলিসদনহংসী কল্যাণৈকস্থলী নমতাম্ ॥ ৫৯ ॥
স্ফুরতু মম বচসি বাণি ত্বদীয়বৈভবসুধাধারা ।
নিত্যং ব্যক্তিং প্রাপ্তা ধুতনতজনখেদজালকা মহতী ॥ ৬০ ॥
বাণি তব স্তুতিবিষয়ে বুদ্ধির্জাতা হি মে সহসা ।
তেন মম ভাগদেয়ং পরিণতিমিত্যেব নিত্যসংতুষ্টঃ ॥ ৬১ ॥
সৃষ্টিকলামণ্ডনভূরেষা বাণী জগজ্জননী ।
আলোকমাত্রবশতস্তমসো হন্ত্রী চ সংপদাং জননী ॥ ৬২ ॥
পৌরুষলোপবিধাত্রী ধাতুরিয়ং কমলকোমলাঙ্গলতা ।
বসতু সদা জিহ্বাগ্রে দিব্যজ্ঞানপ্রদা দেবী ॥ ৬৩ ॥
প্রতিদিনদুরিতনিহন্ত্রী পদ্মাসননয়নপুণ্যপরিপাকঃ ।
কবিতাসংতানকলাবীজঙ্কুরবর্ধিনী জয়তি ॥ ৬৪ ॥
ক্ষণবীক্ষণেন মাতা লক্ষ্মীং পক্ষ্মলয়তি প্রণতে ।
বেধসি সুরতমহোত্সবসংকেততলপ্রদর্শিনী কালে ॥ ৬৫ ॥
শৃঙ্গারবিভ্রমবতা নীলোত্পলকান্তিচাতুরীসুপুষা ।
বাণীনেত্রেণ বিধির্জিতোঽভবত্ সোঽপি সততকৃতবেদঃ ॥ ৬৬ ॥
শ্যামা কটাক্ষলহরী মাতুর্জয়তীহ সংপদাং জননী ।
য়ামস্তৌষীত্ কালে মঘবা নাকাধিপা মুনয়ঃ ॥ ৬৭ ॥
মণিকটকনাদপূরিতমম্বাপাদাম্বুজং মহামন্ত্রৈঃ ।
জপ্যং ধ্যেয়ং কালে দিশি দিশি কলিতস্বরক্ষং চ ॥ ৬৮ ॥
স্মরণেন দুরিতহন্ত্রী নমনেন কবিত্বসিদ্ধিদা বাণী ।
কুসুমসমর্পণকলয়া কালে মোক্ষপ্রদাত্রী চ ॥ ৬৯ ॥
বিসৃমরতমোনিহন্ত্রি ত্বাং সেবে শারদাদেবি ।
শিশিরীকুরু মাং কালে করুণারসবীক্ষিতেন বরদেন ॥ ৭০ ॥
মাতর্নমোঽস্তু তাবককটাক্ষমধুপায় শারদে জয়তি ।
য়ো বেধসোঽপি কালে সৃষ্ট্যাদৌ চাতুরীং দিত্সন্ ॥ ৭১ ॥
সুমনোবাঞ্ছাদানে কৃতাবধানং ধনং ধাতুঃ ।
ধিষণাজাড্যাদিহরং য়দ্বীক্ষণমামনন্তি জগতি বুধাঃ ॥ ৭২ ॥
ললিতগমনং ত্বদীয়ং কলনূপুরনাদপূরিতং বাণি ।
নৌমি পদাম্বুজয়ুগলং কবিতাসিদ্ধ্যৈ বিধেঃ কান্তে ॥ ৭৩ ॥
কমলকৃতবৈজয়ন্তী বিধের্মুখেষ্বাদরাদ্বাণ্যাঃ ।
জয়তি কটাক্ষলহরী তোরণলক্ষ্মীস্তু সত্যলোকে হি ॥ ৭৪ ॥
নিশ্রেণিকা চ মুক্তেঃ সজ্জ্ঞাননদীমহালহরী ।
নানারসচাতুর্যপ্রসারিকা দুরিতশঙ্কুলা কালে ॥ ৭৫ ॥
পরতন্ত্রিতবিধিবিভবা দেবী সা শারদা জয়তি ।
কৈবল্যাদিকলানাং দাত্রী ভক্তালিকামধেনুর্যা ॥ ৭৬ ॥
কবিকামধেনুরেষা মঞ্জুস্মেরাননাম্ভোজা ।
বাণী জয়তি বিধাতুর্মননাগমসংপ্রদায়ফলদা হি ॥ ৭৭ ॥
ঘনতরকৃপারসার্দ্রৈর্নানাবিভবপ্রদানকৃতদীক্ষৈঃ ।
বাণী জয়তি কটাক্ষৈর্নঃ কাশ্মল্যং হঠান্নিরস্যন্তী ॥ ৭৮ ॥
দাসাশাদানকলাপ্রক্লৃপ্তদীক্ষাকটাক্ষলহরী মে ।
কবলয়তু পাপরাশিং বাণ্যা নিত্যং মহৌদার্যা ॥ ৭৯ ॥
আদিমজননী সৈষা বাণী জয়তীহ ভক্তরক্ষায়ৈ ।
সর্বত্র কলিতদেহা নানাশাস্ত্রাদিরূপতো জগতি ॥ ৮০ ॥
বহুবিধলীলাসদনং সংভৃতফুল্লাব্জশিল্পবৈচিত্র্যম্ ।
বাণীমুখারবিন্দং চুম্বতি মানসমিদং হঠাত্ কৃত্যম্ ॥ ৮১ ॥
সৌভাগ্যকান্তিসারং বদনাম্ভোজং শ্রিয়ৈ বাণ্যাঃ ।
আশ্রিত্য সকলবেদা অপি নিত্যং মান্যতাং প্রাপ্তাঃ ॥ ৮২ ॥
জ্ঞানময়ী সলিলময়ী তত্ত্বময়ী ভাতি সর্বলোকানাম্ ।
অক্ষরময়ী চ বাণী শ্রেয়োদানে নিবদ্ধচিত্তগতিঃ ॥ ৮৩ ॥
নমৌক্তিরস্তু মাত্রে বাণ্যৈঃ নঃ সিদ্ধিদা ভক্ত্যা ।
আনন্দিন্যৈ জ্ঞানস্বরূপভাজে প্রবন্ধরূপায়ৈ ॥ ৮৪ ॥
আরাধ্যায়ৈ ধ্যেয়ায়ৈ চাত্তকলাচিত্রনাদরূপায়ৈ ।
সচ্চিত্তবাসভাজে বাণ্যৈ ভূয়ো নমোঽস্তু ভক্তিকৃতম্ ॥ ৮৫ ॥
কমলাসনপুণ্যকলা নমতাং চিন্তামণির্বাণী ।
জীবাক্ষরবোধকলারূপা জয়তীহ সত্ত্বরূপবতী ॥ ৮৬ ॥
ব্রহ্মাণ্ডমণ্ডলমিদং ব্যাপ্তং মাত্রা ক্ষরাক্ষরাদিজুষা ।
য়ত্পদকমলং নিত্যং শ্রুতিততিসুদতীবিভূষণং চ বিদুঃ ॥ ৮৭ ॥
মনসিজসাম্রাজ্যকলালক্ষ্মীরেষা বিরিঞ্চিমুখহর্ষম্ ।
ব্যাতন্বানা নিত্যং রাজতি ষডরস্বরূপচক্রতলে ॥ ৮৮ ॥
মঞ্জুলবীণানিনদপ্রয়োগনির্ধূতমোহসংচারা ।
হংসীয়ানা বাণী হংসগতিঃ সুকৃতিনেত্রপুণ্যকলা ॥ ৮৯ ॥
কুচকলশসবিধবিনিহিতবীণানিক্কাণসাবধানকলা ।
অধিনেত্রী হি কলানাং সকলানাং শারদা জয়তি ॥ ৯০ ॥
ত্রিদশপরিষন্নিষেব্যা প্রাতঃ সায়ং প্রফুল্লমুখকমলা ।
কমলাস্নুষা হি বাণী বাণীং দিশতু প্রবন্ধরসভরিতাম্ ॥ ৯১ ॥
অধিকচপলৈঃ কটাক্ষৈরঞ্চিতলীলারসৈরুদারৈর্নঃ ।
মঙ্গলমাতন্বানা বিধাতৃগৃহিণী সুরাদিনুতপাদা ॥ ৯২ ॥
কান্তং লক্ষ্মীভবনং মুখকমলং শারদাদেব্যাঃ ।
সৌভাগ্যকান্তিসারং স্পৃহয়তি মে মানসং সরসম্ ॥ ৯৩ ॥
কারুণ্যপূর্ণনয়নং পুস্তকহস্তং মহঃ কিমপি ।
ধাতুঃ পুণ্যকলানাং পরিপাকো মর্ত্যরক্ষণং কুরুতে ॥ ৯৪ ॥
সংসারবারিরাশিং তর্তুং সা সেতুরেষা নঃ ।
ধাতুর্গৃহিণী দুঃখং শিথিলয়তু পরং জনিপ্রাপ্তম্ ॥ ৯৫ ॥
সরসকবিকল্পবল্লীমম্বাং বাণীমহমুপাসে ।
অন্তস্তমোনিহন্ত্রীং য়ামাহুর্জ্ঞানদাং মুনয়ঃ ॥ ৯৬ ॥
মম লোচনয়োর্ভূয়াত্ বিদ্যা কাপি প্রধূতজনিভীতিঃ ।
নিগমেষু সংচরন্তী কৃপানিধিঃ শারদা দেবী ॥ ৯৭ ॥
শমিতনতদুরিতসংঘা ধাত্রে নিজনেত্রকল্পিতানঙ্গা ।
কৃতসুরশাত্রবভঙ্গা সা দেবী মঙ্গলৈস্তুঙ্গা ॥ ৯৮ ॥
পদ্মাসনস্থিতাং তাং বাণীং চতুরাননাং বন্দে ।
কল্যাণানাং সরণিং কবিপরিষত্কল্পবল্লরীং মান্যাম্ ॥ ৯৯ ॥
কুচভারসংনতাঙ্গীং কুন্দস্মেরাননাম্ভোজাম্ ।
কুন্দলকুসুমপরিমলসংপাদিতভৃঙ্গঝংকৃতিতরঙ্গাম্ ॥ ১০০ ॥
চিদ্রূপাং বিধিমহিষীং হংসগতিং হংসসংনুতচরিত্রাম্ ।
বিদ্যাকলাদিনিলয়ামারাধ্যাং সকলজডিমদোষহরীম্ ॥ ১০১ ॥
জননি য়দি ভজতি লোকে তব লোচনবীক্ষণং ক্ষণং মর্ত্যঃ ।
কুপুরুষনুতিবিমুখস্তে রূপং জ্ঞানপ্রদং পশ্যন্ ॥ ১০২ ॥
কুক্ষিংভরিত্বমুখদুর্গুণাদিকং দূরতস্ত্যক্ত্বা ।
ত্বদ্ভাবনেন ধন্যো নয়তি চ কালং প্রমোদেন ॥ ১০৩ ॥
ময়ি তাপভারশান্ত্যৈ তরঙ্গয় ত্বদিলোচনে মাতঃ ।
য়চ্ছারদাব্জসুষমামান্যে দেবাদিভিঃ প্রার্থ্যে ॥ ১০৪ ॥
সর্বার্থদা হি ভজতাং কটাক্ষধাটী শিবংকরী বাণি ।
চিন্তামণিমিব কলয়তি য়াং হি বিধির্বিদিতমন্ত্রোঽপি ॥ ১০৫ ॥
সুকৃতপরিপাকমানসা ধন্যাস্ত্বামর্চয়ন্তি ননু বাণি ।
অহমপি তদ্বত্কলয়ে ফলপ্রদা ত্বং সমানকল্পাসি ॥ ১০৬ ॥
নিগমবচসাং নিদানং তব পাদাব্জং বতংসয়তু কালে ।
দেবোঽপি দেবদেবো বিজিতজগত্ত্রয়তলে মাতঃ ॥ ১০৭ ॥
অন্তস্তমসো হন্ত্রী পটীয়সী তে কটাক্ষঝরমালা ।
য়া তোরণমাল্যশ্রিয়মাতনুতে বেধসঃ সৌধে ॥ ১০৮ ॥
শৃঙ্গারবিভ্রমবতীং ত্বাং প্রাপ্যৈব ক্রিয়াকালে ।
কলয়তি সৃষ্ট্যাদিমসৌ বিধিঃ শ্রুতিব্যক্তমাহাত্ম্যঃ ॥ ১০৯ ॥
বেধোবদনং কেলীবনমাসাদ্যাম্ব পরময়া হি মুদা ।
ক্রীডসি শুকীব কালে দ্বিজসংঘসমর্চিতাত্মবৃত্তিশ্চ ॥ ১১০ ॥
ধাতুর্মুখমঞ্জূষারত্নং নিগমান্তকেলিবনহংসীম্ ।
পরমাং কলামুপাসে তামম্বাং চিদ্বিলাসঘনবৃত্তিম্ ॥ ১১১ ॥
বাগীশদেবরূপিণি গীষ্পতিমুখদেবসংঘনুতচরণে ।
তব রূপং সূর্যায়ুতদৃশ্যং দর্শয় মম জ্ঞানে ॥ ১১২ ॥
দিব্যজ্ঞানপ্রদমিদমম্ব ত্বদ্রূপমাদরাদ্বাণি ।
কালে দর্শয় কৃপয়া তেন বয়ং প্রাপ্তকার্যসাফল্যাঃ ॥ ১১৩ ॥
অম্বা ত্রিসংধ্যপঠনপ্রবৃত্তিভাজাং ক্রমেণ নাম্নাং তু ।
দ্বাদশকলাবিভেদব্যূহাদিজ্ঞানদা প্রসন্না হি ॥ ১১৪ ॥
মূকোঽপি সত্কবিঃ স্যাদ্ দুরক্ষরাণ্যপি বিধাতৃলিখিতানি ।
সত্ফলদানি সরস্বতি কটাক্ষপূরে য়দি কাপি ॥ ১১৫ ॥
অবলম্বে তামম্বাং পঞ্চাশদ্বর্ণকল্পিতজগত্কাম্ ।
সৃষ্টিস্থিতিসংহারস্থিরোদয়াং বিবিধশাস্ত্ররূপাঢ্যাম্ ॥ ১১৬ ॥
বাণীং দিশতু মনোজ্ঞাং বাণী গতিহসিতকাদম্বা ।
য়া দম্ভাদিবিমুক্তা নাদং ভাব্যং বদন্তি য়দ্রূপম্ ॥ ১১৭ ॥
রাকেন্দুবদনবিম্বা সাম্বা বাণী পুনাতু কৃতিমেনাম্ ।
পরিকলিতভাববন্ধাং রসোজ্জ্বলাং মঙ্গলোত্তুঙ্গাম্ ॥ ১১৮ ॥
লাবণ্যকান্তিসিন্ধুঃ পাদাব্জনতপ্রভাবসংধাত্রী ।
প্রসৃমরতমোনিহন্ত্রী মদ্বাচাং দেবতা চাদ্যা ॥ ১১৯ ॥
জনতানেত্রানন্দং রূপং য়স্যাঃ স্ফুটং ভাতি ।
স্মরণং ত্বজ্ঞানহরং বিশ্বজ্ঞানপ্রদং চ সা জয়তি ॥ ১২০ ॥
সহধর্মিণী বিধাতুর্দারিদ্র্যধ্বংসিনী নিজকটাক্ষৈঃ ।
সাংনিধ্যং জনয়তু মে সুরমুনিনরসংনুতস্বমহিমেয়ম্ ॥ ১২১ ॥
মুখরিতবীণা বাণী বাণীং মে দিশতু নৈজনুতিয়োগ্যাম্ ।
আস্বাদিতশাস্ত্রামৃতলহরীং সদ্যস্তমোনিহন্ত্রীং চ ॥ ১২২ ॥
মণিনূপুরনাদনিভা বাণী ভাতি ত্বদীয়ভক্তমুখে ।
কীর্তির্দিশাসু শুদ্ধির্বপুষি বহুমুখী পরং কালে ॥ ১২৩ ॥
তব পাদস্মরণবশাত্ তাম্যতি তিমিরাবলিশ্চান্তঃ ।
আনন্দলহরিবীচী প্রসর্পতি ক্ষমাতলে হি ভক্তানাম্ ॥ ১২৪ ॥
সংপন্নলিনীভানুং জ্ঞানাব্ধিসুধাকরং হি তব রূপম্ ।
ভক্ত্যা মনসি গৃণন্তো গচ্ছন্তি ব্যোময়ানমারূঢাঃ ॥ ১২৫ ॥
হৃত্তমসাং দীপরুচির্বিধাতৃদয়িতা মমাস্তু পরদৈবম্ ।
ভবতাপমেঘমালা কবিশুকবাসন্তিকশ্রীর্হি ॥ ১২৬ ॥
মম মানসমণিহর্ম্যে বিহরতু বাণ্যাঃ স্বরূপং তু ।
নিগমবচসাং নিগুম্ফৈর্বেদ্যং তদ্বেধসা লাল্যম্ ॥ ১২৭ ॥
সততমভিগম্যরূপা বিবুধবরেড্যা সরস্বতী মাতা ।
মনসি মম সংনিধত্তাং ভূত্যৈ নঃ সর্বতঃ কালে ॥ ১২৮ ॥
মম শিরসি নীচপুণ্যে পুণ্যঘনা বেদমৌলিহর্ম্যা চ ।
কৃতপদবিন্যাসভরা বাণী জয়তীহ শতমখাদিনুতা ॥ ১২৯ ॥
মায়ানিরসনদক্ষা মাতেয়ং সুপ্রসন্না মে ।
লভতে পরমং জ্ঞানং য়দ্ভক্ত্যা পামরোঽপি চ ধরিত্র্যাম্ ॥ ১৩০ ॥
বাণীশ্বরি তব রূপং নামস্মরণং চ পূজনং ভক্ত্যা ।
সিধ্যতি সকলবিভূত্যৈ তত্র হি ভবতীদয়াপ্রসারস্তু ॥ ১৩১ ॥
সফলয়তু নেত্রয়ুগলং হতনতদুরিতা চ সা পরা দেবী ।
কমলজমান্যচরিত্রা সুমনোবাঞ্ছাপ্রদানকৃতদীক্ষা ॥ ১৩২ ॥
পঙ্কজমৃণালতন্তুপ্রতিভটরূপং ক্বচিদ্দৃশ্যম্ ।
কবিকুলবাণীকৈরবশারদচন্দ্রপ্রভাকবলিতং চ ॥ ১৩৩ ॥
নলিনভবগৃহিণি বাণি প্রহ্বানাং সপদি ভক্তানাম্ ।
লুম্পসি মোহং ভবতীস্মরণাদ্বরিবস্যয়া স্তুত্যা ॥ ১৩৪ ॥
কবিকুলকল্পকবল্লীমপাঙ্গলীলাকৃতার্তিশমনাং তাম্ ।
বাণীমন্বহমার্যারাধ্যাং মোক্ষায় নিভৃতমহমীডে ॥ ১৩৫ ॥
সংবিত্সুখস্বরূপামম্বাং বাণীমহর্নিশং মনসি ।
কলয়ে কলিতাপ্রভরপ্রশান্তিকামঃ প্রভাবতীং জয়দাম্ ॥ ১৩৬ ॥
নতপরিপালিনি বাণি ত্রিজগদঘধ্বংসিনি শ্রিতানাং নঃ ।
তব পাদয়ুগং নিগলং ভবতু তমোরাশিদুষ্টহস্তিগণে ॥ ১৩৭ ॥
কামাদিদুর্গ্রহকৃতানর্থনিরাসায় তাবকাপাঙ্গাঃ ।
বাণি জনয়ন্তি নতানাং কৈবল্য খপ্রদানায় ॥ ১৩৮ ॥
তব দর্শনং হি মাতঃ পরমং সংস্কারমাত্তপাপানাম্ ।
কল্যাণসূক্তিকন্দলরসপ্রদং মান্যতে বিবুধৈঃ ॥ ১৩৯ ॥
ধাতুর্বদনসরোজে শ্রুতিসীমনি হৃদি চ ভক্তানাম্ ।
একপদা দ্বিপদা বা রাজতি বাণী জগন্মাতা ॥ ১৪০ ॥
মণিময়কাঞ্চীলসিতা বীণাপুস্তককরারবিন্দা চ ।
নমতাং জাড্যবিধূননধৃতদীক্ষা রাজতে বাণী ॥ ১৪১ ॥
কবলয়তু তাপমস্যাঃ স্মরণং পাদাব্জবন্দনং বাণ্যাঃ ।
ধাতুর্জিহ্বাগ্রতলে নৃত্যন্ত্যাঃ সারসূক্তিরসয়ন্ত্যাঃ ॥ ১৪২ ॥
পদ্মজবদনবিভূষা নিগমশিখোত্তংসপীঠিকা বাণী ।
সকলবিধশাস্ত্ররূপা ভক্তানাং সত্কবিত্বদানপ্রা ॥ ১৪৩ ॥।
গতিজিতমরালগমনা মরালবাহা চ বেধসো দারাঃ ।
শিশিরদয়াসারা সা নমতাং সংতাপহারিণী সহসা ॥ ১৪৪ ॥
স্তনভারসংনতাঙ্গী দরদলিতাম্ভোজলোচনান্তশ্রীঃ ।
সবিধতলে বিবুধবধূপরিচরণাদ্যৈশ্চ তুষ্টচিত্তা সা ॥ ১৪৫ ॥
হরিণাঙ্কবদনবিম্বা পৃথুলনিতম্বা কচাত্তলোলম্বা ।
নিজগতিজিতকাদম্বা সাম্বা পদপদ্মনম্রভক্তকদম্বা ॥ ১৪৬ ॥
পরিহসিতনীলনীরজদেহশ্রীঃ শারদা প্রথমা ।
স্ফটিকমণিভরকান্তিঃ সরস্বতী কীর্ত্যতে চ বিবুধগণৈঃ ॥ ১৪৭ ॥
নাথে দৃঢভক্তিমতী সৃষ্ট্যাদৌ চিত্স্বরূপা চ ।
ধাত্রা সমানভাবা চৈকাসনপূণ্ডরীকমধ্যস্থা ॥ ১৪৮ ॥
প্রীত্যা সরসপুমর্থান্ দদাতি কালে চিদাদিসংধাত্রী ।
সা মে দৈবতমেষা সততনিষেব্যা চ কামদা ভূয়াত্ ॥ ১৪৯ ॥
হরিচরণনলিনয়ুগলে সদৈকতানা হি শারদা জননী ।
পদ্মানীলাদিসখী শ্রুত্যুদ্যানে বিহাররসভরিতা ॥ ১৫০ ॥
ধাতুঃ কুটুম্বিনীয়ং তন্যাত্ কল্যাণসংততিং সততম্ ।
য়া তারুণ্যবিভুষা সমক্রমা ত্রিপুরসুন্দর্যা ॥ ১৫১ ॥
নানাক্ষরাদিমাতৃকগণেডিতা শব্দরূপা চ ।
নাদব্রহ্মবিলাসা বাণী সা মঙ্গলানি নস্তন্যাত্ ॥ ১৫২ ॥
দৃক্কোণবীক্ষণকলানিগমপ্রাভববিধানদা নমতাম্ ।
বিবুধানাং হৃদয়াব্জং য়স্যা বাসস্থলী চ নির্দিষ্টম্ ॥ ১৫৩ ॥
মোহাদিবনকুঠারা য়া নিত্যং সেব্যতে ত্রিদশসংধৈঃ ।
নিত্যপ্রসন্নরূপাং শান্তাং য়ামেব সেবতে বেধাঃ ॥ ১৫৪ ॥
নমতাং য়য়ৈব খণ্ডীক্রিয়তে সুবর্ণদৃষ্টিপুষা ।
য়দ্বীক্ষণেন পুরুষঃ খ্যাতো নৃপসদসি মান্যতে প্রথমম্ ॥ ১৫৫ ॥
য়স্যৈ শ্রোত্রিয়বর্যৈস্ত্রিসংধ্যমধার্দিকং ক্রিয়তে ।
সা মঞ্জুনীতিরূপা বাণীরূপা চ ভণ্যতে নিপুণৈঃ ॥ ১৫৬ ॥
সা ময়ি তন্যাদীক্ষাং বীক্ষাবনদাং সরস্বতী দেবী ।
সংতানকুসুমজৈত্রীং য়ামৈচ্ছত্ প্রাপ্তুমঞ্জসা বেধাঃ ॥ ১৫৭ ॥
মন্দস্মিতমধুরাস্যং কৃপাবলোকং নিরস্তজাদ্যততি ।
ভূয়াদ্ বাণ্যা রূপং পুরঃ করাম্ভোজকলিতবীণাদি ॥ ১৫৮ ॥
বাণ্যাঃ পরং ন জানে দৈবতমন্যদ্ বনে গিরৌ চ পথি ।
গগনে বা সংরক্ষিতনতজনতায়াঃ কৃপারসার্দ্রায়াঃ ॥ ১৫৯ ॥
আস্যেন্দোরবলোকনমম্বায়াঃ পাদপদ্মসেবা চ ।
সর্বশ্রেয়ঃপ্রাপ্ত্যৈ শাস্ত্রজ্ঞৈঃ সুষ্ঠু নির্দিষ্টা ॥ ১৬০ ॥
বাণী হি তাপহন্ত্রী জগতাং কারুণ্যপূর্ণনয়নশ্রীঃ ।
মন্দান্ করোতি বিবুধান্ দ্রাবয়তি শিলাস্ততস্তু কিং চিত্রম্ ॥ ১৬১ ॥
য়স্মিন্ কটাক্ষপূরো ন ভবতি স হি দীনবদনঃ সন্ ।
প্রস্খলিতবাগ্ভার্তো ভিক্ষামটতীহ নিন্দিতো বহুশঃ ॥ ১৬২ ॥
বাণ্যাঃ কটাক্ষপূরস্রজা ত্বলংকৃতনিগালো য়ঃ ।
স হি ভবতি রাজমান্যঃ কান্তাধরমধুরবাগ্বিলাসশ্চ ॥ ১৬৩ ॥
কবিতাভাগ্যবিধাত্রী পরিমলসংক্রান্তমধুপগণকেশা ।
মম নয়নয়োঃ কদা বা সা দেবী কলিতসংনিধানকলা ॥ ১৬৪ ॥
পরচিদ্বিধানরূপা বাণী শ্রুতিসীম্নি রাজতে পরমা ।
মুনিজনমানসহংসী য়া বিহরতি সা শুভায় স্যাত্ ॥ ১৬৫ ॥
জপমালিকয়া বাণীকরধৃতয়া বীণয়া চ কোশেন ।
অহমস্মি নাথবানিহ কিং বাশাস্যং পরং লোকে ॥ ১৬৬ ॥
কৈবল্যানন্দসুখপ্রাপ্ত্যৈ তেজস্তু মন্মহে কিমপি ।
য়দ্ বাঞ্ছিতচিন্তামণিরিতি বাণীতি চ ভুবি খ্যাতম্ ॥ ১৬৭ ॥
কবিকুলসূক্তিশ্রেণীশ্রবণানন্দোল্লসদ্বতংসসুমা ।
সা দেবী মম হৃদয়ে কৃতসাংনিধ্যা কৃতত্রাণা ॥ ১৬৮ ॥
য়স্যা দৃষ্টিবিদূরাঃ কুমতাঃ শ্রুত্যর্থবঞ্চকাঃ শপ্তাঃ ।
ক্রন্দন্তি দিগন্ততটে মোহাদ্যৈর্লুপ্তনয়নাশ্চ ॥ ১৬৯ ॥
সত্পরিষত্সংমান্যা শ্রুতিজীবনদায়িনী জগন্মাতা ।
চতুরাননভাগ্যকলা কৃতসাংনিধ্যা হি রাজতে হৃদয়ে ॥ ১৭০ ॥
কৃতসুকৃতৈঃ সংদৃশ্যা মন্দস্মিতমধুরবদনপদ্মশ্রীঃ ।
মুনিনারদাদিপরিষত্তত্ত্বোপক্রমবিচক্ষণা বাণী ॥ ১৭১ ॥
কবিবাগ্বাসন্তীনাং বসন্তলক্ষ্মীর্বিধাতৃদয়িতা নঃ ।
পরমাং মুদং বিধত্তে কালে কালে মহাভূত্যৈ ॥ ১৭২ ॥
কবিতারসপরিমলিতং করোতি বদনং নতানাং য়া ।
স্তোতুং তাং মে হ্যারাত্ সা দেবী সুপ্রসন্নাস্তু ॥ ১৭৩ ॥
য়স্যাঃ প্রসাদভূম্না নাকিগণাঃ সত্ত্বসংপন্নাঃ ।
ঐন্দ্রীং শ্রিয়মপি মান্যাং পশ্যন্তি ক্ষপিতশত্রুভয়পীডাম্ ॥ ১৭৪ ॥
মান্যং বিধাতৃলোকে তত্তেজো ভাতি সর্বসুরবন্দ্যম্ ।
ব্রহ্মাণ্ডমণ্ডলমিদং য়দ্রূপং য়ত্র চাক্ষরগতিশ্চ ॥ ১৭৫ ॥
জননি তরঙ্গয় নয়নে ময়ি দীনে তে দয়াস্নিগ্ধে ।
তেন বয়ং কৃতার্থা নাতঃ পরমস্তিঃ নঃ প্রার্থ্যম্ ॥ ১৭৬ ॥
বাণি বিধাতুঃ কান্তে স্তোতুং ত্বামাদরেণ কিং বাচ্যম্ ।
ভাসি ত্বমেব পরমং দৈবতমিত্যেব জানামি ॥ ১৭৭ ॥
কবলিততমোবিলাসং তেজস্তন্মন্মহে মহোদারম্ ।
ফলিতসুমনোঽভিলাষং বাণীরূপং বিপঞ্চিকোল্লসিতম্ ॥ ১৭৮ ॥
পদ্মসনসুকৃতকলাপরিপাকোদয়মপাস্তনতদোষম্ ।
সরসজ্ঞানকবিত্বাদ্যনন্তসুকৃতং বিরাজতে তেজঃ ॥ ১৭৯ ॥
নিজনাথবদনসিংহাসনমারূঢামুপাস্মহে বাণীম্ ।
য়া কৃত্রিমবাগ্গুম্ফৈর্বিরচিতকেলির্ধিনোতি বিধিমাদ্যম্ ॥ ১৮০ ॥
সুজনানন্দকরী সা জনয়ন্তী সর্বসংপদং ধাতুঃ ।
ভক্তেষু তাং নয়ন্তীমন্বহমহমাদ্রিয়ে গিরাং দেবীম্ ॥ ১৮১ ॥
করুণাকটাক্ষলহরী কামায়াস্তু প্রকামকৃতরক্ষা ।
বাণ্যা বিধাতৃমান্যা সত্সুখদানে দিশি খ্যাতা ॥ ১৮২ ॥
বিসরো মহোত্সবানাং বিরিঞ্চিনয়নাবলেরিয়ং মাতা ।
প্রিয়কার্যসিদ্ধিদাত্রী জগতীরক্ষাধুরংধরা জয়তি ॥ ১৮৩ ॥
বিবুধাভিগম্যরূপা হংসাবলিসেবিতা গিরাং দেবী ।
গঙ্গেব কনতি কালে পরিকম্পিতশিবজটাকোটিঃ ॥ ১৮৪ ॥
নৌকাং ভবাম্বুরাশেরজ্ঞানধ্বান্তচন্দ্রিকাং বাণীম্ ।
কলয়ে মনসি সদাহং শ্রুতিপঞ্জরশারিকাং দেবীম্ ॥ ১৮৫ ॥
ভবতাপারণ্যতলে জহ্নুসুতা শারদা দেবী ।
জ্ঞানানন্দময়ী নঃ সংপত্সিদ্ধ্যৈ প্রতিক্ষণং জয়তু ॥ ১৮৬ ॥
মত্তগজমান্যগমনা মধুরালাপা চ মান্যচরিতা সা ।
মন্দস্মেরমুখাব্জা বাণী মম হৃদয়সারসে লসতু ॥ ১৮৭ ॥
রক্ষণচণৌ চ বাণ্যাঃ পাদৌ বন্দে মনোজ্ঞমণিনাদৌ ।
য়ত্সেবনেন ধন্যাঃ পুরুহূতাদ্যা দিশাং নাথাঃ ॥ ১৮৮ ॥
ধাতুর্ধৈর্যকৃপাণী বাণী সুরবৃক্ষকুসুমমৃদুবেণী ।
শুকবাণী নুতবাণী কবিকুলমোদায় জয়তি মৃদুবাণী ॥ ১৮৯ ॥
কল্যাণৈকনিকেতনমস্যা রূপং সদা স্ফুরতু চিত্তে ।
মানসকালুষ্যহরং মধুমথনশিবাদিবহুমতোত্কর্ষম্ ॥ ১৯০ ॥
মুনিজনমানসরত্নং চিরত্নমেতদ্বিধাতৃসুকৃতকলা ।
বিনতজনলোচনশ্রীকর্পূরকলা পরা জয়তি ॥ ১৯১ ॥
ধৃতসুমমধুপক্রীডাস্থানায়িতকেশভারায়ৈ ।
নম উক্তিরস্তু মাত্রে বাগ্জিতপীয়ূষধারায়ৈ ॥ ১৯২ ॥
বালকুরঙ্গবিলোচনধাটীরক্ষিতসুরাদিমনুজানাম্ ।
নয়নয়ুগাসেব্যং তদ্ভাতীহ ধরাতলে তেজঃ ॥ ১৯৩ ॥
কুশলবিধয়ে তদস্তু শ্রুতিপাঠরতাদৃতাত্মবহুকেলিঃ ।
কবলিতপদনতদৈন্যং তরুণাম্বুজলোচনং তেজঃ ॥ ১৯৪ ॥
বালমরালীগত্যৈ সুরগিরিকন্যাদিমহিতকলগীত্যৈ ।
বিরচিতনানানীত্যৈ চেতো মে স্পৃহয়তে বহুলকীর্ত্যৈ ॥ ১৯৫ ॥
বিনমদমরেশসুদতীকচসুমমকরন্দধারয়া স্নিগ্ধম্ ।
তব পাদপদ্মমেতত্ কদা নু মম মূর্ধ্নি ভূষণং জননি ॥ ১৯৬ ॥
কমলজপরতন্ত্রং তদ্গততন্দ্রং বস্তু নিস্তুলমুপাসে ।
তেনৈবাহং ধন্যো মদ্বংশ্যা নিরসিতাত্মতাপভরাঃ ॥ ১৯৭ ॥
জ্ঞানামৃতসংধাত্রী ভবাব্ধিসংতরণপোত্রনামাদিঃ ।
বাণী বাচাং লহরীমবন্ধ্যয়ন্তী সুরাদিনুতচরিতা ॥ ১৯৮ ॥
কারুণ্যপূর্ণমেতদ্ বাণীরূপং সদা কলয়ে ।
য়দ্ভজনাদ্ দেবানামপি সংবিদ্ ভাতি কার্যকালেষু ॥ ১৯৯ ॥
ধীপদ্মপীঠমাস্তে সা বাণী কাঙ্ক্ষিতানি কলয়ন্তী ।
য়া ঘনকৃপাস্বরূপা সংকীর্ত্যা সর্বদেবনুতা ॥ ২০০ ॥
তব পাদপদ্মবিসৃমরকান্তিঝরীং মনসি কলয়ংস্তু ।
নিরসিতনরকাদিভয়ো বিরাজতে নাকিসদসি সুরমান্যঃ ॥ ২০১ ॥
কুচয়ুগলনম্রগাত্রং পবিত্রমেতদ্ ভজে তেজঃ ।
ধাতুরপি সর্বদেবৈর্যন্নির্দিষ্টং হু ভদ্রায় ॥ ২০২ ॥
কৃতনতপদবাগ্ধাটী চেটীভূতামরেশমহিষী নঃ ।
কটিকৃতমনোজ্ঞশাটী পাটীররসার্দ্রনৈজতনুকোটী ॥ ২০৩ ॥
পদ্মভবপুণ্যকোটী হর্ষিতকবিবৃন্দসূক্তিরসধাটী ।
মুখলসিতসরসবাটী বিলসতু মম মানসে কৃপাকোটী ॥ ২০৪ ॥
জ্ঞানপরাক্রমকলিকা দিশি দিশি কিন্নরসুগীতনিজয়শসঃ ।
ধন্যা ভান্তি হি মনুজাঃ য়দ্বীক্ষালববিশেষতঃ কালে ॥ ২০৫ ॥
সুরজনপালনদক্ষা প্রশান্তবীক্ষা নিরস্তরিপুপক্ষা ।
মোক্ষার্থিভিঃ শ্রিতা সা লাক্ষারসলসিতপাদভাগ্ ভাতি ॥ ২০৬ ॥
কুঙ্কুমভররুচিরাঙ্গী ভাতি কৃশাঙ্গী গিরাং দেবী ।
ধাতুরপি জ্ঞানপ্রদমস্যা রূপং বদন্তি বিবুধেশাঃ ॥ ২০৭ ॥
বাণি নতিমম্ব নিত্যং করবাণি হি চিত্সুখাবাপ্ত্যৈ ।
তাদৃক্ত্বদীয়করুণাবীক্ষণতো গীষ্পতিশ্চ সুরমান্যঃ ॥ ২০৮ ॥
কল্যামি নতিমনন্তাং কালে কালে শুভপ্রাপ্ত্যৈ ।
ধাতুঃ সুকৃতোল্লাসং করধৃতবীণাদিকং চ য়দ্রূপম্ ॥ ২০৯ ॥
কমলাসনদয়িতা সা লসতু পুরোঽস্মাকমাদরকৃতশ্রীঃ ।
য়ত্প্রণমনাজ্জনানাং কবিতোন্মেষঃ সদীডিতো ভবতি ॥ ২১০ ॥
পরসংবিদাত্মিকা সা মহিষী ধাতুঃ কলাবতী বাণী ।
শিশিরীকরোতি তপ্তান্ করুণারসদিগ্ধনেত্রপাল্যা নঃ ॥ ২১১ ॥
ধাতৃমনোরথপাত্রং সংতপ্তস্বর্ণকাম্যনিজগাত্রম্ ।
আশ্রিতকমলজগোত্রং রক্ষিতনতবাহুচ্ছাত্রম্ ॥ ২১২ ॥
কবিকুলজিহ্বালোলং পিতামহাদৃতমনোজ্ঞনিজলীলম্ ।
নিরসিতনতদুষ্কালং বন্দে তেজঃ সদালিনুতশীলম্ ॥ ২১৩ ॥
মন্দানামপি মঞ্জুলকবিত্বরসদায়িনী জননী ।
কাপি করুণাময়ী সা লসতু পুরস্তাত্ সদাস্মাকম্ ॥ ২১৪ ॥
নিস্তুলপদসংপ্রাপ্ত্যৈ ভূয়ো ভূয়ো নমাংসি তে বাণি ।
দীপকলাময়ি চান্তঃস্মরণং ধাতুঃ কুটুম্বিন্যৈ ॥ ২১৫ ॥
মায়ানিরাসকামো বন্দে বাণ্যাঃ পদাম্ভোজম্ ।
সিদ্ধমনোরথশতকা য়দ্ভজনেনার্থিনঃ কালে ॥ ২১৬ ॥
সততং বদ্ধাঞ্জলিপুটুমুপাস্মহে তচ্ছুভপ্রদং তেজঃ ।
য়ত্কমলজনয়নানাং প্রমোদপীয়ূষলহরিকামোদম্ ॥ ২১৭ ॥
দিবি বা ভুবি দিক্ষু জলে বহ্নৌ বা সর্বতো বাণি ।
জন্তূনাং কিল রক্ষা ত্বধীনা কীর্ত্যতে বিবুধৈঃ ॥ ২১৮ ॥
ভারতি ভবতাপার্তান্ পাহি কটাক্ষাঙ্কুরৈঃ শীতৈঃ ।
পরমনন্দবিধাতৃন্ য়ানেব স্তৌতি পদ্মবাসোঽপি ॥ ২১৯ ॥
কুলদৈবতমস্মাকং তত্তেজঃ কুটিলকুন্তলং কিমপি ।
করধৃতপুস্তকবীণং কলয়ে কামাগমোদয়ং ধাতুঃ ॥ ২২০ ॥
পরমানন্দধনং তদ্ধাতুরপি ব্রহ্মতত্ত্বরসদায়ি ।
আব্রহ্মকীটনৃত্যত্স্ববৈভবং জয়তি শারদারূপম্ ॥ ২২১ ॥
বিবুধজনমোদজননী জননী নঃ সা বিধেঃ পত্নী ।
মৃদুসংচারবিলাসৈঃ শুভংকরী ভবতু সংততং কালে ॥ ২২২ ॥
সরসমনোজ্ঞবিলাসৈঃ স্ববশে কৃত্বা মনো বিধের্বাণী ।
সৃষ্ট্যাদৌ শুভলেখাকরী নৃণাং মস্তকে মাতা ॥ ২২৩ ॥
প্রকৃতিমৃদুলং পদাব্জং বাণীদেব্যা মদীয়চিত্ততটে ।
কামাদিসূচিনিচিতে কথং স্থিতিং প্রাপ্নুয়াত্ কালে ॥ ২২৪ ॥
নিখিলচরাচররক্ষাং বিতন্বতী পদ্মজপ্রিয়া দেবী ।
মম কুলদৈবতমেষা জয়তি সদারাধ্যমান্যপদকমলা ॥ ২২৫ ॥
কুশলসমৃদ্ধ্যৈ ভূয়াদম্বা সা শারদা দেবী ।
জনিরক্ষণাদিলীলাবিহারভাঙ্নিগমসৌধদীপকলা ॥ ২২৬ ॥
বাচালয়তি কটাক্ষৈর্জডং শিলামল্পজন্তুং বা ।
য়া বাণী সা শরণং ভবে ভবে প্রার্থ্যে শ্রিয়ঃপ্রাপ্ত্যৈ ॥ ২২৭ ॥
য়দি হি প্রসাদভূমা বাণ্যাস্তত্রৈব সা হরেঃ কান্তা ।
পরিলসিত ( … incomplete … ) নিত্যবাসরতা ॥ ২২৮ ॥
সনকসনন্দনবন্দ্যে কান্তে পরমেষ্টিনঃ শ্রিয়ঃপ্রাপ্ত্যৈ ।
বাণি ত্বাং নৌমি সদা ভব প্রসন্না বিপ`ন্চিলসিতকরে ॥ ২২৯ ॥
বাণি বিপঞ্চীকলরবরসিকে গন্ধর্বয়োষিদভিবন্দ্যে ।
তব চরণং মম শরণং ভববারিধিসুতেমম্ব কলয়ামি ॥ ২৩০ ॥
বাণি কদাহং লপ্স্যে চরণাম্ভোজং ত্বদীয়মিদমারাত্ ।
নিজমণিনূপুরনাদস্পৃহণীয়বচঃপদং কলিতভক্তেঃ ॥ ২৩১ ॥
শ্রুতিপূতমুখমনোহরলাবণ্যকুসুমমৃদুশরীরেয়ম্ ।
নিজকরুণাপাঙ্গসুধাপূরণকৃতবৈভবা ভাতি ॥ ২৩২ ॥
পরিসরনতবিবুধালীকিরীটমণিকান্তিবল্লরীবিসরৈঃ ।
কৃতনীরাজনবিধি তে মম তু শিরোভূষণং হি পদয়ুগলম্ ॥ ২৩৩ ॥
প্রেমবতী বিধিভবনে হংসগতির্হংসয়ানকৃতচারা ।
বাচামকৃত্রিমানাং স্থৈর্যবিধাত্রী মহেশানী ॥ ২৩৪ ॥
আনন্দরূপকোটীমম্বাং তাং সংততং কলয়ে ।
সংবিদ্রূপা য়া কিল বিধাতৃগেহে শ্রুতিশ্রিয়ং ধত্তে ॥ ২৩৫ ॥
কমলজনেত্রমহোত্সবতারুণ্যশ্রীর্নিরস্তনতশত্রুঃ ।
ললিতলিকুচাভকুচভরয়ুগলা দৃগ্বিজিতহরিণসংদোহা ॥ ২৩৬ ॥
কারুণ্যপূর্ণনয়না কলিকল্মষনাশিনী চ সা বাণী ।
মুখজিতশারদকমলা বক্ত্রাম্ভোজে সদা স্ফুরতু মাতা ॥ ২৩৭ ॥
কমলসুষমানিবাসস্থানকটাক্ষং চিরায় কৃতরক্ষম্ ।
রক্ষোগণভীতিকরং তেজো ভাতি প্রকামমিহ মনসি ॥ ২৩৮ ॥
কমলজতপঃফলং তন্মুনিজনহৃদয়াব্জনিত্যকৃতনৃত্তম্ ।
করুণালোলাপাঙ্গং তত্তেজো ভাতু মম মুখাম্ভোজে ॥ ২৩৯ ॥
ভাগ্যং বিধিনয়নানাং সংসৃতিতাপজ্বরাদিতপ্তানাম্ ।
ভেষজমেতদ্রূপং কলাগ্রহং মন্যতে দেব্যাঃ ॥ ২৪০ ॥
জননি কদা বা নেষ্যাম্যহমারাদর্চিতত্বদীয়পদঃ ।
নিমিষমিব হন্ত দিবসান্ দৃষ্ট্বা ত্বামাদরেণ কল্যাণীম্ ॥ ২৪১ ॥
মঞ্জুলকবিতাসংততিবীজাঙ্কুরদায়িসারসালোকা ।
জননি তবাপাঙ্গশ্রীর্জয়তি জগত্ত্রাণকলিতদীক্ষেয়ম্ ॥ ২৪২ ॥
অম্ব তবাপাঙ্গশ্রীরপাঙ্গকেলীশতানি জনয়ন্তী ।
ধাতুর্হৃদয়ে জয়তি ব্রীডামদমোদকামসারকরী ॥ ২৪৩ ॥
সর্বজগন্নুতবিভবে সংততমপি বাঞ্ছিতপ্রদে মাতঃ ।
অধুনা ত্বমেব শরণং তেনাহং প্রাপ্তজন্মসাফল্যঃ ॥ ২৪৪ ॥
শান্তিরসসর্বশেবধিমম্বাং সেবে মনোরথাবাপ্ত্যৈ ।
য়ামারাধ্য সুরেশাঃ স্বপদং প্রাপুর্হি তদ্রক্ষম্ ॥ ২৪৫ ॥
কুলজা ভার্যা কীর্তির্দানং পুত্রাদয়ো য়ে চ ।
সিধ্যন্তি তে হি সর্বে য়স্মৈ বাণী প্রসন্না সা ॥ ২৪৬ ॥
কা ক্ষতিরম্ব কটাক্ষে ন্যস্তে সতি ময়ি বিরিঞ্চিবরপত্নি ।
গঙ্গাশুনকন্যায়ান্মহতী মম বৃদ্ধিরীরিতা নিপুণৈঃ ॥ ২৪৭ ॥
অবিরলদয়ার্দ্রলোচনসেবনয়া ধূততাপা হি ।
প্রতিকল্পং সুরসংঘাস্ত্বামভজন্ নুতিনতিপ্রমুখৈঃ ॥ ২৪৮ ॥
দীনানাং চ কবীনাং বাণি ত্বং কামধেনুরসি মাতঃ ।
সিদ্ধিস্তেষামতুলা সুরমান্যা তেন সংকলিতা ॥ ২৪৯ ॥
সকলজগতাং হি জননীং বাণি ত্বাং সংততমুপাসে ।
শ্রুতিসুদতীভূষামণিমখিলার্থপ্রাপ্ত্যৈ লোকে ॥ ২৫০ ॥
ধাতুঃ কুটুম্বিনী ত্বং সন্মঙ্গলদায়িনী স্বমাহাত্ম্যাত্ ।
শ্বশ্রূশ্বশুরমুখাদিপ্রীণনচতুরা চ ভাসি নিগমকলা ॥ ২৫১ ॥
মুখবিজিতচন্দ্রমণ্ডলমিদমম্ভোরুহবিলোচনং তেজঃ ।
ধ্যানে জপে চ সুদৃশাং চকাস্তি হৃদয়ে কবীশ্বরাণাং চ ॥ ২৫২ ॥
য়স্মৈ প্রসন্নবদনা সা বাণী লোকমাতা হি ।
তস্য সহসা সহস্রং লাভঃ স্যাদ্ বান্ধবাঃ সুখিনঃ ॥ ২৫৩ ॥
তাপহররসবিবর্ষণধৃতকুতুকা কাপি নীলনলিনরুচিঃ ।
কাদম্বিনী পুরস্তাদাস্তাং নঃ সংততং জননী ॥ ২৫৪ ॥
পদ্মাক্ষনাভিপদ্মজদয়িতে লোকাম্ব শারদেতি সদা ।
তব নামানি জপন্ সন্ ত্বদ্দাসোঽহং তু মুক্তয়ে সিদ্ধঃ ॥ ২৫৫ ॥
অম্বাপ্রসাদভূম্না নরো হি ভুঙ্ক্তে সুখানি বিবিধানি ।
স্মরে বিজয়ঃ কবিতাধনলক্ষ্ম্যাদের্বিলাসলীলাদিঃ ॥ ২৫৬ ॥
তীরং সংসৃতিজলধেঃ পূরং কমলজবিলোচনপ্রীতেঃ ।
সারং নিগমান্তানাং দূরং দুর্জনততের্হি তত্তেজঃ ॥ ২৫৭ ॥
অপি দাসকুলে জাতঃ কটাক্ষভূম্না বিধাতৃমুখপত্ন্যাঃ ।
জ্ঞানী ভববারাশিং তরতি চ রাজ্যশ্রিয়ং ভুঙ্ক্তে ॥ ২৫৮ ॥
সত্কৃতদেশিকপাদাম্বুজয়ুগলোঽহং নমামি বাণি ত্বাম্ ।
ত্বং তু গুরুমূর্তিরুক্তা কালে কালে চ কাঙ্ক্ষিতবিধাত্রী ॥ ২৫৯ ॥
জ্ঞানানন্দমুখাদীনপবর্গং বা দদাসি ভক্তেভ্যঃ ।
অত এবানন্যগতিস্ত্বাং বিধিপত্নীং প্রপদ্যেঽহম্ ॥ ২৬০ ॥
ত্বয়ি বিন্যস্তভরাণাং ন হি চিন্তা জায়তে নৃণাং কাপি ।
পরমানন্দাদিকলাস্ফূর্তির্দিবিষদ্গণেন সংমান্যা ॥ ২৬১ ॥
সুমশরসাম্রাজ্যকলামঙ্গলবিধিরেখিকা বাণী ।
ধাতুরপি চিত্তবৃত্তিস্থৈর্যং ত্বন্যাদৃশং কুরুতে ॥ ২৬২ ॥
সা ধেনুশ্চিন্তামণিরপি বৃক্ষঃ সংপদাং প্রদায়িন্যঃ ।
অম্ব ত্বমেব কালে ভসি জ্ঞানপ্রদা ব্যপোহ্য তমঃ ॥ ২৬৩ ॥
মনসো নৈর্মল্যপ্রদমস্যাঃ সেবে কটাক্ষমহমারাত্ ।
য়ঃ কুরুতে জনতাং তাং হতমায়াং মধুরাময়োধ্যাং চ ॥ ২৬৪ ॥
শরদিব হংসকুলেড্যা জ্যোত্স্নেব জনার্তিহারিণী বাণ্যাঃ ।
জয়তি হি কটাক্ষরেখা দীপকলেব প্রকামহততিমিরা ॥ ২৬৫ ॥
পঙ্কজভববদনমণিং পরবিদ্যাদেবতাং বাণীম্ ।
নিত্যং য়জতাং জপতাং ন হি তুল্যোঽস্মিন্ ক্ষমাতলে কশ্চিত্ ॥ ২৬৬ ॥
বাণী নিজবাণীভী রচয়তি নুতিমাত্তবীণয়া কালে ।
ধাতুঃ প্রসাদহেতোঃ পতিব্রতালক্ষণৈরন্যৈঃ ॥ ২৬৭ ॥
আনন্দয়তি বিলসৈরম্বা পদ্মাসনং নিজং দেবম্ ।
তেনৈব তুষ্টহৃদয়ঃ শুভাক্ষরাণ্যাদরাল্লিখতি মৌলৌ ॥ ২৬৮ ॥
মম মানসদুর্মদগজমপারতাপাটবীষু ধাবন্তম্ ।
বিরচয়্য মুদিতচিত্তং কুরু বাণি ত্বত্পদাব্জকৃতহস্তম্ ॥ ২৬৯ ॥
কমলাসনধৈর্যমহীধরকুলিশস্তে কটাক্ষ এবায়ম্ ।
কবিকুলময়ূরকাদম্বিনীবিলাসো মুদেঽস্তু সততং নঃ ॥ ২৭০ ॥
গুরুবরদনাম্ভোজে নৃত্যন্তী শারদা দেবী ।
মধুরতরশ্লোকনিভা মণিনূপুরনিনদসংততির্ভ্তি ॥ ২৭১ ॥
কো বা ন শ্রয়তি বুধঃ শ্রেয়োঽর্থী তামিমাং বাণীম্ ।
য়াং পঙ্কজাক্ষনাভিজসধর্মিণীমর্চয়ন্তি সুরনাথাঃ ॥ ২৭২ ॥
মুষিতপয়োজমৃদিম্না চরণতলেনাত্র মানসে বাণী ।
পরিহরতু পাপরাশিং সুরৌঘসংমানিতেন কালে মে ॥ ২৭৩ ॥
য়াথার্থ্যজ্ঞানকলাপ্রাপ্ত্যৈ ত্বাং শারদাং বন্দে ।
সেবাফলং প্রয়চ্ছ প্রসীদ পরমেশি বল্লভে ধাতুঃ ॥ ২৭৪ ॥
নিগমান্তসারমর্থং বোধয়সি ত্বং গুরূন্ প্রকল্প্য ভুবি ।
সৈষা মে জ্ঞানঘনা বাণী নিত্যং প্রসন্নাসি ॥ ২৭৫ ॥
মন্দারকুসুমমদহরমন্দস্মিতমধুরবদনপঙ্করুহা ।
হৃদ্যতমনিত্যয়ৌবনমণ্ডিতগাত্রী বিরাজতে বাণী ॥ ২৭৬ ॥
সৌভাগ্যসূচকাভী রেখাভির্ভূষিতং সৌরৈর্বন্দ্যম্ ।
অম্বাচরণপয়োজং বতংসয়ন্ প্রাপ্তসংমোদঃ ॥ ২৭৭ ॥
দ্বিজগণপূজ্যং নিত্যং নিরস্তজাড্যং ত্বদীয়পাদয়ুগম্ ।
ক্ষণমপি বা সাংনিধ্যং ভজতু মদীয়ে হৃদি স্বৈরম্ ॥ ২৭৮ ॥
নতদেবরাজমকুটীমণিঘৃণিপরিচুম্বিতাঙ্ঘ্রিকমলা নঃ ।
কমলাসনস্য দয়িতা তন্যাদন্যাদৃশী শ্রিয়ং ভজতাম্ ॥ ২৭৯ ॥
বাণী শ্রিতকাদম্বা দম্ভাদিরিপূন্ নিরস্য নঃ কালে ।
ক্ষেমমবন্যাং তন্যাত্ পদে পরে দেবসংঘপরিসেব্যে ॥ ২৮০ ॥
পঙ্কজভবসাম্রাজ্যস্থিরলক্ষ্মীশ্চপাণ্ডরতনুশ্রীঃ ।
নতমানবসুকৃতকলাপরিপাটী ভাতি সকলগুণপেটী ॥ ২৮১ ॥
মুখবিজিতচন্দ্রবিম্বা সাম্বা কাদম্বসেব্যপদকমলা ।
কমলাসনগৃহলক্ষ্মীর্লক্ষ্মীং পুষ্ণাতু শারদা দেবী ॥ ২৮২ ॥
মুরমথনস্যেব রমা শংভোরিব সকলভূধরেন্দ্রসুতা ।
বাণি বিধাতুঃ সদনেঽনুরূপদাম্পত্যসংপদা ভাসি ॥ ২৮৩ ॥
বাণি তব দেহকান্ত্যা কটাক্ষলহরী তু সংয়ুতা কালে ।
ধত্তে কামপি শোভাং সুরস্রবন্ত্যেব সংগতা য়মুনা ॥ ২৮৪ ॥
মধুরাসেচনদৃষ্ট্যা মাং পায়াদাপদো মুহুর্বাণী ।
আশ্রিততাপবিভেত্রীত্যেবং য়ামামনন্তি সূরিবরাঃ ॥ ২৮৫ ॥
অজ্ঞাতকোপপূরা য়স্যা দৃষ্টিঃ কৃতাদরা ভজতাম্ ।
সৈষা বিহসিতপৌরংদরলক্ষ্মীং সংপদং দদ্যাত্ ॥ ২৮৬ ॥
বালকুরঙ্গবিলোচনমীষত্স্মিতমধুরমাননং বাণ্যাঃ ।
মণিময়তাটঙ্কমণীবিলাসি ভূয়ান্মুদেঽস্মাকম্ ॥ ২৮৭ ॥
মুনিজনমানসহংসীং শ্রুতিততিপঞ্জরশুকীং মহাদেবীম্ ।
নৌমি স্নুষাং রমায়াঃ মাহেশ্বরমহিতসত্পদপ্রাপ্ত্যৈ ॥ ২৮৮ ॥
ধাতুঃ সৌধাঙ্গণকৃতচঙ্ক্রমণাং শারদাং নৌমি ।
মত্তমতঙ্গজগমনাং পরিপন্থিজয়ায় সুকৃতিসংদৃশ্যাম্ ॥ ২৮৯ ॥
বাগীশমুখা দেবা য়স্যাঃ প্রসদনবলদ্ধি বিজয়ন্তে ।
পরিপালিতভক্তগণা য়দ্ধ্যানোল্লসদপারপুলকান্তাঃ ॥ ২৯০ ॥
নৈসর্গিকবাক্ষ্রেণীকেলিবনমমলভূষণং ধাতুঃ ।
বদনানামিয়মম্বা জয়তু চিরং কামবর্ষিণী ভজতাম্ ॥ ২৯১ ॥
কলয়ামি হৃদয়মেতত্ পাদাব্জে শারদাদেব্যাঃ ।
প্রাপ্তারিষট্কবিজয়ং তত্ত্বধনং কলিতশারদাধ্যানম্ ॥ ২৯২ ॥
পাদারবিন্দনমনপ্রভাবপরিকলিতদেবসারূপ্যাঃ ।
পরমানন্দনিমগ্নাঃ সুধিয়ো ভান্তি ক্ষমাবলয়ে ॥ ২৯৩ ॥
ললিতবিধাতৃরূপং পালিতলোকত্রয়ং চ তত্ তেজঃ ।
সকলাগমশিখরকলাপরতত্ত্বং শারদারূপম্ ॥ ২৯৪ ॥
ধ্যানৈর্যোগৈশ্চ জপৈর্যত্ সেব্যং পরমমাদিষ্টম্ ।
তন্নশ্চকাস্তু হৃদয়ে বিশ্বজনীনং হি ভক্তানাম্ ॥ ২৯৫ ॥
ভাগীরথীব বাণী তব নুতিরূপা বিরাজতে পরমা ।
ইহ মাতর্যদ্ভজনং সর্বেষাং সর্বসংপদাং হেতুঃ ॥ ২৯৬ ॥
সংততমধুরালাপৈর্লালিতবিধিবৈভবৈরমেয়কলৈঃ ।
শ্রেয়ঃপ্রদানদীক্ষিতকটাক্ষপাতৈর্মহাতত্ত্বৈঃ ॥ ২৯৭ ॥
খেলল্লোলম্বকচৈঃ কুচভরনম্রৈঃ পুরংধ্রিগুণপূর্ণৈঃ ।
আশ্রিতসংবিত্পীঠৈরমরেশবধূকরাদৃতচ্ছত্রৈঃ ॥ ২৯৮ ॥
বীণাপুস্তকহস্তৈর্বিধিভাগ্যৈরস্তু মম তু সারূপ্যম্ ।
সংবিদ্ধনৈশ্চ বাণীরূপৈরেতৈর্দয়াসারৈঃ ॥ ২৯৯ ॥
মাতঃ কথং নু বর্ণ্যস্তব মহিমা বাণি নিগমচয়বেদ্যঃ ।
ইতি নিশ্চিত্য পদাব্জং তব বন্দে মোক্ষকামোঽহম্ ॥ ৩০০ ॥
ত্বামম্ব বালিশোঽহং ত্বচমত্কারৈর্গিরাং গুম্ভৈঃ ।
অয়থায়থক্রমং হি স্তুবন্নপি প্রাপ্তজন্মসাফল্যঃ ॥ ৩০১ ॥
ইতি শ্রীশারদাত্রিশতী সমাপ্তা
– Chant Stotra in Other Languages -Sharada Trishati:
300 Names of Sharada Trishati in Sanskrit – English – Bengali – Gujarati – – Kannada – Malayalam – Odia – Telugu – Tamil